الآن على منتدانا فقط اللقاء الذى تم إجراءه مع الدكتور/هانى السيد.

إن الحمد لله تعالى نحمده و نستعينه و نستغفره، و نعوذ بالله تعالى من شرور أنفسنا و سيئات أعمالنا
أما بعد
يسعدنى ويشرفنى أنا وكل زملائى أنا أعرض على حضراتكم الحوار الذى أجرى كتابيا
مع الدكتور/هانى السيد وقد أجابنا مشكورا عن كل الأسئله التى دارت
فى أذهاننا ولم يبقى لنا أى شىء لنقوله
وما يجعلنى أناطح السحاب وأن أكون فى قمة السرور
أننى أول من قرأ هذا الحوار وحرصت كثيرا ألا يقرأه
أحدا حتى يكون حصريا لمنتدانا وحتى لا نحرق المفاجأه والأسئله
وإجاباتها حتى يعلم الجميع أن الحوار ليس مستهلكلا
أو قديما فالسبق والمبادره لنا لذلك أكرر الشكر
للدكتور/هانى على ثقته بنا وما تؤهلنا دائما إلى صنع الأفضل والأحسن
وندخل أيضا فى مضمار المنافسه.

1/إسم سيادتكم من واقع البطاقه؟؟وتاريخ الميلاد؟ومكان الميلاد؟؟والحاله الإجتماعيه لسيادتكم؟؟وعدد الأولاد إن وجد وأسمائهم؟

الأسـم : هـانى السيـد عبـد العـزيـز مدكور

تاريخ الميلاد: 16-11-1972

مكان الميلاد: أسـوان

الحـاله: متزوج ورزقـت بأبنتين : نورهـان و نهـى .

2/ عدد أخوه حضرتك؟؟وترتيبك بينهم؟؟
أن الأبن الأوسط بين أخين فقط والحمد لله .

3/الدرجة العلميه فى الوقت الحالى؟؟؟ومن أى دوله كانت الدكتوراه؟؟

الدرجـه العلميه : دكتوراه فى الهندسه الإنشـائيـه –جامعة إنسبروك - دولة النمســا .

4/ تشرحلنا رسالة الدكتوراه بتاعتك يا دكتور والماجستير بأسلوب مبسط أو الفكره العامه؟؟

رسالة الماجيستير عباره عن تنفيذ برنامج عملى لتليسح الكمرات المسلحه خارجيا بإستخـدام ألياف الكربون بسمك 5, مم وبأطوال مختلفه فى منطقة القص Shear zone

أما رسالة الدكتوراه فهى عباره عن التمثيل ثلاثى الأبعـاد اللاخطى للخرسانه حتى الإنهيـار بإستخـدام التأثير المتداخل بين ظاهرة اللدونه ونظرية التدمير (تمثيل الشروخ فى الثلاث أبعـاد بدقى متناهيهبعـادأأ) وتم تطبيق النظريه الجديده على نفق معقد بين النمسـا وإيطاليا وتم تـوقع الإنهيـار وأماكن العيوب بدقه عاليه

5/متى كان تخرج سيادتكم ومتى تعينتم معيد\\\\\\\\\\\\\\\"بمعنى خريج دفعة كام\\\\\\\\\\\\\\\"؟؟

سنة التخرج: 1995

سنة التعيين معيد: 1995 بهندسة أسيـوط

سنة التعيين : 1996 بهندسة أسـوان

6/لماذا أخترت قسم مدنى؟هل كان ذلك بالصدفه أم عن تخطيط؟

القسم الذى كنت أحلم به هو هندسة الطاقه الذريه ولكن لا يوجد هذا القسم الإ فى هندسة الإسكندريه

أمـا قسم مدنى فهـو إختيـارى الثـانى والأفضل ولم أختـاره بالصدفه .

7/من أى جامعه قد تخرجت سيادتك؟؟وفى أى كليه قد تعينت معيدا؟وهل كان تعيينك دكتورا فى هندسة اسوان محض صدفه أم عن تخطيط؟وكم عام تدرس كدكتور؟؟

جهة التخرج: هنـدسة أسيـوط

سنة التعيين معيد: 1995 بهندسة أسيـوط

سنة التعيين : 1996 بهندسة أسـوان

تعيينى فى هندسة أسـوان لم يكن صدفه إنمـا عن رؤيـة للمستقبل المتـوقع شخصيـا وإجتمـاعيـا بإذن الله

الحمـد لله أنى أنهيـت الدكتوراه فى 4 سنوات رسميـا

ولكن فعليا لقـد أنهيت الدكتوراه الأولى والمطلوبه بعـد سنه ونصف وقـدمت نظريـه جديده فى سنتين ونصف وهى التى كانت موضوع الرساله الأسـاسى .

8/ما تقدير سيادتك فى سنين الكليه الخمس؟وما تقديرك فى الدكتوراه؟؟وما ترتيبك على دفعتك؟؟وهل حد من دفعة حضرتك معانا فى الكليه؟؟

التقديرات كالتالى:

إعـدادى: جيـد 72%

أولى مدنى: جيد جـدا 76%

ثانيه مدنى: جيد جـدا 79%

ثالثه مدنى: ممتـاز 86%

رابعه مدنى: ممتـاز 85%

الترتيب: الثانى على دفعة 1995

من دفعتى : د. أشـرف فرح - د. سيف الدين أحمـد - د. محمـد فكـرى- م. يحى حسن مكى- د. أحمـد أبو بكر – د. محمود على صـابر-

9/جبت كام فى الثانويه العامه يا دكتور؟؟؟؟

مجموع الثانويه 87% وكنت الثـالث على محـافظه أسـوان و11 على قطاع أسيوط
ملحوظه : الحد الأدنى لهندسة أسيوط فى عام الثانويه العامه هو 74% .

10/هل كنت تخطط لدخول كلية هندسه؟وهل كنت تحلم او تتوقع بأنك ستصبح معيد ودكتور؟؟وأيه الكليه اللى ممكن كنت روحتها لو مدخلتش هندسة؟؟

كلية الهندسه هى أحـد أحلامى منذ الصغر لذلك كنت أخطط لهـا بمنتهى الإصرار

التعيين فى سلك الجامعه تولد بمجرد دخولى الكليه

لم أفكـر مطلقـا فى كليه أخرى غير هنـدسه .

11/لماذا تخصصت فى الخرسانه بالذات يا دكتور؟؟؟

الإنشـاءات بصفه عامه والخرسانه بصفه خاصه ماده غنيه والتطوير بها يومى بالإضـافه لإستخـدامها العالمى والقدره فى تغيير صفاتها وخواصها وسلوكها .

12/من مرحله قبل الإبتدائيه حتى الجامعه وتحضير الماجستير والدكتوراه تؤثر فينا أساتذه ودكاتره كتيير فأرجو ذكر شخصيه أثرت فيك
فى كل مرحله أو أكثر من شخصيه من تلك المراحل إن وجد؟؟

من أكثر ما أثر فى أ.د. صبرى فرغلى بهندسة أسيوط وكذلك أ. د. حسنى محمود صغير بهندسة أسيوط .

13/من تجده قدوه لسيادتك أو مثل تحتذيه؟؟ومن تحب أن تكون مثله؟ومن ترى فيه أنه يخطو خطاك ويسير على نهجك أو يشبهك بمعنى أصح؟؟

قدوتنا طبعا رسول الله سبحانه وتعالى ولكنى أرى سيدنا عمر بن الخطاب مثل أحتذى به فى حياتى وأتمنى أن أفعل جزء يسير من نهجه .

14/هل تؤمن بشىء أسمه الحظ؟؟؟؟

لا يوجد حظ ولكن يوجد إيمـان بالله+إصـرار+ عزيمه+ تخطيط سليم+ أداء بمنتهى الأمانه = نجاح أكيـــــــــد بإذن الله .

15/زى مفيه شخصيات\\\\\\\\\\\\\\\"أساتذه يعنى أو دكاتره\\\\\\\\\\\\\\\" بتأثر فينا فيه برضو طلبه أو زملاء ممكن يأثروا فينا بحاجات كويسه ممكن تذكرلنا حد منهم إن وجد؟؟

الدكتور أحمـد مصطفى من الشخصيات المحترمه جدا

وكذلك المهندس عمر حمدى والمهندس حسين وهما كانوا طلبه وأنا معيد .

16/ليك أصدقاء كتير يا دكتور ولا قليلين؟؟مع ذكر السبب؟؟وأيه مواصفات الصديق بالنسبالك؟؟

الحمد لله لى أصدقاء بعدد معقول وبتخصصات وأماكن مختلفه

مواصفات الصديق: العقل – التدين – الإخلاص- الأمانه- التعاون- الرؤيه الشامله للأشيـاء- الطمـــــــــــــــــوح .

17/أيه الحكمه اللى بتاخد بيها دايما؟أو أيه مبدأك فى الحياه؟؟

بالطبع هناك أشيـاء كثيره مثل:

\\\\\\\\\\\\\\\"من خاف الله أخاف الله منه كل شئ ومن لم يخف الله أخـافه الله من كل شئ\\\\\\\\\\\\\\\"

\\\\\\\\\\\\\\\"من كانت له ذريه ضعفاء فليتق الله فى عمله\\\\\\\\\\\\\\\"

\\\\\\\\\\\\\\\"على قدر أهل العزم تأتى العزائم وعلى قدر أهل الكرام تاتى المكارم\\\\\\\\\\\\\\\"

\\\\\\\\\\\\\\\"أفعـل ماتخـاف\\\\\\\\\\\\\\\"

والأيه القرانيه \\\\\\\\\\\\\\\"من يعش عن ذكر الرحمن نقيض له شيطان فهو له قرين\\\\\\\\\\\\\\\"

وأخيرا الأيه القرانيه على لسـان السيده مريم \\\\\\\\\\\\\\\"قالت هو من عند الله إن الله يرزق من يشـاء بغيـر حســاب\\\\\\\\\\\\\\\".

18/هوه فيه هوايات لحضرتك؟؟

لى العديد من الهوايات مثل العديد من الألعاب الرياضيه+المشى + القراءه+ الشطرنج

ولكن اجد صعوبه فى ممارستها بسبب ضيق الوقت الشديد الذى أعانى منه بإستمـرار.

19/هل فيه روتين معين لحضرتك بتمارسه كل يوم؟؟يا ريت تذكر يومك بيبقى إزاى؟؟

لا يوجد روتين محدد لليوم

اليوم يبدا بالصلاه طبعا وقراءة بعض القران

وإحتساء 2 كوب شاى كبداية فقـط

التاكد من البريد الإليكترونى والمنتدى والعديد من المواقع الخاصه بالجامعات والمشاريع

التأكد من جدول أعمالى اليومى و المحدد سلفا

إعطاء محاضراتى

إدارة مشروع المعامل التخيليه

إدارة وحدة إدارة المشروعات

كتابة التقرير اليومى عن كلاهما

العوده للمنزل والبقاء مع والدتى لبعض الوقت

التأكدمن البريد الأليكترونى والمنتدى والعديد من المواقع الخاصه بالجامعات والمشاريع

البقاء مع أسرتى واللعب مع بنـاتى بعض الظهر

العوده للعمل فى المساء حوالى 5 ساعات على الأقل

التأكدمن البريد الأليكترونى والمنتدى والعديد من المواقع الخاصه بالجامعات والمشاريع

مشاهدة التليفزيون مع اسرتى قبل النوم.

20/أيه الأكله المفضله لحضرتك؟؟وهل أنت اللى بتعملها ولا حد بيعملهالك؟؟

الأكله المفضله هى الباميه أو البطـاطس أو الإسكالوب وطبعا زوجتى تعملها بس أنا أستطيع طبخها بسهوله

ملحوظه : أنا طباخ ماهر وده طبعا بسبب مدة الغربه الطويله فى حياتى.

21/أيه اللى ممكن يضايق حضرتك؟؟وأيه اللى ممكن يخليك فى قمة السعاده؟؟

أكثر ما يضايقنى هو الكذب- الخيانه وأخيرا الإحسـاس أحيانا باليأس بأنه لا فائده من المجهود المبذول فى إتجـاه ما

أكثر ما يسعدنى النجـاح وإحسـاسى أن الله سبحانه وتعالى راضى عنى ويدعمنى فى حروبى المتصله .

22/بتنام كام ساعه فى اليوم يا دكتور؟؟؟

عدد ساعات النوم حوالى 4 ساعات يوميا ويوم الجمعه حوالى 6 ساعات.

23/ بتعمل ايه فى فترة الإجازات يا دكتور؟؟وأيه سبيل الترفيه لحضرتك؟

فتره الأجـازه القصيره هى بنهاية أغسطس حتى بداية الدراسه والأسبوع الثانى من أجازة نصف العام وكذلك يوم الجمعه فقط من كل أسبوع

كل فترة الأجازه مركزه لأسـرتى فقـــــط والهدف الرئيسى هو الإستـرخاء التـام والقيـام برحلات وجولات مختلفه مع أسـرتـى (مش النوم فأنا لا أحب النوم حتى فى الأجـازه) .

24/مين الشخص اللى نفسك تشوفه يا دكتور؟؟ومين الشخص اللى مش بطيقه أو تطيق سيرته؟؟؟

الشخص الذى أتمنى رؤيته الرسول علية الصلاة والسلام – المرحوم والدى – شخص أخر لا أستطيع ذكره .

ولا يوجد شخص لا أطيق رؤيته لأنى والحمد لله قادر على التعامل مع الجميع .

25/أيه الحاجه اللى ممكن تبقى ملزماك دايما سواء فى جيبك أو فى شنطتك أو عربيتك أو فى مكتبك أو شقتك؟؟؟

الأحلام والطموح المتجدد بإستمـرارو الإعتزاز بالنفس والتفكير وجرعات الأمل بالله سبحانه وتعالى فى تحسين الغد بإذن الله .

26/هل بتختار ملابسك بعنايه شديده ولا الحكايه دى مش بتهمك؟؟وهل أنت بتختاربنفسك ملابسك ولا فيه حد بيختارلك؟؟؟

التوسط فى هذا الموضوع ما لم يكون هناك إجتماع فائق الأهميه

أنا أختار ملابسى بنفسى .

27/نفسك تعمل أيه يا دكتور ومعملتوش؟؟وأيه اللى كنت بتحلم بيه وأتحقق؟

نفسى أغير الكليه بالكامل وأغير أساليب التدريس وأغير السلوكيات وطموح الطلاب

ما كنت أحلم به وتحقق هو وجود هندسة أسـوان على الخريطه بالدوله بل أن بعض الجامعات العريقه من داخل مصر وخارجها تطلب مشاركاتنا فى العديد من المشاريع والتمثيل الخارجى والأوربى والأفريقى .

28/إذكرلنا موقف ضحكت فيه من قلبك؟ وموقف زعلت فيه جدا؟

المواقف الطريفه فهى كثيره مثل أبنتى الصغيره نهى وهى تطلب منى أن تنــام خوخ (حاولوا تفسيرهــا ؟؟؟ ولكم 5 درجات بأعمـال السنه)

موقف وفاة والدى وأنـا بالغربه من أصعب المواقف ولأن المصائب لا تأتى فرادى فلقد إحترق جهاز الكمبيوتر وشغل سنه ونصف بالكامل وضاع كل شئ فى نفس الأسبوع .

29/فيه حد معين متقدرش تققوله لأ أو بمعنى أصح بتنفذله طلباته علطول؟؟؟

بناتى نورهـــان ونهى .

30/هل تحب إن اولاد حضرتك يمتهنوا مهنتك كمهندس أو كدكتور؟؟؟ولا ممكن تسيبهم زى ما يحبوا هما؟؟؟

بالطبع اتمنى ولكن لهم مطلق الحريه فى إختيار التخصص .

31/أيه الصفه المهمة أو المبدأ اللى بتعلموا لأولادك وبتحاول دايما إنك ترسخه فيهم؟؟

الثقه بالنفس وقـول الحق أى كان الثمـن .

32/بتحب القرايه حضرتك؟ولو بتحبها أيه الكتاب المفضل ليك؟وأيه نوعية الكتب اللى بتقراها؟؟

بالطبع احب القراءه والكتاب المفضل هو كتاب ساحر الصحراء

كل الكتب بلا إستثنـاء : دينيه – علميه – إجتماعيه – سياسيه - فلسفيه .

33/فى وقت الفراغ ممكن تعمل أيه يا دكتور؟؟

أقرأ – اللعب مع بنـاتى- زيارة أمى يوميا .

34/ايه اليوم اللى عمرك مهتنساه؟؟

هناك أيـام كثيره منهـا

يـام أيـاأأأأ يوم فرحة والدى الله يرحمه بمجموعى بالثانويه العامه وبالماجيستير

يوم ولادة أبنتى نورهان بالنمسا

يوم حصولى على الدكتوراه

يوم وفاة والدى الله يرحمه .

35/هل تحب إنك تكون عميد للكليه\\\"مع ذكر السبب فى الحالتين\\\"؟؟وايه ممكن تعمله لو توليت هذا المنصب؟؟

من هنا بدأت الأسئله الحقيقه

مسألة المنصب كعميد ليس مغرى بالنسبه لى لأن فى شهر أغسطس رفضت العمـل كمسئول ومخطط لمجمعـات التعليم التكنولوجى بالوزارة وترك الجامعه لمدة عشر سنوات على الأقل (العرض ما يزال قائمـا) ولكنى رفضت لأسبـاب مختلفه بعضها متعلق بالكليه والجامعه وبكم كطلاب وأخـوه ولأن الأساس رسالتى لم تنتهى بالكليه ولأسباب أخرى.

نرجع للسـؤال

بالطبع هأوافق على الفور على منصب العميد ليس من منطلق المنصب ولكن من منطلق القدره على التغيير السريع وإتخـاذ القرارات التى تخدم رسالتى بالكليه

الأجراءات الواجب إتخـاذها كثيره جدا:

1- تعديل اللائحه الطلابيه بكل الأقسـام

2- زيادة جرعات الثقه بين الطلاب وأعضـاء هيئة التدريس

3- مراقبة أو متابعة هيئة التدريس

4- محاسبة الإداره على التأخير بأسلوب رادع

5- تفعيل دور إتحـاد الطلاب فى عرض أراء الطلاب

6- إلغـاء الرأفه من الإمتحـانات

7- رفد عضو هيئة التدريس الذى يقوم بإعطـاء دروس خصوصيه

8- إثراء المكتبـه بالكتب والدوريات العلميه

9- عقد إجتماعات دوريه كل ترم مع طلاب كل قسم على حده

10- العمـل كأسره واحده بزيادة الإنتمــــــــــــــــــــــــــــــــاء للكليه

11- وضع خطه تطوير لمنشـات الكليه (أحاول تفعيلها حاليا من خلال وحدة إدارة المشروعات)

12- زيادة المشاركات الطلابيه فى المجتمعات الخارجيه من أنشطه إجتماعيه وثقافيه ورياضيه

13- زيادة مساحات الحوار بين الجميع

14- إيجـاد تمويل مستمر لتحديث معامل الكليه المختلفه

15- جعل الكليه على مستوى هندسة القاهره وأسيوط وعين شمس من حيث المنشأت والأنشطه والأهم على مستوى الخريجيين

16- والعديد والعديد من الأشياء

لذلك أعلم نى لنأنى أنى لن أصبح مسئول فى يوم .

36/ نفسك الكليه تبقى إزاى يا دكتور؟؟

لقد أجبت على هذا السؤال ضمنيا بالسؤال السابق .

37/أيه الحاجات اللى بتحبها فى كلية هندسة أسوان وأيه الحاجات اللى بتكرهها فيها؟

بحب الكليه أن تصبح بيت لنا جميعا

بحب روح الإنتماء الذى وجدتها بمنتداكم

بحب وجود طلبه مجتهده

بحب الإبتكار لدى البعض

بحب الطموح لدى البعض

أكره اللامبالاه عند الجميع (طلاب ودكاتره)

أكره النجاح بأقل مجهود وبمساعدة درجات الرأفه للطلاب

أكره الكسل

أكره الإستذكار فى أخر العام فقط

أكره الدروس الخصوصيه

أكره نسبة الحضور المنخفضه

أكره الإحباط فى عيون الطلاب

أكره عدم التجديد من يوم ليوم فى كل شئ

أكره الحرب التى أقوم بها يوميا لتحريك أحد الجبال التى تخنق التطوير

أكره البطئ الشديـــــــد فى الحركه

أكره الإختلاط الغير مبرر .

38/تتوقع الكليه هتبقى إزاى بعد عشر سنين يا دكتور؟؟من حيث الطلبه والكليه نفسها والإداره كمان؟؟

هذا يعتمد على التغييرات القادمه خلال هذا العام

ولكن ثقوا ان هناك حروب مستمره لتطوير الكليه بكامل تفاصيلها (إدارة- مواد تعليميه- معامل- منشأت- مواد تدريسيه- أعضاء هيئة التدريس- مهارات إحترافيه للخريج................. )

وإليكم الخبر الأتى :

والحمد لله سوف يتم توصيل الإنترنت بقرار فى خلال الأسابيع الثلاثه القادمه بعد لقاء أتممته بهدؤ بالمجلس الأعلى للجامعات الأسبوع الماضى

والقادم أفضل بإذن الله .

39/ س لو سبت هندسة أسوان يا دكتور تحب تدرس فين؟؟؟

سـوف أذهب للعمـل بالوزاره أو المجلس الأعلى للجـامعـات بمصـر إن شـاء الله .

40/هل بتحب السياسه يا دكتور؟؟وهل ليك نشاطات حزبيه؟؟وأيه الحزب اللى حضرتك مشترك فيه؟؟وهل أنت موافق عليه؟؟
وأيه المذهب السياسى اللى بتعجبك مبادئه؟؟

لاأحب السياسه لأن تعريف السياسه هى الحوارات والإتفاقيات القذره

لذلك فانا غير مشترك فى حزب ولكن تم نصحى من قبل شخصيه مرموقه اخيرا بالانضمام للحزب الوطنى حتى أصل لمنصب مرموق ولكن .....................

41لو كنت رئيسا لمصر أيه أول حاجه ممكن تعملها فى البلد دى؟؟واخر حاجه ممكن تعملها فيها؟؟

بالطبع هناك أشيـاء كثيره جدا جدا منهـا :

ألغى مجلس الشعب - وضع قانون صارم ورادع للفسـاد – حساب المسئولين بمنتهى الدقه – وضع خطة للإستخدام الأمثل لكل موارد البلاد – رفض الوصايه من أى دوله خارجيه أى كان حجمها – إلغـاء المعونات- وضع خطة للإعتمـاد على مواردنا فقط والتخطيط لزيادتها – العمل على إلغـاء الجامعات الخاصه ووضع خطه حقيقيه لرفع مستوى المدرسين والتعليم ما قبل الجامعى وخصوصا الثانويه العامه.

42/هل تؤثر قول الحق حتى ولو هيزعل حد منك؟؟؟سواء قريب أو بعيد؟؟

طبعـا الحق فوق أى إعتبـار لذلك أنا فى صراعات دائمه المهم رضا الله سبحانه وتعالى .

43/مين الشخصيه اللى عجبتك فى هندسة أسوان\\\"دكتور ومعيد وطالب\\\" وده خلال سنين تدريسك؟؟

د. أحمـد مصطفى و المهندس عمر حمدى .

44/اذكرلنا رد فعل من طالب كان مش متوقع بالمره وضحكك جدا؟؟
مفيش حاجه محدده فاكرها حاليا

45/أيه المهنه اللى حضرتك ممكن تشتغلها غير الهندسه أو كدكتور؟؟؟

لدى بعض الخبره فى التخطيط والإداره

ولكن أفضـل أن أكون أب

46/أيه خطط حضرتك الأكاديميه؟؟؟

1- إدارة دفة مشروع المعامل التخيليه

2- إدارة وحدة إدارة المشروعات

3- التحضير لمؤتمر قومى بأسـوان عن مشاريع التطوير بالجامعه

4- التجهيز لثلاث مشاريع عملاقه بالكليه هذه الأيـام

5- تفعيل دور مشاريع التطوير بالمجلس لأعلى بأسوان

6- لم شمل جميع أعضـاء التدريس بكليتنـا فى مشروع قومى للجوده الحقيقيه لإعتمـاد الكليه

7- التقدم للترقى كأستـاذ مساعد فى الموعد بإذن الله

47/لو حضرتك حبيت تسمع أغنيه ممكن تسمع لمين؟؟

أغنية فات الميعاد أم كلثوم

أعز الناس عبد الحليم حافظ

أنت قلبى عبد الحليم حافظ

48/ايه اللى بيعجبك فى قسمى كهربا وعماره؟؟وأيه اللى اللى مش بيعجبك فيهم ده من حيث كل حاجه طبعا؟؟

قسم كهرباء

منظم وأعضـاءه محترمين لأقصى درجه ومتكاتفين نسبيا بدرجه كبيره ولديهم رؤيه جيده للأمور وهناك مساحه كبيره للحوار بينهم

ولكن يعيب القسم قلة الطموح وعدم الرغبه الكبيره فى التطوير الشامل

قسم عماره

أفضل ما فى القسم وبعض الطلاب المبدعين أصحاب الجهد الموفور والملحوظ

ولكن يجب غلق قسم عماره لمدة سنتين او ثلاثه (عدم إستقبال أى طلاب جدد) وذلك لإيجـاد حل فى العجز الصارخ فى أعضـاء هيئة التدريس

49/ أيه المشاريع اللى حضرتك نفذتها؟؟أو شاركت فى تنفيذها؟؟؟

مشروع لمؤسسة العلوم والتكنولوجيا بالنمسا (Damage Tensor Project)

مشروع التمثيل الثلاثى للأنفاق لمؤسسة العلوم والتكنولوجيا بالنمسا

مشروع HEEPF مع الزملاء بقسم كهرباء

بالطبع مشروع المعامل التخيليه بكليتنا (وعلى فكره أنا أعتبره أبنى الثالث)

الحصول على منحه من الإتحتاد الأوربى للتدريب بالخارج

الحصول على منحه من وزارة التعليم العالى للبحث بأوربـا لمدة ثلاث شهور

مشروع دراسة الأثر مع برنامج الإتحاد الأوربى بمصر

عدد 8 منح من المشاريع الصغيره والتى تمثل منح من الإتحاد الأوربى والوزاره

المشاركه مع وزارة التعليم العالى بوضع خطة لتطوير التعليم ما قبل الجامعى

المشاركه فى تمثيل مصر فى شبكة الدول الإفريقيه لتطوير التعليم

المشاركه فى مؤتمر البنك الدولى ممثلا لوفد وزارة التعليم العالى

50/ أيه الصعوبات اللى قابلتك فى الغربه؟؟

الغربه نفسها

كذلك البعد عن الأهل

وفاة والدى

إثبـات الذات

جميع المواد والأساسيـات النظريه كانت جديده

اللغه الألمانى فى البدايه

51/ أيه الحاجات الحلوه اللى قابلتها فى النمسا؟؟؟ والحاجات الوحشه؟؟
الحاجات الحلوه كثيره أجملها

ثقتى بأن شعبنا رائع وعبقرى بالفطره

كذلك الإلتزام – الإنضباط- حب العمل- التخطيط السليم للمستقبل القريب والبعيد

وضع ضوابط لأوقات الجد وأوقات الهزل

الحاجات السيئه بالطبع مثلها مثل الكثير من البلاد

الإختلاط بشكل سافر جدا

الحكم على الشعوب بالتعميم

أحيانا التمييز والتفرقه

أحيانا النظر للشعوب العربيه والمسلمه نظره دونيه

52/ هل ليك أصدقاء فى النمسا؟؟؟وإزاى كانت الحياه هناك؟؟والدراسه؟؟

بالطبع لى أصـدقـاء من النمسا ومن مختلف دول العالم إيطاليا- ألمانيا -- فرنسا- الصين- أندونيسيا – التشيك........

53 /لو سبت هندسة أسوان يا دكتور تحب تدرس فين؟؟؟

سـوف أذهب للعمـل بالوزاره أو المجلس الأعلى للجـامعـات بمصـر إن شـاء الله

54/ بتؤيد عمل المرأه يا دكتور\"مع ذكر الأسباب فى حاله النفى والإيجاب\"؟؟؟

عمل المرأه بصفه عامه فى مملكتها (المنزل) إلا فى ظروف معينه ومهن معينه يمكنها العمل

المرأه عندما خرجت من المنزل للعمل أهانت نفسها

كذلك عندما طلبت المساواه مع الرجل خسرت الكثير لأن إسلامنا كرمهـا بشكل لن تجده فى مجتمع ويكفى أن رسولنا عليه الصلاة والسلام أوصـانا بهن أم وزوجه وأبنه وأخت

لذلك أنا ضد عمل المرأه بدون مبرر قوى وواضح

وضد عملها لو كان على حساب بيتها وأسرتهـا

55/ الرساله اللى ممكن توجهها للطلبه بتوعك ؟أو النصيحه اللى ممكن تحب توصلهالهم؟؟

أرجـوكم حب أنفسكــم صح

حب النجاح بتعب

حب التفوق

حب تحقيق الأحلام

حب العمل الجماعــــــى

تذكر الله سبحانه وتعالى فى كل تصرفاتك

تذكر والديك وتعبهم فى كل أوقاتك بالكليه وبالذات وقت الهروب من المحاضرات والسكاشن.

تم بحمد الله لقائنا مع الدكتور/هانى السيد وأكرر شكرى له وأنتظرونا شهريا مع شخصيات هامه وسيكمل معكم مشرف القسم المختار الذى سيوكل بكل المهام الخاصه بالأسئله والأجابات.

جزاك الله خيرا ياحبار اولا على الفكرة الرائعه ثانيا جزاك الله خيرا يادكتور هانى على تواضعك حذا الذي لم نعهده من قبل فدائما يكون هناك جدار فولاذي بين اعضاء هيئة التدريس والطلبة ولكنك اذبت هذا الجدار بحبك الجاد للعمل الصادق وكلامك الرائع عن التطوير الذي لطالما حلمنا به واود ان الفت انتباهكم الى مدى تاثير هذا اللقاء على الشباب لان الشباب للاسف الانى لا يجد من يوعيه او يوجه له الطريق او ينقل له خبراته في الحياة بطريقة سلسله تعطى لشاب ثقة في التقدم للافضل والاخ الاكبر او القدوة الجيد التقدير والاحترام بارك الله فيك يادكتور هانى على انجازك هذا وربنا معاك يارب ويوفقك باذن الله

شكرا يا حبار على الفكره الهادفه دى لأن أحنا ممكن نستفيد جدا من التجارب الخاصه بأعضاء هيئه التدريس وقصة حياتهم اكيد مليئه بالانجازات العظيمه

وشكر خاص للدكتور هانى السيد لتقبله الفكره بكل ترحاب وتواضعه ونحن نعرف وليس مجامله منى ان الكل فى الكليه يشهد له بالكفاءه وحسن معاملته لطلابه بالكليه واهتمامه بمصلحة الطلاب أكثر من أى شئ سواء فى المحاضرات أو كما سمعنا عن متابعته للسكاشن والسؤال عن احوالها ومدى استفادة طلابه منها

شكرا جزيلا للدكتور هانى ,على اتاحة هذه الفرصة الرائعة للتحاور مع عضو من اعضاء هيئة التدريس مع احترامى وتقديرى الشديد لحضرتك يا دكتور.

وشكرا للمدير العام على هذه الفكرة
.
اتمنى يا دكتور هانى تبقى عميد:
عشان تغير اللائحة الطلابية و خصوصا لقسم الاتصالات

لكن لو حضرتك تسمحلى ليه سؤال:
لو بقيت رئيس مصر هتلغى مجلس الشعب , وهيبقى ايه البديل؟

وتعليق حضرتك على قسم كهربا:
اؤيد جدا راى حضرتك ان القسم (على الاقل كطلبة) يفتقر الى الطموح وربما لا يعرف له معنى
وكقسم بالكامل يفتقر الى التطوير .

شكرا.

انا بجد مش عارفة اقول انا كنت مبسوطة اوووووووووى وانا بقرا
واحب اووجه كتير اووووووووووووووى من الشكر للحبار
وكتير من الشكر لدكتور هانى واوجهلوا رسالة انى ماكنتش اعرفة ولما اعرفتة زاد اعجابى بيه جدااااااااااااااااااااا واتمنى ان اكون مثلة وحاحاول اعمل بنا صيحة وبجد حضرتك المثل الاعلى ليا بعد سيدنا محمد صلى الله عليه وسلم

ماشاء الله ياحبار حوار ممتع وكمان عرفتنا اكتر على سيادة لدكتور هانى السيد جزاه الله كل خير

بصراحه متناهيه جداا انا سعيد جدا بالحوار ده وبجد انا استفدت جدا من خبرات الدكتور/هاني
وان شاء الله نبارك لحضرتك علي الاستاذيه عن قريب باذن الله
وفعلا فرصه سعيده ونتمني التجديد والتطور للكليه

ما شاء الله ، أنا كطالب مثلاً تستوقفني مثل هذه الإجابات العفوية التي تتسم بالموضوعية والتواضع ، ويدلنا ذلك على حب للعمل وإخلاص لله ، وتستوقفني أيضاً متعجباً ومؤتسياً وباسماً ومتعلماً .. حيناً وحيناً وحيناً وحيناً .. جزيتم خيراً يا دكتور وبارك الله في أمثالكم ...

فى البدايه أحب أن أوجه الشكر لكل من شكرنى لهذا الموضوع ولكن الشكر الحقيقى
يوجه لمن أتاح لنا الفرصه للتحاور والنقاش الفعال ووثق بنا ثقة نشكره عنها شكرا جزيلا
وهو طبعا الدكتور هانى.

ثانيا أنا قريت الحوار ده أكثر من تلاتين مره فى الإجازه وأثناء إنتظارى للجزء الثانى
للأسئله وحتى لما نزلت الموضوع فى حوالى الساعه التاسعه أعطيت لنفسى إحساسا
بأننى لم أقرا الحوار وقرأته ثانية وذلك لجمال شخصية الدكتور هانى وتسلسله المنطقى
وثباته الذى يظهر فى إجابة كل سؤال.

ثالثا أشكره كل الشكر على أنه أحدث نشاطا ملحوظا فى المنتدى حيث أن بعد تنزيل الحوار قد دخلت
أعدادا غفيره لقراءة الحوار لدرجة أننا كسرنا حاجز أكبر تواجد فى المنتدى فكان مسجل
بستة عشر شخصا أما الآن وصل إلى العشرون وهذا طبعا بفضل من الله وحب للدكتور هانى.

رابعا قد لاحظت شيئا جميلا فى الحوار ألا وهو

اقتباس :: لمواقف الطريفه فهى كثيره مثل أبنتى الصغيره نهى وهى تطلب منى أن تنــام خوخ (حاولوا تفسيرهــا ؟؟؟ ولكم 5 درجات بأعمـال السنه)

فأحببت أن أفسرها لعلى أحوذ على الخمس درجات تلك التى يمكن أن ترفعنى من القاع للقمة
وتفسيرى هو
أنها تختصر الطريق عبثا فبدلا من أن تقول عاوز أنام أو عدم مقدرتها للتلفظ بهذا الكلام
لصغر سنها مثلا فهى تختصر كل ذلك بقول "خوخ" أى الصوت الصادر من النائم

وشكرا لك أخى الدكتور واللهم بارك فى بناتك وأحفظهم من كل شر

ونرجو تعاونا مع من هو قادم للحوار فى المرة القادمه وسنعلن عنه فى الأيام القادمه بإذن الله.

مجهود رائع ياحبار ...

واقترح ان يكون هناك حوار اسبوعيا ... مع اعضاء هيئه التدريس ...

اعني : ان تقوم كل اسبوع بطرح نفس هذه الاسئله على دكتور و معيد ونشرها ...

اعني نفس الاسئله بالضبط لانها سوف توضح اختلاف الراء وتطرح العديد من وجهات النظر المختلفه و المتنوعه ...

و شكرا للدكتور هاني الذي ارى فيه الانتماء و الحب و الجديه و الايجابيه ...
كويس

السلام عليكم احب اوجه التحية لاخي و جاري العزيز د هاني
وارجو من الله العلي القدير ان يوفقه في حياته العملية و ادعو الله ان يحفظه من كل سوء و ان يكثر الله من امثاله و الذي ان كثرت ملكنا الدنيا و ما فيها و ربما اصبحنا اسياد العالم .
احب اوجه التحيه لاعضاء المنتدى لانهم كشفوا لنا عن اكنز مكنون ملأن بالطموح و الامال و مكتوب علي واجهته اعمال كثيره و نجحات عظيمة
اتمنى لكم التوفيق
تحياتي . د/ محمد علي خليل

احب اتقدم بشكرىالكبييررررررررررررررلدكتور هانى على روح التواضع وحبه الكبير للطلبه وفعلا هى دىالروح اللى تنقص كليتننا وبلدنا لان الروح دى هى اكبر حافز و ده من واقع تاريخنا المصرى وبشكر منتدنا اللى اتاحلنا التقرب من اعضاء هيئة التدريس ونرجو المزيد تعظيم سلام

بسم الله الرحمن الرحيم فى البداية احب اوجة الشكر للدكتور هانى اللى حبيناه يااااااما من قبل ما نعرفة او نشوفة واشكر الحبار على هذا المجهود الرائع ودى مش غريبة على الحبار اللى يااااااما اسعدنا بمفجئاتة الجميلة ويا رب با لتوفيق للجميع دكاترة ومعيدين وطلبة ولكم جزيل الشكر

حديث ممتع فعلا ، ومفيد ونتعلم منه أخلاق علماءنا من المهندسين الكبار همة ونفسا
مهندس عمرو عرجون
مدير مركز المعلومات
وزارة الاسكان

شكرا جدا للدكتور هانى
ويوما بعد يوما يزداد إعجابنا بشخصيتك العظيمة ونزداد فخرا بوجود شخصية مثلك معنا
وشكرا جدا للحبار على هذا الحوار الشيق والرائع وننتظر المزيد من المفاجآت

شكرااااااا

السلام عليكم ورحمة الله وبركاته

مش عارف اشكر الدكتور/ هانى السيد
ازاى على تعاونه المشرف معنا دائما
وعلى المفاجأت الكثيره والتى دائما تدخل البهجه الينا جميعا
واشكر ايضا اخى الحبار على هذا المجهود الكبير

السلام عليكم ورحمة الله وبركاته
بصراحة الحوار تحفة وياريت يتكرر اسبوعيا مع احد اعضاء هيئة التدريس علشان نعرف اساتذتنا اكتر

بسم الله الرحمن الرحيم
السلام عليكم ورحمه الله وبركاته
والله انا يادكتور هانى باكن لك كل احترام وتقدير وعندما كنت مرة جالس معاك وقلت انى انا مفكرش انى اطلع بره مصر اعمل هناك او امسك مشروع واسيب الكلية والله انت زدت فى نظرى كتير لان للاسف فى دكاترة كتير فى الكلية لو تسمح لهم الظروف ويسيبوا الكلية يسبوها ويطلعوا يعملوا فى الخارج لاسباب كتيرة وكله عرفها وممكن نقول انهم معزورين ولكن مش معزورين خالص لان الكلية مهما كانت او مرتباتها مهما كانت او مفيش بحث علمى مهما كان ميسبوش الكليه اللى كانت السبب انهم طلعوا برة وحضروا الدكتوراة على حسها
على راى المثل خيرا تعمل شرا تلقى
لا احنا مش عاوزين كدة والحمد لله الدكتور هانى مش كده وانا واثق ان شاء الله مش هيفكر يسيب الكلية
وايضا اللى شفته فى الدكتور هانى انى كل المشاغل ده برضه لازم يعطى للطالب حقه على خلاف بعض الدكاترة
ولكن لى تعليق على اللى اتكتب هو لماذا يادكتور شايف انى السياسة حاجه وحشة مع انى انا اعتقد انى السياسة ممكن من خلالها ان يتحسن الوضع اللى احنا فيه
والله اعلم

اشكرك ياحبار علي المجهود الرائع وكل من شاركك

وشكر خاص للدكتور هاني لحواره الاكثر من رائع

شكرا ليك يا حبار
بصراحه حوار ممتع جدا وردود الدكتور هاني كانت جميله ومنطقيه
واسئلتك شيقه جدا
ونتمني حوار تاني مع شخصيه تانيه ان شاء الله

احب اولا ان اشكر زميلي الحبار على المجهود الرائع .
لكن بجد انا احب اقولكم ان الدكتور هاني افضل من اللي قاله بجد لانه انسان جميل جدا وانا كنت تمليذ من تلامذته وهوا معيد وبجد عمري ما كنت اعرف افهم خرسانه غير منه مع اني مكنتش مجتهد اوي يعني كنت مكبر دماغي شوية بس الخرسانة بجد لغايه الان بدعيله لاني بجد شربتها منه وطريقته التربوية جميله جدا جدا . ربنا يبارك فيه ويباركله في اولاده ويخليهم ليه ويخليه لهم ويفرح بيهم . معلش صدعتكم

اقتباس :: اعرف افهم خرسانه غير منه مع اني مكنتش مجتهد اوي يعني كنت مكبر دماغي شوية بس الخرسانة بجد لغايه الان بدعيله لاني بجد شربتها منه وطريقته التربوية جميله جدا جدا . ربنا يبارك فيه ويباركله في اولاده ويخليهم ليه ويخليه لهم ويفرح بيهم . معلش صدعتكم

صدقت القول فعلا وانا اتمنى انى اجيب امتياز في مادة الخرسانة لانى حبيت المادة فعلا لكن كله توفيق من عند ربنا

» الآن اللقاء الحصرى والأحدث على الإطلاق مع الدكتور عبد الله عميد كلية الهندسة بأسوان على منتدانا فقط .
» حصريا على منتدى أسوان اللقاء الأول مع الدكتور عبدالله عميد الكليه.
» اجراء محاورة شخصية قريبا مع الدكتور هانى السيد
» اللقاء الحصري علي منتدانا مع دكتور إيهاب خلف ....
» اللقاء الأجمل والحصري فقط علي منتدانا مع دكتور محمد عمر....