أسمعوني !!

في نار بتكوى
ونار تنور
ونار بتحرق
ونار تطيب ف جرح غاير
****
وميه تروى اللى نفسه يشرب
وبحر ياخدك جمال شطوطه
تلاقى فيه العجب عجايب
ولا يحلى مصيف الا بصوته

لكنه ممكن يناديك بموته
لو يوم نزلته وموجه ثاير
****
وبحد مشرط تسيل دماك
لكن فى ايد الطبيب حياه
فى لحظه يقتل وف لحظه يجرح
وف لحظه يبقا هو النجاه

والعقل يفضل فى أمره حاير
****
وحب يحيى قلوب كتيره
وحب يقتل فى قلب صاحبه

وحب يهدى الأمان لناسه
وقلب يلقى فى الحب نحبه

لو يبقا عشقه لقلب جاير
****
وشعر يهجى ويجيب مصايب
وشعر يمدح فى بيت لماله

وشعر يعلى بالروح ويملك
وشوفنا بيت قتل اللى قاله

وشعر غير كتير مصاير
****
وم النهايه
قصد الحكايه
قصة ضماير
****
حب غيرك
بس من غير ما تنسى نفسك

وحب نفسك
بس اوعى تكون أنانى
****
نور بنارك
وداوى جرحك

بس لو تتسلى بيها
هيجى يوم تفضل تعانى
****
وخد من البحر وجماله
وان شوفته غضبان

فوته تانى
****
واخلى شعرى
يكون شعورى
يقوله قلبى قبل بلسانى

واوجه على الأعادى ناره
وع الغلابه
رحيم وحانى
****
عرفتوا
ايه هى
الحكايه؟

وان ربك
بحكمه غالب
****
ربى خلقنى
انسان بفكر
انسان وبشعر

وساب فى ايدى
مفتاح مصيرى

وقاللى احكم فيى ضميرى

ويا ويل سنينى
لو يوم حكمت وضميرى غايب
*
د.ابراهيم سعد