جهزي نفسك عشان في عريس جي يتفرج عليكي باليل!................مناقشه مفتوحه

*اسئلتي للبنات*

1_ترضي ان عريس ييجي يشوفك ف بيت اهلك وانتي عمرك ما شفتيه؟

2_وهيبقي احساسك ايه وهو هيشوفك لاول مره؟

3_ولو رفضك هتحسي بإيه؟

4_وياتري هتعيدي التجربه دي مره تانيه؟


*اسئلتي للشباب*

1_ترضي تروح تتجوز بنت من غير ما تعرفها او لمجرد انها حلوه ومؤدبه واهلها طيبين وتلغي الحب من حياتك؟

2_هيكون احساسك ايه وانت رايح تشوف عروسه لاول مره؟

3_شايف انك ممكن تكون نفسك ف كام سنه او يكون سنك اد ايه علي ما تفكر جديا ف الجواز؟



طب ولو افترضنا ان العريس وافق علي العروسه والجوازه مشي
طب الحب هيروح فين؟
ولا خلاص المفروض مفيش بنات تحب ولا ترتبط عشان اكيد البنت مش هتتجوز اللي بتحبه لان اهلها عايزين العريس الجاهز؟

بصى بقى ياستى أنا معاكى ف كل اللى انتى قولتيه وطبعا واضح أوى رفضك لجوازة "الصالونات"
بس انت عارفه المشكله فين ؟
المشكله مش ف الشاب ولا ف البنت، المشكله ف العرف وتقاليد مجتمعنا
أنا معاكى إنه أسلوب مستفذ بعض الشىء لكن فيه ناس هاتقولك من حق العريس أنه يشوفها"رؤية شرعية"















بالنسبه للسؤال الاول وبدون تكلف أو تجمل ف الرد
كتير من الجوازات الىلى بيكون فيه قبلها تعارف مسبق بتبوء بالفشل وليست كلها وممكن يكون العريس ده على علاقه وطيدة بأحد الاقارب وواثق من أخلاقهم فبيقدم على الفتاه متيمنا فيها الزوجه الصالحه
أما عشان أنا عمرى ماشوفته فممكن جدا يكون واحد متربى معاكى وتفاجىء إنك ماتعرفهوش كويس والعكس صحيح
يعنى حكاية واحد تعرفيه او ماتعرفيهوش فى كلا الحالتين ممكن يكون غامض بالنسبه لك
وبكده أبقى جاوبت على السؤال الرابع

لو اتكلمنا عن الحب فهو لازم يكون وجود بس بيبدأ بالارتياح النفسى ثم المعامله الطيبه بين الزوجين والعشره ، وطالما إنه بييجى بعد الجواز يبقى مافيش داعى إن الواحده تكون على أمل صعب تحقيقه وكمان عشان مايكونش فيه إى حاجه فى غير رضا الله


متشكرة على الموضوع الهادف يا فرى راى بس مش عاوزاكى تاخدى فكره عليا أنى راجعيه لو خسبتيها هتلاقى أكيد فيها حاجه صح
وأقولك حاجه ولو عاوزه زوج الح يبقى تقولى الدعاء ده
"اللهم ارزقنى وبنات المسلمين بالزوج الصالح والبيت الصالح والولد الصالح اللهم أنت خير الرازقين"











أما السؤال التانى : بصراحه مش هاقدر أوصفه لأنى لسه ماجربتوش









السؤال التالت:ده طبعا الكارثه مش بعيد أحد عنوانه وانتقم لكرامتى ،
أكيد هايكون أسوء موقف ف حياتى وممكن أى واحدة بعد الموقف ده تفقد الثقه ف نفسها مع العلم إنه هو اللى راح لها
وف الحاله دى بيبقى فيه ردين فعل
اما إن الفتاه تنغلق وتتعقد وترفض موضوع الرؤيه أو الزواج عموما
أو إنها اول واحد يتقدملها بعد العريس "اللى ماعندوش دم " إرضاء لكرامتها" وعلى أمل إنها حليه يندم على عدم إجتياز الفرصه

اقتباس :

1_ترضي تروح تتجوز بنت من غير ما تعرفها او لمجرد انها حلوه ومؤدبه واهلها طيبين وتلغي الحب من حياتك؟

2_هيكون احساسك ايه وانت رايح تشوف عروسه لاول مره؟

3_شايف انك ممكن تكون نفسك ف كام سنه او يكون سنك اد ايه علي ما تفكر جديا ف الجواز؟

بالنسبة للسؤال الاول انا عمري مارضى اروح اشوف عروسة لمجرد انها عجبانى لان ممكن اكون انا مش عجبها وانا عمري مارضى اتجوز و اعيش مع واحده غصب عنها لا زم على الاقل اكون اتكلمت معاها اكتر من مرة واحس انها مستلطفاني مش لازم يعني يكون حب

اما بالنسبة للسؤال التاني انا معتقدش اني ممكن اروح اشوف عروسه لاول مره لو عجبتني اخدها ولو معجبتنيش اشوف غيرها كانها سلعة

اما بالنسبه للسؤال التالت انا ممكن افكر في الجواز في 27 والعروسه تكون 23 .24

وشكرا على الموضوع

بالنسبه للسوال الاول انا طبعا ارفض الاسلوب ده خالص انا عمري ماكنت سلعه في بترينه اللي تعجبه و يدفع فيها هو اللي ياخدها انا مش كنبه او جماد انا انسانه ليا قلب و احاسيس و مشاعر
بالنسبه للسوال التاني انا اهلي رخصوني خالص و ان مفيش مراعاه لقلبي و احاسيسي وده يعتبر اهانه ليا و لكرامتي و حاكرهه
بالنسبه للسوال التالت اقول الحمدلله انا خلصت من الهم التقيل ده و اصلي ركعتين شكر
بالنسبه للسوال الرابع لالالالالالالالالالالالا طبعا لو دفعوني مال الدنيا كلها

اقتباس :

1_ترضي تروح تتجوز بنت من غير ما تعرفها او لمجرد انها حلوه ومؤدبه واهلها طيبين وتلغي الحب من حياتك؟

والله لو فيه واحده حلوه ومؤدبه وأهلها طيبين هعوز أيه تانى والحب أكيد هياجى
بعدين ده لو مجاش بمجرد إنى أشوفها والحب برضو شىء ضرورى بيجعل فى
إستمراريه للزواج حتى لو فيه مشاكل أو ظروف مش كويسه لذلك الحب شىء
ضرورى وحتمى والمواصفات دى أقبل بيها أكييييد.

اقتباس :

2_هيكون احساسك ايه وانت رايح تشوف عروسه لاول مره؟

حاسس إنى عاوز أكل حواوشى!!!
لأ طبعا هكون فرحان مع قليل من الإرتباك لأنى بالنسبالى دى حاجه مصيريه
ومش هتجوز تانى هيا مره وخلاص وده لو مكنتش شوفتها يعنى ،إنما لو كنت شوفتها
يمكن أرتبك أكتر لأن العقل الباطن متعلق بصوره معينه بيهتز لها القلب بمجرد رؤيتها
مره تانيه وده اللى إسمه الحب لذلك الإحساس هيكون إرتباك مختلط بفرحه بقليل
من الحزم علشان تعرف إن الشخص ده جاد وهو اللى يصلح يكون زوج ليها
وبرضو قليل أو كثير من الإحترام لا بد منه لأجل سمو العلاقات الأسريه.

اقتباس :

3_شايف انك ممكن تكون نفسك ف كام سنه او يكون سنك اد ايه علي ما تفكر جديا ف الجواز؟

والله بعد المستوى الرائع فى التعليم بالنسبالى والخطى الثابته اللى بخطوها على طريق الفشل
ممكن تتأجل كتير بس أتوقع على 27 أو اكتر بشويه وده للظروف اللى بتحوطنى وممكن
تحيط أى شاب تانى سواء بالنسبه لتكوين الذات العلميه أو الإقتصاديه أو النفسيه وأنا
بأشجع الزواج المبكر للشاب لأنه حصن ليه وأهو يبقى حدد جزء كبير من حياته ويبتدى
يحقق أهدافه العمليه بالإضافه إلى قول الشيخ الشعرواى أن الرجل يتزوج شابا لينجب أطفالا
تكون له أبا فى طفولة الشيخوخه لذلك مينفعش الواحد يتجاوز الثلاثون وهو قادر والظروف متاحه ليه وميتجوزش إلا بقى لو كانت الظروف زفت والكلام ده يبقى قضاء ربنا ومفيش فى إيده حاجه بالإضافه إنى مش كل العرايس بيقبلوا اللى لسه بيكون نفسه وربنا يعين الشباب
كله ويوفقهم لأنهم عماد البلد وإذا صلحوا صلح البلد والضد بالضد.

وشكرا على الموضوع الجميل يا بشمهندسه

أولا أشكرك على موضوعك المتميزفهو فعلا يستدعي الحوار وإبداء الرأي

ولكن بدون تكرار للكلام حتى لاأطل في الحديث فرأيي ينطبق مع رأي م/رامي

وباتباع وتطبيق ديننا الإسلامي دين اليسر والسهولة في مثل هده الأموروفي جميع أمور حياتنا لانجد أبدا إهانة للمرأة

ولاللرجل وكلاهما يحتفظ بمكانته وكرامته واحترامه

اقتباس :

*اسئلتي للبنات*

1_ترضي ان عريس ييجي يشوفك ف بيت اهلك وانتي عمرك ما شفتيه؟

اقتباس :

2_وهيبقي احساسك ايه وهو هيشوفك لاول مره؟

اقتباس :

3_ولو رفضك هتحسي بإيه؟

اقتباس :

4_وياتري هتعيدي التجربه دي مره تانيه؟

1_ترضي تروح تتجوز بنت من غير ما تعرفها او لمجرد انها حلوه ومؤدبه واهلها طيبين وتلغي الحب من حياتك؟

لا .....
وع فكرة الموضوع دة حصل معايا حقيقى من شهر ونصف ... وعمى كان عاوز ياخدنى يفرجنى على واحدة ( حلوة ... ومؤدبة ... وبنت ناس ) وانا اقتنعت بكلامه وكنت هروح فعلا
ولكن اصدقائى ذوى الخبرة بعادات بلدنا نصحونى انى ماروحش وقالولى
لو روحت ( يبقى اتدبست يامعلم ) وقالوا اهم شئ القبول من الطرفين وممكن البنت اللى هتشوفها
ماتتعيبش بس مافيش قبول منك ناحيتها او العكس .... ودة سبب مش هتقدر تقوله فى البلد دة
وانا اقتنعت بكلامهم وماروحتش .... واسأل على النصيب

2_هيكون احساسك ايه وانت رايح تشوف عروسه لاول مره؟
احساس بالتفاؤل انى هقابل فتاة احلامى
3_شايف انك ممكن تكون نفسك ف كام سنه او يكون سنك اد ايه علي ما تفكر جديا ف الجواز؟
ان شاء الله هتجوز بعد عيد الفطر القادم مباشرة

اولا انا بشكر المهندسه انها فتحت الموضوع ده واللى عايزكم تعرفوه انه لو انتم يابنات رافضين الوضع ده فاحنا الشباب برضه رافضينه بس نيجى نسال نفسنا هو ليه جواز الصالونات ده وللدرجه دى البنت رخيصه ؟؟؟ احب اقولك انه ماعاش ولا كان اللى يقول عليكم كده يعنى انتى ليه بتبصى ع الموضوع من جانب واحد بس انتى بتقولى انه افرض انه البنت معجبتش الولد يبقى شى عادى ويروح يدور ع غيرها ده حقه بس انتى كمان ليكى حق وهو انه ممكن هو يعجب بيكى بس انتى تكونى معندكيش قبول ليه هل ساعتها الزواجه لازم تتم والله لو كان حتى الشاطر حسن وانتى مش عايزاه فمن حقك انك ترقضى وتقولى لا . ولا انتى رايك ايه ؟؟؟ بعد كده انا عارف انه من حق كل بنت انها تحب وترتبط باللى بتحبه وده طبعا شى جميل وياريت كل البنات يتزوجوا بالطريقه دى بس للاسف ده عاده مش بيحصل وانتم عارفين اكيد الاسباب وهو كله والنصيب بس اللى خلانا ف الوضع ده هو الوضع الا قتصادى اللى احنا فيه يعنى مثلا الواحد مننا مش بيقدر يكون نفسه غير ع التلاتين ياترى هو هيتجوز قبل كده اذاى وافرضى انه واحد كان بيحبك وتحبيه هل هتستنيه لغايه مايكون نفسه ولو انتى استنيتى هل اهلك ف البيت هيستنوا الايام بتعدى واحنا لسه مش عارفين نلبس دبل؟؟؟ مش بيت وزواج واسره بعد كده العنوسه زادت بدرجه رهيبه لدرجه انه الشيوخ بيطالبوا القادر من الرجاله انهم يتجوزوا 2و3و4 بدل واحده!!!! وانتم اكيد عارفين الحال ف البيوت شكلها اذاى والبنت دلوقتى بتتجوز ع التلاتين ويمكن بعد كده فهل بعد ده كله البنت هيجيلها تفكير اذاى اتزوجت ولا الطريقه اللى اتزوجت بيها ؟؟؟. الزواج اكيد ستره وانتم عارفين انه الوضع مش مستحمل انه البنت تفكر انها اتزوجت زواج صالونات ولا قصه حب بيتحاكى عنها الناس ؟! . بس ف الاخر انا بقول لكل بنت ولكل شاب انهم يحاولوا ع قد مايقدروا انهم ميضيعوش حبيبهم من ايديهم واتمنى انه ربنا يسعد كل الناس وكل واحد يلاقى نصفه التانى وللضروره احكام " ولكم منى جزيل الشكر" وشكرا مره تانى يابشمهندسه ع موضوعك المتميز ده .