نى هاو رمضان!!

كل سنة وانتوا طيبين بمناسبة شهر رمضان الكريم اللى كل سنة بعد التانية يكاد يحمل شعار «صنع فى الصين».. سجاجيد صينى عبايات صينى وزينة صينى فروع نور وفوانيس صينى فيها أبوتريكة وحسن شحاتة بيغنوا وحوى يا وحوى ورمضان جانا ليل ونهار.. تمر صينى ومكسرات صينى وماعادش فاضل غير كنافة وقطايف صينى تجيلنا من هناك مغلفة بالسلوفان..

عشان كده فى الغالب سنتين تلاتة وهيبقى شىء محرج جدا إننا نقول «أهلا رمضان» بالعربى.. فهنحولها لـ«نى هاو رمضان».. بالصينى برضه إشمعنى دى اللى هتفضل عربى يعنى؟.. قد تعتريك مشاعر الحسرة وانت شايف التوغل الصينى ده فى شهر كنا بنعتز قوى إنه بتاعنا وكل ملامحه من ملامحنا وبنفتخر فى المنطقة كلها إن اللى عايز يشوف رمضان بجد لازم يشوفه فى مصر مش فى أى مكان تانى.. ويمكن على العكس تشوف إن مظاهر رمضان المصرية حوالينا فى كل مكان.. لسه المصريين بيحتفلوا بالشهر الكريم كما لا يحتفل به أحد..

لسه بنزين البيوت ونجهز المساجد ونقيم موائد الرحمن لكل عابر سبيل.. لسه فيه شباب كتير بيجمعوا من مصروفهم القليل ويعملوا شنط رمضان ويفكوا زنقة ناس غلابة فى وقت كلنا فيه غلابة وكلنا مزنوقين.. لسه فيه ناس بيرموا فى عربيتك أكياس التمر وعلب العصير وانت واقف فى إشارة ساعة الفطار فى عز الحر وانت فى أمس الحاجة لنقطة ماية تبل الريق..

لسه فيه ناس رمضان بالنسبة لهم بيبقى نقطة انطلاق إيمانية وبيكملوا بعده بنفس القوة وبيعيدوا ترتيب أوراقهم وينظموا حياتهم من جديد.. لسه الأسرة بتتجمع على الفطار بعد ما كان كل واحد بيتغدى لوحده والعيلة الكبيرة بتتجمع على أكل وود وإعادة روابط أسرية وتصفية خلافات.. لسه المساجد بتبقى فى أحلى صورة وآيات القرآن بتقابلك فى إيدين الناس فى الشارع والمترو والأتوبيس..

لسه الشارع اللى بيبقى زحمة بعد صلاة الفجر بيخطف منظره قلبك وانت شايف كل اللى خارجين من الجامع وهم على وشوشهم النور.. لكن على الجانب التانى للأسف لسه بتشوف كل يوم خناقات الصبح فى الشوارع يوم ما واحد يلمس بعربيته رفرف عربية التانى وتسمع قاموس شتايم مع فاصل من التشويح و2ـ3 ـ15 بيسلكوا وبعدين الاتنين يرجعوا عربيتهم وهم باصين فى الأرض وكل واحد فيهم مرسوم على وشه ملامح التقوى والإيمان وهو بيقول بصوت عالى عشان اللى واقفين يسمعوه «اللهم إنى صايم».. لسه هتلاقى شوارع كتير متقفلة بشوادر بيع البلح والمخلل دون اعتبار لا لمرور ولا لسكان فتكون النتيجة إن حضرتك ترجع من شغلك تدور على بيتكم فى الجيزة تلاقيهم مخبينه منك فى حلوان..

لسه بعض البنات المش محجبات بيتحجبوا الصبح ويخلعوا الحجاب بعد الفطار وكأن الدين بيتقسم ورديات.. لسه الموظفين فى مكاتبهم فاتحين المصاحف جماعة واللى هو شىء جميل لوما كانتش دى حجتهم فى تعطيل شغل الناس.. لسه هتلاقى بياعين الخضار والفاكهة والجزارين والفرارجية فى أجشع أحوالهم رغم إن الشهر الكريم المفروض إنه فرصة عشان كلنا نحس ببعض ونتكاتف ونتوحد كمسلمين وكبنى آدمين..

لسه بنشترى ونخزن أكل يكفى قبيلة وما ناكلش منه حاجة ونرمى نصه فى الزبالة واحنا ولا على بالنا رغم إن الحكمة من الشهر الكريم أصلا إننا نحس بالفقرا والمحتاجين.. لسه بنروح التراويح جروب وشلة وبين كل ركعتين نقعد نبص على عباية دى وغوايش دى ده غير إننا دلوقتى معانا موبايلاتنا بندخل بيها على الفيس بوك نكتب على الوول بتاع جروب «تمورة» أو نشوف صور آخر حفلات «هايفا» قبل ما نقوم ندعى ونعيط مع الإمام..

المشاهد الإيجابية كتير والمشاهد السلبية للأسف برضه كتير.. أكيد لازم نبقى أحسن من كده.. يمكن بس لازم نركز أكتر على الهدف من الشهر والفرض والحكمة الإلهية منهم وما ننجذبش بس ناحية المظاهر والشو ومحاولة «الظهور» بشكل أكثر إيمانا أمام الآخرين ونفتكر إن الدين المعاملة وإن التدين مش مقصور على رمضان وإنه مش بس صلاة وصوم..

يمكن كل ده ويمكن أكتر لكن الأكيد والثابت بالتجربة لأى حد قضى شهر رمضان بره مصر إن حتى مع كل السلبيات ورغم وجود الصين كشريك أساسى لنا الآن فى الاحتفال بالشهر الكريم..لكن رمضان تحس إنه مصرى والاحتفاء بالشهر الكريم فى مصر فعلا احتفاء مالوش مثيل.

منقول

السلام عليكم

موضوع أكثر من رائع وبالفعل الصين أقتحمت الدنيا بأكملها بصناعتها وبتفكيرها والغريب إنهم

مش متقنين الصنعة يعنى حاجتهم بتبوظ وكمان شيوعين ومية ملة فيهم وكمان مية لغة وكتير

جدا ومنقسمين وأمراض بالهبل وزلازل وأعاصير وكل حاجة تعوق حركة النماء إنما بعد

ده كله هم فى المقدمة والكثيرين فى المؤخرة !!

رمضان فى الصعيد أكيد له لذة وأقل فى الأفكار الهبلة من بحرى من خيمة رمضانية وكلام

فارغ على هذه الشاكلة والحمد لله فيه ناس كتيرة لسه محتفظة بجمال رمضان لأنه موجود

فى قلوبها مش فى أى حتة تانى.

شكرا جزيلا عالموضوع الجميل يا بشمهندس

والله الموفق

موضوع رائع يا بشمهندس
نى هاو رمضان!! 2696

» فضل شهر رمضان
» اسطوانه أجمل رمضان في حياتي (هدية رمضان لكل مسلم )
» رمضان السنة دي غير كل سنة .. ومرفق جدول رمضان (ملف اكسل وصورة)
» جدول لاغتنام رمضان وبعد رمضان بالأعمال الصالحة
» اللهم بلغنا رمضان ( أكثر من 1000 محاضرة صوتية خاصة بشهر رمضان )الروابط تعمل جيدا