قلبي اتقسم

قلبي ابتسم

ضحكت انهاردة.. وقلبي ابتسم
وفاقت ملامحي..وعقلي انسجم
ونمت وْ صحيت
خرجت وْ ياريت
ياريت تفضل الدنيا أحلى نغم
واقابل صُحابي ,
واداري عذابي ,
وينساني دمعي..وأنسى الألم
واعيشها حياتي
بلا ذكرياتي
مانا أصلي مـِ الفرقة قلبي اتقسم
ضحكت انهاردة..وتاهت دموعي
وجوه فـْ ضلوعي...حنين محترم
وشوق جوه قلبي يقول ألف لأ
تـرُد الكآبة تقوللي: اتحرق
وخليك فـ حالك وسيب العَشَم
ده من فات قديمه يتوه فـ الحياة
بدون ذكرياته هيبقى عَدم
لقيتني ارتخيت
أكرمش ملامحي
واداري فـ فرحي
وتفضل جوارحي..تـِعـّز الألم