مسرحية من فصل واحد
بقلم جلال عامر
(فى المجمع الانتخابى لأحد الأحزاب الأنوار مطفأة وعلى المنصة يجلس رئيس المجمع وعلى يمينه ويساره المساعدان وأمامهم كومة من ملفات الترشيح وفى القاعة المرشحون يتصايحون).
رئيس المجمع يخاطب أحد المرشحين:
- عايز تترشح ليه؟
المرشح: علشان أدافع عن الوطن.
رئيس المجمع: خليك صريح ماعندناش وقت.. عايز تترشح ليه؟
المرشح: عايز أسرق.
رئيس المجمع: طلباتك؟
المرشح: قالوا لى إن مفيش دايرة فاضية وأنا مستعد أعمل دايرة على حسابى وأنا يا أفندم الدورة اللى فاتت كنت مرشح «أراضى» عايز أغير «الصفة» وأبقى مرشح «بنوك».
المساعد يهمس لرئيس المجمع: يا أفندم عندنا زحمة فى مرشحى «البنوك».
رئيس المجمع للمرشح: تنزل المرة دى «غسيل» مؤقتاً.
المرشح: أنا يا أفندم سايب الشغلانة دى من ثلاثين سنة من أيام الاتحاد الاشتراكى ونزلت «غسيل» و«أتوبيسات» وعايز أستقر.
المساعد: إستقر مطرحك.. اللى بعده.
يقف مرشح (٢) ويقدم نفسه:
- عباس الضبع ٣٧ سنة مثقف طينة وعضو مجلس إدارة منتدب وواخذ على خاطره وأقدس الحصانة البرلمانية.
رئيس المجمع: طلباتك؟
المرشح: عايز أدافع عن الوطن دفاع جامد جداً.
رئيس المجمع: وكيف تدافع عن الوطن؟
المرشح: أنا يا أفندم دفعت ٢ مليون وناوى أدافع بخمسة مليون كمان.
يقف المرشح (٣) ويصيح: علىّ بتسعة مليون.
مرشح (٤): ١١ مليون.
مرشح (٥): ١٣ مليون.
رئيس المجمع: خلى بالكم دى آخر دورة لأن الوطن خلاص قرب يخلص.
مرشح (٦): يبقى ٢٠ مليون والكرسى على حسابى.
موضوع: مسرحية من فصل واحد 
الجمعة 19 نوفمبر - 14:19
