الدرس الأول من دورة CCNA بعنوان network introduction

جزاكم الله خيرا""""

رائع بل أكثر من رائع

thank you soooo much , i hope you go forward

eng_masrya كتب:

الف شكر على الشرح الممتاز يبشمهندس

بس كان عندى سؤال من فضلك فى الجزء دهالطريقة التانية بيسموها ال BUS TOPOLOGY والطريقة دي بتبقى عبارة عن زي سلكة معينة بوصل بيها مجموعة أجهزة وكل ماأكون عاوز أوصل جهاز في الشبكة بوصله بالسلكة دي وهكذا ومن أشهر التكنولوجي اللي بتستخدم ال BUS TOPOLOGY تكونولوجيا الإيثرنت ودي طبعا هيكون كلام الكورس كله تقريبا عليها وبشكل عام كتعريف ليها دلوقتي تقدروا تعتبروا ان الإيثرنت هي تقنية لربط الأجهزة القريبة من بعض بحد أقصى للمسافات بينهم حوالي 100 متر وهنا بيبقى عندي مرسل واحد وأكتر من مستقبل
حاجة زى دى مثلا مين المقصود بالمرسل ومين المستقبلين
يعنى هو جهاز واحد رئيسى واجهزه فرعية موصلة بيه ولا انا فاهمة غلط

السلام عليكم ورحمة الله وبركاته
بالنسبة لسؤالك يابشمهندسة المقصود بأنه في جهاز مرسل وأكتر من مستقبل مقصدتش بيه انه في جهاز رئيسي وأجهزة فرعية أنا قصدت بس مجرد المقارنة بين التبولوجي دي واللي قبلها اللي هيا ال P2P على أساس انه في الطريقة دي لو حب جهاز يبعت من الجهازين اللي واصلين ببعض بيبقى فيه جهاز واحد بس هو اللي بيستقبل لكن في اتوبولوجي بتاعة ال BUS لو أي جهاز في الشبكة حب يبعت هلاقي انه الداتا علشان بتمشي في السلكة والسلكة دي واصلة بكل الأجهزة فطبيعي ان الداتا دي تمرعلى كل الأجهزة فعلشان كدة بقول ان فيه أكتر من مستقبل
جايز أكون بإجابتي اللي فات وضحت جزء من السؤال اللي في بالك لكن أنا متاكد انك بعد أما تقري الإجابة اللي فوق هتسألي سؤال تاني إزاي جهاز بيبعت لجهاز تاني وكل الأجهزة تستقبل الداتا هو مش مفروض انه جهاز واحد بس هو اللي بيستقبل . طبعا ده سؤال منطقي جدا إجابته هنعرف تفصيلها في الكورس لكن بشكل بسيط علشان متحتاريش دلوقتي في إجابة السؤال ده انه هو فعلا الداتا بتروح لكل الأجهزة لكن كل جهاز بيشوف هل الداتا دي مبعوتاله هو ولا لأ ولو الداتا مش ليه بيعملها DISCARD أو بيوقعها مبياخدهاش لنفسه وأول لما توصل للجهاز المبعوتة ليه فالجهاز بيستقبلها وياخدها لنفسه . إزاي بقى كل جهاز بيشوف الداتا دي مبعوتاله ولا لأ دي قصة طويلة أساسا الشبكات اتعملت علشانها يعني حتى بعد أما تخلصي CCNA هتلاقي انه في حلول كتير جدا جدا اتحطت للموضوع ده انتي لسة ماألمتيش بيها
لكن مش قصدي بالكلام انه بيبقى في جهاز رئيسي وأجهزة فرعية لكن أكيد أي جهاز بيبعت داتا لجهاز تاني في الشبكة وده كان قصدي
أرجو اني أكون أجبت عن سؤالك وفهمته
ولو في حاجة أنا تحت أمرك

free_matrex2010 كتب:

موضوع غايه فى الروعه يا بشمهندس اكرمك الله وجعلهوا فى ميزان حسناتك
i have small comment
بعد اذن حضرتك ممكن انا اكون خطا فى الجزئيه دى
النوع الاول من التوصيل للشبكات
الى اسمه
point to point
انا اختلط عليا الامر
انا اذكر انى اخذت فى اعدلدى النوع ده اسمه
pear to pear
وانا اسف لو فيه خطا منى

السلام عليكم ورحمة الله وبركاته
أولا يابشمهندس أنا لما عملت الدرس والموضوع بشكل عام قولت ان الموضوع مش قاصر عليا لوحدي اللي عنده معلومة يدخل يقولها ولو أنا أخطأت معنديش أي مشكلة في ان حد يدخل يعدل عليا أنا بشر ومش معصوم من الخطأ فأسفك هنا ملهوش أي معنى انت تدخل تعدل علطول لو لقيت اي خطأ لأن دي أمانة علمية وهتتحاسب لو شوفت حاجة غلط ومصلحتهاش
أما بقى بالنسبة لتعديلك فمداخلتك كويسة وأنا فعلا نسيت أني أقول النقطة دي هو الإسم المشهور للشبكة اللي بيبقى فيها جهازين بس هو شبكات البير 2 بير أو الند للند زي مانت قولت ومش علشان انا قولتها فأنا بقولك هي صحيحة لكن هو فعلا اسمها التاني هو بوينت تو بوينت ولعلي علشان اتعودت ع المصطلح ده فأنا قولته فمعلش بقى فاتت عليا دي وبارك الله فيك على مداخلتك وأتمنى انه دايما يكون في مداخلات مفيدة دايما سواء منك أو من أي حد بيتابع الموضوع
والسلام

السلام
عليكم ورحمة الله وبركاته
أنا طبعا بداية بعتذر جدا عن التأخير ده لكن والله ربنا وحده يعلم اللي كنت فيه فأرجو انه محدش يضايق من الموضوع ده ومش هطول في الإعتذار هدخل في الدرس التاني على طول
دي العناوين الرئيسية بتاعة الدرس

1-NETWORK MODELS
a-OSI MODEL


ومعلش الدروس بعد كدة هتلاقوا فيها تعريفات كتير بالإنجليزي بعد كدة وتحتها هكتب شرح
التعريف
ودلوقتي بقى هندخل في أول عنوان في الدرس وهو network models
وقبل كل شيء لازم نعرف يعني ايه model أساسا


model : it is a set of components that defined for each device what will be done to aid data transfer.


بمعنى انه عبارة عن مجموعة مكونات أو زي ماهنشوف مجموعة طبقات فوق بعض بقدر اني من
خلالها أعرف الداتا بتتنقل إزاي كل مكون من المكونات دي بيحتوي على مجموعة تعليمات بيديها للداتا علشان
أقدر أنقلها ولو لاحظنا انه في التعريف ده التعريف ضمنيا يحتوي على تعريف البروتوكول اللي قولناه قبل كدة انه هو عبارة عن مجموعة تعليمات بتتبعها الداتا في اثناء نقلها علشان كدة نقدر نقول في تعريف ال model أنه هو عبارة عن set of protocols أو مجموعة بروتوكولات مع بعض .

وقبل أما نشرح الموديلز بتاعة النتوورك فلازم نعرف تعريف مهم جدا وهو مصطلح جديد اسمه ال layer



layer : it is the main and the only component of any of the network models and it defiens a certain function will be done by S/W
or H/W.



ومعنى الكلام السابق انه ال layer هي المكون الأساسي والوحيد لكل نوع من أنواع الموديلز بتاعة النتوورك وأقصد بكلمة المكون الوحيد ان أي موديل لنتوورك هو عبارة عن مجموعة من الطبقات أو ال layers كل طبقة من الطبقات دي بتقوم بوظيفة معينة وفيها بروتوكول أو أكثر علشان تقدر تقوم بوظيفتها .
وييجي سؤال مهم جدا هنا هو أنا ليه اساسا اضطريت اني أقسم الشبكة لمجموعة طبقات وأتعب نفسي في اني أدرس كل طبقة لوحدها ؟؟
وطبعا ده سؤال منطقي والسبب في كدة انه تخيلوا لو أنا في مؤسسة أو شركة معينة هلاقي ان الشركة متقسمة لكذا جزء فهنلاقي مثلا الموظفين الصغيرين اللي في الشركة منهم ناس ماسكة الحسابات وناس ماسكة مراجعة دفاتر معينة وفوق الموظفين دول هنلاقي الموظفين الكبار اللي هيكون ليهم وظايف تانية وبعدهم هنلاقي مثلا نائب أو نواب المدير وهنلاقي سكرتارية وهنلاقي المدير بتاع الشركة فكل مجموعة ماسكة وظيفة معينة وعلشان كدة هنلاقي ان في الآخر الشغل لما بيتجمع من كل دول بيصب في الآخر في تحقيق هدف معين زي مثلا اننا نقول ان الشركة دي شركة استيراد وتصدير او الشركة دي شركة سياحية وهكذا وبيكون ده سر النجاح بتاع الشركة وهو تجزيء الشغل لكن تخيلوا بقى لو احنا الشركة دي خلينا كل الناس اللي فيها بيعملوا كل حاجة زي ان كلالناس ماسكة منصب المدير وفي نفس الوقت بيراجعوا الدفاتر وكلهم ماسكين الحسابات هلاقي ان الدنيا باظت خالص وحصلت لخبطة كبيرة لكن في الأول لما كنت مقسم الشركة بنظام معين كلن كل قسم بيخلص شغله ويسلمه للي فوقه وبكدة بقي فيه نظام في الشركة



نفس الكلام بقى لو طبقناه على النتوورك لو احنا مسكنا الشبكة وبدأنا ندرس كل حاجة فيها من الأول ممكن نلاقي نفسنا بندرس حاجات متقدمة ونلاقي نفسنا في الوسط في بعض المصطلحات الصغيرة اللي مش عارفينها أو بعض الوظائف اللي بتتم في البداية مش قادرين نلم بيها غير لما نرجع لورا شوية ونبدأ نرجع تاني وندرس الحاجات دي وبعدها
نرجع لنفس النقطة اللي كنا فيها علشان ندرس الأجزاء المتقدمة وهكذا فهنلاقي نفسنا تايهين وده كان سر تقسيم الشبكة لمجموعة طبقات ندرس شغل كل طبقة والداتا من بداية خروجها من الجهاز لحد أما توصل لوجهتها الصحيحة
بيحصلها ايه لما بتمر على كل طبقة من دول هنقدر لما نروح في الشغل العملي لما تحصل مشكلة معينة نحدد المشكلة دي من أنهي طبقة بالضبط وعلاجها بيتم إزاي وهتفهموا ده لما أقولكم ان الطبقات كل طبقة منهم عبارة عن مجموعة
بروتوكولات في منها بيشتغل لوحده اما لما بوصل الجهاز بالشبكة وفي منها أنا اللي بعمله كونفجريشن على الجهاز فلما تحصل مشكلة بقدر احدد ايه البروتوكول اللي فيه مشكلة وأقدر اعرف هو في أنهي طبقة بالضبط وأكيد الكلام
هيوضح لقدام شوية إن شاء الله.




ودلوقتي بقى نبدأ ندخل علشان ندرس
الموديلز بتاعة النتوورك وكل موديل عبارة عن ايه ومسئولة عن ايه وايه البروتوكولات
اللي فيها
وال models هما 2 مفيش غيرهم أول واحد اسمه
ال

OSI (OPEN
SYSTEM INTERCONNECTION MODEL)
أما التاني فاسمه ال
TCP / IP MODEL
أول واحد ده هو موديل بيستخدم في الدراسة فقط علشان
الدارس يقدر يعرف ايه اللي بيحصل بالتفصيل أما الموديل التاني
فهو اللي أغلب الناس بتوع النتوورك اللي شغالين عملي بيعتمدوا عليه
في شغلهم وهنعرف الفرق بينهم خلال الشرح لأننا انهاردة
هنشرح بس إن شاء الله ال OSI MODEL


ونبدأ
دلوقتي الشرح إن شاء الله في ال OSI MODEL










- زي ماقولنا قبل كدة ان ال
OSI MODEL
هو نموذج بستخدمه في الدراسة فقط مش أكتر من كدة وجايز أغلب الناس اللي بتدرس نتوورك دايما في بداية الدراسة وبعد دراستهم للنموذجين بتوع النتوورك في أغلب الكتب بيلاقوا مكتوب انه النمذج الحديث في
الدراسة هو ال
TCP/IP MODEL
لكن الحقيقة غير كدة خالص
اللي اتحط الأول فعلا كان ال
TCP/IP MODEL
وهو تم وضعه علشان زي ماقولت قبل كدة الناس اللي بتشتغل نتوورك عملي أو بمعنى اصح الناس دي هي اللي وضعت النموذج ده لكن فيما بعد لما حب الدارسين يدرسوا الموضوع من ناحية نظرية لقوا ان في حاجات كتير محتاجة انها يتم تفسيرها فتم وضع ال OSI MODEL وهنعرف الفرق بين ال النموذجين لما نشرح ال TCP/ IP MODEL فيما بعد إن شاء الله علشان كدة نقدر نقول على ال OSI MODEL أنه هو النموذج الحديث في الدراسة والمعلومة اللي فوق طبعا لا هتقدم ولا هتأخر مع حد لكن من باب الأمانة العلمية مش أكتر المهم دلوقتي نعرف هي ايه مكونات ال OSI MODEL وبيتكون من كام LAYER أو طبقة وطبعا أكيد الصورة دايما ممكن تغني عن ألف سطر الصورة اللي جاية دي هي صورة لل OSI MODEL






والصورة اللي فوق دي تعبر عن شكل ال OSI MODEL زي مانتوا شايفين. وده نموذج زي ماهوواضح في الشكل بيتكون من سبع طبقات وانهاردة الدرس اننا هنشرح كل طبقة من دول بتعمل ايه بالضبط وأمثة للبروتوكولات اللي جوة كل طبقة وفي الآخر هقولكم كدة على تقسيمة يمكن هتحسوا بيها بقيمة دراسة الكورس ده فعلا أو قيمة
دراسة النتوورك بشكل عام خصوصا بالنسبة لمهندسين حاسبات واتصالات بس منسبقش الأحداث دلوقتي وخلنا ماشيين بالترتيب .
في شرح كل طبقة إن شاء الله هنشرحها بالعربي الأول وهي بتعمل ايه وبعد كدة هقولكم كدة على سطر واحد كدة بالإنجليزي يختصر عمل الطبقة بالكامل
بس قبل كدة أحب أنوه عن معلومة صغيرة وهي ان بتوع الشبكات لما حبوا يعملوا النماذج دي وقسموها وجدوا ان مش كل الناس تقدر تحفظ أسماء الطبقات فقرروا انهم يدوا لكل طبقة رقم بحيث ان المتكلم لما يتكلم يقول مثلا الطبقة الأولى أو الطبقة الثانية وهكذا وعلى ذلك ادولها ارقام من تحت لفوق بمعنى ان آخر طبقة من تحت هي الطبقة رقم واحد
وهي ال PHYSICAL LAYER واللي فوقها هي الطبقة رقم 2 وهكذا لحد أول طبقة من فوق وهي ال APPLICATION LAYER ودي ادولها الرقم 7 أو اسمها LAYER 7
الحاجة التانية بقى اللي أحب أنوه عنها واللي هنشرحها بالتفصيل ان في كل طبقة من دول الحاجة اللي بتتنقل في الشبكة بيبقى ليها شكل معين عن طريق ان الحاجة اللي بنقلها في كل طبقة بحطلها HEADER & TRAILER
أو بالبلدي كدة راس وديل بيحتووا على حاجة معينة وإن شاء الله حتفهموا أكتر في الشرح من تحت
نبدأ بقى في شرح الطبقات طبقة طبقة من فوق لتحت




1-APPLICATION LAYER




والطبقة دي هي الطبقة الوحيدة اللي تقدر تشوف العمليات اللي بتتم فيها بعينك لأنها بإختصار هي شاشة الجهاز اللي انت شغال عليه ومش أقصد الشاشة كمكون صلب أقصد اللي انت بتشوفه على الشاشة زي مثلا ملف الوورد ده يعتبر تطبيق زي مثلا صفحة النت دي تعتبر ضمن التطبيقات زي ملف انت حملته ده يعتبر تطبيق زي ملف صوت انت بتسمعه او فيديو بتشوفه أو بي دي اف أو لعبة بتلعبها أو أي حاجة بتقدر ان تعملها وتشوفها بعينك على الجهاز بل يمكن نقدر نقول ان نظام التشغبل نفسه زي الويندوز أو اللينوكس او اليونكس أو الماكنتوش دول من ضمن
التطبيقات ودي هتكون أكتر طبقة محسوسة بالنسبالنا هنا .
طيب بعد أماعرفنا هي ايه التطبيقات دي احنا هنا ايه اللي عاوزينه من التطبيقات دي وايه اللي هندرسه بالضبط فيها . احنا هنا بندرس شبكات يعني المقصد من كل الكلام ده اني أعرف إزاي أنقل حاجة من مستخدم لآخر واوصلها بسلام فاحنا هنا عاوزين نعرف بالضبط الطبقة دي بتبقى مسئولة عن ايه بالضبط لما أكون عاوز أنقل الداتا من مكان لمكان وكمان إزاي بتقدر تنفذ مسئوليتها دي .
أول حاجة هي مسئولية الطبقة دي في نقل الداتا بتبقى ايه , مسئولية الطبقة دي انها بتجهز الداتا لغرض معين بمعنى انه لو الداتا اللي هنقلها أو هستقبلها عبارة عن صفحة انترنت تصفح بيتم إعدادها بطريقة معينة عن طريق بروتوكول معين ولو الداتا عبارة عن ملف هلاقي بروتوكول تاني هو اللي مسئول عنه ولو مثلا الداتا عبارة صوت زي مكالمات الياهوو أو السكاي بي هلاقي بروتوكول تاني هواللي بينقله وهكذا
طب ايه بقى أمثلة البروتوكولات دي , هنلاقي ان مثلا لو أناعاوز أنقل أو استقبل صفحة نت أو زي مابنسميه الأيام دي أعمل تصفح هلاقي ان البروتوكول المسئول عن الموضوع ده اسمه ال HTTP (HYPER TEXT TRANSFER PROTOCOL) ولو أنا مثلا هنقل ملف هلاقي ان البروتوكول المسئول عن كدة اسمه ال FTP ( FILE TRANSFER PROTOCOL) ولو مثلا عاوز ابعت بريد اليكتروني هلاقي ان
البروتوكول المسئول عن كدة اسمه ال SMPT ( SIMPLE MAIL TRANSFER PROTOCOL) ولو هستبقل بريد اليكتروني هلاقي ان البروتوكول المسئول عن التسليم اسمه ال POP3(POST OFFICE PROTOCOL) ولو قعدنا نضرب امثلة للصبح عن البروتوكولات الموجودة في الطبقة دي مش هخلص وده لأن
التطبيقات الموجودة كتير جدا وكل يوم ويمكن كل ساعة بلاقي ان في تطبيقات جديدة بتظهر ولو في تطبيق معين حدعاوز يعرف اسم البروتوكول المسئول عنه في النتوورك اكتبوه في الأسئلة وإن شاء الله أجاوبكم عليه .
آخر حاجة نذكرها في الطبقة دي هي وحدة قياس الداتا المنقولة فيها , ووحدةالقياس هنا هي data لأن في الطبقة دي الداتا بتكون زي ماهي داتا نقية بدون أي إضافات عليها وأكيد حنفهم أكتر


APPLICATION layer : it is responsible for preparing
data for the proper service



2-presentation layer :







بعد أما طبقة التبيقات خلصت شغلها وجهزت الداتا تبدأ ترمي الشغل اللي عملته على الطبقة اللي بعدها وهي ال presentation layer أو طبقة التقديم ولعلنا في الطبقة دي واللي بعدها الكلام مش هيبقى كتير قوي لأن شغلهم شبه بسيط وتقريبا نقدر نقول انه نفس شغل طبقة التطبيقات .
لو حبينا نفسر شغل الطبقة دي باتفصيل هنقول ان شغلها ينحصر في انها تجد لغة مشتركة للتطبيق اللي في شبكة التطبيقات يقدر المرسل والمستقبل يتعاملوا بيها وده هيتضح بمثال لأن الكلام كدة غمض بعض الشيء
معنى ايجاد لغة مشتركة انه مثلا لو أنا مثلا لو جهازي بيشتغل كسيرفر وأنا هفترض هنا ان كل الناس اللي بتقرا فاهمة الفرق بين السيرفر وأي جهاز عادي واللي مش عارف الفرق بينهم ممكن يسأل وهجاوبه عليه بس أنا عاوز اوضح نقطة معينة علشان منخرجش عن سياق الموضوع , فلو مثلا حد بعت طلب لصفحة انترنت من جهازي والصفحة دي فيها مجموعة صور امتداد الصور دي مثلا jpg وعندي كلام في الصفحة text وعندي كمانفي الصفحة ملف صوت امتداده مثلا mp3 وعندي ملف فيديو امتداده مثلا avi هلاقي ان شغل الطبقة دي انها تتفق على شكل معين
لكل حاجة في دول بين المرسل والمستقبل وزي ماكلنا عارفين ان لغة التعامل بين الأجهزة هي الأصفار والوحايد فمثلا الطبقة دي حتجهز الداتا المبعوتة وتقول الجهاز المستقبل والمرسل هنتفق على مثلا الصيغة 0011100101 علشان نعرف ان دي صورة ونوعها jpg ونتفق على الصيغة 11011001 علشان نعرف ان ده ASCII CODE نوعه TEXT وهنتفق على الصيغة 101010011 علشان نعرف ان ده ملف فيديو نوعه AVI وهكذا جايز يكون في بعض المصطلحات اللي مش مفهومة في الشرح ده لكن أنا عاوز حاجة معينة شرحتها ولله الحمد فاللي عاوز بقى الحاجات اللي في الوسط اللي مش باينة يقول وإن شاء الله أوضحها لكن ارجو ان تكون
الفكرة وصلت . وده كل عمل الطبقة دي . تبقى بس نقول حاجة أخيرة وهي وحدة الطبقة دي والوحدة هنا هي الداتا برضه لأن الداتا لسة هنا متحطتلهاش اي حاجة





PRESENTATION layer : it is responsible for finding a common data representation between each sender & receiver.



أما بقى دلوقتي فأنا كان المفروض اني في الدرس ده أشرح كل ال layers وكنت هنزل الدرس يوم الثلاثاء القادم على بعض بس بصراحة بعد ماانتهيت من الجزء ده حسيت ان الناس فقدت الأمل في اني أنزل الدرس التاني فقولت انزل الجزء اللي كتبته لحد اما أكمل الباقي وإن شاء الله على يوم التلات هنزل باقي الدرس كله وشرح باقي الطبقات كلها والتقسيمة اللي قولت عليها ويارب إن شاء الله أعرف أفيد الناس وربنا يقدرني

ربنا يكرمك يا باشمهندس بجد وجزاك الله كل خير
المنتدى بجد أكتر من راااااااااااااااااااااااائع ودايما فى تقدم ان شاء الله

شكرا جزيلا لك وفي انتظار الدرس التاني

الف الف شكر على الشرح التفصيلي بشمهندس

ونتمنى لك التوفيق والنجاح
ونتمنى انك تقدر توصل معنا الى عنونه الشبكات
ممكن نبذه صغيره عن العنونه معليش بشمهندس
العنونه فى غموضه في كيف نعرف عدد ال host