eng_ghost مراقب عام المنتديات والحوار العام ومنتدى الهندسة المدنية
عدد المساهمات : 4632 تاريخ التسجيل : 16/04/2008 العمر : 38 الموقع : just in my dreams ,, i can reach any place رقم العضوية : 1036 Upload Photos :
موضوع: علاقات بنحبها !!! الخميس 25 فبراير - 16:47
فى بداية الامر حبيت اتكلم عن حاجة من الحاجات اللى أثرت فى حياتنا ، وكان ليها تأثير سريع فى طريق حياتنا ، ويمكن العنوان اللى بدأت بيه يكون بيدل على الحوار اللى عايز اتكلم فيه........ ألا وهو العلاقات اللى بين الولد والبنت بكل معانيها. فبمشيئة الله هتكلم أولا عن أنا عايز أتكلم ليه فى موضوع زى كده وثانيا هتكلم من ناحية الولد وأخيرا هتكلم من ناحية البنت. يالا بقى نصلى على النبى .وأدعولى ان كلامى يكون ليه فايدة. اولا أنا هتكلم ليه فى موضوع بيمس كل ولد وبنت وممكن يكون كلامى تقيل على كتير مننا ، لأن دايما الحق طعمة صعب وتقيل على النفس البشرية اللى بيغلب فى السيطرة عليها جانب الهوى ومن الصعب تلاقى حد من أصحابك يكلمك من مطلق الحق . فحبيت أتكلم من منطلق الاصلاح والدعوة للخير .ولو مكنتش هنفعك إن شاء الله مش هضرك.......... لو سألت سؤال...ياترى ليه ربنا حرملنا حاجات مع العلم إنها ممكن تكون حلوة بالنسبة لهوانا ..((مع العلم كمان إن مش من حقنا إننا نسأل فى كل حاجة ربنا حرمها ...لأننا مسلمين والمسلم اى يسلم كل الاستسلام لأوامر الله سبحانه وتعالى)).. المهم .. ربنا حرم لنا فاحشة الزنة مع إنها شهوة بتحبها النفس الضعيفة ..طيب إنك تعمل حاجة زى كدة ممكن تكون نفسك شيفاها إنها حاجة حلوة بس ياترى تعمل إيه لو دخلت بيتك فى يوم من الايام ولقيت واحد مع أختك أو مع أمك يترى الامر هيكون حلو بالنسبه لك...معتقدش..وأكيد هيكون رد فعلك حاجة من تلاتة....يإما تتهور وتدخل السجن وتضيع حياتك..يإما تنتحر لصعوبة الموقف بالنسبة لك وتضيع حياتك وكمان أخرتك...يإما تسكت و ...إشطة... بس سعتها هتعيش طول عمرك مكسور ذليل يعنى برده هتضيع حياتك...فربنا محبش يحطك فى موقف زى كدة وحرم الزنة على كل خلقة............................. طيب لو قلنا السرقة مثلا يعنى هتحصل على كل ما تريد من غير اى تعب بس ياترى لو كنت شغال طول الشهر ...طبعا علشان تاخد مرتبك فى الاخر وانت ومروح لبيتك حد سرقك يترى هتبقى مبسوط ...وعشان كدة ربنا حرملك السرقة علشان ميحطكش فى القهر والغيظ من اللى حصلك...يبقى إتفقنا أن الدين مش عشان يخنقنا بحلال وحرام ولكن علشان يظبطلنا حياتنا.... وانا هخلى رأى الدين (مع انه هو الحق) بس هخليه فى الاخر وهتكلم كلام شبابى ...اولا من ناحية الولد: انت فى علاقتك مع أى بنت يإما بتكون نيتك أخوية ودى بعيدة شويه لأنها غالبا بتتقلب لحاجة تانية يإما فعلا نيتك حب شريف يإما تسلية...وقبل ما تقول إنك بتتسلى ، أحب أفكرك إنك بتتسلى بإنسانة ربنا خلقها لعبادتة مش عشان تسلى وقتك لو فكرنا مع بعض ياترى ايه المكاسب والخساير فى علاقة تسلية....لو قلنا المكاسب انك ممكن تكون بتلاقى الونيسه اللى بتكون فاضيه دايما ليك واللى بتتكلم معاها فى كل جوانب حياتك اللى ممكن متقدرش تتكلم فيها مع أعز أصحابك...وممكن تكون بتحب إنك تتحب ..وممكن تكون حاسس إن الانسانة دى ممكن تكون مناسبة ليك فتحجزها ليك لأنك خايف ان حد يخدها منك فتربطها معاك بعلاقة وخلاص....ومش هرد على المكاسب دى قبل من قول اية الخساير : من الخساير مثلا تضيع الوقت ، يعنى شوف انت بتقابل البنت دى كام مرة وبتتكلم معاها كام ساعة على التليفون ، ده غير النت ، فهتلاقى نفسك مش لاقى وقت إنك تشوف أصحابك الرجالة و ولا هتكون فاضى لحد أصلا...فهتبعد عن أصحابك. كمان من الخساير المصاريف ...شوف أنت بتشحن رصيدك بكام فى اليوم ده غير كمان المقابلات وهدايا عيد الميلاد وعيدين الحب وغيرهم كتير...ولو خارج معاها أكيد مش هتركبها أتوبيسات فهتقضيها تاكسيات ........ كمان من الخساير إنك بتحس إنك شبه مسئول عن إنسانة... أى مشكلة بتواجهها بترميها على كتفك لأنك ببساطة بقيت الأسد بتاعها ...فهتلاقى جايالك كل يومين مشكلة يإما الولد ده عاكسنى يإما البنت دى شافتك بتعمل كذا وحاجات من دى كتير.... ومحدش يقدر ينكر إنك هتبعد عن ربنا كتييييير أوى. ولما تحس إنك زهقت هتفكر تخلع ....وأعرف إنه من السهل إنك تعمل علاقة مع بنت لكن من الصعب إنك تخلع بالساهل لأنك هتحس ...ولأول مرة.... إنك أنانى ومتستهلش أصلا إنك تتحب ...ده غير إنها أكيد هتسيب فى قلبك علامة وهتفضل فى بالك حتى ولو عرفت غيرها كتير. حتى بعد الجواز دايما هتقارن بين مراتك والبنات اللى كنت تعرفهم.. فهيبقى من الصعب إنك تقتنع بمراتك ..ولو جيت أسألك إيه يترى المواصفات اللى أنت عايزها تكون فى مراتك أكيد هتكون عايزها متلمسش إيديها قبل كدة ..وطبعا أنا أسف إنى أقولك إنك مش كدة ومتستاهلش كدة. فأنا كنت معاك من الاول إنها علاقة حلوه بس إكتشفنا مع بعض أن خسايرها أكتر من مكاسبها بكتييييييييير. ولو قلت إنك بجد بتحب ألانسانة دى وغرضك شريف هقولك لو كنت بتحبها بجد كنت أنتظرت شوية لغاية ماتدخل من الباب لأنك من المفروض إنك تكون خايف عليها من كلام الناس وكمان خايف على نفسك وعليها من الشيطان ...ومتقلش إنك بتحبها وحاجزها بعلاقتك دى لحسن حد يخطفها منك..لأن أحب أفكرك إننا لا حول لنا ولا قوة إلا بالله ...ومفيش حد بيجوز مرات حد تانى..وما عند الله لا ينال إلا بطاعتة....فلو كنت بتتسلى وواخدها صحوبية فاتقى الله وأفكرك بكلام ربنا( ولا متخذى أخدان) وأخدان يعنى أصحاب ...يعنى مينفعش إن الولد يكون ليه صاحبة ولو كنت بتحب بجد فربنا يكرمك ويسهلك الجواز إن شاء الله. ولو جيت أتكلم من ناحية البنت...فأنا محبش أشوفك فى صورة غير الصورة اللى ربنا كرمك بيها فى الاسلام...وبعدين أزاى مانصحكيش وأنتى تقريبا كل المجتمع مش نصه...أنتى أختى يعنى الجانب الحنين فى حياتى ومحفظة أسرارى ، وإنتى أمى الى أنا ماشى فى الحياة دى ببركتها وبدعاها.....وأنتى بنتى اللى أحب أشوفها كل يوم أحسن من اللى قبلة....وإنتى مراتى اللى إن شاء الله هتبقى كل أصحابى وحبايبى وشريكة حياتى بل أن شاء الله تكونى شريكة حياتى فى الدنيا وفى الجنة..... يعنى من ألاخر إنتى جوهرة غالية أوى فى الكون ده وعشان كدة الاسلام كرمك ..وبقى الشاب مننا علشان يوصلك مفروض يتعب ويشتغل ويكون نفسة ويكون عش الزوجية والمهر وغيرة الكتير علشان اللى بيجى بصعوبة مبيتسبش بسهولة.. فتيجى إنتى ببساطة تضييعى قيمتك وغلاوتك وتديها لأى حد بمجرد إنه بيقولك كلمتين حلوين مع العلم إن الكلام مش بفلوس. وتضيعى قيمتك وجمالك اللى ربنا كرمك بيه وتلبسى هدوم بتبين كل مفاتنك....أنا معاكى إن طبيعة نفس أى بنت بتحب إنها تكون جميلة ومطلوبة ...بس للأسف أحب أقولك إنك بترخصى نفسك وبتبقى وأنا أسف مرة تانية لحم رخيص لأن أى حد يقدر يتفرج علية بدون أى ثمن وفى شارع ...يترى ينفع نبيع الدهب فى فرشة جرجير وفجل ؟؟؟؟؟؟ وممكن تكونى مقتنعة بالكلام ده بس بتقولى لنفسك(( ييجى بس إبن الحلال وألبس هدوم محتشمة)) ...فأقولك يترى فى حد إبن حلال يرضى يتجوز لحم واحدة كل خلق ربنا داق طعمة ولو بنظرة...وأنا أسف إن كلامى جارح بس سامحينى ...فأنتى فعلا من أكبر الفتن اللى بنقابلها ـ إحنا الشباب ـ يعنى حتى لو الواحد مننا ربنا هاديه وبيغض بصرة ، النظرة الاولى اللى مش قاصده بتكون صابته بسهم فى قلبة ، والنظرة سهم من سهام إبليس ، وهى بداية الفواحش .. أنا مش هكتر عليكم مع إن اللى جوايا ميكفهوش كتب..... فأنا كل اللى قولتة كلام وأنتم عليكم الافعال ...فإليكى الاختيار أن تكونى وردة جميلة لها رائحة جذابة وسط أشواك صعب الوصول إليها ....وإما أن تكونى وردة زينة وسط ورد كتيييير فى ميدان فى الشارع ليس له فائدة سوى المنظر فقط.
اللهم أهدى شباب المسلمين وأرزق بنات المسلمين العفة والطهارة والحجاب وصلى اللهم على سيدنا محمد وعلى اله وصحبة وسلم وأخر دعوانا أن الحمد لله.......................
موضوع: علاقات بنحبها !!! 
الخميس 25 فبراير - 16:47
