يعنى إيه الحاجة زهرة؟
٢٧/ ١٠/ ٢٠١٠
يعنى تبقى جميلة وفِرعة لدرجة إن كل اللى يشوفك يحبك فوراً ويتهبل من جمالك يا بنت المحظوظة.. من الآخر تبقى سوبر سوبريم وومن والأجر على الله
يعنى إيه الحاجة زهرة؟
يعنى تتجوزى مرة واتنين وتلاتة وعشرين لو أمكن– هو الجواز حوروم؟ - فما إن تحصل أى مصيبة لزوجك حتى يأتى لك زوج جديد على الفور
يعنى إيه الحاجة زهرة؟
يعنى يتلهف الرجال على الزواج منك لهفة غير طبيعية.. تذكرنى بلهفة الممسوك عليه ذلة
يعنى إيه الحاجة زهرة؟
يعنى كل ما جوزك يتبخر- يتسجن بقى يموت تجيله مصيبة تاخده مش مشكلتنا دلوقتى- يجيلك غيره هوا من غير ما يفكر ولو لثانية إنك ممكن تكونى نحس مثلا
يعنى إيه الحاجة زهرة؟
يعنى جوزك يموت محروق والعياذ بالله- ما إنتى نحس بقى- ويرجع لك تانى بعد كام حلقة صاغ سليم من غير خدشة واحدة، كل الحكاية إنه فاقد الذاكرة بس.. بسيطة نبعت نشترى له واحدة جديدة
يعنى إيه الحاجة زهرة؟
يعنى كل ما تتجوزى راجل جديد يعدى مشهدين وتضحكى فى خباثة مصطنعة وتقولى له (أنا حامل.. ) كلما سمعت هذه الكلمة على لسان الحاجة زهرة شعرت أننا فى أزهى عصور الخصوبة.
يعنى إيه الحاجة زهرة؟
يعنى تسع شهور الحمل يعدوا هوا، وهوب تدخلى المستشفى هوب تزلطى العيل من دول، هوب يختفى العيل عن الشاشة فى محاولة واضحة وصريحة لتهميش الدور الدرامى المحورى للرضيع (المزلوط لتوه).. ولا أدرى كيف تسكت الأم الحقيقية للرضيع الموهوب على تهميش دور رضيعها الدرامى بهذا الشكل؟
يعنى إيه الحاجة زهرة؟
يعنى تزلطى العيل من هنا وترجعى رفيعة وأمورة وحلوة وغندورة تانى مشهد على طول، ويتكرر هذا النهج الميتافزيقى مع كل حمل وكل ولادة، وبالرغم من إن الزوجة الطبيعية «تفيص تفييصاً تاماً» مع ولادة العيل الثالث إلا أن المخرج عايز كده.. حد له شوق فى حاجة؟
يعنى إيه الحاجة زهرة؟
يعنى يبقى عندك ٣ أولاد فى سن حديثة ولا يطرف لك رمش عليهم ولا ترضعى ده ولا تسكتى فى ده ولا تشقرى على ده، ناهيكى بقى عن البامبرز والتكريع والتهشيك والذى منه... أولاد الحاجة زهرة إنفيزيبول أول ذا تيم.
يعنى إيه الحاجة زهرة؟
يعنى تفضلى طول الوقت مصيفة ولابسة- أو مش لابسة- صيفى، رغم إن كل عيل من العيال التلاتة بياخد له كدة حسبة ٩ شهور عقبال إما يشرف، يعنى يمر عليه أمطار ورعد ورياح وبرد وحر وخريف وربيع.. لكن يبدو إن الحاجة زهرة متمسكة بنظرية العجل فى بطن أمه
يعنى إيه الحاجة زهرة؟
يعنى بالصلاة ع النبى كده يبقى عندك خمسة أزواج حتة واحدة، مع إن كل تترات المسلسل تؤكد إنهم أربعة بس.. لكن نقول إيه؟ ما هو معاها فى نفس الموسم مسلسل (عايزة أتجوز)، يعنى حقها تخمس فى وشنا يا جماعة الحسد وحش.. حقها ولا مش حقها؟.. حقها يا أبوكمال، حقها ياخويا.
ياسمين فيصل
موضوع: يعنى إيه الحاجة زهرة؟ 
الخميس 28 أكتوبر - 15:53
