اعرف الحياة

الحياة .... ايه هي الحياة !!!
معادلة صعبة
متاهة آخرها قبر
وشوية حاجات براقة وبتلمع
والغريب انها غالبا بتطلع شوية سراب
بس الشاطر اللي يعرف بدري بدري انه مجرد سراب من قبل مايضيع وقته وجهده ويروحله

الحياة شوية وقت بيمر ويعدي ، وعقرب بيجري ويطلعلك لسانه ، وبيقوللك لو جدع وقفني
، ( ماهي العقارب في كل مكان ولو وقفت واحد الباقي بردو هيفضل يشتغل)
نصيحتي ليك انك انت اللي تطلعله لسانك لما تسابق الوقت ،هو مهما كان له معدل ماشي عليه ،، لكن انت يا ابن آدم مالكش حدود
استعن بالله وانطلق فالوقت يمر ولن ينتظرك


الحياة انك كل ماتحط كل أملك في مخلوق وماتثقش الا فيه وبس ،، تنزل على فشوش
وانت وشطارتك يا تمسك نفسك وتتعلم ، يا تقع معاه
بس ياريت تتعلم انك تحط ثقتك في ربك قبل اي شئ .

الحياة انك كل ماتشتري جاكت ولا حتى شنطة ولسا هتفرح بيها ييجي واحد ابن حلال يقوللك في وشك : ايه القرف دة !!، تروح زي الشاطر تحط ايدك على خدك ، مع ان ممكن هو اللي يكون ذوقه وحش ، مش أكتر!!
خليك واثق في نفسك واثبت طالما مابتعملش حاجة حرام ولا عيب.


الحياة هي انك تفرح ساعة وتزعل عشرة أو يمكن أكثر شوية
فريح نفسك وماتنتظرش فرحة الدنيا بس خلي عندك أمل في ربك
فرحتنا الحقيقية لما ربنا يرضى علينا في الدنيا وننعم برؤيته في الآخرة

الحياة هي انك كل ماتكون في مرحلة تعتقد انها اصعب واسوأ مرحلة وعمرك ماهتقتنع بأنها كانت بسيطة الا لما تروح اللي بعدها ، وتفتكرها وتعيط عليها وترجع تقول ياربي هو في أصعب من كدة!!
وقتها قول لنفسك استمتع بالسئ فهناك ماهو أسوأ
صدقني أحسنلك تفترض في الدنيا ان الاصل محن وكبوات ، وقتها مش هتحس أوي بفظاعة المصائب دي وهتهون عليك ، وكمان لما الفرحة تيجي هتعرف تدوقها أوي وتحمد ربنا عليها من قلبك
ونزعل ليه ماحنا مالناش غير آخرتنا

الحياة هي أن كل ما والدك يناقشك في اي موضوع بتصر على رأيك وتستغرب اوي من طريقة تفكير باباك ، وتمر الأيام وتلاقي نفسك كنت غلطان
بس الشاطر اللي ياخد باله ويفهم انه مهما كان مقتنع برأيه فهو بردو يحتمل الخطأ، ويجرب يسمع خاصة من ابوه وامه

الحياة هي انك كل ماتعمل نفسك جدع وتتوقع اللي هيحصل بكرة تاخد مقلب محترم وتتهدم كل توقعاتك ،، ماهو صحيح بردو مش شغلتنا اننا نتفزلك على الغيب ، واحنا مالنا ، مانسيبها لربنا ونتوكل عليه .
طب والله كدة أريح

في الحياة الصغير نفسه يكبر والكبير نفسه يصغر ، ولما كنا اطفال كنا بنحب نقلد الكبار
ولما كبرنا مابنصدق نقعد لوحدنا مع طفل ونلعب معاه ولا اجدع طفل
ماكان من الاول !!!
واهو كدة دايما محدش عاجبه حاله أبدا


يااااااااه دي حاجة صعبة أوي


أقوللكم حاجة
استعن بالله ولا تعجز

-----------------------الفارس-------------------------