انا حبيت ان تكون مشاركتى هى اواخر المشاركات وده عشان اسباب كتيره والاداره عارفاها
اما بالنسبه لراى فانا ضد قفل القسم لمجرد ان المنتدى هو منتدى هندسى مش معنى وصفه بانه منتدى هندسى انه ميكونش فيه كل الاقسام مهما كانت وخصوصا اذا مكانش فيه تعدى للحدود او الادب لكن القسم بيعرض جزء لا يتجزأ من حياة اى بنى ادم " الحب" موجود جوا كل واحد فينا وبصور مختلفه وعلى فكره فى ناس كتير جدا بيكون جواها العاطفه موجوده من غير ما يكون فى علاقه حقيقيه فى حياتها يعنى ممكن تلاقى الواحد بيكتب شعر او خواطر لمجرد شعور جواه من غير ما يكون فى علاقه بتدفعه لكتابة الكلام ده ومش معنى كده اننا نقفله القسم
اى نعم اسم المنتدى منتدى هندسى لكن احنا مساحه كبيره جدا لعرض ما بداخل كل واحد فينا من مشاعر واحاسيس وخواطر وابداعات وشعر وقصص ونكت وحب يعنى الموضوع متكامل مش بس دراسه او هندسه وبس
احنا المفروض نصحح من الغلط مش نشيل الموضوع كله لمجرد ان فيه جزء غلط يعنى ممكن فعلا نعيد هيكلة القسم بطريقه تليق بيه لكن عشان نقفله ونقول اننا مش جاين نبيع فل وياسمين او ان فى اماكن ومنتديات كتير نقدر نحب فيها براحتنا ده مش منطق ولا اسلوب لحل المشاكل
انا شايفه ان اغلاق القسم مش هيجيب اى نتيجه لانا بنعلى بالمنتدى مش العكس وبعدين انا عايزه اقول ان القسم ده مش بيشين للمنتدى ولا يخلينا نحط راسنا فى الارض زى ما قال القبطان انه مش حاجه تخلينا نرفع راسنا وليه هو الحب يخلينا نوطى راسنا الحب فى راى هو اساس الحياه اللى احنا عايشنها الخب موجود جوا كل واحد فينا بكل اشكاله وانواعه حتى الحب اللى بين الولد والبنت ده موجود ومنقدرش ننكره والا نبقى بنغالط نفسنا الحل يبقى فى تقنين شكل الحب ده وطريقة التعامل معاه
وانا راى ان لو ربنا اراد والقسم ده متقفلش وده اللى انا بتمناه ان تبقى من اوائل المواضيع الجديده فيه هى كيفية تقنين الحب بكل اشكاله وان ميكونش القسم ده لمجرد الحب والهيام يعنى زى ما بتقولو لاء يبقى فيه مواضيع عن كل انواع الحب عشان مننساش اننا نحب كل شئ فى حياتنا ده احنا ساعات بنلاقى ناس مش عارفه تحب نفسها وده برضو نوع من انواع الحب وفى ناس مش عارفه تتعامل مع اهلها وبيؤدى بيهم انهم مش بيحبوهم وده نوع تانى وفى ناس مش عارفه تتعايش مع اصاحبها عشان مش عارفه تحبهم وده نوع تانى وفى ناس مش عارفه تحب خطيبه او خطيبته او مراته او جوزها وبيؤدى للمشاكل المستمره وبيؤدى للطلاق كمان وحاجات تانميه كتير والحب مش بيخلص ولا بينتهى والا الحياه نفسها هتنتهى وطبعا واكيد قبل كل ده بيكون حب الله ورسوله لكن انا مش هقدر اتكلم عن النقطه دى فى القسم ده لان فى قسم خاص للاسلاميات وده كفيل بتعبيرنا عن حبنا لله ورسوله كلن كمان زى ما فى دين فيه دنيا وزى ما فيه حب فى الدين فيه حب فى الدنيا حتى وان كان الحب ده بين ولد وبنت فهو موجود برضو مش هننكره لكن ليه منعرفش الولد ازاى يحب صح ويخاف على الانسانه اللى هو فكر انه يحبها ومنعرفش البنت ازاى تحب صح عشان تكسب الانسان اللى بتحبه ده طول عمرها ويكون فى الحلال
كل اللى عايزه اقوله ان فى حلول كتير اوى افضل من غلق القسم لاننا مش عايزين ننكر واقع موجود فعلا ونعمل نفسنا مش شايفينه وراى برضو اننا ننزل قوانين جديده للقسم عشان يكون دايما للاحسن والافضل
يا ريت تكون وجهة نظرى وضحت ومعلش اذا كنت طولت عليكو
موضوع: إستفتاء لغلق قسم الحب 
السبت 25 أبريل - 21:51
