لييييييييييييه؟؟؟؟؟؟؟؟؟؟

ليه

ليه محدش حاسس بينا في الزمن ده؟
ليه لو غلطت الكل بيفرح فيك و لو نجحت قليل اللي يهنيك؟
ليه لو خرجت عن اللي المجتمع اتعود عليه تبقى انسان منحرف؟
ليه الواحد بيخاف يقول افكاره لحد يتفهم غلط؟
ليه لازم راي الكبير هو اللي يكون صح؟
ليه لما تغلط تقول لصاحبك و ما تقولش لأهلك؟
ليه يقولو ان ام كلثوم حلال و نانسي عجرم حرام؟
ليه دايما برامج الكبار في التلفزيون و البرنامج المفضل لك يبقى تافه؟
ليه لازم قدوتك يبقى راجل و مينفعش تكون ست؟
ليه بننظر على كل ما هو غربي بنظرة اشمئزاز؟
ليه قاعد تشتكي من البطالة وانت قاعد في بيتك مبتتحركش؟
ليه لما ما بيتقبلشي ان يكون هناك صداقة مع غير جنسك أو جنسيتك؟
ليه أبوك عايز تكون نسخة منه بالكربون؟
ليه بتخاف لما تغلط مع انك بشر؟
ليه تشتم في الريس وانت مهمل في مذاكرتك؟
ليه عايز الحياة السياسية تتغير و انت ممعكش بطاقة انتخاب؟
ليه احنا بنحب المنتدى ده عن غيره؟
ليه مابتدعوليش امتحانى يوم السبت الجاى؟
شكرًا

هو الاسئلة دى من عندك ولا نقالها ولا ايه النظام عشان لو انتا هرد على اسئلتك الكتير دي

modern scholar كتب:: ليه محدش حاسس بينا في الزمن ده؟

ماحنا في زمن الوحوش والناس مابيرحموش!!!

modern scholar كتب:: ليه لو غلطت الكل بيفرح فيك و لو نجحت قليل اللي يهنيك؟

[center]كده تبقي المشكلة فيك لأنك بتعتبر الناس دي من الاصدقاء لكن لو صنفت أصدقائك صح وأعدائك صح مش هاتحس بكده.

modern scholar كتب:: ]
ليه لو خرجت عن اللي المجتمع اتعود عليه تبقى انسان منحرف؟

خللي في بالك انه "لا تجتمع أمتي علي ضلال " ده غير ان الرأي اللي مش عاجبك ده بيكون اتكون علي مدي سنين وسنين ودايما الرأي العام بيتكون ببطئ وعبر عديد من الاشخاص وبنسبة كبيرة جدا بيكون صح ده غير ان الأصول والعادات والتقاليد إتوضعت للحفاظ علي كيان المجتمع وده اللي بيفرق المجتمع الشرقي عن الغربي وده اللي بيخللي معظم الغربيين اللي قابلتهم بحكم عملي في السياحة نفسهم يجوا يعيشوا في مصر وكتير منهم بالفعل لما بيطلعوا معاش بيجوا يعيشوا هنا .

modern scholar كتب:: ليه الواحد بيخاف يقول افكاره لحد يتفهم غلط؟

طيب لو حد صاحبك حضر معاك موقف سخيف وبعد ماخلص الموقف قالك "ياعبيط ايه اللي انت عملته ده؟" هيكون رد فعلك ايه بنسبة كبيرة هتسأل " ليه انا عملت ايه؟" لكن لو حد ماتعرفوش شاف الموقف وقالك "ياعبيط ايه اللي انت عملته ده؟" أكيد هاتخش فيه شمال خصوصا لوكان قدك مش أكبر منك ده هو الفرق ان صاحبك عارفك كويس وهيعرف يحكم عليك وانت بتثق في كلامه لكن لو حد تاني مايعرفكش فمايقدرش يحكم عليك وانت مش هاتثق في حكمه وهتعتبره تدخل منه بس.أتمني انك تقول أفكارك للقريبين منك اللي هايفهموك.

modern scholar كتب:: ليه لازم راي الكبير هو اللي يكون صح؟

لأنه أكثر منك خبرة وانت بحماس الشباب فاكر كل حاجة وردي ودايما الكبير بيحاول يجنبك الصدمات اللي هو وقع فيها . يعني بمعني آخر كان هو في نفس سنك وكان ليه حماس مقارب لحماسك لكن خد صدمة من الحياه نفسة انه يحميك منها .لكن سيادتك طبعا بتثق في خبراتك وانك مش محتاج الخمسين أو الستين سنه خبرة بتوعه لأنك طبعا في رأيك أكبر وأعظم من كده!!!!! صح ولا لأ؟؟؟

modern scholar كتب:: ليه لما تغلط تقول لصاحبك و ما تقولش لأهلك؟

لأن صاحبك مادكش ثقة وانت خنتها بغلطك فمابتحسش قدامة بالذنب ده غير انه في نفس سنك وليه تجارب وخبرة في الحياة مقاربة ليك لكن أهلك أكبر وخبرتهم أكبر وبنسبة كبيرة بيكونوا حذروك من الغلط ده لكن في المعتاد احنا مابنسمعش ومابنروحلهومش إلا لما بتخرب وساعتها أهلك بس اللي بيقدروا يساعدوك وصاحبك بيقفوا عاجزين.
كلمة كان جدي بيقولها :"أهلك من دمك عمرك ماهتقدر تشيل اسمهم من اسمك ولا هما هيقدروا "

modern scholar كتب:: ليه يقولو ان ام كلثوم حلال و نانسي عجرم حرام؟

يعني مش عارف ليه!!!
لأن ام كلثوم عمرها مارقصت بمؤخرتها أو أشارت إلي عورتها بإباحية فجة زي ما نانسي بتعمل.

modern scholar كتب:: ليه دايما برامج الكبار في التلفزيون و البرنامج المفضل لك يبقى تافه؟

مش فاهم بصراحة مين بيعمل ايه؟؟؟؟؟؟؟؟

modern scholar كتب:: ليه لازم قدوتك يبقى راجل و مينفعش تكون ست؟

هوانتا خدت د/سميرة موسي(عالمة طاقة نووية) ولا د/عائشة عبد الرحمن (بنت الشاطئ) قدوة وحد قالك تلت التلاتة كام لكن لما تاخد سلمي حايك قدوة يبقي انت اللي بتعمل كده في نفسك.

modern scholar كتب:: ليه بننظر على كل ما هو غربي بنظرة اشمئزاز؟

[ندعوك للتسجيل في المنتدى أو التعريف بنفسك لمعاينة هذا الرابط]

بيتكلم عن كل ماهو جيد في الغرب : النظام , حب العمل , الإتقان .......إلخ

لكن لو بنتكلم عن علاقات ماقبل الزواج يبقي الإشمئزاز هو المتاح.

modern scholar كتب:: ليه قاعد تشتكي من البطالة وانت قاعد في بيتك مبتتحركش؟

ياسيدي أنا خلصت امتحانات يوم 5/31 نزلت الشغل يوم 6/1 وحاليا باحاول ألاقي وقت انام .

modern scholar كتب:: ليه لما ما بيتقبلشي ان يكون هناك صداقة مع غير جنسك أو جنسيتك؟

ممكن زمالة مع غير جنسيتي لكن صداقة صعب .طب حتي هاتتكلموا في ايه أمور الاولاد ولا أمور البنات أعتقد صعبة دي.
مع غير جنسيتك عن نفسي ليا أصدقاء روس , طاليان ، سويسريين , نمساوييين , جمهورية انجوشيا (جنب الشيشان)
وطبعا اللي إخواتنا اللي عايشين في أسوان (سودانيين , جيبوتي (جنب الصومال) , وكوت ديفوار)

modern scholar كتب:: ليه أبوك عايز تكون نسخة منه بالكربون؟

لأنه نفسة أنك تحقق اللي هو ماقدرش يحققه مثلا والدتي للأسف ماكملتش في حقوق اسكندرية بسبب الجواز لما أصغر إخواتي ماجبتش مجموع في تانية كلنا كنا زعلانين ماعدا هيه لأنها كان نفسها حد من ولادها يطلع محامي.

modern scholar كتب:: ليه بتخاف لما تغلط مع انك بشر؟

لأن كوني بشر ده مايدنيش تصريح مطلق بالخطاء .

modern scholar كتب:: ليه تشتم في الريس وانت مهمل في مذاكرتك؟

لأني لما باهمل في مذاكرتي باسقط لكن الريس كل لما يهمل في الشعب ياخد فترة رئاسة تانية

modern scholar كتب:: ليه عايز الحياة السياسية تتغير و انت ممعكش بطاقة انتخاب؟

علي فكرة أنا انتخبت نعمان جمعة في الانتخابات الرئاسية الأخيرة.

modern scholar كتب:: ليه احنا بنحب المنتدى ده عن غيره؟

لأنه جزء منينا بنعبر فيه عن نفسنا بدون مانحتاج زواق أو تكلف.

modern scholar كتب:: ليه مابتدعوليش امتحانى يوم السبت الجاى؟

لأننا تعبنا من كتر أسئلتك وهننام دلوقت!!!!

شكرا على مروركم الكريم وشكرا على ردك يا أمير و يا جودزيلا الاسئلة دي أنا اللي كاتبها و مش منقولة شكرا2

أتمني لك التوفيق في حياتك.
"أحب ماتعمل إذا لم تعمل ما تحب"
حاول تكون كويس في اللي انت فيه حتي لو مكانش ده اللي بتتمناه.