أنا راعي بقر وحيد !!

أنا راعي بقر وحيد !!

1

كل ما افتكر

حكاياتي اللي فاتت

أسرح

وأبتسم

وأتعجب..

وما أفوقش غير

علي فوران القهوة

أكُبَّها..

وأحط سكر تاني

وبن تاني

ومن تاني

أقَلِّب..

2

للأسف

مشكلتك مالهاش حل

جنونك عاقل جداً

بس عقل العاقلين

من حواليك

مختل..

3

أنا

وبنت لسه

ما قابلتهاش

وبوسة

مستنيِّانا نتقابل..

إحنا التلاتة

بندوَّر علي بعض

وبنستني بعض

ولحد ما نلقي بعض

ياما حنقابل..

4

لأننا

قرَّبنا جداً

كان لازم

نفترق..

لأننا

نَوَّرنا جداً

كان لازم

نتحرق..

5

إركب قطر الدنيا..

طَلَّع راسك من شباكه

عشان تتفرج..

وإوعك تزعل..

لما دماغك تخبط في العواميد..

وسنينك تتدحرج..

من شباك القطر..

6

أرواحنا

نمور غضبانة

محبوسة جوانا

هَيجَانة

حتموت وتهرب م القفص..

نمور

مهما نروِّضها

وندربها

طبيعتها لازم تغلبها

النمر

حيوان مفترس..

خـــالد كســاب

بصراحه انتي دائما متميزه
بس الموضوع عنوانه غير منطبق علي احداثه
ممكن اكون مش فاهم انتي تقصدي ايه
بس عموما انتي متميزه