هل تحب أن تترك بلدك بعدما تنهي دراستك ....؟

تذكير بمساهمة فاتح الموضوع :

لو حبينا نعرف رأى الشباب فى الموضوع ده انا متاكده ان هتكون نسبة الموافقين عليه اكتر من 70% والباقى بيفكر ومتردد والسؤال هو"تحب تسيب البلد اول لمل تخلص دراستك؟"
ولو سألتهم عن الاسباب هتكون كالعاده(انتو شايفين البلد كويسه قوى؟-يعنى هى البلد عملتلنا ايه؟-يعنى لو قعدنا هنزود فيها ايه ولو مشينا ايه اللى هينقص؟...................................)
وفيه منهم اللى عاوز يسيب البلد مش علشان اى حاجه غير انه عاوز يتجوز واحده اجنبيه علشان يخلص من الجيش او علشان ياخد الجنسيه!!!!!!!!!
يعنى كلها مبررات ملهاش اى داعى ولو فكر كل واحد فيهم شويه هيعرف ان بلده دى احسن بلد فى الدنيا وفيها الخير كله وربنا فضلها عن باقى البلاد بذكرها فى القران اكتر من مره وبعدين ايه المشكله انك تدخل الجيش امال لما نكون محتاجين رجاله تدافع عن بلدهم مين اللى هيروح ومتقلوش لما يحصل حاجه ربنا يسهل ساعتها لان مفيش حاجه اسمها كده ياما بتحب بلدك يا اما لا!!!!
وبعدين انا نفسى اعرف ليه الشباب يرضو انهم يشتغلو اى حاجه فى بلد تانى حتى لو مش بشهادتهم ولما يجى يشتغل فى بلده ميرضاش باقل من مدير عام!!!!!!!!!!!!!
طب ما تبدأصغير وبكره تكبر وتكبر البلد بيك
المشكله ان الشباب مش قادر يفرق بين اعتراضه على الحكومه واللى بتعمله وبين حبه لبلده ووطنه لازم كلهم يعرفو ان فرق شاسع بين الحاجتين ولازم يعرفو بردو انهم فى اى مكان بره البلد دى لازم هتكون فيه نسبة اهانه هيتعرضو ليها لان هناك كل واحد بيقول"انا ومن بعدى الطوفان"على الاقل فى بلدك بيقولو"انا واخويا على ابن عمى وانا وابن عمى على الغريب"يعنى فى بلدك هتلاقى اللى هيقف جنبك ويساندك
وحتى لو الحكومه مش موفرالك اللى يخليك تقعد في البلد ممكن تسافر بس وانت عارف انك راجع تانى علشان تفيد بلدك باللى اتعلمته بره وتخليها احسن بلد
فى النهايه انت مصرى مهما عملت ومهما رحت ومهما جيت........ ويفضل السؤال:
"ليه يا شباب عايزين تسيبو البلد؟"

مع أني مازلت مقتنعا بأن من يرفض فرصة للعمل بالخارج هو قطعا إما واهم أو جاهل ، لكن التطرف في الفكرة ليس حلا لذلك أقول لـswar
بلادي وإن جارت علي عزيزة وأهلي وإن ضنوا علي كرام

وأقول لمن عاش في الوهم :
وظلم ذوي القربى أشد مضاضة على النفس من وقع الحسام المهند

أما للي عايزين يعملوا مشاريع في مصر تشغل الشباب فدول هاسيب المحليات والمحافظات هي كفيلة بإفاقتهم من الحلم العربي ده.

علي فكرة من يعترض علي الفقرة الاخيرة مستعد ارد بوقائع كتير تم فيها تطفيش مستثمرين كتير لعدم الحصول علي المعلوم في اسوان خصوصا.

[quote=quote="nana_wow_86"]

مش واحده وخلاص ... حتى لو بتحبها .... ولازم تكون بتحبها .... اى شقه حتى لو ايجار .. بكام
؟
عشان تعيش معقول ..... لازم يكون مرتبك كام ؟
عشان تفرش شقه معقوله .... لازم تصرف
كام ؟
كل ده لازم يكون فى بالك .....الحب وحده مش هايسكنكوا واكلكوا
ويشربكوا صح ولا لا ؟
فى جزء مادى اكيد .....
[/quote]

cool

أنا معاكي إن في جزء مادي ..... بس إنت يمكن ماتكونيش فهمتي قصدي كويس ...... أنا قصدي إنها ماتكونش واخداني علشان فرصة و جات لغاية عندها... يعني لازم تكون مقتنعة بيا الأول قبل أي حاجة .... لأن لو الموضوع كان استغلال يعني و إني هاكون مجرد فرصة .... فأنا إيه اللي يخليني أتجوز من أساسه أصلا و ادفع فلوس في الجواز مع إني ممكن أعمل نفس الحاجة و من غير مصاريف و لا جواز .... أنا قصدي إنها تكون فعلا مقتنعة بيا و بشخصيتي و تكون بتحبني فعلا ..... علشان ما حسش إن اللي بدفعه ده علشان حاجة تستاهل إنها تاخده .... يارب تكوني فهمتي قصدي كويس ..... وللا إيه رأيك ؟

اقتباس :: لو حد مضايق من رأي يا ريت قبل ما يعدل فيها يبعت و يقولي لأن أنا مش بقول حاجة غلط أو على الأقل يكتب سبب التعديل

بيني وبنكم 90%من اللى بيهاجروا من مصر بينجحوا في البيزنس واللي بيفضلوا في مصر وينجحوا10%

فطبيعي اني معظم الشباب عايزين يسافروا

لو حد لقي سفر ياخدني معاه انا بتعلم بسرعه ومعايا كذا صنعه

اولا اعزروني اني هتكلم بالعامية
وكلها اراء شخصيه وعفوا وسامحوني لو هاقولكم الحقيقة المرة
انا خريج الكليه قسم مدني - 2002
انا شايف ان اللي بيردوا مش متخرجين ولا شافوا السوق شكله ايه
احب اقلكم اولا ان تلات اربع دفعتي والدفعه اللي بعدي واللي قبلي موزعين في دول الخليج لدرجة بقولهم شوية وهانده الغياب بتاع السيكشن.
انا اتخرجت والحمد لله ربنا وفقني ومدخلتش الجيش
يا بشمهندسين انا شاب وبكون نفسي -ازاي اتجوز او حتى اكون مسؤول عن بيت وانا بشتغل في الحكومة ب 250 جنيه وعقد غير دايم - الا لو قطاع الاتصالات او البترول
ها قولولي
لو في قطاع عام بتشتغل حاجه اسمها ظهورات برضوا ب 15 جنيه او 20 في اليوم زي كانك فاعل يعني نقول 600 جنيه بتقبضهم على مرتين كل مرة النص وحلني طبعا لما يجي المحاسب يقبضك يعني كل 20 يوم قبض( دي تجربة واقعية )
اما قطاع المقاولات والشغل الخاص بقا مثلا المقاول قول هيديك 1000 جنيه او اكتر بس صدقني هياكلك بيهم ويغسلك وتشتغل عنده زي كانك عبد والله بجد ( ودي كمان تجربة حقيقية ) ( مش كل الناس هتشتغل في طلعت مصطفى او اوراسكوم !!!!!!!!! )
انا بقا شغال برا وجربت دا كلو صدقوني الشغل بمواعيد بعد المعاد ب اوفر تايم يعني احترام
في تامين طبي ( طبعا في مصر لو مت محدش هيسال فيك )
انا مش هعيش بره طول عمري بس اكيد هرجع - هرجع لما اكون فخور بنفسي وفخور بشغلي واللي هاقدمه للبلد
طبعا والحمد لله الدول العربيه اغلب العادات والتقاليد الشرقية موجودة فيها
ومحدش يقول اني محدث نعمة ولا مش لاقي
الا لو طبعا والدي مليونير مكنتش سافرت برا وكان جابلي شغل بالكوسة في الاتصالات او البترول ويجوزني كمان ويدلعني كمان . سوري للالفاظ بس يا ريت محدش يتكلم من فراغ انزلوا وشوف الناس عايشين ازاي .
البلد لو كويسه مكنتش اشوف مهندسين معايا في الشغل هنا في الخليج سنهم يعدي 50 - 60 سنه اكيد بيتعب عشان عياله ويوفرلهم حياه كريمة لكن اكيد انتوا عرفتوا هما بيسافروا ليه.
اسف مرة تانيه على لهجتي العصبية شوية لكن بجد دي الحقيقة .
شكرا اخواني

شكررررررررررررراً جزيلاً

يعنى الواحد خليه قاعد في الكلية

بقى احسن له

أهى حاجة تلممممه

والله الواقع اليم فعلا لحال البلد
الشباب فعلا مظلوم كلام الباش مهندس yemenصحيح مائه بالمائه وواقع امام عيني
صحيح انا مجربتهوش لاني ربنا كرمني بشغل في اماكن دخلي فيها كويس جدا جدا بس برضو برة احسن بكتير جدا جدا
البلد دي والله على شفا جرف هار فنهار به في نار جهنم
وربنايستر على الايام اللي جايه

و الله يا شباب أنا شايف إن كل واحد حر في رأيه ......
و مش معنى إنك يا بشمهندس يحيى عندك وطنية زيادة عن اللزوم ..... يبقى
تفرض رأيك على الجميع .....
و بعدين إنت يمكن مش حاسس بمعنى الكلام اللي أنا بقوله لأنك لسه ما دخلتش
الدنيا و ما شوفتش الحياة برة شكلها إزاي.... إنت هاتحس بمعنى الكلام لما
تبقى متخرج من كليتك و معاك شهادتك و تفضل قاعد في بيتكم و لسه بتاخد
مصروفك من والدك و تلاقي إن كل اللي انت اتعلمته مالهوش لازمة .....
و تضطر في الآخر إنك تشتغل أي شغلانة و خلاص .... و
ساعتها مش هاتلاقي غير مندوب مبيعات في شركة و مش هاتقبض غير 250 جنيه ...
و ممكن ما تخودهمش كلهم ممكن يخصموا منك علشان أنت ما عملتش التارجت بتاع
المبيعات المطلوب منك الشهر ده ... ده غير طبعا التعب اللي انت بتشوفه في
الشغلانة الهباب دي إنك تلف على رجلك طول اليوم علشان تبيع الحاجة اللي
معاك و ممكن ماتبيعش حاجه خالص طول اليوم ده غير طبعا الناس اللي انت
بتتعامل معاهم و تسمع من ده كلمتين و ده كلمتين .....

المشكلة في كده إنك عارف إن الناس دي أقل منك في المستوى العلمي بس الفرق
اللي بينك و بينه إن هو معاه فلوس ممكن يشتريك بيها و إنت على باب الله
..... و ساعتها مش هاتعرف تاخد حقك لأنك طبعا نازل علشان تشتغل مش تتخانق
مع خلق الله .....

أنا مش باقول الكلام ده كده و خلاص و إنما عن تجربة حصلت معايا فعلا ....
المشكلة إن الناس كلها فاكرني إن إتولدت و في بقي معلقة دهب ... بالعكس
أنا عايش عيشة عادية جدا جدا ..... ده يمكن جزء من الواقع يا بشمهندس يحيى
....

و لو نزلت و سألت الشباب اللي بيشتغل و عرفت مؤهلاتهم هاتتخض من الناس دي ...
يعني مثلا انا مرة كنت راكب ميكروباص و اتعرفت على السواق و كان شاب زينا
كده و لما سألته عن شهادته قاللي إنه بيدرس في اخر سنة في كلية تربية عين
شمس قسم BIOLOGY ...
وواحد تاني بيشتغل بياع جرايد عندنا في ميدان الجيزة متخرج من اقتصاد و
علوم سياسية ... و واحد تاني متخرج من كلية هندسة و شغال في فرقة أفراح و
كان شغال قبل كده في شركة كريازي مهندس اليكترونات...

فياريت تبطلوا تبصوا للحياة بالنظرة الوردية دي لأن فعلا إنتم لسه ما
شفتوش الحياة برة عاملة إزاي و ماتعرفش قد إيه إنت هاتتذل علشان تكسب أكل
عيشك ..... عرفت بقى ليه أنا بقول على مصر كده و عرفت بقى ليه أنا عاوز
أسيب البلد و أهاجر منها ...... يا ريت تكون رسالتي وصلت .....

ألف شكر ليك يابشمهندس يامن .... لأن فعلا هو ده اللي بيحصل برة و اللي الناس عندنا في الكلية ما تعرفش عنه حاجة ..... و كل واحد في الكلية فاكر إنه هايشتغل كبير بشمهندسين لما يتخرج....

بسم الله الرحمن الرحيم

انا كنت في الخليج لمدة 16 سنة درست هناك وأخدت الثانوية العامة من هناك وجيت مصر عشان أكمل دراستي هنا لقيت الفرق الشاسع بين هنا وهناك .هناك المصلحة فوق كل شئ فلا يعرفك الخليجي إلا لمصلحته وعندما تقدمها له فأنت بالنسبة له كرت محروق ليس الكل ولكن الأغلبية أما هنا فوجدت كل شيء حلمت به الصداقة والصحوبية بحلوه ومرارته بعد إذنك يا بشمهندس SEWAR101 انت حتعرف الذل الحقيقي في الخارج حتى ولو بلد عربي على فكرة انا كنت في الخليج بسبب والدي وانا في الخليج دلوقتي أقضي الأجازة هناك لأن والدي لا يستطيع السفر الى مصر بسبب عمله وكل الذي يستطيع أن يقضيه إجازة 35 يوم فقط من سنة كاملة بالذمة حرام ده ولا حلال أنا واحد من الناس لما صدقت أرجع مصر وأنتظر بفارغ الصبر أن تنتهي هذه الأجازة لكي أرجع الى مصر لأصدقائي لأهلي على فكرة يا بشمهندس انت المفروض توصل مع أهلك حتى لو قاطعوك لأن الرسول صلى الله عليه وسلم قال( الواصل ليس بالمكافئ ،الكافئ الذي قطعت رحمه قطعها ،أما الواصل الذي قطعت رحمه وصلها ))

والله ولي التوفيق

والسلام عليكم ورحمة الله وبركاته

السلام عليكم

سؤال صغير: نضرب مثال اذا كان فى مكان ل 100 مهندس جديد فى شغل فى مصر وعندنا 10000 مهندس بيتخرجوا كل سنة متحاول انت تكون من 100 ولا لازم تكون فى اخر ال 1000؟؟؟

هى دى وجهة نظرى بالظبط حال البلد اتغير تماما والرأسمالية هى المتحكمة فى السوق دلوأتى ومتطباتة فلازم تكون كفء عشان تقدر تلاقى شغل فى مكان كويس بمرتب كويس ووضع كويس

اى مكان عاوز يشغل ناس بيدور على شخص كفء يقدر يحل محل 5 على الاقل فى اى مجال
على سبيل المثال احنا هنا فى شركة اتصالات مكتبنا فى اسوان عبارة عن 3 مهندسين و5 فنيين المهندس بيشتغل بالظبط: مهندس وفنى وسائق وامين مكتب ومحاسب وسكريتير ومدير .....
ولذلك كل ما يكون عندك خبرات اكتر فى سوق العمل كل ما تستطيع انك تجد مكان كويس للعمل بمرتب كويس وضع كويس.
وبالتالى اهم نقطتين عشان تعرف تشتغل فى مكان كويس: كفاءة مهنية ( تقرا كثير - دورات فى مجالك وفى غير مجالك ) + حاول انك تكتسب خبرة بقدر الامكان فى اى حاجة فى مكان عملك متفوتش يوم من غير ما تتعلم حاجة جديدة اى حاجة هتفيدك فى يوم من الايام حتى لو حسيت ان المعلومة مش مفيدة اتعلمها واركنها هتنفعك فى يوم من الايام.

احب اضيف ردي الى كل ردود الاخوة الاعضاء ومع احترامي لكل شخص ولكل رد
انا احب اعرفكم اني عايشه برضه برة في الخليج ومولوده برة كمان ومش باجي الافي الاجازة وده تاني سنه ليا في مصر عشان الجامعه ..
بس في فرق بين مصر وبين برة مهما كنت مرتاح برة من ناحيه مسكن وملبس وماكل ومشرب وكعمل وكتربيه اطفال وكل حاجه
بس كتعامل الواحد برة مش عارف ياخد نفسه عكس ما يكون في بلده

في بلدك ممكن تتكلم وتقول رايك انما برة لا انت مجرد واحد موظف ممكن يرحلوك في اي لحظه
ده من ناحيه عيوب برة واكيد في كتير بس مش لازم تتقال عشان تقريبا اتقالت في الردود
بس في مصر مش بيقدرو الانسان اللي تعب في تعليمه المتعلم زي غيرة وزي ما اتكتب باشمهندسين كتير يا اتخرجو ومش لاقيين شغل ونلاقيهم بيبيعو ورد في الشوارع هل ده لو سافر برة هيبيع ورد لا طبعا لانهم هيقدروة
ومهما كان دي مصر وهي ام الدنيا ..... no comment نايم

love to life كتب:: وفيه منهم اللى عاوز يسيب البلد مش علشان اى حاجه غير انه عاوز يتجوز واحده اجنبيه علشان يخلص من الجيش او علشان ياخد الجنسيه!!!!!!!!!
:
"ليه يا شباب عايزين تسيبو البلد؟"

المواطن امصرى يموت من أجل الحصول على رغيف العيش

ومفيش داعى لذكر الرواتب كد ايه
بالـتأكيد لا أحد يريد تلرك بلاده ففيها نشأ وفيها كبر وتعلم لكنه قد يضطر لذلك بغض النظر عن التجنس أو غيره
ما معنى ان يعيش النسان غريبل فى وطنه
قال احدهم المال فى الغربه وطن

» عندما تترك الزوجه طفلها مع ... زوجها
» اعرف تاريخ بلدك
» إسبانيا تنهي المغامرة الروسية .. وتتأهل للنهائي
» إتعب علي نفسك بقي .. بلدك تعبت منك!