تجميد قسم عمارة (مفيش اولى عمارة السنة دى )

بالنسبة لطلبة عمارة فأكترهم مغترب ومش موجود في أسوان وكلهم جايين بعد العيد ( وأنا واحد منهم ) ، علشان كده مضطرين نتكلم على المنتدى لحد ما نوصل إن شاء الله ، حنحاول نفوق الباشمهندسين النايمين على المنتدى دلوقتي علشان نتجمع مع بعض بعد كده ونتكلم مع البشر ونعمل اللي ربنا يقدرنا عليه ، وياريت يساعدنا اللي يقدر يساعد من اخوانا الباشمهندسين أو الدكاترة أو المعيدين
، ولازم يبقى واضح إن المواقف الفردية مش هيا اللي حترجع القسم ، تجمعنا هوا اللي حيساعدنا ( بعد ربنا ) وده هي مهمتي ومهمة الزملاء حالياً لحد ما نوصل أسوان .

انا عايز افهم حاجة هما دلوقتى عايزين يقفلوا القسم بدل مايلاقوا حل لمشكلة عدم وجود دكاترة فى القسم ده على الاقل علشان خاطر الطلبة اللى لسه ماتخرجوش وبعد كده عايزين يقفلوا دلوقتى مدفعة بكالريوس عددهم خمسة والناس رضييت بكده ماتقفلش ساعتها ليه وبصوا لمصلحة الطلبة دول على اساس ان عددهم صغير وتوزعوا على اقسام تانية واتقفل القسم /جايين دلوقتى لما فى اقبال على القسم عايزين يقفلوا هو المفروض يحصل تطوير ولا يحصل تدهور علشان كده للاسف مفيش اى مجال للمقارنة بينا وبين قسم عمارة فى اى جامعة تانية بالرغم ان فى طلبة موهوبة جدا فى القسم بتمنى ان طلبة اولى عمارة يكون ليهم موقف واحنا طلبة عمارة هنكون معاهم علشان القسم ده ميتقفلش ويعانوا زى مااحنا بنعانى

ع العموم بالنسبه للناس اللى عاوزه تشتكى فى مواضيع ارجو زيارته

[ندعوك للتسجيل في المنتدى أو التعريف بنفسك لمعاينة هذا الرابط]

لو سمحتو عاوز اعرف مين اللى بيعدل على مواضيعى ؟؟؟؟؟؟؟؟


ما هو انا مش دمى يتحرق واقعد افكر اكتب ايه وييجى واحد يعدل على مزاجو اللى عندو مشكله

من مواضيعى ياريت يبلغنى

مش حكايه مزاجو ولا حاجه يا بشمهندس اكيد ايلي بيعدل ردودك عارف انه ده الصح

وممكن تكون ف ردودك حاجه مخالفه فعدلها حفاظا علي سمعه المنتدي

متهيالي دي حاجه متزعلش كل واحد فينا معرض انه ردوده تتعدل و دي حاجه عادي

ممكن طلب ياجماعه؟؟؟
قولو للمسؤولين اللي في الكليه اللي قررو يقفلو القسم
انتم مارضيتوش تجيبو معيدين ودكاتره وتدفعولهم رواتب لدفعه مثلا هيكون فيها بالكتير حتى 25 طالب
طيب دلوقتي لو زي مابنسمع ان دفعه اولى هتبقى من الباقيين بس وهما سبعه تقريبا ... دول ايه وضعهم؟؟
ياخدوها منازل؟ ولا ايه بالظبط عشان نفهم
والله اللي بيحصل ده تهريج
انا بقى هشد حيلي السنادي (انا مع الباقيين للعلم) فهشد حيلي السنادي عشان اطلع الاول ع الدفعه .. يافرحتي

ياجماعه انا كتبت رد في قسم مقترحات لتطوير الكليه ... مكن تقروه وتقولولي ايه ردكم او ايه رايكم ... انتم برضو طلبه زينا وحاسين بينا ... وكل سنه وانتم طيبين

هو فعلا في طلبه معاهم ماده او مادتين من اعدادي والباقي من اولى ... برضو ماده او مادتين
اغلب الطلبه على مااعتقد اصلا كل اللي شايلينهم خمس مواد بالكتير الا طالب واحد على مااعتقد شايل اكتر من خمسه

ياخوانا المفروض اللي كتبوا الرغبة الأولى عمارة والطلبة المحولين عشان يدخلوا القسم المفروض يبقى ليهم موقف ان شاء الله بعد العيد عشان احنا مش هنسيب مستقبلنا يضيع في قرارت عشوائية والحل اذا كانت الكلية المحترمة دي مش عارفة تصرف عالقسم يبقى يتفتح السنة دي وبلاش السنة الجاية عشان كل واحد يبقى مرتب اوضاعه ويشوف هيعمل ايه

el_maystroo كتب:

ياجماعة المشكلة فى ان القسم مش عليه اقبال

قسم عمارة قسم جديد...مفيش اقبال لان القسم مش ناجح من البداية
طلبة اعداى مش شايفين حاجة كويسة فى القسم تخليهم يختاروا قسم عمارة
لعدة اسباب:
1. المركب اللى ملهاش ريس
عشان قسم ملهوش رئيس قسم اساسا انا مش عارف الدكاترة الكبيرة المتعلمة فين من الموضوع ده..انا بعتبرها نكتة
ده العمال ليهم رئيس عمال....بالك المهندسين
اظن القسم كان ناجح فى سنة من السنين لما جابوا له رئيس قسم الله يمسيه بالخير الدكتور وفيق
2.دكاترة مدنى
كتير فى دكاترة مدنى بيذموا فى الهندسة المعمارية ومش بيعتبروها هندسة وبيعتبروا طلبة عمارة طلبة عايز تاخد الهندسة ببلاش..
طبعا لو انت طالب فى اعدادى رحت سألت دكتور من مدنى ادخل مدنى ولا عمارة حتلاقيه بيحزرك جدا من قسم عمارة
مش عارف ليه بس ده ممكن يكون واحد واخد دكتوراه فى الهندسة ولسه عندى جهل باقسام وفروع الهندسة....ربنا يهدى دكاترتنا
3.مجال العمل
يتضايق قوى مدير المشروع او الموقع لما يعرف ان المهندس اللى جاى جديد ده معمارى مش مدنى وبيعتبره مش بيفهم حاجة...سبحان الله
مع ان المعمارى درس فى قسمه الخرسانة والتسليح والماتيريال المتعلقة بالمبانى او العمارة على يد دكاترة مدنى برضه
اضافة لمهارة المعمارى فى اعمال التشطيبات وحل المشاكل الداخلية مع احترامى للمدنى بس مش بيكون زى المعمارى غير بعد خبرة كبيرة

بس فى حاجة فى عمارة اسوان السنين الاخيرة ان القسم اساسا مفهوش معيدين حايجيبوا له ليه طلبة
كان الله فى عون كل من التحق بهندسة اسوان ليتخرج مهندس معمارى
انها كلية هندسة قسم احباط


تحياتى
مهندس معمارى
خريج عمارة اسوان

أولا ,,, مع شديد أحترامي ورغم قدم الموضوع إلا أنني أريد أن أرد علي بعض ملحوظات حضرتك يابشمندس



حضرتك أشرت لنقطه معينه وهي انه هناك أسباب وجيه نوعا ما لغلق القسم لكني أعترض علي بعض ذه الاسباب مع احترامي



السبب الثاني والثالث بالتحديد ,,, بالنسبه لرأي أي دكتور أو أي مهندس عموما عن قسم عماره فده مش معناه أن القسم مالوش لازمه ,, لأ ,,, ده معناه أن ممكن الشخص اللي حذرك من القسم مش شايف ( من وجهة نظره ) حاجه كويسه


وده مش معناه أن القسم مالوش معني أو أننا نقفل القسم ,,,, لأ ,,,, ده معناه أنه فيه وجهة نظر (تحتمل الخطأ أو الصواب) ,,, قسم عماره محدش ينكر أهميته في قسم الهندس عموما ,, ومش معني أن دكتور أو حتي مجموعة أشخاص مش شايفين الحقيقه دي أن الدنيا خربت




وبالنسبه للشغل ,,,,, فأكيد حضرتك تعلم تمام العلم أن الأرزاق بأيد ربنا ,,,, وأن دي حاجه مش بأيد أي حد مننا



وأكيد لما نيجي نتكلم عن علاقة الكراي في الشغل ,, فحضرتك تعرف الدوره الطبيعيه



المهندس الاستشاري بيكره المهندس المقاول والعكس صحيح ,,, فموضوع الكراهيه في الشغل ده مش جديد ,,, وأنت معرض أن الناس تحترمك أو تكرهك أو حتي تحبك ,,, فأنت اللي مفروض انك تفرض نفسك في شغلك ,,, بغض النظر عن شخصيتك أو حتي مجالك


طول ما انت بتعمل الصح ,,, تحط صباعك في عين أتخن تخين في الموقع ولايهمك



وعلي فكره بالنسبه لموضوع الشغل ,,, فمهندسي عماره ليهم ماشاء الله مجال واسع في الشغل علي مستوي وجه بحري عموما



لأن شغل مهندس مدني ممكن أي مهندس معماري يعمله ( أنا أقصد في مجال الأشراف في الموقع وليس مجال التصميم وخلافه )



وطبعا زي ماهو معروف ان المهندس المعماري عليه اقبال شديد جدا في حاله لو انه هيشتغل في مجال التشطيبات



لأنه للأسف علي قد ماهو مجال واسع جدا وليه سوقه الأ أن الناس اللي شغاله في ( صح ) قليلين جدااااااا



وطبعا زي ماقولت يفضل أنهم يكونو مهندسين معماري لدرايتهم الأكثر من رائع بمواد التشطيبات والأحتياجيات المبديئه المطلوبه لعمل شغل تشطيب رائع ,,, علي عكس مهندس مدني لسه بيدرس المعلومه دي من مهندس تاني ولا حتي صنايعي





كل اللي أتمناه أنه تكون وجهة نظري وصلت حضرتك ... بغض النظر عن أنها تحتمل الصح أو الخطأ ,,,,,



ولأن الموضوع أصبح قديم ,,,, ونظرا لأنه تم فتح قسم عماره هذه السنه ,,,,,, يتم غلق هذا الموضوع




والله الموفق