"محمول السيد الرئيس" خيال علمى:
ماشى فى أمان الله فى أرض الله...بالتحديد عند محطه كوبرى القبه..الشارع فاضى والجو برد وأنا مش طايق نفسى ثم فجأه موكب كبير يعدى بسرعه من جنبى..اخدت بالى إن حاجه صغيره وقعت من عربيه مميزه فى الموكب..أقرب أشوف هى إيه..ألاقيها موبايل جديد وشكله حلو قوى..أفرح..وأخده البيت..وهناك اكتشف إنه بتاع الريس..أفكر إن يمكن الريس رماه عمدا بعد أن اكتشف غيره محتاج ليه..او يكون رماه بنيه التبرع منه لأحد فقراء الوطن..ومن ناحيه الفقر..هكون أنا الأكثر وطنيه فى مصر كلها.
أقلب فى الموبايل..وأقرر إنى أشوف إيه يا ترى اللى بيميز موبايل سياده الريس عن أى عده تانيه من عدد الشعب..؟
أول شىء بيميز الموبايل هو الcover , وده بقى مختلف عن أى واحد تانى ممكن تلاقيه فى أى حته..علم مصر يا جدعان..بنفس النسر الموجود على العلم..بالألوان التلاته الأحمر والأسود والأبيض..موبايل وطنى زى الريس..تحيا مصر يا عم على رأى أخوانا اللمبى.
أدخل الرسايل..أول خمس رسايل مكتوبين بنفس الشكل.."كاه تمام يا باشا","كله تمام يا بابا"..دى في منها اتنين..والأخيره كانت"every thing is ok".
الرسائل بعدها لم تخرج عن كونها رسائل تهنئه عاديه بالأعياد من الوزراء والشخصيات العامه.
النغمات كانت تستحق التركيز أثناء تفحصها..النغمه الأم للموبايل كانت طبعا رأفت الهجان..لدرجه إنى بكيت وأنا أسمعها للمره الأولى.. وفى آخر النغمه ستجد صوت يتردد"مصر يا رأفت"..الصوت يتردد فى تأثر واضح.
نغمه الابن كانت "الواد قلبه بيوجعه وعاوز حد يدلعه" أما نغمه أى رقم غريب كانت" مصر التى فى خاطرى وفى دمى"..ولكن ما لفت نظر فعلا النغمه المخصصه لنواب المعرضه ولرموز كفايه كانت "علشان أصالحك وأرضى عليك حاجات كتير لازم تعملها"..لكن هناك نغمه مخصصه ل"no number..." ودى كانت أغنيه "قوم اقف وأنت بتكلمنى"...حاولت أفهم يا ترى المقصود إن الريس يقف أم المتصل نفسه..بس معرفتش فى الاخر!!!.
الشىء اللافت للنظر أن موبايل الرئيس لم تكن به خاصيه الاهتزاز..وده أمر طبيعى جدا ألا يهتز موبايل الرئيس كما أن الرئيس نفسه لم يهتز من فوقنا طوال مده حكمه..وبما أن الرئيس سيظل فوقنا مادام به قلب ينبض..فإن الموبايل بتاع سيادته لن يهتز ما دامت به بطاريه مشحونه.
حاولت أعرف ايضا رقم الموبايل اللى فى إيدى..اتصلت بالبيت..لكن لقيت إظهار رقم الطالب بيرتعش..ورنه التليفون بتاع البيت تحولت لزغروده..والشاشه بدل ما يتكتب عليها رقم اتكتب عليها "elrayes..calling you.." .
بعد محاولات كثيره اكتشفت أن الريس لا هو 010 ولا 012 ولا حتى 018 ولا 09000, هو زيرو وبس..
طبعا يا عالم.. رقم مميز..الأرقام اللى بعد رقم زيرو سهله جدا..767676 وده طبعا تيمنا بالماده التى يهوى الرئيس تعديلها لأجل عيون الشعب.
قعدت أفكر يا ترى التليفون ده حد بيتصل بيه وتطلع النمره غلط..وهل لو طلعت النمره غلط والمتصل اكتشف إن الرقم ده رقم الرئيس..هيعمل إيه؟! ممممم..أكيد هيعمل زى الست بتاعه فيلم "ناصر 56"..أول ما الريس يقول انا حسنى مبارك..يروح المتصل قايل.."ربنا يحرصك يا ابنى"..ويروح قافل علطول.. ولا بلاش يقفل عشان تبقى قله ذوق ويمكن الريس يضايق منه وتبقى مشكله..هو يقول "ربنا يحرصك يا ابنى بعد إذن سيادتك هقفل.. سلامو عليكم".. لكن المشكله الحقيقه هى إن مصر كلها لا يوجد بها بنى آدم قادرانه يقول للريس "يا ابنى"..وده لظروف تتعلق بالسن والمقام طبعا!
السؤال اللى كان محيرنى فعلا يا ترى موبايل الريس خط ولا كارت؟؟.. جربت اتصل بخدمه العملاء..رد عليا رئيس شركه المحمول شخصيا وقال بمنتهى الثقه "للأبد يا ريس للأبد..رصيدك شغال علطووول..لاينفد أبدا".
الحقيقه بعد أن قلبت فى الموبايل لقيت إن من واجبى كمواطن إنى ارجع الموبايل للريس..وحتى لوكان الريس رماه لى خصوصا من باب التبرع بموبايله..فأنا هقوله يا ريس إنت ربيت الشعب إن نفسه تكون عزيزه وإنه ميخدش أى حاجه تترميله..وإنك لو عاوز تدهولى تدهولى بشكل يليق بى كمواطن فى دوله تحترم المواطنين..(عجبتنى تحترم المواطنين دى وقررت إنى لازم أقولها بصوت أعلى شويه)..
خدت بعضى وعلى كوبرى القبه..و..
- وجدت هذه الورقه بجوار موبايل..مرمى على الأرض فى كوبرى القبه..ولا يزال البحث جاريا عن كاتب هذه السطور السابقه..............
موضوع: "محمول السيد الرئيس"خيال علمى. 
السبت 30 يونيو - 9:07
