##-( نسيــــم جـــــارح )-##

نسيم جارح

يا دنيا الحزن
لساكي فـ أحضاني
ولو يضحكلي يوم فيكي
بُــكاكي عِش أوطاني
بنادي عليكي وألقاني
بضيع منك
صحيح إنك
فـ وجداني
لكن قلبي سكت منك
وعقلي النابض الغلبان
بقت حالتو معانداني
وجِـتّت قلبي مَرمية
فـ شُريانك
مكفّــنها نَسيم الغَدر
ودمي السايح العايم
على رقبتك
بينـزف هَدر
لكن عارفة
فـ أحلامي
راسملك صورة شيء تاني
راسملك طرحة بترفرف
تضيّع هبو أحزاني
راسملك شَـعر وضفيرة
نسيجها حنين فـ أشجاني
وهَنسىَ كتير
أكيد لازم
أشيل من فكري ناس تانيين
ومش أسرى
ولا تايهيين
دي ناس السم في ودادها
تبـُخه لما تحضنها
وتسمع نبض أمواتها
تحس ساعتها فرق كبير
بين الصورة
وبين تصوير
بيتزيف
بيتغلف
بلون زاهي
ينسّيِ أي قلب حزين
سمات حزنه
لكن وقت الغلاف ما يضيع
تلاقي الدنيا تتغير
تلاقي الحلو بان أغبر
تلاقي الخُضره رجعت طين
مهو الحق ملوش وشين
لكن إعرف
يا تتقدم وتاخد خطوة محسوبة
يا تتندم
وتاخد طوبة ورا طوبة
فـ جرح يزيد
وما يتلم
وتفضل عمر ايامك
بتنده جوا قلب أصم
بتنده
جوا قلب أصم

وائل فتحي
2-6-2009

يا دنيا الحزن
لساكي فـ أحضاني
ولو يضحكلي يوم فيكي
بُــكاكي عِش أوطاني
بنادي عليكي وألقاني
بضيع منك
صحيح إنك
فـ وجداني
كلمات رائعه