التركة مسرحية جديدة يكتب فصولها التاريخ

الأبطال :

الزعيم :: 129 سنة ونصف !
سوزي :: 89 سنة !
جمال :: 43 سنة وشهرين !
علاء :: 36 سنة !

============ التركة مسرحية جديدة يكتب فصولها التاريخ Biggrin

============

إلتفت الأسرة حول فراش الزعيم وهو يلفظ أنفاسه الأخيرة
وهنا قال الزعيم بصوت ضعيف ولكنه حازم فى نفس الوقت

الزعيم : كلكم موجودين؟

سوزي : أيوه ياحبيبي أنا جنبك أهو
وأدي جمال وعلاء .. قمرين دول ولا عينين ؟

الزعيم : طب إسمعوا اللي حقوله كويس

جمال : سامعينك يابابا .. إتكلم

الزعيم : مصر دي كنز ياولاد .. إمسكوا فيها بإيديكم وسنانكم
بنسرق فيها بقالنا سنين وسنين ولسه بتدّينا

علاء : هيّا دي البركة اللي بيقولوا عليها يابابا

الزعيم : أيوه يابني .. ربنا يبارك لكم ولعيالكم فيها
ودلوقتي إسمعوني كويس وافهموا اللي حاقوله

علاء : إنت على الهوا يابابا .. إتكلم

الزعيم : أنا مش مديون لحد ياولاد
يعني أى واحد يصيع عليكم ويقول لكم أبوكم كان مستلف
مني فلوس تفّوا فى وشه على طول

علاء : إطّمن يابابا .. حرامي على حرامي ما يلعبش

الزعيم : أنا سيبت لكم اللي يكفيكم إنتوا وعيالكم وعيال عيالكم ويفيض
فلوس متلتلة متتعدش .. مش ح اقولكم حافظوا عليها وبس
لاااااا زوّدوها كمان وكمان لجل ما روحي ترتاح وأنا فى تربتي

جمال : هيا الفلوس اللى إنته عملتها يابابا دى بتسميها فلوس
شفني أنا وعلاء ح نعمل إيه
ولاّ صحيح حتشوفنا إزاي .. عموماً ما تقلقش

الزعيم : ودلوقتي إسمعوا وصيتي .. الحكم لأولاد العائلة فقط
لازم أول ما جمال يحلف اليمين تغيّروا إسم مصر وترجعوه
زي ما كان زمان أيام الملك فاروق والملكة نازلي

(المملكة المصرية)

جمال : مفهوم يابابا .. خش في اللي بعده

============ التركة مسرحية جديدة يكتب فصولها التاريخ Biggrin

============

الزعيم : الجيش والشرطة والأزهر
أوعوا واحد من التلاتة دول يخرج عن طوعكم أبداً

علاء : مفهوم برضه .. اللي بعده .. ياساتر ده إنته ملل

سوزي : عيب ياعلاء لما تكلم أبوك كده

علاء : بهزّر ياماما

الزعيم : الهرم لأم العيال
ليكى ياسوزي بعد ماخدمتينى بتفاني وإخلاص طول السنين دى

سوزي : هرم ! هيا دي آخرة صبري ! وده يسوى كام ده ؟

علاء وهو يمسك بالألة الحاسبة : يسوى كتير ياماما
لو تحبي أتصرّفلك فيه ممكن يعمل معاكي مبلغ كويس

سوزي : مش ح أرضى بأقل من التلات أهرامات وأبو الهول

الزعيم : مش خسارة فيكى ياغالية .. أثار النوبة لعلاء .. والأقصر لجمال
ودلوقتى نيجي للميّه .. الساحل الشمالى لعلاء والبحر الأحمر لجمال
وقناة السويس تخصّصوا دخلها صدقة جارية على روحي

سوزي : إنت أكيد مجنون .. مليار ونص دولار صدقة جارية على روحك؟

جمال في إذنها : ما تاخديش على كلامه ياماما
ده يبقى كتير لو طلعنا 100 ولا 200 جنيه على روحه للفقرا

علاء وهو يمسك بالألة الحاسبة : ممكن نطلّع لحد ألف جنيه ياجمال
السيولة تسمح !

============ التركة مسرحية جديدة يكتب فصولها التاريخ Biggrin

============

الزعيم : أوعوا تفرّطوا في حبيب العادلي من بعدي ياولاد
حبيب قلبه ميت وإيده طرشه
وهوه ده اللي ينفع مع الغجر اللي هنا

جمال : بس ما بيعجبنيش شنبه يابابا

الزعيم : إنتي مالك ومال أم شنبه .. إحنا بنشترى مجرم

جمال : أعاهدك يابابا إنى حخليه معايا ومش حفرط فيه أبداً

الزعيم : الشيخ طنطاوي ياولاد راجل بركة .. يمين يمين شمال شمال
أوعوا تفرطوا فيه .. بس ما تخلوهوش يصلي عليّا
لأني بصراحة مش متأكد إن كان ربنا حيقبل منه ولاّ لأ

علاء : ولا يهمك يابابا .. ح أخلي أونكل كمال الشاذلي يصلي عليك

الزعيم : والله لو عملتها ياعلاء لأكون متبرّي منك إلى يوم الدين

علاء : بهزر معاك يابابا .. أونكل كمال مش حافظ الفاتحة

الزعيم : المشير طنطاوى ياولاد .. مش ح أوصيكم عليه
الراجل ده طول الوقت حاطط وشه فى الأرض وعمره ما استجرى يرفع عينه فيّا
وفي نفس الوقت ماسك الجيش بإيد من حديد

سوزي : هوّ فعلاً خجول وكل ما يشوفنى ما يقوليش غير ياست هانم
إبقى خليه معاك ياجمال

جمال : حاضر ياماما

============ التركة مسرحية جديدة يكتب فصولها التاريخ Biggrin

============

الزعيم : عايز جنازتي ياولاد الناس تحكي وتتحاكى عنها
هاتوا المخرج الإيطالي ده اللي إسمه مكافيللى يصورها

علاء وهو يمسك بالألة الحاسبة : هوه حيكلّفنا كتير
لكن ممكن فى الأخر نلم مبلغ معقول لو خلينا شركة أجنبية
تحتكر حق توزيع الفيديو فى أوروبا وأمريكا

الزعيم : عايز أحلى مدفع يشيل النعش ياولاد

جمال : مدفع رشاش؟

سوزي : الهزار مش فى الحاجات دي ياجمال

جمال : آسف ياماما

الزعيم : عايز أدفن فى شرم الشيخ ياولاد جنب أولمرت وشارون

علاء : بلاش كفر مصيلحة يعني؟

الزعيم : لأ كلها براغيت ياعلاء .. وإسم شرم الشيخ كمان أشيك بكتير

============ التركة مسرحية جديدة يكتب فصولها التاريخ Biggrin

============

تنويـــه :

القصة والأحــداث خيالية
وأي تشـابه في الأسماء أو الشخصيات يُعد من قِبل المصادفة لا أكثر
وماأكثـر المصـادفات في مثل هذا البلد !

اقتباس :: تنويـــه :
القصة والأحــداث خيالية
وأي تشـابه في الأسماء أو الشخصيات يُعد من قِبل المصادفة لا أكثر
وماأكثـر المصـادفات في مثل هذا البلد !

ههههههههههههه بيضحك2

بقي الموضوع صدفـــــــــة
والله ربنا يستر عليكم
بس موضوع جامد جداً
التركة مسرحية جديدة يكتب فصولها التاريخ 2696

MAX كتب:: علاء : إطّمن يابابا .. حرامي على حرامي ما يلعبش

هههههههههههههههه
كان قصده
ومبروم علي مبروم
ميرولش
ههههههههههههه
جامده جدا جدا جدا يا ماكس

شكلك كده اكيد رايح رايح الملاهي علي رأي البشمهندس يامن

» د.أحمد غانم يكتب: استثمارات مضمونة فى مزبلة التاريخ!
» ليس من يكتب بالحبر كمن يكتب بدم القلب...
» مسرحية من فصل واحد
» مسرحية قصيرة جدًا
» مسرحية (الاميرة تنتظر)