قاطعوا مطعم أبو عاطف(شاذلي)

أنا أعرف أن هذه الدعوة قد لا تسترعي اهتمام البعض ولكمها مهمة لكل الطلبة القاطنين في حي صالح حرب

ولكن بلغ الأمر مدي لا يمكن السكوت عليه فقد قام هذا المطعم بزيادة الاسعار بشكل مبالغ فيه دون أي اعتبار
وكأن هؤلاء الطلبة كلهم ميسوري الحال مع أنهم أبناء موظفين مواردهم محدودة
وليت هذه الزيادة تقابلها معاملة جيدة أو طعام جيد وهذا راجع إلي أنه يرتع بمفرده في المنطقة دون وجود منافس
وهذا هو الإحتكار بعينه أن يتحكم أحدهم في سلعة ويعرضها بالسعر الذي يراه دون أي مراعاة لضميره
ويقوم هذا المطعم باستخدام اردأ الخامات والمكونات ويستخدم الزيت مرة واحدة طوال اليوم دون تغييره حتي يحترق

أرجوكم تفاعلوا وقاطعوا حتي لا يصبح هناك أحمد عز جديد بيننا(مع الفرق في التشبيه)

أنا أول المقاطعين معاك يا عمده
بس يا ريت الناس تفهم المغزى من ذلك دون تهريج.

انا اوافق العمده فى ما يقول فلابد من وقفه حاسمه مع مثل اولئك الناس
واضم صوتى فى ان اعارض بشرف

وأنا شخصيا أوافق هذا الرأى تماما
وليس أول مرة
فلقد قمنا بهذه المقاطعة من قبل وأتت ثمارها ولكن حين كان الطلاب يدا واحدة وهذا ما نفتقده هذه الأيام وشخصيا كنت أنوى ان اقوم بهذه الخطوة ولو بمفردى وهذا ما سيتم بإذن الله لأننى لم أعد أحتمل وشخصيا لا أعارض طرح هذا الموضوع بل وأراه هام ومؤثر جدا بالنسبة للطلاب بالكلية
بل وأتمنى التفاعل معه وتطبيقه بكل قوة ورغم أننى شخصيا كنت أفكر فى هذا الأمر منذ فترة ولكنه لم يخطر بفكرى أن اطرحه بالمنتدى ولذلك اشكرك أخى العزيز على طرح هذا الموضوع الهام بالمنتدى

أضم صوتي لصوتكم ولتكن الماقاطعة

هو مين الشاذلى دة

عشان تقاطعووووه !!!!!!!!!!
قاطعوا منتجات الدنمارك أحسسن
وانا الصراحة مش شايف هم للموضوع دة
فيه 100 مطعم تانى في المنطفة
ويعنى هو أساساً أكله مش كويس
والناس بتقبل عليه ( انا مش عارف ليه )
فلازم يغلى الأسعار ويخلى الجودة زى ما هىى
عايزين نبص بعينيننا
ع حاجات أعلى من كدة ونبقى متحضرين شوييية
مش نقاطع شاذلى
:geek:

كل الهيصة دى عسان الرغيف بقى ب 1 جنيه بدل 75 قرش طب ما هو لازم يبقى كده لما يبقى كيلو الفول ب 9 جنيه بعد ما كان ب3 او 4 جنيه والزيت غلى على الاخر هيعملكوا ايه يخسر هو يعنى عشان انتوا تتبسطوا وبعدين هو برضه عنده عيال عايز يربيهم

زائر

كل الهيصة دى عسان الرغيف بقى ب 1 جنيه بدل 75 قرش

طيب الرغيف هنا فى ادفو 75 قرش ويتفوق على رغيف الشاذلى 100 مرة من كل النواحى

والزيت غلى على الاخر هيعملكوا ايه يخسر هو يعنى عشان انتوا تتبسطوا وبعدين هو برضه عنده عيال عايز يربيهم

اولا هو بيستعمل الزيت مرة واحدة فى اليوم وانا عمرى ماشوفته بيغيره
وبعدين انا عندى عيال عاوز اربيها اسرق عشان اربيهم مش هو دة المبدأ
وبعدين عيال ابو عاطف انا افتكر واحد منهم واسمه (حوادث) ودة يصرف على ابوه مش ابوه
اللى يصرف عليه....
هو مين الشاذلى دة

عشان تقاطعووووه !!!!!!!!!!
تاجر جشع بيستغل الظروف
عايزين نبص بعينيننا
ع حاجات أعلى من كدة ونبقى متحضرين شوييية

لتكن هذه البداية فى مواجهة جشع التجار الذين لايجدون رادع
واذا نجحت المحاولة ورأينا نجاحنا فلننظر حينذاك الى حاجات اعلى

انا لما باجي عند صحابي الي سكنين هناك معظم اكلهم من عنده

اعملو شكوه للمحافظ
لازم يبقي في كنتاكي ولا ماكدونلز
او حتي cock door
لا بجد انتو صعبنين عليا
اقول لكم علي حاجه بلغو الضرائب عنه .....

أشكر الزميل العمدة علي دعوته الجميلة

وأنا أضم صوتي لصوته وسأقاطع هذا الشاذلي ليعلم أن هذا المطعم وكل المحلات التي بجوار الكلية أنهم يعملون عندما يكون الطلبة متواجدين وتخيلو منظر هذا الحي في الإجازة وهذه المحلات تجد أغلبهم لا يعمل .
وبالنسبة للمقاطعة هي مجرد رد فعل للإستغلال الذي نعيشه وليكن لنا وقفة واحدة ليعلم هؤلاء
أننا نستطيع أن نستغني عنهم حتي لا يتمادوا في غيهم

انا اصلا مش باجي ناحبتة حتى بس برضوا اضم صوتي ليكم,بس عايزة اقول حاجة يييييااااااااا جماعة صحتكو اهم و عن تجربة انا كنت باكل فى اماكن انضف بكتييييير من البتكلمو عنه و مع ذلك جالى فيروس فى الكبد بسبب العك ده .بعد الشر عليكم طبعا بس انا خايفة عليكم

اشكر البشمهندسين على اثارة هذا الموضوع وانا تعمدت التاخير فى اثارة هذا الموضوع علشان

افكر الناس بيه
بالنسبة لموضوع كيلو الفول ابو 9 ج والزيت اللى غلى احنا كطلبة لينا سنين فى الكلية
ونعتمد على المطاعم اتحدى اى شخص يقول انه فى مطعم في اسوان كلها رفع اسعاره الا شاذلى ولا هو الفول غلى عليه هو بس حتى المطاعم لما بترفع اسعارها بتعلى الجودة عكس شاذلى
اما بالنسبة للزميل اللى قال انه الموضوع مش مهم لا يابشمهندس ايه فايدة المنتدى اصلا
غير مناقشة اى موضوع يهم طلبة الكلية وهذا الموضوع من اهم المواضيع
واحنا لاسامح الله لا نريد ان نقطع عيش حد ولكن نريد ان نمنع الظلم والساكت عن الحق شيطان اخرس
قاطع شاذلى تنقذ طالبا

الصراحه انا اضم صوتى لصوت البشمهندس يحيى
هناك منتجات انتوا بتشتروها كل يوم وهى اصلا مقاطعه
جايين تقاطعوا مطعم فول وطعميه
طاب قاطعوا منتجات الدنمارك الاول وامريكا واسرائيل وبريطانيا

اقتباس :

لاحظت فى كلامك يا باشمهندس السخريه من الأخرين
وبصراحه الشاذلى كان معلم كبير من معالم الطلاب فى أبو الريش واللى ما يقدروش يستغنوا عنه

اقتباس :

قاطعوا منتجات الدنمارك أحسسن

أولا يا باشمهندس لو ما أبتدناش بالأشياء الصغيره دى الهامه بالنسبه لنا عمرنا ما هنفكر فى الأشيا الأعظم
ومنتجات الدنمارك أعلب الطلبه المغتربين مقاطعه المنتجات الدنماركيه بالأجبار مش بكيفها

اقتباس :

وانا الصراحة مش شايف هم للموضوع دة

أكيد يا باشمهندس لازم تقول كده لأنك مش حاسس بأخواتك الطلاب والمعاناه اللى هما بيعانوها فى موضوع الأكل لانك مش مغترب وكل اللى انت بتحب تاكله بتلقاه فى لمح البصر

اقتباس :

فيه 100 مطعم تانى في المنطفة

لو سمحت يا باشمهندس تذكرلينا اسماءهم علشان يبقى نجربهم طاب حتى قول 99 مطعم بس علشان تبقى مبلوعه

اقتباس :

ويعنى هو أساساً أكله مش كويس

ده بالنسبالك لكن أى مغترب مبيكونش عنده فرصه للأختيار

اقتباس :

والناس بتقبل عليه ( انا مش عارف ليه )

يا عم أرزاق

بعد كده يا باشمهندس العمده بيقول

اقتباس :

يا ريت تكون فهمت المعلومه دى

اشكر الجميع علي مشاراكاتهم وردودهم وتناولهم للموضوع

أما بالنسبة للأخ يحيي

اقتباس :: قاطعوا منتجات الدنمارك أحسسن

فيا أخي العزيز ما هي المنتجات الدنماركية التي تستخدم هنا في مستويات الدخول المحدودة جدا (الناس مش لاقية العيش الحاف)وأنت تقول المنتجات الدنماركية!
وأنت يا أخي لست مغترب مثل باقي الطلبة فلن تشعر بمعاناتهم مع إحترامي لك
وأنا أؤيدك في مقاطعة المنتجات الدنماركية ولكن هناك أولويات
والأخNEMOقال

اقتباس :: اعملو شكوه للمحافظ
لازم يبقي في كنتاكي ولا ماكدونلز
او حتي cock door
لا بجد انتو صعبنين عليا
اقول لكم علي حاجه بلغو الضرائب عنه

فيا أخي هذا ليس مجالا للسخرية والتهكم علي زملائك فهذا موضوع جد خطير

فيجب أن يكون لنا وقفة ونعبر عن رأينا ولا نسمح لأحد باستغلالنا
وأخيرا(تعاطفك لوحده مو كفاية)

اقتباس :: أنا أول المقاطعين معاك يا عمده
بس يا ريت الناس تفهم المغزى من ذلك دون تهريج.

أولا لم نعتد على الهجوم دون التحزير أو أنا عن نفسى أى شئ بشوفه خطأ أول شئ أفكر فيه دون تردد هو أن أذهب لصاحب الشأن أولا وإن لم أفلح فى التوصل إلى حل معه أفكر فى حلول أخرى فهذا مبدأى فى أغلب الأحيان

فياريت أولا تنبهوا على (عم شاذلى)وتقولوا له أن الأسعار غالية.
وممكن تعملوا خطة حلوة ربما تفيد
يتجمع المقاطعين لعم شاذلى وليكن سبعة أو ثمانية طلاب
يتجمعوا فى مكان بعيد شوية عن المطعم. ويذهب أحدهم ويقول للبائع بالمطعم إعطى لى رغيفين فول مثلا ويسأله أولا كم الثمن وعندما يخبره بالثمن يقول له لاء خلاص ده غالى. وبعد خمس دقائق يذهب المقاطع الثانى ويطلب مثلا كمية كبيرة مثلا خمس أرغفة وقبل أن يشرع البائع فى تحضير الطلب يسأله بكام الطلبات وعندما يخبره بالسعر يقول له لاء بلاش ليه الغلا ده كلوا
وهكذا يتتابع المقاطين على فترات متباعدة وطبعا ولا واحد هايشترى .
وبعدها أتمنى أن يعود عم شاذلى لصوابه
والله المستعان

ماشي يا عمدة

انا مكانش قصدىى
اى حاجة وربنا يكون فى عونكم
بس مش بالشكل اللى انت شايفة دة
ان اللى مش مغتربين ، عايشين حياتهم قووى كدة
بس فيه ناس مغتربين عايشين حياتهم اكتر مننا والله
وانا بعتذر لك يا باشا
وانا حقاااطع شاذلى كمااان

أشكر الأخت رحاب علي استجابتها وردها
وأما التحذير فقد حذرناه مرارا وتكرارا ولم يستجب وتمادي في غيه فكان لابد لنا من وقفة حاسمة أما ما تقولينه عن الطريقة فهي من وجهة نظري غير مجدية وقد تسبب إحراج للبعض

أما الأخ يحيي فأنا لم أقصد الإساءة ولكن كان قصدي توضيح وجهة النظر فقط
وأشكرك علي استجابتك وأنا معك في مقاطعة المنتجات الدانماركية ولتكن دعوة للجميع
وما فيش إعتذارات بين الأخوة يا بشمهندس

وأشكر الأخ الشاوري علي رده وأشكر جميع الذين استجابو لدعوتنا المتواضعة
ولتكن هذه الدعوة بداية تجمع طلبة الكلية علي موقف واحد مهما قل شأنه

لا للشاذلى
لا لا

يعنى يغلى الساندوتش ولسه طعميته متتاكلش
ده بيصتعبط بلاش منه خالص
تعالو نقضيها مولتو وامرنا لله

القاطنين في حي صالح حرب

هو فين صالح حرب ده فى اسوان يا جماعه
انا بقالى 20 سنه فى اسوان عمرى ما سمعت بالاسم ده

رغم اني لست من طلبة الكلية
ولا من سكان أسوان ..

او حتى من سكان جمهورية مصر العربية

إلا اني اضم صوتي لصوتكم في مقاطعه كل من تسول نفسه بالجشع و الطمع

لأنني أعاني انا ايضا من هذه المشكلة هنا في الكويت في ظل ارتفاع الاسعار مؤخرا بطريقة رهييييييييييييييييييييييييبه تصل في بعض السلع إلى 100% أو 200% .. و ذلك لمجرد انتشار أنباء .... باحتماااااااااااااااااال .. زيادة الرواتب .. بنسبة ... 40%

لا للجشع

ولا للطمع

ولا للعيشه المرفهه على قفانا إحنا

و كمان بتقولو المطعم ذو جوده منخفضة و للغاية .. يعني ملوش حجه انو يزيد اسعاره طالما بيوفر في تمن الزيت و بيفضل يستخدمه يوم كامل :pale: (( والله قرفت ))

طنشوه و متشتروش منه
و بصراحة ... رأيي الشخصي ... لو ينفع يعني .. انكم تتفقو بينكم و بين بعضكم على منافسته .. ممكن لو احد ما منكم يعرفله واحد صاحب مطعم .. يقترح عليه فتح فرع من مطعمه في المنطقة دي .. أو انكم تعملو بجهود شبابية على محاولة اقناع أحد اصحاب المطاعم بالفكرة في انه يفتتح مطعم في المنطقة خصوصا انها منطقة طلبة كما فهمت ..
احنا عملنا كده في الكلية بصراحة .. كون الكافتيريا بتاعت الكلية غلت أسعارها اوي

قاطعناها .. و الطلبة اتفقو مع ادارة الكلية و تم توفير آلات لبيع السندويشات و المأكولات الخفيفة كالشيكولاته و الشبسي داخل ممرات الكلية

ايضا دي بديل كويس في حالة توفرها ..

اقتباس :

شكرا يا باشهندسة على الشعور بأخوتك فى الكليه وده طبعا أخلاق أي مصرى حتى أن كان غير موجود بالفعل معانا لكن دايما المصريين روح واحده

اقتباس :

و كمان بتقولو المطعم ذو جوده منخفضة و للغاية .. يعني ملوش حجه انو يزيد اسعاره طالما بيوفر في تمن الزيت و بيفضل يستخدمه يوم كامل :pale: (( والله قرفت ))

بالله ما نصعبش عليكى والله انا هعيط

اقتباس :

و بصراحة ... رأيي الشخصي ... لو ينفع يعني .. انكم تتفقو بينكم و بين بعضكم على منافسته .. ممكن لو احد ما منكم يعرفله واحد صاحب مطعم .. يقترح عليه فتح فرع من مطعمه في المنطقة دي .. أو انكم تعملو بجهود شبابية على محاولة اقناع أحد اصحاب المطاعم بالفكرة في انه يفتتح مطعم في المنطقة خصوصا انها منطقة طلبة كما فهمت ..

وكمان أحنا فكرنا فى الفكره دي بس كنا مستنيين نشوف الامور هاتوصل لفين معاهم
ويرجعوا عن اللى فى دماغهم ولاايه

هو فعلا موجود كل ده بكافيتريا الكليه بس مش معقول ان احنا نعتمد عليها بشكل اساسي لأن الكافيتريا مش معقول ها تفتح 24 ساعه
وبعدين بصراحه شغل الشبسى والكلام ده ميسدش مع ناس كتير وانا اولهم

شكرا مره اخرى على تجاوبك معانا يا باشمهندسه

ولكن تم بالفعل تراجع الاسعار الى ما كانت عليه بسبب المقاطعه وكان فعلا قرارنا بالمقاطعه ده قرار صح
وهذا يعتبر نقطه وفكره جميله نشأت من خلال المنتدى وكنا فعلا ايجابيين أنا عارف أن فى ناس كتيير تعبت من المقاطعه ولكن الحمد لله كان بفايده

المشرف العام/
القبطان

الحمد لله المنتدى كان ليه تأثير كبير فى تراجع الأسعار عند شاذلى مره تانيه
وعاوزين دايما يبقى صوت المنتدى قوى كده ويجعل مننا قوه وإتحاد ما بين بعضينا
واله الموفق.

القبطان كتب:

اقتباس :

شكرا يا باشهندسة على الشعور بأخوتك فى الكليه وده طبعا أخلاق أي مصرى حتى أن كان غير موجود بالفعل معانا لكن دايما المصريين روح واحده

و لكني لست حتى من سكان مصر الجميلة .. ولا من مواطنينها Embarassed

فهل هذا يعني اني خرجت عن قائمة الروح الواحده ؟؟ :)
و بالنسبة لكون الشبسي ميسدش في آلات برضه مخصصة لبيع السندوتشات .. لا أعلم ان كانت متوفرة في مصر أم لا لكن لدينا في الكلية عدد منها و السندوتشات تبع شركة أمريكانا و الآلة كذلك و تعبأ كل صباح بسندوتشات مختلفة و انواع من الكرواسون و علب السلطة .. يعني انتا تفطر بسندوتش و علبة سلطة كده .. و تقوم داخل على الآلة الي وراها تشربلك نسكافيه .. و بعدها تقوم واخدلك شيكولاته من الآلة الي بعدها ..

و تمشي زي الروبوت بالظبط بعد ما اعتمدت في نظامك الغذائي على الآلات cheers

بس بجد ... دكتورة الاقتصاد اقترحت علينا ان احنا نفتح كافيتيريا خاصه و نديرها بجهودنا احنا كطلبة .. الي فاضي يقف فيها و نتعاون عليها ... و نحارب بيها غلاء الكافيتيريا والكافيهات الي في الكلية .. خصوصا ان احنا كمان حوالين الكلية عندنا تعتبر منطقة صناعيه و مفهاش مطاعم ... صالحة لاستهلاك طلبة جامعة بريئين معدتهم مش واخده على زيت العربيات و قطع الكاوتش !!

اقتباس :

و لكني لست حتى من سكان مصر الجميلة .. ولا من مواطنينها فهل هذا يعني اني خرجت عن قائمة الروح الواحده ؟؟ :)

سورى سيدتى فانا لم أتشرف بمعرفتك من قبل أو أعرف أنك مصريه او لا ولكن أن ساور ذهنى أنك فقط تدرسين بالكويت لكنك مصرية الأصل وهو فى هذه المره خاننى على عكس عادته ولكن هذا لأينقص من قدرك شئ ففى النهايه كلنا عرب مسلمون وكونك مسلمه وعربيه وبحراره كما لاحظت من كلامك فانت من ضمن تلك الروح الواحده وهى الروح العربيه فانا اسف لسوء الفهم

اقتباس :

و بالنسبة لكون الشبسي ميسدش في آلات برضه مخصصة لبيع السندوتشات

الات أيه يا باشمهندسه"لوسمحى اقول يا باشمهندسه" الى حضرتك بتتكلمى عنها بتتكلمى عنها عندنا هنا مفيش الات ولا حركات من دى خالص احنا يدوب بنسمع عنها سمع ولو فى عندكم زياده أبقى أبعتيلنا شويه
او أدعيلنا"ربنا يصلح الحال"

اقتباس :: لكن لدينا في الكلية عدد منها و السندوتشات تبع شركة أمريكانا و الآلة كذلك و تعبأ كل صباح بسندوتشات مختلفة و انواع من الكرواسون و علب السلطة .. يعني انتا تفطر بسندوتش و علبة سلطة كده .. و تقوم داخل على الآلة الي وراها تشربلك نسكافيه .. و بعدها تقوم واخدلك شيكولاته من الآلة الي بعدها ..

انت كده يا باشمهندسه بتفتحى عين الشباب على الحاجات دى فى ناس الحاجات دى زى المخدرات بالنسبه لها ولو طالبنا بيها فى الكليه ممكن نروح المعتقل
ومن الاخر كل الناس بتقول أحنا فى منفى ابو الريش

على العموم اسف لسوء الفهم

» مجموعة تسجيلات الدكتور عاطف العراقى
» تعليم برنامج بوربوينت للدكتور عاطف العراقي
» أغلب تسجيلات الدكتور عاطف عراقى للمهندس المدنى
» لقـــاء جديد مع شخصية جــديدة " استاذ شاذلي القاضي " ،،،
» مطعم تحت الماء