زي كل سنة يللا نبدأ ....!!!!

زي كل سنة يللا نبدأ ....!!!! 17303175mj7

عن زيد بن خالد الجُهني رضي الله عنه عن النبي - صلي الله عليه وسلم - قال
: " من فطَّطر صائماً كان له مثل أجره غير أنه لا ينقص من أجر الصائم
شيئاً" رواه الترمذي وقال حديث حسن صحيح.

تعلن جمعية الرسالة لتنمية المجتمع وكفالة اليتيم
مشروع صناع الحياة عن البدء في جمع شنط رمضان لاسعاد الاسر الفقيرة والمحتاجة

[ندعوك للتسجيل في المنتدى أو التعريف بنفسك لمعاينة هذا الرابط]
وللسنة الثالتة علي التوالي بدأنا في جمع شنط رمضان [ندعوك للتسجيل في المنتدى أو التعريف بنفسك لمعاينة هذا الرابط]
والحمد لله كان دايما لطلبة الكلية دور في جمع الشنط والمشاركة معانا

والسنة دي كمان عايزين الكل يشارك وناخد كلنا الثواب ان شاء الله

وللي ما يعرفش مشروع شنطة رمضان هو مشروع جمع الطعام الضروري للاسر الفقيرة
زي مثلا السكر والتمر والأرز والفول وهكذا
وللتفصيل فعلي سبيل المثال المفروض الشنطة يكون فيها

مكونات الشنطة
سكر 3 كيلوجرام
زيت 1 كيلوجرام
سمن 2 كيلوجرام
مكرونة 2 كيلوجرام
أرز 3 كيلوجرام
لوبيا 1 كيلوجرام
فول 2 كيلوجرام
تمر 1 كيلوجرام

وده طبعا مش شرط يعني ممكن الأصناف تتغير فمثلا بدل اللوبيا ممكن فاصوليا (عادي مش حيقولوا لأ يعني Laughing

)
وكمان ممكن تقل عادي يعني لو حد عنده سكر بس او لوبيا بس او اي حاجة برده عادي جدا
ولو حد مش فاضي يشتري وكده ممكن برده يتبرع بالفلوس والجمعية حتجيب مكونات الشنطة
وان شاء الله منتظرين الكل يشارك معانا عن طريق الكلية او مع الجمعية مباشرة

وحتي المغتربين او اللي مش عايشين في أسوان ليهم دور ان شاء الله معانا

شكرا على هذة المبادرة الطيبة منكم وجزاكم الله خيرا واعانكم الله على فعل الخير وندعو جميع الطلبه بالمساهمة في هذا العمل الخير باي شيء ولو بالقليل ورمضان كريم علينا كلنا

شكرا على الدعوة وجزاكم الله خيرا

شكرا يا بشمهندسين علي الردود السريعة ولو أي حد عنده أي استفسار ياريت يشاركنا بالرأي برده

ونكمل

اول حاجة نسيت اقول ان المشروع مستمر ان شاء الله لغاية نهاية رمضان
وبعده في ان شاء الله مشاريع تانية كتير ححاول انشرها هنا برده

ونيجي بقي لطرق التواصل

اولا مباشرة مع الجمعية وعنوان الجمعية هو:
أسوان - بامتداد حي العقاد - طريق التأمين - خلف مسجد الفاروق عمر .

من الساعة العاشرة صباحاً حتي الساعة الثانية ظهراً.
ومن الساعة الساسة مساءاً وحتي الساعة التاسعة مساءاً.

والطريقة التانية هي عن طريق الكلية ان شاء الله
فزي كل سنة بنجمع الشنط في الكلية وبنوديها للجمعية
وان شاء الله اللي عايز يشترك يبعتلي رسالة خاصة "PM"

وللمغتربين قصادهم حل من اتنين اما ينفذوا المشروع في بلادهم
او يجمعوا فلوس مؤقتاً لغاية ما ييجوا أسوان ويعملوا الشنط هنا
واللي عايز يشارك معانا في شغل ومشاريع أكتر من كده يبعت يقولنا برده

ومطلوب من كل واحد حتي لو هو مش حيشارك انه يبلغ أصحابه وأهله ومعارفه
ويبقي له ثواب كل واحد عرف بالموضوع عن طريقه

ياريت يا جماعة ما نكسلش لان الموضوع ده غير الثواب اللي فيه فالواحد بيحس انه بيعمل حاجة مفيدة وخير والحمد لله كل الشغل ده تطوعي حتي من المشرفين علي الجمعية

وعلي فكرة الموضوع مش حكر لجمعية الرسالة الموضوع ومافيه للتسهيل اما لو حد بيتعامل مع جمعية تانية او عارف ناس محتاجين يقولنا واحنا نشتغل معاه برده

بس ياريت الشغل كله يبقي تبع جمعية لانهم بيبذلوا مجهود في جمع معلومات عن الأسر المحتاجة فعلا للتبرعات دي.

وحتي لو عددنا قليل يا جماعة فما تستهونوش فكل سنة بنجمع فوق الألف شنطة - غير اللي لبقية الجمعيات - وكل سنة بنكون قليلين برده
ما شاء الله فيه شباب بيروحوا للمحلات الكبيرة والمتاجر وبيقلولهم فكرة الموضوع
وفي اللي بيجمع كذا شنطة من اهله بس
غير طبعا اللي بنجمعه من الطلبة نفسهم

وان شاء الله لو الموضوع نجح فيه مشاريع تانية اثناء الكلية لخدمة الكلية اولا وللمجتمع ثانيا.

واللي عايز ورق الدعاية ان شاء الله حنزل الإعلان هنا واللي عايز يطبعه ويوزعه يكون أفضل لان الورق ده بيكون بمثابة التذكير للناس بالشنطة.

او برده يروح الجمعية او يبعتلي ونوصله العدد اللي عايزه من ورق الدعاية للمشروع.

شكرا للاهتمام لكن سيتم حجب نمرة الموبايل وسيتم وضعها بعد استأذان صاحب الرقم بنشرها على الموقع وشكرا

او يتم اخدها منك يا بشمهندسه عبر الرسائل الخاصه او الباشمهندس جودزيلا وشكرا

انا عندي كمان فكرة لأصحاب الاهتمام بهذا الموضوع وهو بطانيه الشتاء للفقراء والمساكين

ولبس العيد للأيتام

يعني من ضمن الافكار المجربه والناجحه جدا

ونرجوا الاهتمام بهذه المشاريع التي لا تكلف الانسان الا الشيئ البسيط لكن اثرها الاجتماعي كبير جدا فهو اكبر دليل على الترابط الاجتماعي والاسري ونشعر جميعنا اننا اسرة واحده بغض النظر عن الغني والفقير وهذا هو الاسلام

انا كمان عندي رأي شخصي انا متهيألي كده اني أوصل فلوس للأيتمنام والفقراء أفضل من إعطائهم شنطه رمضان فلربما هو بحاجه للمال لقضاء دين مثلا او لشراء علاج اكثر من حاجته لهذه المواد الغذائيه

لكن طبعا الفكرة حلوة ومجربه وناجحه وجزاكم الله خيرا

zeko_egyco كتب:: شكرا للاهتمام لكن سيتم حجب نمرة الموبايل وسيتم وضعها بعد استأذان صاحب الرقم بنشرها على الموقع وشكرا
او يتم اخدها منك يا بشمهندسه عبر الرسائل الخاصه او الباشمهندس جودزيلا وشكرا

شكرا يا باشمهندس علي تفاعلك مع الموضوع وعلي أفكارك والحمد لله احنا برده شغالين في المشاريع دي من بدري

يعني برده في مشروع جمع الملابس ودي عموما وطول السنة بس ياريت نركز في مشروع مشروع

وبالنسبة لرقم الموبايل طبعا انا استأذنت قبل ما احط الرقم لان دي امانة اولا واخيرا ورقم كمان محطوط في موقع الأستاذ عمرو خالد فعادي يعني مافيش مشاكل.

سيتم الاتصال بصاحب الرقم والاستئذان منه من قبل مشرفين المنتده وشكرا

فى البدايه الفكره حلوه وبجد مبادره خيريه جميله منك يا بشمهندسه

بس كان المفروض أنك تخطرى الإدراه قبل الشروع فى عمل أى شىء زى كده

وأحنا عموما كنا هنبقى معاكى قلبا وقالبا مع أنى المنتدى ده مش أعلانى ولا مسموح

فيه بوضع أعلانات أو أرقام تليفونات لأنه منتدى تعليمى فى المقام الأول قبل كل شىء

لذلك هنتجاوز الحكايه دى على أساس إن شاء الله مش هتكرر من حد تانى إلا بإذن من

الإدراه وده علشان مندخلش فى مشاكل ملهاش لزمه أو حد يعلق برضو تعليق أحنا

فى غنى عنه وعلشان ميفقدش المنتدى مصداقيته اللى أحنا بنحاول جاهدين أننا نحافظ عليها

وعلشان ده عمل خيرى محدش يمكن هيستفاد منه إلا مستحقيه.

لذلك قررنا بأجماع المشرفين أنى الموضوع يكمل واكتبى أعلانك وإن شاء الله ربنا يقدرنا

ويقدرك على فعل الخير وهنحاول كلنا بإذن الله بمجرد منروح أسوان بأننا نشارك فى العمل

الجميل ده وعلشان نشوف الجمعيه اللى بتقولى عليها دى هل هى مسجله وبتمارس نشاطات

لمساعده المحتاجين والأيتام ولا لأ.

ونحاول كمان نعمل إعلان فى الكليه برضو ده طبعا بعد متوافق إداره الكليه

علشان الكل يشارك فى العمل الخيرى ده.

وشكرا على الموضوع يا بشمهندسه.

الحبار كتب:: فى البدايه الفكره حلوه وبجد مبادره خيريه جميله منك يا بشمهندسه
بس كان المفروض أنك تخطرى الإدراه قبل الشروع فى عمل أى شىء زى كده
وأحنا عموما كنا هنبقى معاكى قلبا وقالبا مع أنى المنتدى ده مش أعلانى ولا مسموح
فيه بوضع أعلانات أو أرقام تليفونات لأنه منتدى تعليمى فى المقام الأول قبل كل شىء
لذلك هنتجاوز الحكايه دى على أساس إن شاء الله مش هتكرر من حد تانى إلا بإذن من
الإدراه وده علشان مندخلش فى مشاكل ملهاش لزمه أو حد يعلق برضو تعليق أحنا
فى غنى عنه وعلشان ميفقدش المنتدى مصداقيته اللى أحنا بنحاول جاهدين أننا نحافظ عليها
وعلشان ده عمل خيرى محدش يمكن هيستفاد منه إلا مستحقيه.
لذلك قررنا بأجماع المشرفين أنى الموضوع يكمل واكتبى أعلانك وإن شاء الله ربنا يقدرنا
ويقدرك على فعل الخير وهنحاول كلنا بإذن الله بمجرد منروح أسوان بأننا نشارك فى العمل
الجميل ده وعلشان نشوف الجمعيه اللى بتقولى عليها دى هل هى مسجله وبتمارس نشاطات
لمساعده المحتاجين والأيتام ولا لأ.
ونحاول كمان نعمل إعلان فى الكليه برضو ده طبعا بعد متوافق إداره الكليه
علشان الكل يشارك فى العمل الخيرى ده.
وشكرا على الموضوع يا بشمهندسه.

وانا متفهمة جدا حكاية الدعاية وكده

بس كل الحكاية اني حبيت اسهل الموضوع علي الآخر
اما لو قولت يا جماعة اعملوا الشنط ووزعوها مع نفسكم مثلا
كان معظم الناس حتكسل
وده عن تجربة
اما لو حد عنده جمعية تانية
يقولنا عليها واحنا نشتغل معاه عادي
وكمان لما قولت اسم الجمعية كان برده للمصداقية
يعني اي حد عايز يسأل عليها وبشوف نشطاتها ويتأكد بنفسه من الشغل بتاعها
وكمان علشان لو اي حد عايز ييجي يشتغل تطوعي معانا

وعلي فكرة الجمعية هي نفسها اللي الكلية اتعاونت معاها في رحلة الايتام (الخاصة بالطالبات) السنة اللي فاتت
بس كانت في المقر القديم

وبالنسبة للمشاريع دي فهي لا تخرج عن نطاق ان احنا طلبة وان ده منتدي علمي
يعني ممكن نعتبره هنا زي خدمات اتحاد الطلبة
بس ده اهو عملي جدا ومش كتابة علي ورق وبس
اما بقي حكاية اعلان في الكلية عيان

فيكون ساعتها رمضان بتاع السنة اللي بعد اللي جاية خلص بيضحك

انا عن نفسي اكتر واحدة بحب ان الشغل يكون رسمي
بس مع كليتنا دي صععععععععععععب
بس ممكن برده وربنا يقدم اللي فيه الخير
وبالنسبة لرقم التليفون فده براحتكم تنزلوه او ما تنزلهوش
بس هو عادي جدا هو مكتوب علي كل اوراق المشاريع اللي بنوزعها علي الناس
ومكتوب في منتدي استاذ عمرو خالد
والمفروض صح كنت استأذن الادارة الاول
بس معلش سامحوني بجد مش فاضية
ومعلش تاني مرة علي التاخير في تنزيل باقي المشروع
بس انتظروني مع اخر اخباره بس لما افوووووووووق

شكرا على اهتمامك يا بشمهندسه بس عندي تحفظ بسيط :

اننا اه ممكن نعتبرة دعايه لانشطه وخدمات اتحاد الطلبه بس ده لما يبقه ساعتها في حد منهم او حد شارك معانا منهم حته لو من اعضاء الاتحاد بتوع السنه اللي فاتت ربنا يصلح حالنا وحالهم
على العموم احنا منتظرين تنزيل باقي المشروع عشان الحاجه تكون كامله والناس يكون عندها درايه وعلم بالموضوع كله
كمان منتظرين منك ياريت نتائج المشروع ده عشان لو في حد مش واثق من نتائج الجمعيات ده ومشاريعها وشكرا وبارك الله فيكم

حتي لو مافيش حد من الاتحاد
مش المفروض ان كلنا نشتغل؟؟!!!
وبالنسبة لنتايج المشروع فلله الحمد
غداً "الاثنين" بليل ان شاء الله
حنبدأ في توزيع أول دفعة من الشنط لأسر الأيتام
وده واحنا لسة في بداية المشروع

لاننا للاسف بدأنا فيه متأخر شوية
نظرا ً لانشغال الجمعية بافتتاح المقر الجديد اللي هي موجودة فيه حاليا
وححاول اجيب صور للشنط قبل توزيعها

ودي صورة للاعلان للمشروع

سبحان الله والحمد لله ولا اله الا الله والله اكبر
"املا وقت الانتظار بالطاعة والاستغفار"

هوه كلامك صح يا بشمهندسه وكل حاجه بس فيه ناس بتحب تعمل فى الخفاء ومتظهرش سبل الخير اللى بتساهم فيها ومش معنى أنى أى شخص عموما مشتركش فى الجمعيه دى فهوه مش

من أرباب عمل الخير بالعكس فيه ناس كتير بتعمل حاجات أكبر من كده بس فى الخفاء زى مقولتلك فممكن كان أفضل أنك تخلى اللى مش عاوز يظهر يبعتلك رساله خاصه ويقولك هيتبرع أزاى وكده علشان ميبقاش فى الصوره فيا ريت تمشى فى الاتجاه ده برضو وجزاكى الله خيرا عن الجميع وكملى مشروعك.

بالنسبه لصور الشنط ممكن يا بشمهندسه تنزليلنا صورها واي حااجه تتعلق بيها وممكن لو تقوليلنا على تكلفه الشنطه كاام بالضبط من الناحيه الماديه واي صور معاكي ممكن تنزليهالنا .....وشكرا

السلام عليكم ورحمة الله وبركاته

تكلفة الشنطة تقريبا 60 جنيه

وصور الشنط

زي كل سنة يللا نبدأ ....!!!! Image089nc1

زي كل سنة يللا نبدأ ....!!!! Image090wd2

زي كل سنة يللا نبدأ ....!!!! Image092hf9

» وراح نبدأ منين تانى
» فوازير رمضان..........يللا نشارك..
» يللا نحتفل سوا برأس السنة!!!...
» ( نكت رمضان..) يللا سلي صيامك ودخل بنفسك احلي نكت سمعتها........
» يللا هتختم القران في تلاتين يوم رمضان واقل..........ازاي؟...ادخل واعرف...........