مهازل بعض الطلبة..عرض مستمر

تذكير بمساهمة فاتح الموضوع :

أحب أن أتكلم في موضوع شائك استرعي انتباهي منذ فترة ولكنه زاد عن حده في الفترة الأخيرة
لقد رأينا وسمعنا الكثير من المهازل وسؤ التصرف ولا أقول الأدب من بعض الطلبة
أولا:طالبين يتشاجران علي الكافتيريا ويشاهدهم العميد فيذهب ويكلمهم فما كان من أحدهم إلا أن
تجاوز ورفع صوته بطريقة فجة وتكلم بالفاظ لا تليق بطالب محترم يتكلم مع عميد كليته او حتي رجل أكبر منه سنا
فمن أين أتي هذا الطالب بما قال وأين أنت يا حمرة الخجل عندما يتكلم طالب مازال في اعدادي هندسة بهذه الصورة
اين تربيته وأين خلقه
ثانيا:قيام بعض الطلبة بتصرفات غير لائقة في حق أحد المعيدين وكأنه يعمل عندهم
بجد احنا عايزين ايه ؟ لما المعيد يعاملنا رسمي نزعل ونقول عنه ما قال مالك في الخمر
ولما يبقي كويس معانا ويعاملنا مثل أخوة له نتجاوز حدودنا معه وننسي أنفسنا ومن نحن ومن هو
ونتصرف تصرفات صبيانية لا طائل من وراءها إلا أذية باقي زملائنا فلماذا؟
ماذا سيكون رد فعل هذا الطالب عندما يكون السبب في أذية أناس كثيرين لا ذنب لهم سوي أنهم للأسف
زاملوه في هذه الدفعة المشؤمة التي أرثي لحالها
وماذا سيكون رد فعلنا نحن عندما نعلم أن هذا التصرف حدث من بعض الطالبات!!!!!!!!
ثالثا: سمعنا عن بعض التصرفات غير الأخلاقية التي حدثت من بعض طلبة اعدادي
هي ايه حكاية اعدادي هندسة السنة دي ولماذا كثر اللغط علي هذه الدفعة؟يا تري مين وراهم!
رابعا:هل الدروس الخصوصية التي كان يعطيها بعض المعيدين هي السبب في تجاوزات هؤلاء الطلبة
ولا هي مسألة بيئة وتربية غير سليمة كانت هذه هي نتيجتها!
وهناك المزيد من المهازل والتجاوزات ولكن لا يسمح المجال هنا لسردها لأنها لا تصح أن تصدر من طلبة
كلية هندسة مش حاجة تانية رغم أن الأخلاق لا تتجزأ
وأكيد في حاجات كثيرة أنا لا أعرفها ولكنها حدثت فما خفي كان أعظم
وأـخيرا أقول لهم ربنا يصلح لنا حالنا وحالكم حتي لا تكونو السبب في أذية أنفسكم أو غيركم
ومش عايز أقول حسبي الله ونعم الوكيل في كل اللي يتسبب في أذي لأي حد
ومش عارف ليه عندي احساس أن الموضوع هيتحذف من قبل بعض أعضاء الإدارة

رامي ربيع كتب:: انا راي انه يتعلق لوحه داخل المظله مكتوب عليها استراحه الطالبات .....

علي فكرة يا بشمهندس أسرة بداية عاملة يفط خشبية من سنتين من ضمنها اليفط دي ولغاية هذه اللحظة إدارة الكلية معطلة الموضوع ده

اذا كان الحق مش عاجب اللي في المنتدي فبلاش المنتدي احسن.من شويه قريت رد يحيي الاخير في هذا الموضوع ولقيت انه اخطا في بعض المعلومات واردت توضيحها ولكن يبدوا ان الكلام الذي كتبته والذي يعبر عن حقيقه كلها لم تعجب واحد من المشرفين والذي اتخذ قرار بحذفها دون ان يوضح وجهه نظره مما يدل علي ان الحقيقه لم تعجبه والساكت عن الحق شيطان اخرس
وحسبي الله ونعم الوكيل
اللهم بلغت اللهم فشهد
وشكرا.

ياريت يبشمهندسين المشرفين اللى حذف الرد يوضح هو حذفه لية ؟؟؟؟؟؟؟؟؟؟؟؟؟؟؟؟؟؟

الموضوع حكتبه مره تاني ولو اتحذف خليكم شاهدين:
-يا يحيي الموضوع اللي انت بتتكلم فيه انا والسكشن بتاعي كنا حاضرين الموقف كله وشوفنا كل حاجه واحنا كلنا شاهدين ان الطالبه دي تكلمت مع المعيد بطريقه قمه في قله الذوق والادب والاحترام ولو انا كنت مكان المعيد مكنش كفاني فيها طردها من الكليه كلها وفعلا لو المعيد عاوز يعمل كده فده حقه وياريت ما تتكلمش في الموضوع ده لانك ماكنتش قاعد ساعتها عشان تشوف الموقف.
-ثانيا ان قاعد في الكليه ديه من خمس سنين وخبرتي في الكليه اكتر منك وبقولها ان المعيد ده احسن معيد تعاملت معاه حتي الان فهو حسن الخلق وكويس خالص في تعاملاته مع الطلبه وان اكتر معيد حسسني اني اخوه الصغير بجد ومش انا بس اللي بقول كده بل كل الطلبه .وحتي في الموقف ده المعيد كان بعامل الطالبه كويس جدا لكن هي اللي معجبهاش رد المعيد وراحت مشوحه بيدها مع انه كان بيعملها بمنتهي الذوق!!!شوفت مسخره اكترمن كده.
-ثالثا بدل ما تروح تعتذر للمعيد راحت تقدم في شكوي وعماله تقول اصل كرمتي اتهانت مع ان محدش دسلها علي طرف وبالعكس خلت شكل المعيد قدام الطلبه زي الزفت !! بالله عليك ده يرضي مين؟؟
-رابعا ياريت يايحيي تسال اللي حضر الموقف وتحكم بالعدل بدل ما تسمع الخبر من اي حد او من حد متحيز لهذه الطالبه.
-خامسا لو شايف كلامي مش مظبوط انا كلي اذاني صاغيه ليك وممكن تناقشني.
ارجو ان الكلام مايزعلش الموضوع ده حصل قدامي وانا بقول اللي شوفته لان ده هو الحق والساكت عن الحق شيطان اخرس.
والسلام عليكم ورحمه الله

شكرا ليك ياطارق على ردك وسعة صدرك في اعادة الرد وان شاء الله موضوع الحذف مش هيتكرر تانى وانا اوعدك بكده

ياريت نسيب الناس فى حالها ونصلح أخطئنا قبل ما نتكلم عن اخطاء الاخرين وبعدين الطالب ده مرفعش صوته على العميد زى ما انت بتقول والطالب ده اعرفه كويس واعرف انه محترم ومتربى وذات اخلاق فاضله مش زى ما انت بتقول

اقتباس :: ياريت نسيب الناس فى حالها ونصلح أخطئنا قبل ما نتكلم عن اخطاء الاخرين

اذا مشينا بالمبدأ ده يبشمهندس اللهم ان مافيش حد هيصلح حاجة يبشمهندس غير كده احنا هنا مش بنتكلم عن شخص بعينة لان التعديات من الطلبة كانت من اكتر من واحد احنا بناقش المستوى الاخلاقي المتردي الى وصلت ليه طلبة الكلية بغض النظر عن الشخص اللى بيحصل من افعال بعض الطلبة والسكوت عليه هو الى وصل للمرحلة كنتم خير امة اخرجت للناس تامرون بالمعروف وتنهون عن المنكر ومن راي منكم فليغيرة اللى بيقول خليه في حاله بكرة الكارثة تطوله مفيش حد بيبعد عن تصحيح الخطأ بيبقي محمى لانه سكوته ع الخطأ بكرة هيلاقي الخطأ وصله

وكمان مع احترامى ليك لو كان ذو اخلاق فاضلة زي مابتقول عمرة مايتجرأ في يوم ويعمل مشكلة مع استاذة واكيد طبعا المعيد مش مجنون عشان يعمل معاه مشكلة من الباب للطاق كده اكيد في حلقة مفقودة في الموضوع

اشكر الجميع علي ردودهم وتجاوبهم وغيرتهم علي الحق
وكنت أنوي الرد علي البشمهندس يحيي ولكن بعد ما قاله المهندس fieلا داعي للتوضيح
أكثر من ذلك فما قاله يفي بالغرض تماما ويوضح وجهة النظر في هذا الموضوع
وأعتذر له عن الحذف الذي لا أدري لماذا تم من الأساس
وبالنسبة لموضوع مظلة البنات الذي أثاره الأخ جودزيلاا فمعه كل الحق فيما ذهب إليه
ولكني أري أن الحديث في هذه النقطة حق أصيل للزميلات فلم نسمع منهم أي شيء في
هذا الموضوع ولكني أري أن الولد الذي يجلس في هذه المظلة وهو يعلم أنها مخصصة للطالبات
هو انسان متنطع وكفي...وأؤيد الزميل رامي ربيع في اقتراحه ورأيه وأتمني تنفيذه عاجلا
وبالنسبة للأخ مروان فأقول له نحن لسنا أوصياء علي أحد وعندما نتكلم عن خطأ ما حدث بالفعل
فغرضنا هو المصلحة العامة ونحن نحاول أن نصلح من أخطائنا أيضا ولا نتصيد الأخطاء للأخرين
وما فعله هذا الزميل حدث بالفعل ونحن لا نتجني عليه مع كامل احترامنا له ولك
وأقول للأخ roo2a-benzلا تحزن وما حدث معك هو تصرف فردي من أحد أعضاء هيئة
التدريس وربما يكون له عذر والدليل ما فعله معك دكتور المادة حين تقبل عذرك بصدر رحب
وأخيرا أتمني من الجميع عدم أخذ الموضوع علي محمل شخصي فهدفنل من هذا النقد
هو المصلحة العامة للجميع وإصلاح أي أخطاء تحدث بينا ومن بعضنا لأجلنا جميعا

شكرا يا جودزيلا علي ردك المتميز علي الأخ مروان
ولكن هناك نقطة أحب توضيحها فمشكلة هذا الطالب مع السيد عميد الكلية وليس مع معيد
وهذا الطالب كان يتشاجر مع زميل له علي الكافتيريا وشاهده العميد وكان معه رئيس قسم كهرباء
فتحدثا مع الطالبين فاستجاب أحدهم وأقر بخطأه أما الأخر فرد بطريقة تتنافي تماما مع قواعد الذوق والأدب وتناسي مع من يتحدث ولا أدري لماذا وإلي أي شيء يركن هذا الطالب ليتصرف هكذا

شكرا لإدارة المنتدي علي حسن إستيعابها للموقف ويظهر ده هيكون أخر شكر هنزله

متشكرين جدا علي التوضيح يا بشمهندس خالد
وقد تكلمت فأوضحت وأجليت الحقيقة وأعتقد أن الأمور الأن واضحة تماما للجميع

أرجو من الأخوه عدم التطرق مره أخرى إلى أسماء معينه أو شخصيات بعينها وأيضا
أرجو ذكر الدلائل وعدم التحيز لأحد مهما بلغت درجة القرابه أوالصداقه والتكلم أيضا
باحترام فمهما أخطأت شخصية المعيد أو الدكتور فهما شخصيتان تستحق الاحترام
ومن منا يقدر أن يحاسبهم أو يذكرهم بسوء لذلك أى رد سيذكرهم بسوء حتى ولو كان صحيح
سيتم طرد صاحبه فورا مهما بلغت رتبته ويتم مسح رده فورا.

الحبار
مدير عام المنتدى

شكرا وتحياتى الى الادارة الحكيمة دائما فى كل المواقف المتمثلة فى المدير العام الحبــــــــــار

متشكر يا حبار علي تدخلك الحاسم في هذا الموضوع
وياريت نبقي موضوعيين في ردودنا ونقدنا

بسم الله فاتحة كل خير وتمام كل نعمة
أنا أعيب على الإخوة في
إشارتكم في الردود إلى أشخاص بعينها ثم النفي في رد آخر في أنكم تشيرون إلى أحد
لا أريد سوى تذكرتكم بآيتين من كتاب الله لعلها تفيدكم في حواركم
((يا أيها الذين ءامنوا إن جاءكم فاسق بنبأ فتبينوا أن تصيبوا قوما بجهالة فتصبحوا على مافعلتم نادمين))
وقوله تعالى
( خذ العفو وأمر بالعرف وأعرض عن الجاهلين)

وأريد التنبيه إلى أني لا أرى في بعض الردود سوى الدخول تحت خطيئة الغيبة والعياذ بالله
والرسول صلى الله عليه وسلم يقول ((لقد أهلك من كان قبلكم القيل والقال وكثرة السؤال))
وسلام على من اتبع الهدى

اشكرك اخي علي مرورك وردك
انا عندما كتبت هذا الموضوع كتبته بناء علي أشياء شاهدتها بنفسي ولم أتجني علي أحد
ويمكنك أن تراجع كل كلمة كتبتها هنا لتتأكد أنني لم أحدد شخصا بعينه في الموضوع
ولم أغتاب أحد فنحن ننتقد تصرفات وأفعال وليس أشخاص
فمن نكون نحن حتي نعطي أنفسنا حقا ليس لنا وأنا لست مسؤلا عن أي ردود كتبها غيري
وياريت تقرأ الموضوع كويس والردود حتي تحكم حكم عادل بلا أي أحكام مسبقة واتهامات جاهزة
وأرد علي كلامك بهذا الحديث الشريف
عن أبي سعيد الخدري رضي الله عنه قال:سمعت رسول الله صلي الله عليه وسلم يقول:-
(من رأي منكم منكرا فليغيره بيده,فإن لم يستطع فبلسانه,فإن لم يستطع فبقلبه,وذلك أضعف الإيمان)
رواه مسلم

اقتباس :: تم التعديل بواسطة الحبار
إنظر قسم مقهى الإداره

السلام عليكم
يا جماعة اعتقد انى اول واحدة هتقول كلمه كويسة عن معادلة عشان انا منهم بس و الله انا هقولكو الحاصل بامانة
اولا انا واحدة من جروب معادلة و بعد في الكافتريا كمان عايزة اقول ليلبشمهندس البيقول معادلة واخدنها حب و غرام ان الحمد لله كل الجروب زى اخوات و لوقتنا ده محدش اتجرأ و عمل كده كل الموضوع ان احنا جروب بنحب بعضنا و نخاف على بعض و اهالينا عارفين كل اصحابنا و مش بنضايق او نيجى على حورية حد يمكن و البشمهندس البيقول ان معادلة شايفين الباقى بيئة ده غلطان كلنا بنى ادمين زى بعض و ياريت لو عندو موقف شافو بعنية يقولو لكن لو الكلام ده طالع ناتيجة كبت فبقولو ازاى هنشوفكو بيئة و احنا عايشين و واكلين عيش و ملح مع بعض. .اتمنى من البيقول ان معادله بيعدو تحت الجراش يركز كويس هيلاقينا على طول الجروب مع بعض يا اما في محاضرات يا اما في كافتيريا و هيلاقى الجراش الناس العلى طول فيه ولا هما اعدادى ولا معادلة......كفايا كل حاجة مش كويسة تبقى على معادلة اعدادى..الحمد لله فى ناس قربو لينا و عرفونا كويس و بيحبونا و يشهدو ان مش بنعمل حاجة غلط. و بعدين معادلة اعدادى البيعدو فى كافتيريا عددهم قليل و كدة بتشهرو بيهم و بالاخص البنات في نقطة حب و غرام و المشكلة ان ده ظلم و باطل...زو ربنا يهدينا جميعا
السلام عليكم

يا safy محدش يقصد حد بالتحديد
وما حدش قال ان كل طلبة المعادلة مش كويسين
وما حدش يقدر يقول كده
وعلي فكرة انا اتعاملت مع طلبة معادلة كتير محترمين وكويسين جدا جدا
وياريت ما حدش ياخد الكلام علي محمل شخصي
وما حدش يضايق
لاننا في الاول والاخر كلنا اخوات وزمايل تجمعنا كلية واحدة

وانا كان نفسي اقول حاجة
لما حد بيعمل حاجة مش صح
ما ينفعش نقول ده معادلة ولا لأ
وما ينفعش نقول طلبة دفعة كذا

اللي بيغلط ده انسان زيي وزيك
يعني اشمعني لما حد بيغلط من أي حتة
مش بنقول ده غلط عشان من البلد الفلانية
كل واحد يتحمل نتيجة غلطه لوحده
وما ينفعش السيئة تعم هنا
لاننا كده بنظلم ناس كتير

طبعا زي الاخوات على عينا وراسنا من فوق انما الظاهر غير كده خااااااااااااالص اولا لازم حضرتك تعرفي ان الاسلام حرم الصداقة بين الولد والبنت وهذا يتبين من قول الحق سبحانة في سورة النساء ولا متخذات اخدان هو ممكن نقول زي الاخوات لو هيساعدك ماشي لوجه الله طبعا انما الي شايفة تهريج وحاجة اخر مسخرة وبلاش احكى بالتفصيل قلة الادب اللى انا شفتها من الجروبات خصوصا اللى انتى بتقولي عليه وتاكدي ان لو بدر منهم اي تعدي زي الى انا شفته ده انا هكتب فيهم مذكرة لعميد الكلية فورا لان الامور خرجت عن نطاق الاحتمال
اوعدك وانا مش بوعد كدب انه هيحصل انا مش عيل صغير ولا حاجة من دي الحمد لله الواحد لف في الدنيا واكبر منكم وعارف بتنتهى الحياة دي بايه بتبدي زي الاخوات واحترام والشيطان طبعا مش بيتوصي ياعنى فياريت تقطعوا الطريق عليه من الاول بالالتزام بشرع الله
واوعدك بردوا لو معايا كاميرا هجيبلك الناس بالصور وباسم فرقتهم عشان تتاكدي ان الناس مش بتجيب حاجة من دماغها
مع احترامي الشديد لكل اللى انتى ذكرتيهم من الاهل والناس الكويسة انما احنا منهجنا كمسلمين في الحياة شرع ربنا الى مبني على الكتاب والسنة ياعنى اكيد احنا ناس كبيرة وعدينا 18 سنة وعارفين الصح من الغلط وعارفين بردوا ان افعالنا لازم تكون على منهج شرع ربنا ونصيحة من اخ وان تطع اكثر من في الارض يصدوك عن سبيل الله

أشكر الفرعون العاشق علي موضوعه المتميز

ولكن لي وجهة نظر أتمني أن تجد لديكم أذانا صاغية
من المفروض عند طرح قضية أو موضوع ما يلمس وضع نعيشه في الكلية
أن نتكلم للإصلاح وتوضيح جميع وجهات النظر الخاصة بتلك المواضيع
وليس التشهير بأحد أو التعريض بسمعة الأخرين فذلك أبعد ما يكون من زملائنا
وأقول للأخ جودزيلا لا تأخذ الأمور علي محمل شخصي وكن صبورا
وياريت نكون أكثر تسامحا مع بعضنا البعض ولا نتصيد الأخطاء للأخرين

شكرا ليك يابشمهندس العمده على مداخلتك وانا ماذكرتش حد بالتحديد وباين جدا من الكلام انا هنا بتكلم عشان الوضع الاخلاقي العامي يبقي في الكلية كويس احنا كلية بردوا ليها احترامها وتقديرها غير الكليات التانية بالمستوى اللى احنا فيه ده بعد كام سنه هنبقي معهد خدمة تانى عن نفسي انا لا اقبل ان اكون موجود في جو ملوث فية اناس غير ملتزمة لان تجاوزتهم تعكر صفوا كل من يريد العيش في سلام وفي جو نقي

أشكر الجميع علي تجاوبهم واهتمامهم
ولكن لي ملاحظة علي بعض الردود ياريت تجد أذانا صاغية لدي أصحابها
لقد وجدت في كثير من الردود أنها تركت الموضوع وقامت بالتعليق والرد علي
أراء بعض زملائهم وتفنيدها وأحيانا تصيد الأخطاء لهم لا أدري لماذا
فنحن عندما طرحنا هذا الموضوع للنقاش لم نقصد أن يتحول لمهاترات بيننا
فليس معني حرية الرأي والتعبير أن نتكلم دون اعتبار لأي شيء وأن ينصب بعضنا
أنفسهم حماة للفضيلة ومدافعين عنها فليس من حق أحد أن يسفه رأي زميل له أو يعترض عليه بصورة مؤسفة
فهذا لا يليق بنا ولا بكليتنا التي نشرف بالإنتماء إليها
وأخيرا أقول للأخ جودزيلا أنا أقدر غيرتك علي الكلية وحميتك للحق وتدينك
ولكن ياريت تخفف من حماسك المفرط حتي لا يتحول من نعمة لنقمة!!
وأبدا لن تتحول كليتنا لمعهد خدمة مع كامل احترامنا للجميع......

جزاك الله خيرا يابشمهندس الفرعون العاشق على النصيحة دمتم في رعاية الله وحفظة

» مهازل الثانوية العامة
» تابع : مهازل الثانوية العامة
» ابحث مع الطلبة
» فوضي وفضائح الكرة المصرية عرض مستمر!؟(2)
» حلم فيلبس مستمر وسقوط أربعة أرقام قياسية عالمية