إتعب علي نفسك بقي .. بلدك تعبت منك!

ناس كتير لما كنت أعرفهم من سنين .. كنت متصورة لما ابصلهم دلوقتي مش بعيد ألاقيني "فان" لحد منهم .. ف كل المجالات و كل التخصصات .. بس اتفاجيء إنهم -و مع بعض التغييرات ف نضارتي- أكتشف إنهم لسه ف مكانهم .. بتحسر .. أيوة عشان مش ده اللي المفروض نبقاه
زي ما بنغير و بنطالب بالتغييرات السياسية .. لازم إحنا كمان نتغير!

اللي انا بكتبه ده تجربة شخصية .. أنا مش بقول إني بعمل كل حاجه تخليني أغير حواليا و جوايا .. بس المحاولة واحده واحده .. و مرة ورا التانيه الواحد بيوصل للي عاوزه .. إديسون حاول 9999 مره قبل ما ينور العالم كله بالمحاولة العشرتلاف

ساعات بنبقي عاوزين النجاح جاهز .. و ساعات كتير بنصنف النجاح ف حاجات مش هي كل حاجه ف الدنيا .. - و شوف اللي انتحروا عشان بس معهمش فلوس .. أو واحد متجوزتش البنت اللي بيحبها .. عشان كان شايف الدنيا من ناحية واحده

1. كن انت .. فكل الآخرين قد تم حجز اماكنهم من قبل

من الاخر كده .. انت انت .. أي حد تاني بقي الحد التاني ده .. و يا تكون انت يا تكون و لا حاجه .. يبقي مش الحل إنك تبقي شايف إنك لازم تبقي زي فلان ف ظروفه أو ف مجتمعه أو حتي بلده عشان تقدر تعمل حاجه – اللي بيقولوا عاوزين يسيبوا البلد لازم يعرفوا إن مفيش حاجه بتحصل إلا لسبب و زي ما الأفارقة عند خط الاستواء ربنا خلقلهم جيوب انفية واسعة عشان يعرفوا يتنفسوا ف جو كله رطوبه و حر .. إنت كمان ربنا خلقك مصري عشان عندك حاجه لازم تعملها للبلد دي .. إتعب علي نفسك!

2. إقرا

إقرا ف كل حاجه و أي حاجه .. بتمل من القراية؟ .. ليك حق .. عشان اول ما بتحاول تقرا بتجيب كتب تشبه القواميس أو بتحط خطه عشان تقرا عشروميت كتاب .. أو علي الاقل بتختار كتاب غلط!
قبل ما تقرا كتاب دور علي النت علي الريفيوز بتاعته و النقاد قالوا عنه إيه .. و لما تروح تشتريه أو تستعيره من مكتبه أو من واحد صاحبك قلب فيه .. افتح صفحة من نصه و اقراها اتشديت؟ .. يبقي هتقراه .. متشديتش .. جرب صفحة كمان .. لو متشدتش يبقي الكتاب ده متكتبش عشان انت تقراه .. الكتاب أنواع كتير جدا و كل واحد ليه اسلوب مختلف تماما عن اي حد تاني .. يعني تقدر تقول إن زي ما لكل مواطن دلوقتي مطرب .. برضه كل مواطن ليه الكاتب اللي بيكتب الكلام اللي هو عاوز يقراه .. و يا سلام لو جبت كتاب بيتكلم عن حاجه كان نفسك تعرفها أو حاجه بتحبها .. اقراه ولو نص صفحة كل يوم ..هيفرقوا معاك كتير .. الكتب حياه تانيه بتبص فيها علي افكار كتير فكر فيها ناس قبلك و تعيش اعمار تانيه فوق عمرك .. إتعب علي نفسك!

3. كن التغيير الذي تريد ان تراه في العالم – غاندي

غاندي لما قال الجمله دي مقالهاش عشان تستني لما يحصل التغيير اللي انت عاوزه فتقول كويس انا كنت عاوز كده انا كمان! ..
غاندي مكانش يقصد إنك تكون رئيس الجمهورية اللي نفسك فيه .. بس كان يقصد إن لو نفسك البلد تبقي نضيفه .. ابدأ بنفسك متقبلش ترمي غطا الكانز ف الشارع .. لو نفسك ف جو هادي .. متضربش كلاكس إلا للضرورة القصوي .. نفسك ف رغيف عيش يتاكل .. طلع بطاقة و انتخب اللي يعرف يطالب بحقوقك! .. إتعب علي نفسك!

4. مين قالك البلد مفيهاش شغل؟

اللي بيقول ان البلد مفيهاش شغل .. عامل زي اللي قال لا تقربوا الصلاة و سكت .. الاصح : "البلد مفيهاش شغل ليا" .. الخطأ الشائع إن البلد مفيهاش شغل .. بس الصح إن ايوة الشغل مش كتير .. و عشان مش كتير أكيد محدش أول ما تدخل عليه مخلص كليه بقالك 4 سنين معملتش حاجه ف الكلية عمرك و لا اتعلمت حاجه تفيدك بعد ما اتخرجت و هيقولك "فينك من زمان؟ إحنا كنا بندور عليك!" .. إتعب علي نفسك!

5. مدرستش مجال بتحبه؟

و مين بيدرس ف البلد دي مجال بيحبه؟ الحل حاجه من اتنين يا تغير مجال دراستك .. بس خد بالك : لو هتغيره فعلا لحاجه تانيه اتأكد إن الحاجه التانيه دي هي اللي انت عاوزها" و إن الدراسة ف المكان و البيئة دي بكل ما فيها فعلا هما اللي انت عاوزه .. و إلا .. خليك مكانك و حاول تخلص دراستك بأسرع ما يمكن عشان تتفرغ للشغل ف مجال بتحبه..
طب و المجال اللي بتحبه؟ .. مين قالك إنك لازم تكون خريج إعلام قسم صحافة عشان تبقي صحفي؟ و لا معهد سينما قسم إخراج عشان تبقي مخرج؟ كام واحد خرج من حقوق اشتغل فيها؟ كام واحد ف تجاره طيب؟ كام واحد اتخرج من علوم بقي عالم؟ ..
من الآخر كده .. اتعلم اللي انت عاوزه بنفسك –و عن تجربة بيبقي أحلي – عشان مش ملتزم بمناهج حاطينها من 30 سنه فاتت .. و لا ملتزم بدراسة نظرية .. دراستك النظرية هتبقي قراية .. و سيرش و أسئلة و الدراسة العملية هتبقي مع الوقت خبره محدش من اللي درس ف الكليات أخدها .. محتاجه بس شوية صبر علي حبة إيمان .. إتعب علي نفسك!

6. جرب

بتكتب؟ خلي الناس تقرا .. بتمثل ؟ خلي الناس تتفرج .. بتغني؟ خلي الناس تسمع .. إزاي؟ دي مش المشكله مطلقا .. "افتح الويبكام .. صابت صابت .. قلشت مش خسران حاجه" – عمرو سلامة. عمرو سلامة اتعلم الاخراج و هو عمره ما درسه و لا عمره حتي كان مساعد مخرج .. و أول فيلم أخرجه "زي النهارده" .. خالد دياب أول فيلم كتبه كان "الف مبروك" .. و علي حد قوله "كان أول مره أمسك قلم و اكتب حاجه كاملة" .. اتعلم و جرب مش عيب .. الناس هتتريق شوية و هيضحكوا شوية .. بس ف الاخر ممكن من جمال أعمالك تبكيهم .. جرب مره و اتنين و عشره لحد ما توصل .. و لو بجد عندك حاجه هتوصل!

7. إكتشف

ممكن تبقي موهوب ف حاجة بس عشان مجربتهاش معرفتش المعلومة دي! .. و الحل؟ .. اكتشف .. روح جرب تلعب مزيكا.. جرب تنظم حفلات و مؤتمرات .. جرب تسجل حاجه بصوتك .. جرب تروح المدرسة اللي كنت فيها و اعمل ورش عمل للطلبة ف حاجه انت بتفهم فيها .. ذاكر حاجه كان نفسك تعرفها .. و محدش يقولي منين .. النت مليان! و جرب ده: academicearth.org .. أنا درست من عليه الفلسفة و علم النفس و الخطوة اللي جاية الأدب الانجليزي .. ممكن مجال بتحبه ف ظل التعليم اللي عندنا تتعلمه غلط بشكل يخليك تكره حاجه بتحبها .. المحاضرات دي أونلاين فيديو و فيه بعضها مكتوب و اوديو و من جامعات كبيره زي أوكسفورد و ييل و هارفارد .. بعدنا عن الموضوع؟ لأ .. الناس دي بقت كده ازاي؟ بتكتشف .. بتسأل و بتدور .. أوعي تسيب سؤال جواك من غير إجابة! السؤال ده بقي جواك عشان تدور علي إجابة .. و الإجابة أكيد هتديك معلومه متعرفهاش او تخليك تتأكد من معلومه عارفها أو تربط بين معلومتين .. عمر العلم ما كان ضرر!

8. فاضي؟

لو فاضي بعد كل ده .. جرب حاجات معملتهاش قبل كده ممكن تساعدك علي الاكتشاف! .. روح اماكن جديده .. إسأل عن أماكن ف بلدنا محدش بيروحها غير الـ"خواجات" اللي من بره و الخواجات اللي من "جوه" ميعرفوش عنها حاجه .. صدقوني البلد دي فيها اماكن كتير حلوة اوي تستاهل الواحد يروحها و هتستمتعوا بوقتكوا أوي هناك .. و سيرش ع النت أو جرب "خروجات" .. جرب تركب عجل .. تقعد تذاكر لاخواتك بطريقة جديدة - عن تجربة أختي مكانتش بتحفظ حاجه ف الدراسات، كنت بعمل معاهاmind maps

9. إشتغل بدري

اشتغل من بدري أوي .. انا اعرف ناس اشتغلوا من سن 14 و 15 سنه و ناس من 11 سنه! .. أنا للأسف اشتغلت من سن 16 بس! .. مش لازم تبقي بتشتغل يعني بتقبض! .. لو فاكر إن هو ده الشغل يبقوا ضحكوا عليك! .. و إلا كنا اعتبرنا تنابلة المصالح الحكومية بيشتغلوا (مع الاعتذار للي فعلا بيشتغلوا) بس الغالبية مبتعملش حاجه غيره إنها تقولك روح إختم دي و روح امضي دي! .. يعني ده مش شغل .. استغل قدراتك مهمها كانت قليلة .. بتعرف تترجم؟ اشتغل مترجم و ذاكر! .. صوتك كويس و بتعرف تقرا؟ سجل محاضرات و دروس لدور رعاية المكفوفين و ساعد غيرك ياخد حقه ف الحياة!
الشغل الحقيقي لازم يتوافر فيه حاجتين من تلاته لو ملقتش غير واحده أو ملقتش خالص أوعي تكمل طالما فيه فرصة تلاقي فيها إتنين من التلاته .. إيه هما بقي التلاته
*إنك بتفيد الناس و بتضيف
*إنك تكون بتتعلم حاجه جديدة و خبرات و ناس
*المرتب يكون مرضي
و بما إن أغلبنا لسه معندوش خبره فلازم تركز علي الاولي و التانيه .. و دي موجوده ف حاجات كتير جدا .. الأنشطة الطلابية زي (supportclub.net) و الأنشطة التنموية زي (علشانك يا بلدي) .. و الخيرية زي رسالة و صناع الحياه و تدريبية زي مجددون و أنوار رسالة و ياللا إديوكيشن .. و كل الأماكن دي بترحب جدا لما تفكر تروحها .. بس خدوا بالكوا "العمل التطوعي غير تطوعي" يعني أول ما تاخد مهمه أو مطلوب منك حاجه تعملها بقت مسؤلية مبقاش تطوع .. فيه ناس بتعتمد عليك ف اللي بتعمله ده .. و عن تجربة .. هتكسبوا كتير أوي لما تلاقوا الناس بتستفيد بسببكوا.

10. متستصغرش نفسك

أوعي تفكر إنك قليل او صغير ف السن بدري عليك الخبره .. فيه باند ف أمريكا (للأسف مش فاكرة الإسم) عاملينها ناس عمرها بين 11 و 15 سنه .. و الناس بتسمعهم! .. خلينا ف مثال مصري؟ محمود وائل بقي دكتور دلوقتي ف الشبكات! و ده عنده 11 سنه أو 12 علي الاكثر .. بلاش ده عشان ذكي (رغم إننا أذكياء) .. ياسر عاشور .. مونتير من سن 18 سنه .. صحفيين كتير بقي و ماليين الفيسبوك و نعرفهم كلنا – محمد جمال (نضال) – كان صحفي من سن 18 و كان بيكتب علي عشرينات !.. محمود دياب (mkhaled.com) وديزاينر من و هو عنده 11 سنه و كان بيشتغل ف شركات .. أمثلة كتير اوي ملهاش حصر .. الفرق بينك و بينهم مش بس السن .. الفرق إنهم عرفوا طريقهم .. عرفوا هما حابين إيه .. جربوا مليون حاجه لحد ما قالوا هي دي!

11. خد قدوة من كل حد تقابلة

مش لازم يبقي قدوتك ملاك .. و مش لازم يبقي واحد و بس .. خد من كل واحد حاجه يبقي قدوتك فيها .. واحد بيعرف يتفاوض و يعمل أحسن ديلز .. راقبه و اتعلم منه .. واحد بيعرف يتكلم كويس مع الناس و يكسبهم .. راقبه و اتعلم منه .. خد من كل واحد خبره .. ((الفراش عنده خبره مش عندك طالما إنت مشتغلتش قبل كده فراش))

12. إسعي للتميز

أوعي تكون مع التيار .. و اوعي تكون ضده! .. من الآخر "لا تكن إمعة" و متكونش برضه "الشريك المخالف" .. خليك مقتنع باللي بتعمله "حتي" لو مش عاجب اللي حواليك .. طالما سمعتهم و و فكرت ف كلامهم و طلعت بره الصورة و برضه مقتنع عن إيمان مش عن "عند" .. و خلي بالك من أهدافك .. ممكن تبقي متميز بس مش محقق أهدافك!

13. قرب

مش بس الفراش ممكن تتعلم منه .. كل اللي تسمع إن المفروض تبعد عنه .. متخافش أوي كده .. ناس كتيرللأسف بتخاف تقرا لكارل ماركس عشان ميتحولوش للماركسية! .. أوعي تعمم .. لما تقرب و تشوف الحاجات علي حقيقتها .. تقدر تحكم! .. و مش معني إنك قربت إنك مصدق ف اللي قربت منه و لا إنك موافق عليه .. إحنا خايفين نقرب نشوف الاسرائيليين بيفكروا إزاي! لمجرد إنهم اسرائيليين! .. و خفنا من انفلوانزا الخنازير عشان اغلبنا عمره ما ربي خنزير .. بس انفلوانزا الطيور اللي هي أحد و اخطر مكناش خايفين منها كده عشان طول عمرنا بنشوف طيور و مالوفة!

14. خبط ف كل حاجه .. خد خبره

اشتغل سواق و بياع ف محل .. دليفري و سكيرتير .. ف رأيي .. الخبره المتعددة خصوصا ف الفترة بين 15 و 25 مهمه جدا .. مش بس هتتعمل منها خبرة عملية .. هتاخد خبره ف الحياه هتشوف ناس جديدة من كل حته و كل فكره و علي كل لون!

15. ذلل الصعاب

متقفش قدام كلية و تقول مش بحبها و عاوز أسيبها عشان مش فاهم .. مش فاهم إفهم و عدي .. متضيعش عمرك و اتعلم جمبها حاجه تانيه لو مش هتعرف تسيبها (غالبا بسبب الأهل خصوصا مع كليات القمة - مش فاهمة قمة إيه بالظبط؟!) يبقي حاول تخلص و جمبها إعمل اللي بتحبه اللي يضيفلك .. و اتعلم إزاي تتخلص من حاجه مش حاببها بإنك تتحداها!

16. انتهز الفرصة و متضيعش وقت

جتلك فكرة دلوقتي .. فكرة مشروع .. حل لأزمة ف بلدك؟ .. افتح فايل وورد و اكتب ف فايل سميه "سلة الافكار-basket of ideas" حط كل فكرة تجيلك .. كل الحاجات اللي قلبت حال الشعوب كانت مجرد افكار "عابرة" .. متخليهاش تعبر من غير ما تضع آثارها علي اوراقك! .. و نصيحة مني .. نوتة صغيرة و قلم أصغر ف جيبك مع البطاقة .. زي ما البطاقة وثيقة إثبات هوية .. النوتة وثيقة إثبات حياة .. إنك لسه حي بتفكر و بتبدع ..
و أوعي تضيع وقت .. لو فيه فرصه تنفذ حاجه حتي لو بعد كده هتسيبها لحد تاني يكملها من بعدك .. حالًا إعمل كده .. أرجوك! .. خلي حد تاني يتعلم إزاي يدير فكرة مؤمن بيها حتي لو مش فكرته .. خلي الناس تتعلم إزاي يشتغلوا مع بعض .. و تابع افكارك و هي بتكبر .. هتبقي فخور بيها حتي لو كان مشاركتك فيها كانت مجرد البداية بس! .. و هتفضل طول حياتك مبسوط بسببها .. عمرك ما هتنتحر إطمن!

17. مش لازم يعجبهم المهم تبقي أحسن المرة اللي جاية

عملت حاجه و معجبتش الناس .. جرب تاني .. أكيد متولدتش كاتب .. و لا إتولدت مذيع! .. أوبرا وينفري كانت عايشة ف قرية فقيرة .. جدتها كانت بتغسل الهدوم و مبتعملش حاجه غير إنها تستناها تنشف و تطبخ و بس! .. كانت بتقول لأوبرا: ("أوربا" .. اتفرجي عليا كويس عشان هتعملي زيي لما تكبري) كانت بترد عليها تقولها (لأ .. عشان أنا مش هعمل زيك لما أكبر) .. مش لازم الناس تعجبهم كل حاجه .. المهم تبقي مؤمن باللي بتعمله و تعرف تسمع للأراء الأخري صح عشان أكيد اخدوا بالهم من حاجه مشوفتهاش!

18. ركز و سيبك منهم .. المحبطين

اللي فاتوا كانوا ناس بتقول رأيها عشان تحسنك .. لكن أول ما تلاقي ف كلام حد تهكم .. شايفك مش هتعمل حاجه لمجرد إنه شايف كده من غير أسباب .. يبقي سيبك منه .. عشان كل اللي هيعمله إنه هيقلل همتك و عزيمتك .. و مش هيكسب حاجه إلا إنه يبقي أثبت لك و لنفسه إنه كلامه صح! .. إرمي كلامه ورا ضهرك .. حتي لو كان أهلك! – عشان هما عاشوا زمن تاني بثقافة تانيه و قد يكونوا كمان لسه عايشين فيه!

19. اتحمس !

خليك دايما مترقب و متحمس و اعرف ان الحاجه اللي تعملها بروحها ف ساعتها بيبقي عندك القوة تجربها تاني و تالت .. لكن لو ركنتها هتحمض! .. power of now بتفرق كتير أوي مع حاجات كتير .. كام مرة كاتب ركن حاجة متحمسلها عشان يكتبها .. و بعد كده خلاص مبقاش حاسسها! .. كام مرة كنت متحمس تعمل حاجه و إديت وعود لكن لما الموضوع طول .. بقي ماسخ! متستناش دلوقتي حالا اعمل اللي كنت مكسل تعمله .. راقب نفسك .. شوف إيه اللي بيرفع روحك المعنوية و يعلي همتك و دايما ركز عليه!

20. أثر في الناس

اللي اتعلمته .. رد جميل اللي علموهولك و علمه لغيرك .. و لو مكانش حد علمك و تعبت علي نفسك لوحدك! .. ساعد ناس تانيه ف تعبهم علي نفسهم خليهم يوفروا تعبهم لحاجات أكتر لو ساعدت شخص ف 1 و 2 هيتعب هو علي 3 .. أثر ف الناس .. طول ما انت بتأثر ف اللي حواليك كل ما تحس إنك بتملك قوة ملهاش حدود .. بتحس إنك عندك رصيد طائل من حاجات ملهاش حصر عند ناس ممكن اوي متعرفش أغلبهم .. لو اثرت ف واحد و هو أثر ف عشرة .. إنت تبقي اثرت ف 11 ! .. و افتكر "لو تقدر تغير ف 500 و غيرت ف 499 ربنا هيحاسبك علي تقصيرك – أروي الطويل"

21. خليك طموح

حدد هدف .. شوف نفسك كمان شوية .. مش هقولك كمان خمس سنين .. شوف نفسك كمان ست شهور و كمان تلات سنين .. شوف نفسك بعد ما تموت كمان! .. نفسك الناس تقول إيه عنك؟ و كل ما تستقر علي صورة آمن بيها أوي .. خليك ماسك فيها .. تشارلي شابلن موسيقار و ممثل ف أوائل سنين حياته كان الناس بتتريق عليه و بيقولوا إنه هيبقي ولا حاجه .. أوباما من أصول افريقية .. و بقي رئيس أقوي دولة ف العالم! .. إنت مش اقل من دول ! .. هما آمنوا إنهم يقدروا يعملوا حاجه .. آمن إنت كمان!
و حدد اولوياتك و جددها كل فترة لما تحس إنك مش بتحقق أي تقدم .. و جدد أهدافك .. حط خطة طويلة أوي لأهداف كبيرة أوي .. و خطط صغيرة أوي لأهداف صغيره .. حتي لو كان الهدف إنك تتعود تشرب لترين مية كل يوم!! .. و متنساش تسجل أهدافك ف سجل اهداف .. كل فترة لما تبقي كحلي منقطة بإسود و مقلمة ببني .. افتحه و اتفرج قد إيه إنت قادر تعمل حاجات كتير مكنتش قادر تعملها ..

22. هات مشجعين حتي لو نصهم هتيفه!

لازم يبقي فيه حد بيشجعك – و مش لازم يبقوا أهلك و قرايبك و اصحابك!- المهم يبقي فيه حد بيشجعك .. خلي القريبين منك يعرفوا إنت عاوز تعمل ايه ف حياتك .. و اتفق معاهم لو حد شافك بتعمل حاجه مش تبع اللي انت عاوزه "ينبهك" عشان تراجع كده و تشوف هتعمل ايه! .. لازم يبقي فيه ناس تبقي مؤمنه بيك .. حتي لو قليلين! .. الرسول صلي الله عليه و سلم أول من تبعه كانوا تلاته ! و كان محتاج إن يبقي فيه حد مؤمن بيه! .. تجربة الرسول قابلة للتطبيق .. اقتدي به .. – الاقتداء مش بلايك علي صفحة بتقول خلي صفحة الرسول أكبر صفحة علي الفيسبوك و نبقي أهلي و زمالك!

23. بلدك و الدنيا بحالها

مينفعش تبقي قاعد ف البيت و فيه مصيبه بتحصل ف الأوضة اللي جمبك و انت مش عارف! .. كبر الأوضة لعمارة و شارع .. و حي و بلد و العالم كله! .. لو مش عارف إيه اللي بيحصل تبقي مش عايش معانا! .. أوعي متتابعش ولو العناوين! .. إختار مصادر موثوق فيها زي المصري اليوم و الBBC و ال CNN و تابعها .. اعمل subscribe ليهم و لصفحاتهم علي اليوتيوب لو مش بتحب القراية .. خليك مثقف باي شكل .. مش لازم بس القراية .. الإعلام بقي ف الهوا و ف التاكسي اللي معدي جمبك عليه إعلان معجون سنان! .. و متخافش من السياسة .. محدش بيموت ناقص عمر .. و لن يصيبنا إلا ما كتب الله لنا! .. و إنت هتتابع مش أكتر Wink

24. حب!

ايوة حب كل حاجه بتعملها .. و حب حاجتك .. حب الحاجات اللي بتستخدمها .. و حب الناس اللي انت بتتعامل معاهم .. طول ما بتحب الحياة .. هيبقي عندك امل إن بكره أحسن مليون مره .. و لو كرهت هتتشغل بكرهك .. واللي يكرهك مش شرط تحبه بس متشغلش نفسك بكرهه! و إدعي ربنا إنه يحببك ف اللي فيه خير ليك .. و يحبب الناس فيك .. حب الناس نعمه!

25. أخيرًا .. إوصل!

إنت عايش .. دي فرصتك! إوصل لاهدافك و أحلامك .. بلدك محتاجاك توصل .. محتاجاك تنجح و كل اللي يعرفوك محتاجينك قدوة! .. يبقي إتعب علي نفسك!

إتعب علي نفسك بقي .. بلدك تعبت منك! 899620

إتعب علي نفسك بقي .. بلدك تعبت منك! 899620

للمتألقه والمبدعه !!

ياسمين مدكور

الخبره المتعددة خصوصا ف الفترة بين 15 و 25 مهمه
جدا .. مش بس هتتعمل منها خبرة عملية .. هتاخد خبره ف الحياه هتشوف ناس
جديدة من كل حته و كل فكره و علي كل لون!

إتعب علي نفسك بقي .. بلدك تعبت منك! 2696

إتعب علي نفسك بقي .. بلدك تعبت منك! 2696

الله على الكلام الرائع ده يااسماعيل. لانه فعلا محدش بيتعلم الا لو غلط اوفشل مرة من المرات...

» اعرف تاريخ بلدك
» تعبت جداً من كتر الشغل
» هل تحب أن تترك بلدك بعدما تنهي دراستك ....؟
» هل تعبت من الحياة والناس ؟ هل تريد السعادة؟ هل أنت منصدم في حياتك؟ تعال
» متى تبك على نفسك.....!!!