عبقرية الضاد!!

بعد ظهور أهلة النتائج وبعد ثبوت رؤى الجميع وجدت سرطانا خبيثا يجتاح نتيجتى شخصيا فقد أنتشرت بها البقع

كمرض الحصبه "عافنا الله وإياكم جميع الأمراض"

أو أنها بقع صعبة الإزاله إلا بجد وسعى وبركة من الله عز وجل ولا تعجب أخى من أن هذه البقع باللون الأحمر لربما

تم أختيارها تبعا لأن هذا اللون حائز

على درجه عليا من التردد لذلك من يدعى قصر النظر أو طول النظر أو حتى عمى الألوان فإنه يراها كشمس ساطعه

فى يوم من أيام الربيع!!!.

بعد رؤيتى لنتيجتى وجدتنى تائها شريدا منعزلا منطويا هائما فى ملكوت رب العالمين حتى إننى إحترت ماذا أفعل هل

أحزن وأهتم وأضيق وأتقوقع على نفسى أم أدع لنفسى

فرصة كى أعدل من أخطائها وجرائمها وأطور إمكانياتى ولعل هذا إنذار صغير من رب العالمين يعقبه طامة كبرى إلم

أنصاع وأخضع وأستجب إلى تلك العلامات.

لذلك أحببت أن أكتب موضوعا ساخرا ضاحكا يمكنه بإذن الله أن يرفه عن كل حامل للواء الضاد وكل حزن يتسلل إلى

نفوس الأخوه الزملاء ولربما يضع لنا

مسلكا وطريقا إلى أمل جديد وحياة أخرى قد تؤدى بنا إلى أعلى قمم النجاح ولنبدأ بداية جديده عنوانها عبقرية الضاد.

تعالوا نحلل هذه الضادات ونتسائل ونجيب عما يدور فى ذهننا وأول سؤال لماذا سميت الضاد بهذا الإسم؟؟!!!

بصراحه مش عارف ليه سموها ضاد بالذات وأنا أعلم جيدا أنها إختصار لكلمة ضعيف ولكن لماذا سميت بضعيف؟؟!!!

ولماذا لم تسمى ركيك أو واهن أو مهيض أو حتى تعبان؟!!!!!!

ده حتى تبقى حلوه لما حد يسألك عملت أيه يا دفعه فتروح رادد وبعلو صوتك إتنين ركيك وواحده واهن!!!!

وخللوا بالكم الركيك هنا مش الرقيق لأن الحاجات دى مفيهاش ركه خالص قصدى رقه خالص دى حاجات كلها

سوفاج"اللى هيا متوحش بالفرنساوى".

أو نخليها مثلا أربعه راء أو أربعه تاء أو حتى نخليها أربعه واو ونغنى ونقول والواو واو واو.

على فكره حتى الضاد ملهاش اصل ومش اقدم حرف فى الحروف ودى معلومه فعلا لأن أقدم حرف من الحروف هو

حرف الواو!!!

وطبعا حد من الأخوه هيقولى أشمعنى الواو اقولك يا سيدى لأن الواو

لم يحدث عليها تعديل على مر السنين والأيام بمعنى أنها

متحرفتش أو حصلتلها حاجه

وده برضو لأنك لو نطقتها مضمومه أو مفتوحه أو حتى مكسوره هتلقى نفسك زى ميكون بقيت أهبل "ولامؤاخذه

يعنى" لأنها مينفعش تتنطق غير واو.

ولأن بقيت الحروف دخلت عليها تحريفات وتعديلات زى الكويت مثلا بيقولوا على الكاف جيم وفى حاجه اسمها

الكشكشه فى اللغه وهى قلب الكاف شين

وفيه ميم التميميه ودى بتقلب حرف اللام لميم وفيه كمان ناس بتقلب حرف الجيم لدال وعلى فكره القلبه دى مش

صعيديه مئه بالمئه لأنها أخذت من إحدى القبائل السعوديه التى أتت إلى مصر.

لذلك الأحقيه المفروض تكون لحرف الواو هذا الحرف الأصيل المأصل وذو التاريخ.

ولكن الغريب فى الأمر أن تجد شخصا ما يحصل على أربعه ضاد!!!

ياااااه أربعه ضاد ربنا يديك الصحه وتشوف ولاد ولادهم!!!!

لكن تعالوا ننظر إلى البعد الغريب والطريف فى الأمر أن كل من يحوز على أربعه ضاد يعتبر من ذوات الأربع!!!!!

يا للهول "على رأى يوسف وهبى" ذوات الأربع مره واحد وطبعا جميع البشر من ذوات الأربع!!!!

سأجد صوتا يقول لى كيف ذلك يا أخ فأقول له أنت تمتلك يدان ورجلان فإذن أنت من ذوات الأربع!

فما بالك أخى عندما تحوز أربعه ضاد فتكون من ذوات الأربع مرتين وليست واحده وهذه ميزة بشريه ليست لأى أحد

من الورى"حلوه الورى دى بمعنى الناس يعنى".

فلنعتمر جميعا القبعات"حلوه نعتمر دى برضو" ونتباهى بما أتنيا به وكأننا حصلنا على جائزة نوبل فى الخيبه قصدى

فى الضاد وده بالأربعه!!.

أطالب بعمل جمعيه تسمى ذوات الأربع ولا نخليها مؤنثه ونقول ذوات الأربعه مع إنهم الاتنين واحد ويجعله عامر.

وطبعا نشترط على كل من يلتحق بجميعة ذوات الأربعه أن يحصل على أربعه ضاد باللون الحمر بس ايه يكونوا احمر

دم زى البرتقال وهنطلع نعاين وندوق بنفسينا.

وحتى لا نظلم الآخرين من حائزى الكلام الفاضى اللى أسمه ضاد ولا اتنين ضاد ده يلموا بعض وعندما يكتمل مجموع

ما حصلوا عليه على أربعه ضاد نحسبهم

بنفر ونسميه فريق ملتحق بجمعية الأربعه أما اللى هيزيد عن أربعه ضاد فده يعتبر سوبر ستار العرب ممكن نعمله

ليله على المنتدى وندبحله عجل لأنه هيمسك

منصب إدارى فى الجمعيه مع العبد لله يعنى واللى هيجيب ضعيف جدا والعياذ بالله كفانا الله وإياكم هنحسبهاله باتنين

ضاد ونعمله وسام فى أى بى"VIP".

وأهداف الجمعيه هوه طبعا الحقد والضغينه والكره والبغض والمقت وكل الكلام اللى مش طايق بعضيه ده بالنسبه

للأخوه للى ناجحين صافى وعامليلى فيها

أخترعوا حاجه جديده أو طلعوا أوائل على جامعة السوربون العربيه الشقيقه أو ممكن نمشيها غيره بالنسبه للبنات

وأهو ممكن تحوق مع إنهم أشطر يعنى.

طبعا بعد مهتنطبق عليك الشروط هنتمنى إقالتك من الجمعيه لأنها جمعيه مش كويسه فعلا ومحدش بيحبها زيى أنا

ولربما دخلتها قهرا أو لظروف أو لإهمال.

فأرجو محق وتدمير ودك وفتك كل تلك الظروف ومحو هذا الإهمال والنظر إلى ما هو آت.

حاولوا تعملوا حاجه تجدد من حياتكم أو تغيروا منها كلوا مثلا سندوتشات حلاوه بالقشطه على رأى اللمبى ولو أنت

بتدخن حاول تبطل كأنك بتعمل عقاب لنفسك على الضادات

ولو مش بتدخن أوعى تستهبل وتنغمس فى قلة الأدب والمسخره عيب إحنا كبار وأوعى تفكر ترمى نفسك تحت القطر

ولا من فوق سور الكليه

لأ طبعا هتموت وفى سجلك ضاد وربنا يستر عليك من الفتنه.

حاول مثلا تمارس رياضه معينه ترفه فيها عن نفسك ولنعتبرها كبوه من الكبوات

وبإذن الله ستكون الأمور على ما يرام.

وأوعى تعمل زى الأخت نانسى وتجيبلك فار وتقعد تلعب فيه وتقول يا سلام وبتاع!!

أهى قعدت تقول يا سلام لما السلامات اللى فى الدنيا كلها خلصت

ولا حد عبرها!!!

خللى بالك برضو متدورش على أسباب الضاد اللى هيا الدكتور إدانى مش عارف درجه رفيعه ولا قليله بلاش الكلام ده

لأنه قضى الأمر زى حكاية الممر

كده نحاول ننسى القديم والخطأ بكل اشكاله ونشرع فى بدايه جديده ومحاوله أخرى للعمل الجاد وإياك واليأس فدى

حاجه مدمره بلاش منها.

أو ممكن برضو تروح تنام فى الممر بتاع الكليه لأنه خلاص بعد مسحبوا الكارنيهات الناس بقت خايفه تعدى فيه نظام

رعب فبدل ما الناس تعدى ممكن تنام

ولو معجبكش كلامى يا سيدى افتحلك كشك فى الممر"سمعت إنى فيه ناس جايه من زائير عاوزه تأجر دكاكين عندنا

فى الممر"
بس اتقى الله فى الأسعار علشان الضاد تترفع وتبقى صاد من غير نقطه يعنى.

أخيرا أنا أؤمن بأن الإنسان هوه الوحيد القادر بأن يخرج نفسه من أى حاله نفسيه أو مأذق بعون الله وحوله ما دام

يمتلك عقلا لا يحيد عن شرائع الله

فلا تدع شخصا يواسيك فلا يوجد شخص يخاف على مصلحتك أكثر من أبيك وأعتقد أنك لا تمتلك إلا أبا واحدا لذلك لا

تتنتظر التحفيز والتنشيط أو نظرات الإستعطاف والشفقه وعبارات

شحذ الهمم فتوكل على الله وانسى ما فاتك وفكرا مليا فيما سيأتى ودعونى أفكر معكم أخوتى وأجدد عزيمتى ولنشعر

سويا بأننا متفردين عن بقية البشر

وأننا لا ينقصنا شئيا بالعكس فنحن نمتلك عبقرية الضاد.

والله الموفق

ٍِِ

أنا عايز انضم لجمعية ذوات الاربعة بس في مشكلة انه انا معاياه 3 منهم 2 ضاد وواحدة ض ج
فممكن تعتبرني من أبناء الشهداء وتضموني لجمعيتكم؟؟؟؟؟؟؟؟؟؟؟؟؟؟؟

انا من رايى بعد اذنكم طبعا ان احنا نعمل قسم خاص للشهدا اللى شايلين ضاد جيم احنا عاملين كل ده عشان حرف امال اللى شايل حرفين يعمل ايه

وكمان يبقالهم الحق الا كبر فى اولو يه المحلات والمكتبات اللى هانعملها فى الممر وياريت ماينسوش اخوانا اللى هايعملو الدكاكين دى ياخدوا اكلهم وكل متطلباتهم عشان يحرسو دكاكينهم اصل نصحى نلاقيها مهدوده او مسلوبة بوضع اليد زى ملاقينا نفسنا فجاة قدام سور
او ممكن نخلى الحرس بتوع الكليه يحرسوهم اااااااه سيت حرس الكليه عدده قليل هيلاحق على ايه ولا ايه !!!!!!!

بسم الله نبدأ جمعيه ذوات الاربع

وبأذن الله ستكون جمعيه الامل لكثيرى من حاملى الضاد
هذا الوباء الذى انتشر فى الكليه وفى كل الدفعات
ولا نعرف كيف يتم القضاء عليه
او حتى عزل المرضى دون انتشار مدوى للمرض
والذى بات من المستحيل القضاء عليه

لا لا ياس مع الحياه ولا حياه مع الياس

احمد ربكم لو انتو فى معهد طاقه ..اعدادى طاقه ..

كان لميتو هدومكم وروحتو

بس انتو لسه فاضلكم فرصه لان هما اللى بشيل اكتر من ماديتين على طوووووول بيعيد السنه

انما انتم قدامكم فرصه

فشدوووووووووووووووووو حيلكم النص التانى وان شاء الله خير

عذرا لن أرد فى هذا الموضوع الآن وقد لا أرد فيه من الأساس
أو قد أقوم بإنشاء مجموعة جديدة

شكرا على الموضوع الجميل يا حبار اللى خرجنا كلنا من جو الهم والحزن

اقتباس :

وحتى لا نظلم الآخرين من حائزى الكلام الفاضى اللى أسمه ضاد ولا اتنين ضاد ده يلموا بعض وعندما يكتمل مجموع

ما حصلوا عليه على أربعه ضاد نحسبهم

أن شاء الله ملحوقه فى الترم التانى أحنا هانروح من بعض فين
واللى ربنا ما قدرهوش أن يجيب أربعه ضاد يشد حيله الترم التانى علشان يترقى

اقتباس :: فممكن تعتبرني من أبناء الشهداء وتضموني لجمعيتكم؟؟؟؟؟؟؟؟؟؟؟؟؟؟؟

خلاص يا سيدى هنعتبرك من ضحايا الزلزال بس شد حيلك علشان عاوز أشيلك من الجمعيه دى.

اقتباس :: انا من رايى بعد اذنكم طبعا ان احنا نعمل قسم خاص للشهدا اللى شايلين ضاد جيم احنا عاملين كل ده عشان حرف امال اللى شايل حرفين يعمل ايه

وكمان يبقالهم الحق الا كبر فى اولو يه المحلات والمكتبات اللى هانعملها فى الممر وياريت ماينسوش اخوانا اللى هايعملو الدكاكين دى ياخدوا اكلهم وكل متطلباتهم عشان يحرسو دكاكينهم اصل نصحى نلاقيها مهدوده او مسلوبة بوضع اليد زى ملاقينا نفسنا فجاة قدام سور
او ممكن نخلى الحرس بتوع الكليه يحرسوهم اااااااه سيت حرس الكليه عدده قليل هيلاحق على ايه ولا ايه !!!!!!!

عندك حق يا ساسو ونعملهم بالمره أيديهات ويلبسوا زى موحد ويكون أبيض فأسود زى الأفلام القديمه علشان يبقى ملفت للنظر!.

اقتباس :: بسم الله نبدأ جمعيه ذوات الاربع

يا بشمهندس هارى أنت بالذات متتكلمش علشان مجبتش أربعه لما تجيبلك كام واحد أبقى نحسبك بنفر.

اقتباس :: احمد ربكم لو انتو فى معهد طاقه ..اعدادى طاقه ..

كان لميتو هدومكم وروحتو

يااااه ده احنا مش قاعدين فى الدنيا خالص!
شكرا على المعلومات المفيده يا ابو فرح والحمد لله فعلا.

اقتباس :: أن شاء الله ملحوقه فى الترم التانى أحنا هانروح من بعض فين
واللى ربنا ما قدرهوش أن يجيب أربعه ضاد يشد حيله الترم التانى علشان يترقى

أنت ورايا ورايا حتى فى الضاد أشق هدومى يعنى منك.

شكرا على الردود اللذيذه وفى إنتظار العديد من المناوشات.

بشاااااااااااااااير بشااااااااااااااااااااير

انت شايل كام مادة ياهندسة

شكلك شايل الكلية كلها فوق دماغك؟
بس بامانة موضوع ممتع ورائع

موضوع جميل ويضم شريحة كبيرة من الناس

وهما الناس المظلومين اللي ماحدش مهتم بيهم خالص بس اشمعني اربع مواد بس مينفعش خمسة او ستة والله بتحصل او اقل من كدا او الناس بتاعة الضعيف جدا ملهومش نفس يعني
عشان كدا عندي فكرة احلي من موضوع الضاد والضاد جيم والاحراج دا وكمان بلا امتياز بلا بتاع
احنا نخلي التقدير الموحد هو الجيد
بحيث الامتياز تبقي جيد اوي والجيد جدا يبقي جيد متوسط
والمقبول يبقي مش جيد والضعيف يبقي مش جيد خالص ومفيش حاجة اسمها ضعيف جدا ليه يحطموا الناس كدا
وربنا يوفق الجميع

الواقع انى اليوم وبعد ظهور النتيجة ولله الحمد أبتعد عن ذوات الأربع
ولكن قد أنشىء مجموعة جديدة
ولدى إقتراح باحتساب الضاد جيم باثنين ضاد على الأقل
وضاد جيم المقرر بضاد مادة أساسية
ولكن بعد ظهور نتيجة الفرقة الثالثة مدنى اليوم أهنئكم بأنه هناك الكثير والكثير من الأعضاء الجدد
بل هناك مجموعات ستفوقكم أطرافا ويصبح ذوى الأربع ليسو هم الأقوى
مبروك

يا حبار ان الله حليم ستار
ده انت كده بتقول يلى ما تشترى اتفرج

كان نفسي انضم للجمعيه يا حبار بس للاسف انا نجحت صافي ومعيش ضاد
ينفع مقبووووووووووووووووووووول؟

الحبار كتب:: واللى هيجيب ضعيف جدا والعياذ بالله كفانا الله وإياكم هنحسبهاله باتنين

ضاد ونعمله وسام فى أى بى"VIP".

لو سمحت أنا عاوز العضوية ال VIP اللي قولت عليها ......

علشان أنا نجحت في كل المواد بتقدير جيد جدا و جيد و مقبول مزأطط

بس في الآخر شيلت مقرر ثقافي (( بيئة وتلوث )) ضعيف جدا على أساس إني سيبت الورقة فاضية في اللجنة و خرجت نار

و شـــكـــرا.......
(( حـسـبـي الـلـه و نـعـم الـوكـيـل )) بيبكى

اقتباس :: بس في الآخر شيلت مقرر ثقافي (( بيئة وتلوث )) ضعيف جدا على أساس إني سيبت الورقة فاضية في اللجنة و خرجت

أكيد أنت مش فاهم مقرر كويس
هههههههههه
بس أنا مش عايزك تزعل نفسك
اللى يشوف بلوة غيره تهون عليه بلوته

الحمد للة صافىىىىىىىىى

امال الناس اللى جايبة تقدير ملهاش نصيب فى الجمعية ولا ايه؟؟؟

» هواجس بحرف الضاد !!!!!!
» ***عبقرية فذة***
» عبقرية الغباء!!!!
» مشروع الترجمة الجامعية: فكرة عبقرية لردم الفجوة الحضارية