خطابات غير مرسلة III

خطابات غير مرسلة III

********

رجعتلها تاني

الاوضة الضلمة

حساها بعيـــــــــــــــــــــــدة

أو انا اللي كنت بعيدة عنها مسافات

ساكتة

مفيش صوت ولا حتى صوتي ليا

كل شيء ساقع وقماش هدومي اتحجر

واتنسل م البرد

وبقى بيتلجني

امتى معرفش ومن غير ماشوفك

حواسي لمست دفاك

حتى هدومي عليا نعمت واستكانت

عشان تأكدلي اني مش بتخيل وانك هنا وحقيقي

فاكر

اليوم رقم ...... معرفش كام

سندّت راسي عالحيطة كعادتي في روتين البكا

عشان اما عيني بتغيم راسي بتتقل اوي فالحيطة تلحقني

لكن يومها

خلعت نفسي من كتف الحيطة

اللي مابتشربش دموعي

قبل كده حاولت كتير امسح فيها عينيا

لكنها جرحتلي وشي

ضربتها

وضربت كل حاجة خبطت حبطت كل حاجة بطلها

وفجأة محلك معرفش ليه وقفت

خطيت ناحيتك خطوة قزمة

لقيت دمعي انتحر للتبخر المفاجيء ومن غير إذني

من وقتها اتعلمت اختبر وجودك ومجالك بدموعي

وكونت شهادة ايماني " انت هنا .. ماليش دموع "

عمري ماشفتك

بس اكيد شمس عينيك طالت عيني وامرتها تلف ف مدارك

من غير ماتقدر تحود ابدا

انت ادعيت اني بطلت اقربلك ووقفت عشان خايفة

لأ حتى خوفي فقدت قدرة التحكم فيه

انت افقدتني معنى الارادة المنفصلة عنك

عامة "الكاللو" لو انفصل عن الجسم يموت

انا بعدت عشان انت امرت كياني بده

ورغم انه فيه موتي .. ماملكش ارفض لاني استحالة اكون اخترت

ان معدلي الحيوي ينخفض جدا ....

ولانك عارف انك ترمس الحياة الوحيد ليا .. بدرجة الحرارة الوحيدة اللي تحييني

ازاي قسوتك كده معايا –

وبعدين ضحكت على نفسي وكإن الموضوع بمزاجي ولأماني

قلتلي

ان دمعي كده حيبقى وان جلدي المجروح حيفضل من غير كوي

واني لو قربت منك حتحرقني

وطنشت حقيقة اني مابتجرحش وانت جنبي

وتماديت مع نفسي

واتهمتني وعاقبتني على ان خوفي منك سبب انك سبتني

واما بقيت اكدب نفسي

كنت اطلع كيس الذكريات وأعد كام مرة كنت بتخاف عليا

وكام مرة كنت ....

وان المرة دي اكيد زي اللي قبلها

اكيد انت خايف عليا احسن يجرالي زي دموعي

يمكن عشان انا من اللي بيقولوا عليهم ذوات الدم البارد

انت خفت عليا

ايوه عشان كده اكيد

مش عايزة اصدق انك متطمن عليا وانا مش فحضنك

وانك مش متضايق وانت متخلي عني

كإني حد مايخصكش

طيب عارفة انا نفسي

بس انا كل احتياجاتي فتافيت دفا ماشترطش عليك تخصني بدفاك

كل اللي كنت عايزة افضل قريب من زفيرك

بس …...............

************