الآن دورة CCNA من الألف إلى الياء حصرياً وفقط في منتدى هندسة أسوان

السلام عليكم ورحمة الله وبركاته
بعد التحية
أولا وقبل كل شيء هناك موضوعين قد كتبتهما من قبل مثبتين في قسم الشبكات أحدهما بعنوان
أكبر موضوع عن الشبكات
والآخر بعنوان : إعتذار ويجب إصلاح الخطأ
أرجو من الإدارة أن يتم حذف هذين الموضوعين وتثبيت هذا الموضوع لأنه إن شاء الله سيكون من الأهمية بمكان أن يتم شرحه
وسوف اذكر مجموعة نقاط لأوضح فيها كل شيء :
1- لما وضعت موضوع الشبكات كنت وضعته بسبب اني بحب المجال ده جدا وكنت مطلع على حاجات كتير فيه وكنت عارفه بشكل عام فكانت نيتي في الشرح اني هذاكر حتة حتة وأبدأ أشرح لكن نظرا لظروف قهرية مقدرتش أكمل الموضوع لأني مكنش عندي وقت اني أكمله بسبب الظروف دي وحتى لما وضعت الموضوع التاني واللي وعدت فيه بأني هكمل الموضوع كانت على ماأفتكر في أجازة نصف العام وبغض النظر عن الوقت لكن فعلا كنت في ظروف مايعلم بيها إلا ربنا لكن فعلا والله أنا بحمد ربنا جدا إني مشرحتش حاجة لأني كنت هاخد وقت طويل جدا في حاجات يمكن كان مش هيكون ليها لازمة .

2- في الدراسة طبعا مكنتش قادر أكيد اني أكمل الموضوع نظرا لضغط شغل الدراسة وزنقة الكلية ومكنتش بلاقي وقت أقعد على الجهاز علشان أكتب مواضيع مجرد اني ببقى فاتحه قدامي علشان ابحث في النت عن حاجة معينة وأنا بذاكر

3- في أجازات آخر السنة كنت الفترة الأخيرة يمكن من ساعة لما كتبت الموضوع وأنا في سفر مستمر فبرضه مكنتش بلاقي وقت أقعد ع الجهاز

وبعد ال 3 نقاط اللي فاتوا فأنا بعيد الكلام اللي قولته في أول نقطة الحمد لله ان ده حصل علشان أنا بجد ممكن مكنتش هقدر أفيد قوي في الموضوع ده زي دلوقتي ولعل الأسباب تتضح فيما بعد لكن في حاجات كتير جدا هتتغير في اسلوب الشرح وفي طريقة تناول المادة بالإضافة لأني أنا لوقتي أفكاري مرتبة كتير جدا في الموضوع ده عن زمان نظرا لأني والحمد لله وزي مااتحط موضوع قبل كدة في المنتدى واللي حطه صاحبي وحبيبي يحيى ممتاز اني الحمد لله خلصت أول شهادة من شهادات سيسكو واللي أنا بصدد شرحها تفصيليا في موضوعي ده إن شاء الله

لكن أرجو من الإدارة استبدال الموضوعين المثبتين بهذا الموضوع كما أشرت من قبل وبإذن الله يكون ده الموضوع المتكامل وتستفيدوا منه لأني بجد ملاحظ انه يمكن الشغل في الجانب ده قليل جدا في المنتدى ومحدش يزعل مني أنا بقول حقيقة في ناس كتير ولعل أغلب الناس في المنتدى بتبقى مواضيعها منقولة من منتديات تانية وأنا مبقولش ان ده غلط لكن في وجهة نظري المتواضعة إن تقبلتوها يعني انه لازم يكون صاحب الموضوع على دراية كاملة بتفاصيل موضوعه
دي حاجة الحاجة التانية بقى لاحظت ان كل اللي بيدخل علشان يشرح حاجة في المنتدى فهو بيقتطع جزء من موضوع كبير ويشرحه من وسط الموضوع ولعل نادر لما حد تناول موضوع من أوله لآخره بالشرح

الحاجة التالتة والأخيرة انه لعل يكون في نقص في المادة العلمية شوية ويمكن أنا بقول كدة لأني دايما بحب ان الحاجة يتم تناولها من بدايتها لنهايتها بشكل كويس ويمكن من أكتر المواضيع اللي عجبتني في المنتدى هو موضوع عمله البشمهندس محمد عبد الحميد في اسئلة مادة الفيلد وهي المواضيع اللي زي كدة هي اللي بتزود المادةالعلمية عند الطلاب بشكل كبير وبيبقى فيه تفاعل بين الطلاب والمعيدين ونشاط في المنتدى

وقبل أما أقول آخر حاجة وأنا ليه اخترت الموضوع ده بالذات علشان أشرحه فمش عاوز الإدارة تضايق من الكلام اللي قولته ده لأنها مجرد وجهة نظري من خلال اللي شايفه في المنتدى وهذذا لايقلل أبدا من شأن هذا المنتدى أنا روحت القاهرة السنة اللي فات ومكثت فيها فترة كبيرة جدا وكانت ال 3 شهور بتاعة أجازة الصيف السنة اللي فات من أفضل أيام حياتي رغم انها كان فيها تعب كتير جدا ويمكن خلال الفترة دي فعلا اكتشفت ان هندسة أسوان تقريبا ملهاش مكان على خارطة مصر وفي ناس كتير جدا متعرفش اساسا ان في حاجة اسمها هندسة أسوان ويمكن في ناس كتير جدا ممكن تعارضني في الموضوع ده لكن الأماكن اللي أنا كنت فيها واللي سمعت منها الكلام ده مهما حد عارضني في ده فلا يمكن أبدا اني أصدق أي حد يقوللي ان هندسة أسوان معروفة في مصر
لكن رغم كل اللي قولته فوق كنت في مرة في سيمينار في شركة فسألني البشمهندس انت في هندسة ايه قولتله في هندسة أسوان فلقيت ناس كتير كانوا معايا من جامعات مختلفة عارفة الكلية من المنتدى وقالولي بجد احنا مشوفناش منتدى هندسة زي المنتدى بتاعكم والكلية بتاعتكم معرفنهاش إلا من المنتدى وأثنوا جدا على الشغل المعمول في المنتدى فكنت سعيد جدا بالكلام ده علشان كدة انتوا لازم تسعوا في انكم تخلوا المنتدى ده صرح علمي بجد علشان يبقى أحد العوامل اللي تتعرف بيها الكلية ويبقى ليها صوت في مصر

الحاجة اللي عاوزأوضحها بقى هي أنا ليه اخترت الموضوع ده بالذات والأسباب اني أنا زي ماقولت فوق أنا بحب جدا المجال ده فأكيد إن شاء الله هبقى في شرحه أفضل من أي مجال تاني والحاجة التانية اني بجد حبيت اني أوري الناس وأحسسهم الفرق بين المجال العملي والنظري وإزاي بيتربطوا ببعض وعلشان أقدر أوضح للناس اللي بتقول ان مفيش علاقة بين العملي والنظري . لا أكيد طبعا فيه علاقة يمكن متكونش واضحة قوي بس هي موجودة وربنا يوفقني وأوضحها

أما بقى آخر حاجة فهي أنا عاوزأوضح الموضوع سياقة هيمشي إزاي وهرتبه إزاي
إن شاء الله هيكون الموضوع على هيئة دروس اسبوعية مرتين في الأسبوع علشان أدي فرصة للناس اللي مهتمة أنها تذاكر واللي عنده أسئلة يبدأ يسأل وعلى قدر ماربنا يوفقني هجاوب وإن شاء الله هبدأ شرح من الأسبوع اللي جاي من يوم السبت القادم بإذن الله .
وهنا أنا هحط العناوين اللي هنتناولها بالشرح في الكورس علشان يبقى الكورس واضح قدامكم

CCNA COURSE CONTENTS :
1-NETWORK INTRODUCTION
2-TCP/IP MODEL
3-DATALINK LAYER
4-INTERNET OR NETWORK LAYER -----> IP ADDRESSING & SUBNETTING , DHCP , DNS
5-TRANSPORT & APPLICATION LAYER
6-ROUTERS & SWITCHES ( S/W & H/W)
7-ROUTING PROTOCOLS
8-SECURITY ( ACCESS CONTROL LISTS)
9-SWITCHING
10-REMOTE ACCESS ( WAN TECHNOLOGIES : ISDN , FR, DSL)
11-WIRELESS LAN ( WIFI )
12-SECURITY ATTACS & SECURITY DEVICES
13-VPN ( VIRTUAL PRIVATE NETWORK )
14-IPv6 ( IP VERSION 6 )

بس كدة كدة تمام قوي يارب بس أقدر أخلص نصهم الكورس طويل ولذيذ وفيه بعض الحاجات الرخمة في الوسط بس لما تتعودوا عليها هتلاقوها من أفضل الحاجت في الكورس
بس أهم حاجة تدعولي أنجح السنة دي ونخلص بقى أنا مليت من المذاكرة كفاااااااااااية خلاص جابت جاااااااااااااااز

رابط الدرس الأول
[ندعوك للتسجيل في المنتدى أو التعريف بنفسك لمعاينة هذا الرابط]

تم تثبيت الموضوع يا محمد وفك تثبيت الموضوعين الأولين عشماً
ان الموضوع يكمل ان شاء الله
بالتوفيق

يبدو والله أعلم ان يحيى فاقد الثقة فيا خالص بسبب اني مكملتش الموضوعين اللي فاتوا بس متقلقش يادفعة إن شاء الله الموضوع ده يكمل أنا عارف ان في ناس اضايقت علشان الموضوعين اللي فاتوا بكل صراحة اتكلمت كتير ومعملتش حاجة بس ربنا بقى يسهل والموضوع ده يكمل
وادعوا انه يكمل
والسلام

الآن دورة CCNA من الألف إلى الياء حصرياً وفقط في منتدى هندسة أسوان 379625

لاااااااا انا بغيظك وبس

وعارف انك لما بتوعد بحاجة بتنفذهااااا

منتظرين مقدمة سيسكوو يا باشا

وانا من المنتظرين وشكرا لتعبك مقدما يابشمهندس

طيب بداية كدة يعني أنا هعمل مقدمة خفيفة هقول فيها تاريخ شركة سيسكو بسرعة علشان يوم السبت إن شاء الله ندخل في المادة العلمية علطول وعلى فكرة المقدمة بتاعة دلوقتي دي مش هي المقدمة اللي أقصدها عن النتوورك اللي هي مفروض انها أول عنوان في الكورس لا دي مجرد بس فتح شهية يعني زي مابيقولوا
واعذروني أنا حابب اني اتكلم في المقدمة دي بالعامية شوية ومش هكتبها باللغة العربية لكن إن شاء الله خلال فترة الشرح بإذن الله هتبقى معظمها باللغة العربية ده لو في حاجة محتاجين اننا نكتبها يعني بالعربي لأن الكورس أغلبه أوامر وحسابات ولكن شرح البروتوكولات والكلام ده إن شاء الله هيكون الشرح باللغة العربية وهحاول إن شاء الله إني أمشي بنفس الطريقةاللي أخدت بيها الكورس
طيب نبدأ على بركة الله
كنا اتكلمنا قبل كدة عن ان أول من فكر واخترع موضوع الشبكات في العالم هي وزارة الدفاع الأمريكية لأنها كانت عاوزة تربط أجزائها ببعض وبعد كدة بدأت تنفذ الفكرة في نطاق الولايات المتحدة الأمريكية وبعد كدة بدأ العالم كله ياخد باله من الطفرة دي وتوسع موضوع الشبكات في العالم كله
ونظرا للتطور والزيادة الكبيرة في مجال الشبكات بدأت بعض العقول تفكر في انها تصنع أجهزة الأجهزة دي تساعد في ربط الشبكات ببعضها بدل ماالموضوع يبقى كله أسلاك والدنيا تبقى معقدة فتخيلوا مثلا لو أنا عاوز أربط بنك في مصر بفرع البنك بتاعه في الولايات المتحدة عن طريق الأسلاك فقط هنلاقي ان الموضوع مكلف جدا وإمكانيات الخطأ فيه كبيرة فضلا عن تعقيد الأسلاك اللي هنلاقيه وبعد المسافة كمان فالكلام ده مكانش منطقي إطلاقا وعلشان كدة بدأ التفكير في تصنيع أجهزة تشتغل بطريقة معينة وتتحط بين الأجهزة نقدر بيها نخفف حاجات كتير من الحاجات اللي قاتت .
كان أول من فكر في الموضوع ده شخصين من الولايات المتحدة الأمريكية وبالتحديد من ولاية سان فرانسيسكو وفعلا أسسوا الشركة المسئولة عن تصنيع الأجهزة دي وبدأت الشركة تكبر وحققت نجاح غير مسبوق أصحاب الشركة نفسهم مكانوش متوقعينه وكانت الحيرة في اختيار اسم للشركة دي فملقيش أصصحاب الشركة إلا انهم يكرموا بلدهم ويعترفوا بفضلها عليهم وخصوصا الولاية اللي بينتموا ليها فقرروا انهم يحذفوا أول 7 أحرف من اسم الولاية ويسموا الشركة بباقي الحروف فحذفوا من كلمة سان فرانسيسكو حذفوا منها سان فران وأبقوا الباقي لإسم الشركو ومن هنا كان اسم سيسكو ومش بس كدة دول كمان حتى شعار الشركة نفسه في ناس كتير بتفتكره انه عبارة عن electrical pulses لكن هو مش كدة خلاص الرمز بتاع الشركة مأخوذ من شكل كوبري سان فرانسيسكو الشهير وهتلاقوا ان أغلبكم عارفينه وعارفين شكله وده طبعا كان لشعورهم بالإنتماء لبلدهم .
استمرت الشركة في النجاح لفترة كبيرة جدا وبدأوا يجذبوا أفضل العقول للعمل عندهم وغطى إسم أجهزة سيسكو على أي أجهزة شبكات موجودة في السوق في الوقت ده وكان المستخدم مبهور بإمكانيات الأجهزة بتاعتهم وذكائها الشديد في التعامل مع الشبكة فلم تجد سيسكو لها من منافس في السوق العالمية في مجال الشبكات
لكن كانت المشكلة الكبيرة انهم كان عندهم سياسة بيعية غريبة جدا لأي جهازعندهم والسياسة دي هي more complicated more sales والأغرب ان السياسة دي ساعدت على نجاحهم نجاح غير مسبوق في السوق العالمية وكان ليها أكبر الأثر على الأرباح العالية بتاعتهم لكن دوام الحال من المحال بعد فترة كبيرة جدا من النجاح المنقطع النظير بدأت السياسة دي تمشي ضد أرباح الشركة وأدى تمسكهم الشديد بيها لخسائر غير عادية في الشركة لأن المستخدم وجد نفسه ممكن يشتري جهاز ب 10000 دولارومش قادر يستخدم أكتر من 10% من إمكانيات الجهازالحقيقية ومتستغربوش من الرقم ده فعلا أجهزة سيسكو غالية جدا جدا وممكن تلاقي راوتر تمنه ربع أو نص مليون جنيه ففعلا الأجهزة كانت غالية جدا فهل يعقل ان واحد يدفع ده كله في راوتر أو سويتش وفي الآخر مش عارف يستخدمه وكان العامل التاني في خسارة الشركة ان بعض بلدان العالم بدأت في مرحلة تطورها زي الصين واليابان وغيرها فبدأت تظهر في البلاد دي بعض الشركات المهتمة بتصنيع أجهزة زي كدة وكانت الأجهزة أبسط في الإستخدام وأقل في السعر فطبعا المستخدم فضل إستخدام الأجهزة الأبسط والأرخص عن الأعقد والأغلى فعلشان كدة خسرت الشركة خساير فدحة وبدأت المنحنى بتاع الأرباح ياخد إتجاه حاد النزول لايمكن تداركه ووجدت الشركة ان أفضل حل عندها أنها تتخلى عن تعقيد الأجهزة بتاعتها وتصنع أجهزة أبسط وأسهل في الإستخدام وحتى لو ده تم مكانتش الأرباح بتاعتهم هتزيد لا زيادة سريعةولا حتى بطيئة لكن كانت هتفضل على ماهي عليه لا بتزيد ولا بتنقص ودي كانت أفضل الحلول المتاحة قدام الشركة . لكن الشركة زي ماكان عندها عقول مهرة في مجال تصنيع الهاردوير ودراسة البروتوكولات كان عندها فريق تسويق غير عادي فبدأ الفريق ده يدرس كل ملابسات الموضوع لمدة شهر كامل علشان يتوصلوا لحل للمشكلة الكبيرة دي . وكان الحل بعد عناء شهر تقريبا من الدراسة حل غريب جدا وهو more complicated more sales وأنهم يحافظوا على السياسة البيعية بتاعتهم بل ويعقدوها زيادة ولكن أصحاب الشركة ملقوش أي تفسير لده ومفيش تغيير حتى بعد شهر من الدراسة والبحث لكن فريق التسويق ده كانت وجهة نظره انهم يحافظوا على السياسة البيعية لكن مع الفارق بينها وبين اللي فات انهم ينزلوا مع كل جهاز دليل مستخدم كامل يشرح عمل الجهاز كاملا.
وييجي سؤال هنا هل في شركة محترمة في الدنيا ممكن متزلش مع أي جهاز جديد تصنعه دليل مستخدم أو وسيلة توضح وظيفة عمله ؟ أكيد طبعا ان أي شركة في الدنيا محترمة لازم تعمل كدة لكن الأمر مع سيسكو كان يختلف شوية لأن أجهزتها معقدة جدا في شغلها زي ماهنشوف إن شاء الله في خلال الشرح وعلشان يقدر المستخدم يستخدم كل إمكانيات الجهاز الذي تم شراؤه ممكن تضطر الشركة انها تنزل كتاب كامل أو كتابين يشرحوا عمل الجهاز فهيكون دليل المستخدم للجهاز كبير جدا ففي الأول مقدرتش الشركة تعمل كدة وكانت بتنزل دليل مستخدم لا يشرح أكثر من نسبة ال 10% من إمكانيات الجهاز اللي اتكلمنا عنها
فكانت المشكلة في انهم يرفقوا دليل مستخدم يشرح كل عمل الجهاز شيء صعب جدا لأنه هيكون كبير بالإضافة لأنه من النادر انه ممكن حد يقرأ دليل المسستخدم كاملا فهيكون فيه صعوبة كبيرة جدا في فعل شيء زي ده
ولكن كان الحل الأمثل لهذه المشلكة انه اجهزة سيسكو تستمر في السياسة البيعية لها وعلشان يقدر المستخدم يعود ليشتري الأجهزة لابد وانه يتم تعريفه بكل إمكانيات الجهاز ولكن يتم ده عن طريق دورات تدريبية تعقد لمن يريد أن يستخدم أجهزة سيسكو المعقدة وتكون الدورات دي هي دليل المستخدم وبعد كدة بدأ التفكير في انه يتم عقد إمتحانات معتمدة من قبل الشركة لمن يريد ويحصل على شهادة معتمدة انه أصبح شخص خبير في التعامل مع أجهزة سيسكو وطبعا كان حل في منتهى الذكاء قدرت بيه الشركة تعمل لنفسها دعاية في كل مكان وبكدة تقدر تزود أرباحها وكمان تجذب المتعلمين والمهتمين بالمادة العلمية وتقنعه من خلال الكورسات والإمتحانات دي انه بيحصل على حاجتين هما العلم لمن يريد أن يتعلم وكمان قدرته على التعامل مع الأجهزة المعقدة دي
وعند البدء بتنفيذ الخطة دي بدأت الشركة تشعر بأنه أرباحها بدأت تزيد مرة تانية بل إنها زادت زيادة غير عادية عن السابق ونجح تلك الإقتراح
ثم درست الشركة كل السبل التي تسهل فيها على المتعلمين تعلم المادة العلمية فبدأت الشركة بتقسيم شهاداتها لأجزاء أو مجالات مختلفة وخرجت بأكثر من مجال يمكن تقسيم الشهادات فيه
لكن ممكن نسيب شرح تقسيم الشهادات ومجال كل شهادة في المرة اللي جاية علشان موضوع هيحتاج مجهود شوية أنا بس حبيت أديلكم فكرة سريعة عن سيسكو وإزاي جات فكرة انهم يعملوا الشهادات
والموضوع المرة اللي جاية هيكون عن تقسيم الشهادات ومجال كل شهادة وبعد كدة هنتكلم شوية عن نقاط ضعف وقوة سيسكو ومنافسي سيسكو في السوق وهندخل في جزءبسيط في المقدمة بتاعة الشبكات
أرجو ان الموضوع يعجبكم ومعلش هو مش مرتب شوية المرة دي لأن الكلام أولا معظمه من دماغي ومش أقصد طبعا إني أنا بضحك عليكم ومألف قصة أقصد من معلوماتي يعني على قدي والحاجة التانية اني عندي إمتحان يوم الأربعاء والحاجة التالتة انه كله كلام نظري ومعلومات تاريخية فهي فقط للإطلاع للي عاوز يعرف لكن أوعدكم انه هيكون منظم أكتر المرة اللي جاية و بمجرد ما هاخد الأجازة هيكون ليه وقت من يومي أشتغل فيه في الموضوع ده
والسلام عليكم ورحمة الله وبركاته

يااااه دي سيسكو طلع ليها قصة كبيرة من أول الاسم لغاية شهادتها

بصراحة انا اول ما لاقيتك بتقول مقدمة عن سيسكو وتاريخها وكده
قولت المقدمة هتكون مملة وليه ما دخلش في الشرح علي طول
بس بجد قريتها كلها .. وعجبتني جدااااااااا
ووضحتلي هي ايه سيسكو اصلا :)
الآن دورة CCNA من الألف إلى الياء حصرياً وفقط في منتدى هندسة أسوان Icon_flower

طبعا انا متابعة الموضوع
بس ياريت مع كل درس هتشرحه .. تحط لنا الريفرينس اللي انت ذاكرت منه
أو اللي اخدت الكورس منه
عشان لو حاجة مش فاهمينها نشوفها فيه .. واذا ما وصلتش برده .. نسألك طبعا الآن دورة CCNA من الألف إلى الياء حصرياً وفقط في منتدى هندسة أسوان Icon_razz

علي فكرة انا بفكر ادخل امتحانات في الشبكات بعد التخرج
بس ما اعرفش هتكون تبع سيسكو ولا تبع ميكروسوفت
في انتظار الدرس الجاي عشان اعرف الفرق واعرف احدد

الآن دورة CCNA من الألف إلى الياء حصرياً وفقط في منتدى هندسة أسوان 379338

وشكررررررا كتير وربنا يعينك علي الدروس دي كلها الآن دورة CCNA من الألف إلى الياء حصرياً وفقط في منتدى هندسة أسوان 379338

واااااااااااااااااااااااااااااااو

رووووعة جداااااااااااااااا الموضوع دة

وحيبقى من أفضل المواضيع في المنتدى

بجد واخد منك مجهود كبييير

شكراااً ليك يا محمد

وانا بحب اقرا الهيستورى بتاعت أى حاجة فعلاً

وعجبتنى جداً فكرة more complicated more sales

وسياسة الحل بتاعتهم

وكمان اختيار اسم سيسكو _ وفعلاً الشعار بتاعهم زى الكوبرى

هههههههههههههههههه

مكنتش واخد بالى خالص من الحكاية دى

وحتابع معاك في اجازاتى ان شاء الله

Be sure

و عايزين مشاركات اكبر من الأأعضاء عشان

محمد ما يزهقش _ والموضوع دة حلو كتييييييييييير

ولسة حيحلواا واكيد محمد حيشرح برامج السيموليشنز

والأكواد ان شاء الله

انا كنت متابع مع محمد وهو بيحضر الكورس دة

3 ساعات رايح و3 ساعات جاى

وكمان سهره للصبح وهو بيذاكر عشان الامتحان

هو الصراحة مش بيعملها للدراسة في الكلية

بس عنده حق في كدة

الحاجات دى اهم كتييييييييييييييييييييييييييييييير

وأشكرك مرة أخرى يا باشا _ مجهود مشكوووووووووووور عليه

وبعد إذنك أغير اسم الموضوع _

عشان يجذب الكثيييييييييييييير من الأعضاء جوة المنتدى

ومن خارجه

وان شاء الله الحبار لما يفضى يعمل له بروباجاندا جامدة

لو عاوز تغير إسم الموضوع غيره مش مشكلة بس أهم حاجة الناس تستفيد
أما بقى ردا على كلام البشمهندسة أميرة بالنسبة للفرق بين سيسكو وميكروسوفت لعل ان ميكروسوفت وسيسكو غير منافسين لبعض في السوق إطلاقا لأن كل واحدة شغالة في مجال لأني مقصدتش خالص ميكروسوفت بكلامي عن منافسين سيسكو
لكن كويس انك فتحتي الموضوع ده وهخليله جانب في كلامي المرة اللي جاية لأني كنت هنساه خالص لو انتي مفتحتيهوش علشان الناس بس تعرف ايه الفرق بين شهادات سيسكو وشهادات ميكروسوفت

مقدمة جميلة جدا وموفقه باذن الله
طيب ممكن اقتراح ممكن نخلى موضوع تانى ملحق بالموضوع الرئيسى ويكون للاسئله والمناقشات والاستفسارات عشان يكون الشرح أكتر تنظيما

مفيش مشكلة في كدة يابشمهندسة إن شاء الله
اعملوا اللي انتوا عاوزينه في الموضوع
أنا كل اللي عليا إني هشرح وأجاوب على الأسئلة إن شاء الله
الشرح فين ولا الأسئلة فين متفرقش معايا كتير
والسلام

السلام عليكم ورحمة الله وبركاته
بصراحة أنا شوفت اني أنا أكمل المقدمة وأخلص منها ويوم السبت نبقى نبدأ في حاجة جديدة إن شاء الله على طول على الشرح وندخل في الموضوع
فنكمل بقى باقي الموضوع بتاع المرة اللي فات
كنا قولنا آخر حاجة المرة اللي فات ان سيسكو في الأول طلعت مجموعة من الشهادات ليها كبداية يعني وكانت الشهادات دي عبارة عن 3 شهادات أو بمعنى أصح هي شهادة واحدة بس مقسومة لمجموعة مراحل كل ماتعدي مرحلة منهم دل ده على زيادة براعتك في أجهزة سيسكو وفي الشبكات بشكل عام وده الشكل العام بتاع شهادات سيسكو اللي كانت في البداية

الآن دورة CCNA من الألف إلى الياء حصرياً وفقط في منتدى هندسة أسوان 03022010111738q

وهنا بقى لازم نقف وقفة كدة شوية علشان نشرح ايه اللي جوة الهرم ده
أول حاجة نشرح التدرج بتاع الهرم
طبعا زي مانتوا شايفين ان ان الهرم أوله حاجة اسمها
CCENT1 (Cisco Certified Entry Networking Technician)
ودي أول شهادة بتاخدها لوا انت عاوز تبدأ في شهادات سيسكو
بعدها بتنتقل للمستوى المتقدم وتبدأ تدرس شهادة اسمها
CCENT2 (Cisco Certified Entry Networking Technician)
ومجرد انك حصلت على الشهادة دي يبقى معاك شهادة اسمها
CCNA(CISCO CERTIFIED NETWORK ASSOCIATION)
ودي أول شهادة فعلية في شهادات سيسكو وكما تدل آخر كلمة في الشهادة ان الحصول عليها معناها انك تخطيت مستوى المبتدئين
ليك إختيار تاني بدل ماتاخد الشهادتين دول وتكلف نفسك فلوس وتعب انك ممكن تدخل امتحان واحد اللي هو ال CCNA مباشرة ومرة واحدة وتنجح فيه ويبقى معاك سي سي ان ايه على طول
لكن بشكل عام ده مستوى المبتدئين وأول لما تعديه تبدأ في المستوى اللي بعده واللي هو مستوى المحترفين
وتبدأ تدرس شهادة تانية اسمها
CCNP(CISCO CERTIFIED NETWORK PROFESSIONAL)
ودي طبعا مستوى المحترفين وبتتكون من أربع شهادات أو أربع تراكات كل تراك ليه امتحان وشهادة لوحدها
ومجرد ماخلصتها بتنتقل لمستوى الخبراء وتبدأ في الشهادة اللي بعدها وهي
CCIE (CISCO CERTIFIED INTERNETWORK EXPERT)
وده طبعا أعلى مستوى في كل شهادات سيسكو والشهادة دي مقسومة نصين النص الأول بيسموه WRITTEN وهو بيبقى امتحان زي باقي امتحانات سيسكو العادية زي السي سي ان ايه أو الإن بي لكن بيبقى الجزء ده عليه حوالي نسبة 2% بس من مجمل الشهادة أما بقى الجزء المتبقي من الشهادة وهو 98 % بيبقى امتحان اسمه LAB وهو الإمتحان العملي ومدة الإمتحان بيبقى حوالي 10 ساعات متتالية بيقضيها الممتحن مع أجهزة سيسكو حقيقية وبيدولوا مجموعة مشاكل ويبدأ هو يحل المشاكل دي من الصفر ولمدة 10 ساعات كاملة . لكن جدير بالذكر هنا ان أولا لحد دلوقتي عدد اللي بيدخلوا الإمتحان ده اللي بينجحوا فيه نسبة لا تتجاوز ال 2 % من عدد الأشخاص اللي داخلين الإمتحان في نفس الوقت ثانيا الإمتحان ده مبيتعملش غير في 10 دول في العالم فقط منها دولة عربية واحدة وهي دبي وعلشان يقدر أي شخص يدخل الإمتحان ده لازم يجزه قبلها بحوالي شهر وثمنه حوالي 1500 دولار لكن الجدير بالذكر برضه انه أقل نسبة اتحسبت لعدد أشخاص دخلواالإمتحان وسقطوا فيه هما المصريين يعني نادرا مافيه حد مصري بيسقط فيه وأنانقلا عن كلام البشمهندس اللي اداني الكورس لأنه كان معاه CCIE WRITTEN انه كان معاه واحد صاحبه مصري داخل الإمتحان في دبي وكان هو معاه فبيقول كان في جنسيات كتير داخلة معاه واحد ايراني كان داخل الإمتحان لتالت مرة وواحد سعودي كان داخله للمرة الخامسة وواحد إماراتي كان داخله للمرة الخامسة برضه وصاحبه المصري كان أول مرة يدخل الإمتحان ومفروض في امتحانات سيسكو انك بتمتحنها أونلاين فالنتيجة بتظهر مباشرة بعد أما تخلص فبيقول ان بعد أما انتهى وقت الإمتحان الوحيد اللي نجح كان صاحبه المصري وكل الي دخلوا معاه نزلوا وكانوا طالعين مستغربين من الراجل اللي عداه من أول مرة وهما كانوا طالعين يحجزوه مرة تانية علشان يمتحنوه بعد شهر
لكن واحد ييجي يسألني هو ليه كل الكلام ده وهستفاد ايه من التعب ده كله وبعدين سعره غالي ولازم أروح دبي علشان أمتحنه وشغلانة
طيب أنا هقولكم بقى ايه اللي بيحصل لما بتاخد الشهادة دي
اللي بيحصل ان أصحاب الشركات الكبيرة في الشبكات بيبقوا مستنيين برة اللاب أيام الإمتحانات وبيستنواالناس اللي طالعة علشان يعرفوا مين اللي نجح وبيبدأوا يفاصلواعليهم وده هيديلوا كام وده هيديلوا كام وبرضه هنقلكم الكلام اللي قاله البشمهندس انه صاحبه بعد أما خلص امتحان كان في 3 أصحاب شركات كبيرة جدا في الإمارات عمالين يتشاكلوا قعد الأول يقول أنا هديله 600 دولار والتاني يقوله أنا هخليها 650 والتالت يقوله تعالى أنا هديلك 700 دولار وقعدوا يتخانقوا عليه ولما بيقولهم 700 دولار دي في الشهر قاله لا دي في الساعة عرفتوا بقى ليه السي سي آي ايه تستاهل ده كله غير كدة لما اتحسب في العالم متوسط عدد الساعات اللي بيشتغلها ال CCIE CERTIFIED لقوها مش أكتر من 10 ساعات وهوضح ليه لكن وعلى الرغم من ده بيعتبروا انه اصحاب ال CCIE CERTIFIED في الشرق الأوسط مظلومين جدا بالنسبة للمرتبات اللي بياخدوها لأن أصحاب ال CCIE CERTIFIED في أوروبا مرتباتهم في الساعة ممكن توصل ل 1500 و 2000 دولار طب وليه كل ده , ده كله علشان انه مفروض انه أي شركة عندها CCIE CERTIFIED وبتشتري أجهزة من سيسكو بيتعملها تخفيض على أجهزة سيسكو ممكن يوصل ل 80 % من تمن الجهاز وده بيتوقف على عدد ال CCIE CERTIFIED الموجودين في الشركة كل مازادوا كل ما زاد التخفيض على تمن الأجهزة من سيسكو فالشركة مش محتاجاه في حاجة أكتر من انها تحطه كدة بس علشان يعملها تخفيض على تمن الأجهزة وبتشغله عدد ساعات قليل لكن في مقابل ده المبلغ اللي بتوفره الشركة بيبقى كبير جدا وعلشان كدة بيعتبروهم مظلومين في الشرق الأوسط . ودي بس نبذة صغيرة عن ال CCIE والكلام اللي فات ممكن نطبقه على أي مستوى خبراء عندنا في الشهادات اللي هشرح باقيها بكرة إن شاء الله
معلش الكلام كتيير وهحاول لحد يوم السبت أكون خلصت الكلام ده علشان زي ماوعدتكم يوم السبت أبدأ في المادة العلمية بس دي مجرد تحابيش كدة تتسلوا فيها لحد يوم السبت إن شاء الله

السلام عليكم

إزيك يا بشمهندس لعلك بخير وتكون موفق بالإمتحانات

طبعا جزاك الله كل خير عن مبادرتك وعملك الجميل ده ويا ريت الكل زيك وإن شاء الله تكون

فى ميزان حسناتك وتكون وافية وشافية لكل الأخوة الطلبة والمهندسين.

طبعا يفضل الموضوع بأسئلتة بكل حاجة فيه بموضوع واحد علشان يرتفع اسرع بجوجل

والمتلقى طبعا هيقرأ كل الموضوع مش هيسيب حاجة وأكيد هيستفاد بإستفسارات الآخرين

لذلك يفضل يكون بموضوع واحد ويا ريت تحدد مواعيد لنزول الدروس علشان أولا

ينتظرك الأخوة المتلقين وثانيا بين كل ميعاد وميعاد الناس تسأل زى ما هيا عاوزة ويبقى

فيه نظام وكده.

إن شاء الله الدورة هيتعلق بيها إعلان فى البوابة وهتتبعت رسالة بيها لآلاف المشتركين

ويا ريت تضع الرابط بتاعها بتوقيعك وإن شاء الله تجد صدى سواء النهاردة أو بكرة أو

بعد شهر أو سنة حتى لأن الحاجة اللى زى دى بتعيش على مدى كبير ويا رب تكون

الشرح الوافى والكافى لأى مهندس محتاجها.

مرة تانية شكرا ليك وفى إنتظار دروسك ومجهودك يا بشمهندس

والله الموفق

أولا تبعا لكلام مدير المنتدى
إن شاء الله أنا بفضل مادام هبدأ يوم السبت
يبقى نخلي الدروس ثابتة يومي السبت والثلاثاء إن شاء الله
كل اسبوع
بس إن شاء الله انهاردة وبكرة هكمل باقي المقدمة علشان أخلص منها خالص
لكن إن شاء الله بالنسبة للناس اللي هتابع الموضوع لو لقيتوا في وسط الموضوع انه يومين في الأسبوع قليلين أنا ممكن أزودهم ونخليهم 3 أيام
بس الأول هنبدأ يومين في الأسبوع ونشوف ايه الظروف إن شاء الله
واستوني مني باقي المقدمة شوية كدة إن شاء الله

السلام عليكم ورحمة الله وبركاته
أولا ياجماعة أنا بعتذر جدا عن عدم التنسيق في الأول كدة
بس بجد الموضوع في الأول مش هتلاقوا ليه صور كتير وكله كلام علشان نبذة عن الشركة لكن أرجو من ربنا انه يوفقني في اني أنظم الموضوع أكتر من كدة إن شاء الله خلال الشرح لأنه هيكون محتاج تنظيم طبعا فسامحوني إذا كانت البداية غير منسقة
نرجع بقى تاني لموضوعنا
اتكلمنا عن الهرم بتاع سيسكو الأساسي المرة اللي فات وهو بالترتيب من تحت لفوق خلينا نتفق انه
ccna
ccnp
ccie
ونتجاوز عن ال ccent دلوقتي لأنه نادر جدا دلوقتي لما حد بيمتحنها
وقولنا ان دي كانت شهادات سيسكو كلها في الأول بمعنى انك مجرد ماوصلت لل ccie خلاص كدة يبقى انت معاك كل اللي تقدر تحصل عليه من شركة سيسكو لكن كانت الشهادات دي صعبة جدا في الأول لأنها كانت شاملة كل حاجة في الشبكات بكل تفاصيلها يعني مثلا كورس ccna كانت شهادة علشان تقدر تذاكرها وكانت أسهلهم بتحتاج مش أقل من 6-8 شهور علشان تقدر تضمن انك تقدر تدخل امتحان صح وتنجح فيه فتخيلوا بقى ال ccnp فضلا عن ال ccie كان شيء صعب جدا وبدأت سيسكو تحس انه الموضوع ده صعب جدا على الناس وخصوصا بعد أما ظهرت حاجات جديدة في مجال الإتصالات زي ال wireless communication وبدأت تظهر attacks جديدة من قبل الهاكرز فبقي مجال السيكيوريتي أصعب فبدأت شركة سيسكو تفكر في فصل بعض المجالات لوحدها علشان تقدر انها تسهل على الناس تحصيل الشهادات لكن في نفس الوقت مغيرتش في تركيب الهرم الأساسي بتاعها اللي فات أبقت على شكل الهرم لكن مع فصل بعض المناهج بتاعته وخلتها منهج لوحدها وسمي الهرم اللي ذكرناه اللي فات سمته ال cisco standard pyramid ودي هي السكة الطبيعية اللي بيسلكها أي دارس علشان يكون بارع في مجال الشبكات بكل نواحيه والشهادات الباقية اللي عملتها واللي فصلتها في منهج لوحدها خلتها بقى للي عاوز يتخصص
وأنا هحط من تحت صورة عامة لكل الأهرامات بتاعة سيسكو في المجالات المختلفة مقارنة بالهرم الأساسي وهشرح كل هرم على حدة تحت الصورة

الآن دورة CCNA من الألف إلى الياء حصرياً وفقط في منتدى هندسة أسوان 04022010112117v

أرجو ان الصورة تكون واضحة لأنها الصورة الوحيدة اللي قدرت ألاقيها لكل أهرامات سيسكو
بس إن شاء الله لو في حاجة غامضة فيها هتتضح في الشرح إن شاء الله
زي ماقولنا ان سيسكو فصلت بعد المناهج منها علشان تسهل أولا المذاكرة على الدارس ثانيا الحصول على الشهادة
وطبعا كان ده أحد العوامل اللي خلت الناس تتجه لدراسةشهادات سيسكو بشدة
أول مجال خلته سيسكو منفصل هو مجال ال design أو التصميم إزاي أقدر أصمم شبكة وهتلقوا الهرم بتاعه موجود بس يمكن ناقص حاجة في المستوى الأول لأن شهادة المبتدئين بتاعته اسمها الحقيقي هي ccna + ccda
وطبعا كلنا عارفين اختصار ccna لكن ccda فهي اختصار ل cisco certified design association وبعد كدة لما ننتقل لمستوى المحترفين هنلاقي اننا نتوجه ناحية شهادة اسمها CCDP وأكيد كلنا عارفين انها اختصار cisco certified design professinal أما بقى آخر مستوى وهو مستوى الخبراء فالشهادة بتاعته اسمها CCDE وأعتقد انه خلاص أنا مش محتاج أفسر اختصارها ولكن الجدير بالذكر في مجال الديزاين بشكل عام انه أغلب اللي بيتجه لدراسته هن الفتيات وأكثر الحاصلين على شهادات في مجال التصميم فتيات بالإضافة لأن أول شهادة CCDE كانت الحاصلة عليها فتاة ولحد دلوقتي لم يعرف السر في ذلك ولعله علشان الفتيات بيحبوا الروقان والدماغ العالية والحاجة اللي بتتعمل بالراحة وده رأيي الشخصي طبعا
المهم ننتقل بعد كدة للمجال الثاني اللي فصلته سيسكو وهو مجال الأمن أو ال SECURITY والشهادة بتاعته طبعا واضحة تالت شهادة على اليمين من فوق في الصورة
وعلشان أقدر أحصل عليها لازم الأول تكون حاصل على CCNA وبعد كدة تنتقل لمقدمة عن الشبكات في شهادة اسمها CCNA SECURITY ودي طبا شهادة صغيرة لعل مذاكرتها متاخدش أكتر من شهر على الأكثر بعدها تبدأ تنتقل لمستوى الخبراء في شهادة CCSP أو CISCO certified security professional ثم ننتقل إلى مستوى الخبراء واللي اسمه CCIE security وبرضه نذكر هنا انه مفيش غير شهادة ال CCDE هي الوحيدة اللي هتلاقي فيها حرف يدل على المجال في اختصارها لكن باقي الشهادات كلها في مشتوى الخبراء هنلاقي انها تتنطق CCIE وبعدها بنضيف اسم المجال علشان أبين نوعه ايه أما لو قولت CCIE كدة بدون أي حاجة بعد بعدها فيقصد بيها الشهادة اللي في الهرم الأساسي لسيسكو .
نيجي بقى للمجال الثالث والمجال ده هو مجال اسمه ال INTERNETWORKING والمجال ده لعل اسمه ميكونش واضح لناس كتير لكن أكتر ناس بيفهوا معناه همل اللي شغالين في شركات ال ISP (INTERNET SERVICE PROVISERS) زي تي إي داتا أو لينك أو إيجي نت إلى آخره من الشركات اللي بتقدم خدمات الإنترنت وعلشان أقدر أحصل على الشهادات لازم أعدي 3 مستويات أول واحد اللي هو ال CCNA بعده بعدي ال CCIP (CISCO CERTIFIED INTERNETWORK PROFESSINAL) وآخر حاجة شهادة ال CCIE واللي بتكون قريبة الشبه في دراستها من الشهادة اللي موجودة في الهرم الأساسي وتنطق CCIE زي ماهي ومبيتضافش اي حاجة عليها بعدها ونقدر نعتبرها جزء من ال CCIE بتاعة الهرم الأساسي وزي ماقولت انها بتبقى مطلوبة جدا لشركات ال ISP
كل الشهادات اللي فات دي ظهرت لما كانت الشبكة مستخدمة في نقل الداتا بس لكن أول ما بدأت الإتصالات تظهر بشكل كبير والطفرة اللي حصلت في مجال الإتصالات بدأ التفكير في استخدام الشبكة العنكبوتية في نقل الصوت مع الداتا وعلى هذا الأساس بدأت شركات تصنيع أجهزة الشبكات صناعة أجهزة خاصة الأجهزة دي مخصصة لنقل الصوت لأنه أكيد يختلف عن الداتا وكانت سيسكو رائدة هذه الشركات طبعا وبدأت تضيف لشهاداتها شهادة الصوت أو ال voice
ولكن نظرا لأنه كان لسة طالع ومفيش الطفرة بتاعة الإتصالات اللي زي دلوقتي فمكانش الإهتمام بيه زي دلوقتي لكن سيسكو من رواد مجال الفويس في الشبكات وتدرج شهادات الفويس كان كالآتي
أول حاجة كانت هي شهادة CCNA وبعدها برضه تنتقل لشهادة صغيرة اسمها CCNA VOICE علشان تنهي مجال المبتدئين وعلى فكرة معظم بتوع اتصالات مبيستفيدوش من الشهادة دي غير انهم بياخدوا منها شوية أوامر لأنالشرح نفسه بيبقى معظمةأساسيات الإتصالات اللي بيتم دراستها في الكلية وده لأن العبد لله دلوقتي بذاكر فيها فكشرح معظمه أنا واخده في الكلية أما بقى الزيادة هو الأوامر وشوية معلومات عن اجهزة الفويس . بعد كدة بقى ندخل على مستوى المحترفين CCVP (CISCO CERTIFIED VOICE PROFESSINAL) وآخر حاجة هي طبعا ال CCIE VOICE
وبعد أما ظهرت الإتصالات بشكل واسع بدأ التفكير في نقل الصوت بطريقة لاسلكية عن طريق الهواء وظرهت الإتصالات اللاسلكية وكمان بدأ التفكير في نقل الداتا لا سلكيا فبدأ موضوع الإتصالات اللاسلكية تظرهر للوجود وبدأ التفكير في تصنيع أجهزة تناسب المجال ده وطبعا سيسكو مرة تانية تمتلك زمام المبادرة فبدأت بوضع شهادات ال WIRELESS وكان أول شهادة هي CCNA بعدها الشهادة الصغيرة لإتمام مستوى البتدئين وهي CCNA WIRELESS بعدها لقت سيسكو ان الحاجات اللي ظهرت في الوايرلس أقل بكتير من انها تعملها شهادة لمستوى المحترفين وبعد كدة شهادة للخبراء فضمت الإتنين على بعض وبعد شهادة ال CCNA WIRELESS ممكن تقدر تنتقل لمستوى الخبراء مباشرة وتدرس CCIE WIRELESS
لكن مع التقدم الرهيب في مستوى الإتصالات اللاسلكية وكم العلوم اللي ظهرت بظهورها من 3 شهور بالضبط ويمكن لما كنت أنا في القاهرة بمتحن لما كنت في المركز عرفت ان سيسكو قبل إمتحاني بأسبوع نزلت شهادة جديدة اسمها CCWP(CISCO CERTIFIED WIRELESS PROFESSINAL) علشان بكدة تكون تمت كل المجالات في كل الإتجاهات

بعد كدة بقى سيسكو نزلت مجموعة شهادات سريعة كدة للي عاوز يعرف الأساسيات بسرعة
1-cisco routing & switching specialist
2-cisco security specialist
والشهادات دي طبعا لاترتقي لمستوى الشهادات اللي فوق لكنها مفيدة في تعلم الأساسيات واللي محتاج انه يشتغل بسرعة فعاوز حاجة تخدمه بسرعة والشهادتين اللي فوق دول في غيرهم حوالي 5 تاني اللي هو ال specialist career لكن بصراحة مش فاكرهم كلهم واللي عاوز يعرف ممكن يعملهم سيرش بس ده مش موضوعنا قوي الأفضل طبعا انك تمشي في التراكات اللي فوق
وهيكون أفضل من ده بكتير .
في شهادة في الرسمة الموجودة فوق ودي في مجال ال network storage ما ذكرتهاش لكنها تحتوي على نفس التراكات بتاعة الشهادة الأساسية لكن في مجال تخزين الداتا وليس إرسالها واستقبالها وطبعا واضح من اسم الشهادة.
الحاجة الأخيرة اللي عاوز أذكرها والغريبة جدا ان شركة سيسكو متبعة نظام غريب جدا في شهاداتها أولا انت مينفعش انك تدرس الشهادة من النص بمعنى انك ياتدرسها من فوق يامن تحت وده الغريب في الموضوع يعني انت مينفعش تروح لمستوى المحترفين profrssinal level بدون ماتعدي مستوى المبتدئين association level لكن ينفع انك تروح مباشرة تقدم على امتحان في مستوى الخبراء بدون ميكون معاك مستوى مبتدئين ولا محترفين ودي من الحجات اللي يمكن تستصعبوها جدا لكنها ريحت ناس كتير قوي فمثلا ممكن تلاقي واحد شغال في المجال ده ليه 10 سنين أو أكتر وخلاص تشبع بالشغل العملي ومش عاوز ياخد وقت في انه يمر بالهرم من تحت ويصرف فلوسس زيادة , فممكن جدا انه يقدم على شهادة في ال expert level مباشرة ويدخل امتحانها على طول لوهو شايف في نفسه القدرة على كدة
وملخص الكلام انك ممكن الهرم تدرسه من فوق أو من تحت لكن من النص ده مبينفعش

طيب دلوقتي بكدة احنا نكون خلصنا شرح شهادات سيسكو كلها تقريبا لكن يمكن يلاحظ جدا في كل الشهادات انك لازم علشان تدخل في أي مجال تكون حاصل على شهادة ccna وده يمكن يبينلكم مدى أهمية الشهادة دي ده مش بس كدة من خلال تجربتي العملية في الموضوع ده يمكن مفيد جدا لأي حد عاوز يمشي في مجال مايكروسوفت واللي هنوضح الفرق بينها وبين سيسكو قدام شوية اللي عاوز يمشي في مجالها من خلال أشهر شهادتها في النتوورك واللي اسمها mcse من الأفضل انه يدرس ccna الأول لأنها شهادة بتعرفك أساسيات النتوورك بشكل عام مش خاصة بسيسكو وبس لكن هتفتحلك الدنيا علشان تعرف انت عاوز تمشي في ايه ومايل ناحية ايه بالضبط وإن شاء الله ده يتضح من خلال الشرح
كدة انهاردة ممكن نقول كفاية وبكرة إن شاء الله هتكون آخر حاجة في المقدمة وهي الشركات المختلفة اللي بتنافس سيسكو وايه مجال شغل سيسكو بالضبط والفرق بينها وبين ميكروسوفت
أنا طبعا بعمل الموضوع ده ابتغاء وجه الله ومتفرقش معايا مشاركة الأعضاء أهم حاجة الناس تتعلم بس اللي اتمناه انه يبقى فيه تفاعل في الموضوع علشان أكمله بس في كل الحالات إن شاء الله هكمل الموضوع
والسلام

شكرااااااااااااااً كتيييييير جدااااااااا

بجد شرح موفق للغاية
وكمان عشان بالعامية فلذيييذ قووى

بس دلوقتى انا منتظر الجزء بتاع الفرق بين سيسكو وميكروسوفت !!

لحد ما انت تخلصه

استفسر عن حاجة :
بعد ما الشهادات كلها اتقسمت اهرامات كتيير قووى
ولغوا الهرم الأساسى
ال CCNA
اللى انت خدتها دى ضمن مين فيهم ؟؟
ولا دى وحدهااا لازم تاخدهاا
يعنى مثلاًُ في الوايرلس في CCNA wireless

بالنسبة لك انت لو عايز تدخل في هرم الوايرلس
لازم حتدخل امتحان

CCNA wireless ???
و كمان اسمع عن امتحان ال CCNP
بدون اى اضافات عليه _ فدة حيبقى تبع انى هرم ؟

وفي استفسار تانى _
شهادات الوايرلس والفويس
انت بتقول انها تخص مهندسين الإتصالات _
بمعنى لو مهندس حاسبات خد الشهادة حيبقى شغله فيما بعد صعب
في المجال دة ؟؟ _ يعنى في الشغل بره في حاجات لازم يكون لها مهندس
اتصالات !!

وياريتك تكلمنا عامة عن مجال سيسكو المفروض لمهندسين اتصالات ولا حاسبات
ولو ينفع لل 2 في شهادات معينة المفروض أحدهم مايحطش نفسه فيها ؟؟

عشان دة حيفتح معانا حوار شهادات ميكروسوفت _ و متعارف عند ناس كتييير
ان سيسكو لمهندسين اتصالات _ وميكروسوفت ام سي اس اى لمهندسين حاسبات
وانا شاكك فى الحوار دة !!! فايه رايك

وشكراااااا مرة تااااااانى _ شرح متميييييييييييييييييييييييز يا باشمهندس محمد
CCNA certified

مشكور يا بشمهندس واجرك عند الله كبير ونحن منتظرين هده الدوره بفارق الصبر

YeHi@$MmZ كتب:: استفسر عن حاجة :
بعد ما الشهادات كلها اتقسمت اهرامات كتيير قووى
ولغوا الهرم الأساسى
ال CCNA
اللى انت خدتها دى ضمن مين فيهم ؟؟
ولا دى وحدهااا لازم تاخدهاا
يعنى مثلاًُ في الوايرلس في
CCNA wireless
بالنسبة لك انت لو عايز تدخل في هرم الوايرلس
لازم حتدخل امتحان

CCNA wireless ???
و كمان اسمع عن امتحان ال CCNP
بدون اى اضافات عليه _ فدة حيبقى تبع انى هرم ؟

يمكن انت فهمت غلط شوية
الهرم الأساسي متلغاش ولا حاجة اللي أنا قولته انهم فصله منه بعض المناهج وخلوها مجالات منفصلة في أهرامات منفصلة ويمكن ده يتضح شوية موضوع فصل المناهج لو انت كنت واخد بالك من الجملة اللي قولتها أنا لما قولت ان مذاكرة شهادة زي ccna كانت محتاجة حوالي 6 شهور في مذاكرتها على الأقل وده لأن الشهادة نفسها كانت شاملة كل حاجة بمعنى الكلمة كان جواها سيكيوريتي ورواوتينج وسويتشينج ووايرلس وفويس كانت المقدمة لكل الحاجات دي موجودة في سي سي ان ايه فلك ان تتخيل ال ccnp فضلا عن ال ccie لكن لما فصلوها خلوا الهرم الأساسي مفيهوش غير راوتينج وسويتشينج بس وهي دي ال ccnp اللي من غير أي إضافات واللي هي خاصة بالراوتينج والسويتشينج
أما بقى بالمسبة لشهادة السي سي ان ايه اللي العبد لله حصل عليها فالشهادة دي مشتركة في كل الأهرامات ومنهجها واحد مبيتغيرش من هرم لهرم تقدر تقول يعني انها بتعرفك كل مجال فيه ايه ونبذة عنه وانت بعد كدة تختار الهرم اللي هتكمل فيه براحتك يعني تقدر تقول انها عاملة زي اعدادي هندسة بتاخد فيها كل حاجة

YeHi@$MmZ كتب:: وفي استفسار تانى _
شهادات الوايرلس والفويس
انت بتقول انها تخص مهندسين الإتصالات _
بمعنى لو مهندس حاسبات خد الشهادة حيبقى شغله فيما بعد صعب
في المجال دة ؟؟ _ يعنى في الشغل بره في حاجات لازم يكون لها مهندس
اتصالات !!

أما بقى عن إجابة السؤال ده فاللي عاوز أقوله فيه انه طبعا مقدرش أبدا أقول ان شهادات سيسكوهتكون صعبة على حد خالص وعادي ممكن واحد أساسا يدوب بيعرف يفك الخط يروح يذاكرها وياخدها ومش أقصد بكدة انها سهلة لا أنا أقصد على المجال نفسه انك مش شرط تبقى مهندس اتصالات علشان تاخد الوايرلس أو الفويس لأن سيسكو شركة مبتعملش شهاداتها لكليات ولا معاهد لا دي لأي حد مهتم وعاوز يمشي في المجال لأنها مثلا وفي الفويس وده لأني بذاكر فيه دلوقتي زي ماقولت بتشرح من مجال الإتصالات الجزء اللي هيخدم المنهج فمش محتاج انك تكون مهندس إتصالات علشان تاخدها لكن كل اللي قولته انها الأفضل لمهندسين الإتصالات لأنها هتبقى سهلة في فهمها لكن ده مش معناه أبدا انه أي حد غير مهندس اتصالات صعب يدرسها وشغله برة مش هيكون صعب أبدا لو اتعلمها لأنه شغل عملي ومعظمه عبارة عن أوامر بتفهمها وتحفظها

YeHi@$MmZ كتب:: وياريتك تكلمنا عامة عن مجال سيسكو المفروض لمهندسين اتصالات ولا حاسبات
ولو ينفع لل 2 في شهادات معينة المفروض أحدهم مايحطش نفسه فيها ؟؟

عشان دة حيفتح معانا حوار شهادات ميكروسوفت _ و متعارف عند ناس كتييير
ان سيسكو لمهندسين اتصالات _ وميكروسوفت ام سي اس اى لمهندسين حاسبات
وانا شاكك فى الحوار دة !!! فايه رايك

بالنسبة بقى لموضوع مهندسين إتصالات ومهندسين حاسبات زي ماقولت قبل كدة لا سيسكو ولا ميكروسوفت في دراستهم ليهم علاقة بإذا كنت مهندس إتصالات أو مهندس حاسبات ودايما يابشمهدس يحيى مينفعش تقول ده مينفعش لمهندس إتصالات وده لمهندس حاسبات وإضافة صغيرة بس لعل في بعضكم يكون عارفها مهندس إتصالات ملهوش أي لازمة بدون مهندس حاسبات ومهندس حاسبات ملهوش اي قيمة بدون مايبقى فيه مهندس إتصالات الإتنين ميستغنوش عن بعض شغل أي واحد فيهم ملهوش لازمة بدون التاني
لكن اللي أقدر أقوله في سؤالك ده انهي الأفضل لإتصالات وأنهي الأفضل لحاسبات
مش هنلاقي اي مشكلة ان واحد حاسبات يدرس سيسكو وواحد اتصالات يدرس ميكروسوفت لكن الأفضل ان بتاع حاسبات علشان شغله دايما على الكمبيوتر سواء هاردوير أو سوفت وير بس ده في الكمبيوتر فالأفضل ليه ان يدرس شهادات ميكروسوفت لأن شغلها كله software network يمكن ميوضحش المعنى ده قوي دلوقتي وهيوضح إن شاء الله لما نشرح ال 7-layers ان شغل بتوع حاسبات سواء كان هارد أو سوفت وير فهو بيشتغل في أو طبقة واللي بيسموها ال application layer أو شبكة التطبيقات وشغل ميكروسوفت كله في الطبقة دي أما بتوع اتصالات فمن الأفضل ليهم سيسكو طبعا لأن شغلها كله في الهارد وير . إزاي تظبط روتر أو سويتش أو أكسيس بوينت وهكذا وهنعرف ليه لمهندسين اتصالات ده أفضل لما نشرح السبع طبقات بتاعة النتوورك لكن مش معنى الكلام اللي أنا قولته انه مينفعش حاسبات يدرس سيسكو أو اتصالات يدرس ميكروسوفت لأن الموضوع سواء هنا أو هنا ملهوش اي علاقة باللي انت أخدته في الكلية خالص ديحاجة جديدة تماما ولو في حاجة هنا أو هنا من الكلية محتاجها هتلاقيها بتتشرح ضمن الكورس فاطمنوا من الناحية دي وانتظروا مني بالليل إن شاء الله كدة ختام المقدمة علشان بكرة إن شاء الله نبدأ في المنهج ورجو اني أكون أفدتك يايحيى بأجوبتي
والسلام

بجد شكرا أوى على المقدمة الجميلة دى و يارب يقدرنى و أتابع باقى الكورس مع حضرتك و يارب يوفقك على انك توازن بين الدراسة و الكورس اللى من بدايته شكله جميل و تقدر تتابعه ان شاء الله

كان ليا سؤالين ياجماعة لكل المتابعين الموضوع أرجو انكم تردوا عليهم في اسرع وقت
أولا أنا لما كنت بكلم يحيى كان من رأيه اني أكمل شرح بالعامية كدة وقلي كدة أحلى فعاوز آخد رأيكم في ده
ثانيا لما كنت بكلم واحد صاحبي شاف الموضوع هو طبعا علق اول حاجة على عدم نظام الموضوع واني سارد الكلام كبلوك واحد وان ممكن القاريء يمل من ده حتى لو الموضوع حلو وأنا وعدت بأني إن شاء الله هعدله بمجرد ما الشرح يبدأ لكن التعليق التاني ليه كان على ان الشرح وتحته ردود الناس واستفسارتها قلي ان في رأيه اني اشرح الموضوع تحت بعضه كدة والردود والإستفسارات تبقى تحت الموضوع كاملا
جايز أكون انا مش مرتاح للموضوع ده قوي لكن يمكن يكون للناس رأي تاني في كدة ولما فكرت لقيت ان أفضل حاجة لو الموضوع ده هيلخبط انه يتعمل جزء خاص بالموضوع وموضوع تاني للردود والإستفسارات رغم برضه اني مقتنع بأن لما كل جزء يبقى تحته التعليقات والإستفسارات بتاعته ده هيكون أفضل علشان الناس تتابع
ياريت الناس المهتمة تدخل وتقول رأيها في نظام الموضوع وعاوزينه يتعمل إزاي بس ياريت بسرعة علشان أناهبدأ شرح بكرة إن شاء الله
والسلام

هوا مفروض تشوف الأريح بالنسبة لك علشان أعتقد انك غالبا مش هتخلص الكورس ده فى أجازة نص السنة يعنى هندخل على الدراسة .أما لو مش هيتعبك الموضوع ده فا ممكن تعمل لكل نقطف فى الموضوع صفحة لوحدها و تعملها تاج فى الموضوع الرئيسى اللى هوا المثبت و يبقى كل نقتى فى الموضوع الرئييسى ليها الموضوع بتاعها و التعليقات الخاصة بيها.و شكرا

طيب بخصوص اللغة أهم حاجة الناس تفهمك يا بشمهندس وأعتقد لو بقيت وسط لا فصحى

خالص أو عامية خالص هيبقى كلام معتدل مفيش مشاكل.

وبخصوص الدروس فممكن علشان اللى قالك ده تخللى كل درس لوحدة وتحط الرابط بتاعة

هنا فى الموضوع ده رغم انى أفضل إنه يبقى الموضوع موسوعى على حتة واحدة وكمان

يعنى لما تقلب فى الصفحات مش قصة يعنى بزيادة عشر دقايق ولا النت بقى بطىء خالص

أو للدرجة دى هنتعطل ؟؟

لذلك يفضل يبقى فى موضوع واحد علشان يبقى مترابط ومتسلسل والناس تتابع واحدة واحدة

والموضوع يرتفع على مستوى محركات البحث "جوجل وخلافه" والناس كلها تشوفه

بالتوفيق يا بشمهندس

والله الموفق

أنا ماكنش قصدى خالص علشان سرعة النت بس أنا قصدى يبقى لكل نقطة الدرس بتاعها و المناقشة بتاعة الأعضاء فيها مش حتى علشان الواحد لو عايز يراجع حاجة يبقى ميبقاش مضطر ان يبحث فى كل الصفحات بتاعت الموضوعو شكرا

, بعدين باعكس علشان حتى لو حد عايز يقرأ الكورس ده و كان الكورس خلص او كان فى نصه يقدر يقرأ الكورس براحته و يقرأ التعليقات المتعلقة بالموضوع و على العموم ده رأيى و شكرا

» !~¤§¦ممكلة حلول الكتب Solution Manuals ¦§¤~!~¤ô_ô¤~ لقسم كهرباء ~¤ô_ô¤~×÷·.·°¯`·)» ( حصرياً على منتدى هندسة أسوان ) «(·°¯`·.·÷×
» مهرجان تعليم الفيجوال بيزك O?°· (مع Amir وال Programming Team ) |][حصرياً على منتدى هندسة أسوان
» دورة الأورااكل سكوال _ الأن على منتدى هندسة أسوان SQL 4 orac
» أكبر موضوع عن الشبكات :حصريا على منتدى هندسة أسوان
» ¨¨¨°~*§¦§ مهرجان تعليم الفيجوال بيزك والسي شارب §¦§*~°¨¨¨O?°· (مع Amir وال Programming Team ) ·°O][||ioi||][حصرياً على منتدى هندسة أسوان][||ioi?