عندك اكتئاب بتعانى من الروتين خش خد الروشتة

اولا:تجنب النوم لما يكون مش جايلك نوم ..يعنى ايه؟؟ يعنى انا متعود انام الساعة 2 صباحا مثلا لكن بكرة عشان هاصحى الساعة 8 لازم انام الساعة 12 من الساعة 12 بتكون على السرير هل بتنام؟؟ طبعا لا لو مش مرهق يبقى من الساعة 12 الى 2 هاتفتح الباب وممكن كمان مايتقفلش الا الساعة3 او 4

ثالثا:دايما فكر فى حياتك لما تبقى مليونير هاتعمل ايه؟؟ مثلا شركة مقاولات طيب ازاى اعمل مناقصات لازم مايفوتنيش مزاد لازم اكون كويس مع العمال والحسابات هاتمشى ازاى وهكذا او اى مجال انت بتحبه وده هايفدك كتيربس اهم حاجة اهتم بالتفاصيل وطور شركتك بتفكيرك وان شاء الله ربنا يرزقك
رابعا:اوعى تكون عايش حياتك كلها مع اشخاص مكتئبين يعنى لو ابراهيم حب وماطالش وخليل مشاريعه كلها فاشلة وتهانى اتطلقت ولايصة بالعيال ماتقعدش معاهم كتير يعنى خلى معظم حياتك مع الناس اللى حياتها زبادى فى الخلاط بدل ماتضرب انت فى الخلاط يعنى برده هاتلاقى اللى ربنا كارمه وعمل مصلحة وعدى واللى ربنا صلح حالها واتجوزت وعندها عربية خضار ماشاء الله وطبعا لو اضطريت ان تكون كل قعدتك مع المكتئبين حط فى دماغك انك ممكن تكون ظروفك احسن منهم ان شاء الله فى المستقبل وربنا يوفق الجميع.

اعلموا ان الاكتئاب مثل السرطان والعياذ بالله ولازم تسيطر عليه قبل مايسيطر هو عليك ازاى الكلام ده؟ هاقولك اذكر الله اولا واعلم ان السعى وراء الاهداف قد يحقق الاهداف من جانب اخر يعنى ممكن تفضل شغال فى البطيخ طول حياتك وفجأة تكتشف ان واحد عايز يبيع شقته وانت عندك الزبون وهوب بقيت تاجر عقارات قد الدنيا او العكس كنت سمسار او صبى سمسار وتصبح تاجر فاكهة كبير وبكرش متر و35 سنتي ...يعنى دايما افتكر قول الله عز وجل((ان الله لايضيع اجر من احسن عملا)).

فيه حاجة لازم نعرفها اولا ان دايما الشيطان يسيطر على الضعفاء بس مش هايلاعبك رست ولو غلب هايسيطر عليك لا انا قصدى ضعيف القلب والعقيدة يعنى تبص تلاقى واحد بيقولك انا هاموت نفسى خلاص مش قادر وواحد تانى بيحاول يموت نفسه وواحدة بترمى نفسها من الشباك او تنحرف او الاتجاه لطريق المخدرات واشرب يامعلم عشان تنسى ....هل تعتقد ان هؤلاء اقوياء القلوب والعقيدة؟ هل تعتقد ان الملتزمين بتعاليم الدين عندهم اكتئاب؟ هل تعتقد انك لو لجأت الى الله ودعيته انه يزيل الاكتئاب هايفضل عندك اكتئاب؟ هل تعلم ان النبى صلى الله عليه وسلم قال :أطب مطعمك تكن مستجاب الدعوى) مش معناها كل كويس دعوتك هاتستجاب لا معناها اجعل رزقك حلال تكن مستجاب الدعوى
طب مانا عارف كل ده وبرده عندى اكتئاب.. وكمان مالى حلال ومابسرقش ولا تاجر مخدرات ودعوتى مش مستجابة ممكن تفهمنى؟ اقترب من ربنا وانت هاتتحسن مش تصلى هوب هوب وتقلب وتقولى عندى اكتئاب لازم تتأنى وتخشع وتقرأ سور غير السورتين اللى لسانك بيقولهم من غير ماعقلك يقولهم ولا يتدبر مابهم من معانى
وموضوع مالك حلال ودعوتك مش مستجابة طبعا ده بيتهيألك لان الدعوة المستجابة يكون مصيرها حاجة من اتنين اما ان تتحقق او تقابل بلاء فترفعه يعنى بالبلدى كده ياتعمل الخير اللى انت طالبه ياتمنع شر كان نازل عليك وده كلام النبى صلوا عليه
يعنى من الاخر كل ما الباب يتفتح تذكر ماعليك من العبادات وافعلها وتصدق لقوله تعالى((خذ من اموالهم صدقة تطهرهم وتزكيهم بها)) ونعم بالله لكن الفلوس اللى معايا قليلة دا انا استحق صدقة ...اعلم انه مانقص مال من صدقة يعنى ماتخافش ان الفلوس تنقص وطبعا الاقربون اولى بالمعروف وربنا يهدى الجميع

ماهى اعراض الاكتئاب؟وماهى نتائجه؟ دى اسئلة عادية لكن لما اقولك ماهى فوائد الاكتئاب؟
اعراض الاكتئاب دايما تكون احباط وفقدان أمل ... وانتوا عارفين.. ونتايجه دايما العصبية والحزن والخوف من بكرة وفقدان حلاوة الاشياء يعنى لو بتاكل كنافة هاتحس انها محشية طرشى ...وبرده انتوا عارفين..لكن ايه فوايد الاكتئاب؟ اولا احب اقولكم ان الموضوع ده مش مقتبس ولا منقول يعنى كتابتى انا شخصيا ..واحب اعرفكم انى كنت من أشد المكتئبين فى العصور القديمة وكانوا طبعا بيعملوا مسابقات وكنت باشارك وكنت دايما باطلع الاول يــــــــــاه كانت ايام يارب ماتمروا بيها .. المهم انا دايما باحب الاختراعات الجديدة وخصوصا فى المشاريع يعنى فكرة جديدة او اركب مشروعين فى بعض ...لحد ماجيت فى يوم وانا مكتئب وقلت ليه ماحولش الاحباط الى طموح زى مالعربيات بتتحول من بنزين لغاز (عشان اوفر احباط) وبدأت أدرس الاكتئاب اللى عندى واحلله ومسكت مثلا اهم اسبابه عندى وقلت انا عندى اكتئاب بقالى كام سنة؟ كتير طبعا ده انا معاشره من زمان الزمان وقعدت اذكر مرات النجاح وطموحى وأهدافى اللى لسة ماحققتهاش من دلوقتى انا لازم اتغير وجبت كراسة وكتبت فيها اهدافى ونشاطاتى الحالية والمركز مالى (كام تحت الصفر)وعايز اقولكم حاجة مهمة جدا شوف ايه هواياتك والحاجات اللى بتحبها وتوسع جدا فيها ده غير هدفك وشغلك يعنى حياتك يبقى فيها شغلك او دراستك+هدفك+هوايتك اللى هاتبقى عملك فيما بعد واعرف حاجة انت لو اشتغلت فى ما تحب هاتكون افضل الناس لانك لو بتحب حاجة هاتستمتع جدا وانت بتقرأ عنها وبتبحث وكل ماتوصل لافاق ابعد كل ماسعادتك هاتزيد وثقتك بنفسك هاتزيد وكمان هايزيد تشويقك للبحث والوصول لابعد مما وصلت حتى تصل للابداع
وهنا يكون ردى على السؤال بتاع الاكتئاب قوة دافعة لانه اصبح خلفك ولا يحول بينك وبين هدفك وعشان توصل المعلومة اكتر انا هاشبهه بواحد واقف بينك وبين مكان معين(هدفك) ولما تكون فى حالة مزاجية جيدة ساعتها بتكون بتبص فى ناحية تانية ولما تكتئب طبعا بتكون بتبصله بس انا باحذرك اوعى تسلم عليه انا بقى بقولك انت ممكن تخلى الراجل ده يقف وراك لانك اقوى منه بعقيدتك اولا+هدفك+هوايتك+عملك او دراستك .. ودى انا باسميها عضلاتك اللى هاتهزم بيها الاكتئاب وهاتنتصر عليه بس نصيحة ماتبصش وراك فى اول طريقك.. لكن بعد كده بص وراك على الراجل (الاكتئاب)هاتلاقيه ضئيل جدا يعنى ببساطة مش هاتقدر تكتئب تانى لابمزاجك ولا غصب عنك
ودى كانت خواطرى مع الاكتئاب وكيفية القضاء عليه وطبعا الموضوع لم ينتهى انا منتظر ردودكم وتساؤلاتكم على العام والخاص ودعواتكم ليا