الحلم ,,, !!

مجاريح يا صاحبى
و الحلم جوانا بيحبى
يشب لما الشمس
تطلع فى البراح
مجاريح و الحلم عايش ماراح
مجاريح دوانا فى العطش و الجوع
بدون ركوع
و لا نحس بخسيس يحكم
بأمر الخضوع
مجاريح يا صاحبى كل عشاق الوطن
نزيفهم دموع
قلبهم موجوع
روحهم متشعلقة بالحق
مجاريح و بنقول لأ
و لا شيىء بيقدر علينا
مهما البراح بيضيق
أيه العمل يا صديق
لما يتوه الطريق
غير سيرة الثوار
من مينا
وحتى عبد الناصر
حلم أمتنا بيتحاصر
ألوف من السنوات
مرت علينا
و عمر الحلم جوانا ما مات
و لا هيموت
و كل مرة يفوت
ويعدّى
مرة يطير
و مرة يهدّى
و الأكيد
انه عارف سكته
عطشان فى صحرا
و لاّ بيندّى
ساكن فى لحظة
و لاّ بيؤدى
الدنيا من غيره
موت
من دونه
سكوت
من غير ثورته
عدم
سنين بلا عنوان
غير الندم
الحلم ما تقدر تهينه قدم
الا إذا فرطنا فيه
دوسناه برجلينا
رمناه بإدينا
و جوه قلوبنا موتناه
و ف قبر روحنا شيعناه
و تحت تراب يأسنا دفناه
ما فى حاجة بعد الحلم الا الموت
ما فى حاجة بعد الحلم الا الموت

عبد المجيد راشد
الأربعاء 25/ 4 / 2007

ايه التشائم ده بس ...مجاريح ههههههههههه
بس شعاعر ممتاز
سلمت يداك يا بشمهندس
وجزاك الله عنا كل خير

و عمر الحلم جوانا ما مات
و لا هيموت
و كل مرة يفوت
ويعدّى
مرة يطير
و مرة يهدّى
و الأكيد
انه عارف سكته
عطشان فى صحرا
و لاّ بيندّى
كلمات رائعه تسلم ايدك

موضوع رائع يا بشمهندس
جزاك الله كل خير

» كلنا شوفنا الحلم العربى.......تيجى نشوف مع بعضنا الحلم الأمريكى والأوروبى
» صور نهائى الحلم
» مابين الحلم والحقيقه ؟؟؟
» أترى يفيد الحلم
» هههه تهييس الحلم العربي للدراسة