حمار الصين العظيم

حمار الصين العظيم

مصـــر ...

الكلمة دي بتفكرك بإيه؟؟ .. أنا عارف إن سؤالي غريب .. أو عشان أكون أكثر تحديداً .. ما لوش معنى .. ما كلنا عارفين مصر بتفكرنا بإيه..

بتفكرنا بالتوريث .. بالمحاكم العسكرية .. بالفساد المالي والحكومي .. بالتعذيب .. الغلابة .. الزبالة .. التزوير .. التخلف .... وحاجات كتير كلها لا تعبر إلا عن بلد ضائع وشعبه ضايع معاه ..

كل الكلام ده كلام معروف .. قديم .. بنقراه في الجرايد كل يوم .. والسؤال اللي بحاول ألاقي له إجابة :

مين في إيده الحل؟؟ .. مين يعرف يحل المشكل ؟؟ بالبلدي يعني: مين اللي لازم يخلي بلدنا بلد كويس وعشتنا عيشة محترمة؟؟ مين ها؟؟ مين؟؟ مين؟؟ الشعب ولا الحكومة ولا حسني مبارك ولا الإخوان؟؟ مييييييييييييين؟؟

أنا أقولكم مين .. بس اسمعوا معايا القصة دي .. قصة ناس كانت بلدهم ضايعة .. وعيشتهم بلوة .. لكن بقوا حاجة تانية .. الصين .. أيوة الصين!!

الصين اللي خلت أشهر جملة ممكن تقراها في مصر طبعا بعد : نعم لمبارك .. هي made in china عارفين الكلمة دي؟؟ دي كلمة مشهورة في معظم دول العالم .. كلكم حافظينها طبعا .. لأن لو حضرتك بصيت لنفسك .. حتلاقي ساعتك وموبيلك وقلمك ومسطرتك وهدومك وحتى شرابك .. كلهم مكتوب عليهم نفس الجملة : made in china .. الصين عملت كل حاجة .. فعلا كل حاجة .. واخترقت كل الأسواق .. وبأرخص الأسعار .. يعني تبقى صناعة البلد وتيجي منتجات الصين المستوردة اللي اندفع عليها جمارك ومواصلات .. وتلاقيها أرخص بكتير

وعلى رأي سواق مرة كنت بتكلم معاه في نفس الموضوع قالي: يا أفندي دي الصين خلاص حتنزل عيال مختوم على قفاهم made in china !!! .. قولتله : لا ده بكرة تنزل حمار صيني بيقول بابا وماما .. ونعم لمبارك!!

الناس دول احتلوا العالم بصناعتهم .. ناس غريبة .. ودولة عجيبة .. أوعوا تفتكروا إنهم متقدمين من زمان .. لا ده الصين كانت مضيعة زي مصر لكن أصبحت من أقوى دول العالم دلوقتي وأمريكا بتعملها ألف حساب .. عارفين ايه اللي غيرها وخلاها بقيت كده؟؟

اصبروا عليا .. ححكي لكم حدوتة عشان تعرفوا إزاي الصين بقت دولة عظيمة كده؟؟ وعشان نوصل لإجابة .. إزاي بلدنا تتغير .. وتبقى بلد متقدمة ونبقى شعب محترم .. مش متخلف يعني

حدوتة..حرب الأفيون

في القرن الثامن عشر حاول المستعمرون الإنجليز مد حضارتهم الغربية لاستعمار الصين.. ولما فشلت حملاتهم العسكرية الأولى، لجأوا إلى سلاح غريب حتى يستطيعوا التغلب على شعب الصين القوي فاستخدموا سلاحاً قذراً وهو .. الأفيون، الذي اخذوا ينشرونه لتسميم الصينيين وشل إرادة المقاومة لديهم، الأمر الذي مهد لهم سبيل الانتصار العسكري لاحقا .. وهذا ما عرف تاريخيا بـ" حرب الافيون"

وقد لاقت تجارة الأفيون رواجاً كبيراً في الصين .. ‏ وازداد حجم التبادل التجاري بين البلدين .. وبدأت بشائر نجاح الخطة البريطانية في الظهور .. إذ بدأ الشعب الصيني في إدمان الأفيون ..‏

انزعجت الصين لهذه الظاهرة‏.. وللخطر الذي يمثله تعاطي الأفيون الواسع علي صحة المواطنين‏..‏ والذي يسبب تدمير المجتمع الصيني .. فقد كان الصيني يبيع ارضه‏.. ومنزله‏‏.. وزوجته .. واولاده.. للحصول على الافيون ..
لذلك اصدر الامبراطور الصيني "يونغ تيكينج" قرارا بحظر استيراد الافيون الى الامبراطورية الصينية ..بل وذهبت الامبراطورية الى ابعد من ذلك عندما ذهب ممثل الامبراطورالي‏ مركز تجارة الافيون واجبر التجار البريطانيين والامريكيين علي تسليم مخدراتهم من الافيون وقام باحراقه..في احتفالية كبيرة شهدها المناوئون لهذا المخدر ..

عندها قررت بريطانيا وكانت في اوج قوتها في ذلك الوقت ..اعلان الحرب على الصين لفتح الابواب من جديد امام تجارة الافيون للعودة من جديد .. وانهزمت الصين أمام بريطانيا .. واضطرت إلى الموافقة على معاهدة مهينة ..

وبعد فترة قصيرة حدثت وقائع "حرب الأفيون الثانية" عندما اقتحمت جيوش بريطانيا وفرنسا .. الصين حتى وصلت إلى بكين عاصمة الصين وأحرقوا القصر الامبراطوري .. واضطرت الصين مرة أخرى إلى الموافقة على معاهدة مذلة .. تنازلت فيها الصين عن أجزاء من أراضيها

وانتشر الأفيون داخل الصين بحماية بريطانيا حتى ارتفع عدد المدمنيين في الصين من 2 مليون مدمن عام 1850 ليصل إلى 120 مليوناً سنة 1878 .. يعني في 28 سنة بس زادت نسبة المدمنين 6000%

وفي عام 1920 أصبح ربع الشعب الصيني مدمن للأفيون ..

ولم تنتهي مشكلة الأفيون في الصين إلا حينما قامت حكومة "ماوتسي تونغ " عام 1950 بعمل برنامج فعال للقضاء على تعاطي الأفيون .. ونجحت الحكومة بالقضاء عليه نهائياً

الحدوتة التانية .. محو الأمية = مية المية

الشعب الصيني كان شعب جاهل .. بجد ناس جهلة لدرجة أن نسبة الأمية بلغت بين أفراد الشعب الصيني 80% .. وتحسن هذا الرقم قليلاً عام 1990 فأصبحت نسبة الأمية في الريف الصيني 62% تقريباً .. يعني معظم الشعب جاهل!!

حتى جاء أحد المعلمين بفكرة مبتكرة وطبقها في قريته .. اشترط على كل طلاب المدارس والجامعات في القرية أن يقوم كل واحد بمحو أمية 20 شخص من قريته خلال فترة الصيف مقابل أن تعفيه الدولة من المصاريف الدراسية .. وفعلاً بعد شهور قيلة استطاع هذا المعلم ان يقضي على الأمية في القرية تماماً .. وقدم هذه الفكرة للحكومة وتغير الحال في الصين كلها

وبفضل الجهود المشتركة المبذولة من قبل الحكومة والمجتمع معاً أحرزت الصين تقدماً ملحوظاً في مجال تعليم الأطفال حتى أصبح يشكل عدد طلاب المدارس الآن 98.9%

الحدوتة التالتة .. الحلقة الأخيرة

هذا البلد الذي كان يعاني من الجهل والتخلف والإدمان تغير في غضون سنوات قليلة جداً .. وبدأت الصين الطريق والحل بأسلوبين:

1- قطعت الصين علاقاتها مع العالم الغربي ورفضت كل ما هو غربي حتى الأجهزة التعليمية التي كانت تستوردها من الولايات المتحدة امتنعت عن شرائها، مما جعلها تنتج هذه التكنولوجيا داخل الصين

2- لم تفق الصين وتتحول الى العملاق الذى نراه اللآن الا بعد ادارة الصين بعقلية هندسية مبرمجة (بكسر الميم الثانية) واقعية تخطط طبقا للواقع وليس للاحلام والتمنيات وتعمل للحصول على افضل النتائج فى حدود الامكانيات المتاحة وتوفير امكانيات إقامة ونمو مشاريع اقتصادية جديدة وتشجيعها وشهدت الصين نقلة جبارة إعتمدت على عمل شاق وجهد دؤب من الصينيين وليس احلام وتمنيات وفهلوة وقامت بمحاربة الفساد الذى كان مستشرى فى كل مجال

حل اللغز..واكسب مصر`

شايفين الاستطلاع اللي عملناه في الموقع ده .. ده بيتكلم عن شباب بلدنا عن ناس لما بتقع في مشكلة بتهرب منها .. عن شباب مختلف عن شباب كل دول العالم .. مختلف عن شباب الصين اللي حارب ضد الاحتلال والجهل وحكومات ديكتاتورية حكمته .. عشان تبقى كل حاجة في مصر ودول كتييييييير مكتوب عليها .. made in china

أنا ذكرت يا جماعة مثلين تطورت فيهم الصين جداً .. والمثلين عكس بعض .. إزاي؟؟

الأول: إدمان الأفيون اللي قام بحل المشكلة .. الحكومة

الثاني: الأمية اللي قام بحل المشكلة .. واحد من الشعب

يعني ببساطة الموضوع عايز شعب بجد .. شعب عنده استعداد يتعب ويشتغل وحكومة محترمة .. مش شباب عايز يخلع م البلد وتولع الدنيا مش مهم،ولا ناس مكبرة دماغها ولا بتفكر غير في المم (الأكل يعني) وبس .. طيب لو الحكومة مش كويسة .. زي بلدنا يعني .. نعمل إيه؟؟؟

نصبر .. أيو نصبر أمال حنعمل إيه؟؟ .. ونحاول نغير الواقع اللي احنا عايشينه .. حتى لو التغير ده حنبتديه من نفسنا .. وزي ما بيقولوا في المثل : اصبر ع الجار السو يا يرحل يا تيجي مصيبة وتاخده .. قولوا آمين

منقول

اقتباس :: قولتله : لا ده بكرة تنزل حمار صيني بيقول بابا وماما .. ونعم لمبارك!

اقتباس :: المثل : اصبر ع الجار السو يا يرحل يا تيجي مصيبة وتاخده .. قولوا آمين

آمين يا رب العالمين

وشكرا على الموضوع يا قبطان.

السلام عليكم
بجد مش عارف اشكرك ازاي علي المجهود الرائع الي انتا عمله في الموضوع بجد منور القسم يا قبطان اما بنسبة لتعليقي علي موضوعك احب افكركوا بالمقولة الشهيرة افات الشعوب ثلاث الفقر,المرض والجهل فلوبصينا للشعب الصيني هو نجح تقريبا في القضاء علي الافات ده بانه علم شعبه و بالتعليم وفرله وسيلة للعمل وجمع المال عشان يقضي علي الفقر زي برضوا مقولة لا تعطني كل يوم سمكة ولكن علمني كيف اصطاد اما بقي للحكومة بتعتنا ده موضوع تاني عايز موضوع لوحده بس شكرا جدا يا قبطان

thedragonkinght كتب:: السلام عليكم
بجد مش عارف اشكرك ازاي علي المجهود الرائع الي انتا عمله في الموضوع بجد منور القسم يا قبطان اما بنسبة لتعليقي علي موضوعك احب افكركوا بالمقولة الشهيرة افات الشعوب ثلاث الفقر,المرض والجهل فلوبصينا للشعب الصيني هو نجح تقريبا في القضاء علي الافات ده بانه علم شعبه و بالتعليم وفرله وسيلة للعمل وجمع المال عشان يقضي علي الفقر زي برضوا مقولة لا تعطني كل يوم سمكة ولكن علمني كيف اصطاد اما بقي للحكومة بتعتنا ده موضوع تاني عايز موضوع لوحده بس شكرا جدا يا قبطان

ده بس من زوقك يا باشمهندش وفعلا أغلب أغراضنا أصبحت منتجات من الصين لأنهم بيفكروا أحسن منينا بكتير والأن في ناس بتقول اللي معاه ولد يوديه الصين أو اليابان

» حمار ابن حمار !!
» حمار بن حمار
» قصة حمار
» حمار وحمير
» فلسفة حمار