عيب بقي سيب القصيدة أحمد فؤاد نجم

عيب بقي سيب القصيدة
أحمد فؤاد نجم
**********

كأنك مفيش

برغم إن صورك فـ كل الدواير

وكل المداخل وكل المحاور

ومليا الشوارع على كل حيط

مطنش علينا وعامل عبيط

كأنك مفيش

***

يا فرحة قلوبنا رئيسنا ظريف

فُكهي

إبن نكته ودمه خفيف

فـ عهدك سيادتك فَرَشنا الرصيف

وآخر مُنانا الغُموس والرغيف

وكل أمَّا تُخنُق ندوَّر

مفيش

***

مسيِّب علينا عصابة حبايبك

فضايح وسرقة ونهب بسبايبك

مابين حزب نجلك .. وهانم جلالتك

وجيش الغوازي إللَّي داير يجاملك

وناملك وقاملك .. وحارسك وأمنك

شبعنا مهانه .. شبعنا لطيش

وأنت .. مفيش

***

باعونا فـ حضورك

ببركة عِبـيدك وغالي وسرورك

باعوا الأراضي .. وكل المصانع

وباعوا البنوك

وقدَّام عِنيك .. صوتنا إتـنبح

ننادي عليك

إلحق يا ريس : ده باعوا الحديد

وأنت منشِّف دماغك عنيد

كأنك مفيش

***

دوشتوا دماغنا " بجمال " طلعتك

ومن يومها وإحنا عَبـيد حضرتك

ما تزعلش إني مواطن أبيح

ورافض كلابك فـ شعبك تطيح

فسادهم يا ريِّس واضح .. صريح

قوم بينا صلّح وفتَّش .. وثور

ح نكتب تاريخك ياريِّس بنور

مش تبقى عايش كأنـَّك مفيش

***

ورحمة أبوك .. مادام أنت قاعد

عيب لمَّا عُصبة نَـوَر يسحبُوك

م تُقبض عليهم .. م تقطع إيديهم

م تعمل عليهم يا ريِّس شاويش

بدل م انت ساكت وقاعد مفيش

***

ياريس علىّ الطلاق تعبانين

ياريس علىّ الحرام كفرانين

صبرنا سنين

سيادتك مسلطن

وشعبك وناسك بتاكل مسرطن

وتشرب مجاري وميت سم هاري

ومش دريانين

ما تنهض يا ريس تلم الديابه ؟

ده شعبك غلابه

ومليان طيابه

وهوَّ الشفاعة ف يوم الحساب

وهما البطانة الحُثاله الكلاب

ما يملاش عنيهم غير التراب

وليهم ضوافر

وميت ألف ناب

وواقفين لشعبك ورا كل باب

لإمتى ح تسكت وليه الغياب ؟

ده ياما ممالك طواها التراب

حياتنا ياريس تعب فوق عذاب

يا ريس " شريفك " ماهوَّاش شريف

" نظيفك " يا ريس ماهوَّاش نظيف

وحتى " حبيبك " ماهواش حبـيب

وأنا غصب عني .. خلاص إستويت

بـ غـُلبي إنحنيت

وطلعان عنيا .. وصعبان عليا

بحسبة بسيطة ومن غير خريطه

وكونك مفيش .. لقيت متساويش

ومش فارقه أعيش

نويت أشتكيك للِّي فوقي وفوقك

وأصلي الفرايض ..عسى يفـُك طُوقـك

قالولي إللي يسجد عدو النظام

حاولت أحكي حالي

قالولي الحكاوي نميمة وحرام

فكرت أكتب

لقيتكم سيادتك منعتوا الكلام

فقررت أحلم

هاحلم سيادتك وأفُك اللِّجام

ولو مش هيعجب سيادتك يا فندم

وصِّي العساكر .. تاخُدني أمَّا انام

***

حلمت إني شعب

حلمت إني شعب ومصلوب بطولي

على أرض سمرا

ودمي بينـزف ومليان جروح

وفوق صدري جمرة

يميني مربّط على أرض طابا

شمالي ممسمر فـ أولاد علي

ورجلي على جزع نخلة فـ حلايب

ومرتاح براسي على حِجْر مصر

وشوفتك ياريس ..كأنك ولي

كأنك نبي

فـ إيدك عصاية وليك معجزات

وشايل صليبي وبتفـُكني

وانا فـ جنَّه خضره .. وتحتي جداول

ومن فوقي نور .. وريحة بخور

همست ف ودانك بآخر وصيّة

إنسى إللي فاتك

هننسى الأسية

أمانه عليك

حُط الوطن جُوَّه نِنِّي عينيك

كرامة عيالنا أمانة ف إيديك

بحق إللي بينّا يا ريِّس وبـينك

وحَق اليَمِين و" ألكتاب " فى يمينك

بحق الشهيد .. إللي رافع جبينك

وجيش إنتصارك فى يوم العبور

وجيل حُر طالع .. وعدته بدور

لملم عيالك .. وجمَّع فـ مالك

وإسحب " جمالك " وسيبنا وغور

بيضحك 2

يا سلام على الكلام
بس اللى يحس يا ريس

جاااااااااااااااااااااااااااااااااااامده

خللى بالك يا إسماعيل دلوقتى أى حد بيفتح بقه بيتشال يعنى مش هتبقى مثلا أحسن من

إبراهيم عيسى وعلاء الأسوانى وحمدى قنديل وعلاء صادق وعمرو أديب والعبد لله فلمها يا

سمعة وانا مليش دعوة وبخصوص الباشا ريسنا فقوله عاوزين يا باشا ندوق الطماطم لأحسن

الواحد قرب ينساها أرجوك قبل ما أموت حتى ولو لحسة !!

شكرا على الشعر اللى تعبنا ده

والله الموفق

(دوشتوا دماغنا" بجمال " طلعتك)

والله فعلا "ادوشنا" بجد

رااااائعة برافو

» أحمد فؤاد نجم يغني لـ(غزة)
» أنا مصري - أحمد فؤاد نجم
» قتل صاحبها وأصبحت القصيدة يتيمة
» أحمد فؤاد نجم يناشد وزير الثقافة إنشاء نقابة لـ الراقصات!!!!
» احمد فؤاد نجم