كرسى الإعتراف على الطريقة الهندسية "الجزء الثانى"

تذكير بمساهمة فاتح الموضوع :


والمره دى فيه
الههههههههههه المعتاده ةاللى كانت بتضايق
وفيه الخخخخخخخخخخ اللى بقت بتضايقك

الحبار كتب:

السلام عليكم ورحمة الله وبركاته

بعد التحية والإعتذار عن التأخير فى إختيار الضحية الجديدة

أعلن على حضراتكم نبأ عاجل وهام للدرجة القصوى

من كان متكا فليعتدل ومن كان جالسا فليقف ومن كان تائها فلينتبه

اليوم ليس كأى يوم سبق ومضى وولى

إنه اليوم الذى تمت فيه إختيار ضحية ليست كأى ضحية

شخصية ورجل من زمن عز فيه الرجال

إنسان حتى آخر قطرة وذو رأى يعتد به ورومانسى كمان

مدنى زى حالتى كده ودفعتى كمان

من الأعضاء البارزين والمهمين فى إنشاء هذا المنتدى وقيامه

له مئات المشاركات فى جميع مجالات المنتدى

صديقى الصدوق وزميل فاضل وبلديات كمان من أيااااام زماااااان

عنيد جدا ومرح جدا جدا وأستاذ فى الطبيخ جدا جدا جدا

إنه الباشموهندس

بكل ما تحمل الكلمة من معنى ومغزى ومدلول






القبطاااااااااااااااااااااااااااااااااااااان


محمد سيد باشا




يلا بقى نفصصه تفصيص

وجميع الأسئلة تقال مفيش إستثناءات

مع ترحيب صغنن بقى إنه رجع تانى معانا ينور المنتدى ويقود معنا دفته

ويلا يا عم

أولا/ أتمنى منكم قبول أعتذارى عن غيابى عنكم الفتره السابقه وأهو أخدت جزائى وعاقبونى عقاب شديد وأسى .


ثُانيا /أحب أشكر الحبار على كلماته الجميله وأتمنى له كل التوفيق والنجاح وكمان أحب أشكره على نشاطه الدائم لأن تقريا لو سألت هانى إيه هدفك فى الحياه هيقول منتدى طلبة كلية هندسة أسوان .

ويا ريت لو حد جاله نفس وسأل يبقى بالراحه شويه علشان أنا لسه راجع جديد وتقريبا هأبتدى حياتى فى المنتدى من الأول.

اقتباس :

لقد صدق الحبار فيما قال
وأؤيده تماما فيما ذكر فالأخ القبطان فعلا من اندر الشخصيات التى يمكن ان
تقابلها على مر حياتك وممن يتركون اثرا جميلا جدا جدا فى كل من يعرفونهم
أو يتعملون معهم فهو بحق رجل فى زمن عز فيه الرجال وكثر وشاع فيه أشباه
الرجال وهو من ينطبق عليه فعلا مقولة صاحب صاحبه.

ألف شكر يا باشا والله أنت اللى زى العسل وروحك حلوه.

اقتباس :

1/أسمك وقسمك؟

محمد سيد محمد محمود
الفرقه الثالثه مدنى

اقتباس :

2/ما هو سر أختيارك للقب الفبطان وما هى مدلولات هذا الأسم عليك؟

بصراحه السؤال ده صعب شويه بس يلا هأجاوب عليه واهو كله بثوابه
سر اختيارى للأسم ده يا باشا إنى فى سنه من السنين قلت اجرب وأجرب أشتغل على مركب سياحى ففى واحد ربنا يكرمه أسمه محمد عمر أو العمده يعنى قرر يسمينى القبطان بس الكلام ده من حوالى 4 سنين او اكتر.
وبس.

اقتباس :

3/لماذا أنقطعت عن المنتدى كل هذه الفتره ويا ريت تكون إجابتك من غير دبلوماسيه؟

أولا لأنى فى اول الأجازه فى البدايه كنت منشغل بزفاف أختى الوحيده وأنت عارف الأفراح ودوشتها بقى.
بعدين ام محمد تعبت وعملت عمليه جراحيه فأنا تقريبا كنت مشغول جدا جدا فى البيت فمكنش فى وقت أدخل

اقتباس :

4/ما هى علاقتك بوالدك بأخوك وكيف كانت وكيف سارت؟

الحمد لله علاقتى مع والدى إنى هو أبويا وانا من صلبه ومقدرش أقول أكتر من كده لأنى أنا فعلا لسه الغاية دلوقتى مش فاهم علاقتى بيه وصلت ولا هاتوصل لحد فين وعلشان كده أنا مش هأقدر أجاوبك ولأ أقول أكتر من كده.

أما علاقتى بأخويا أحمد ربنا يكرمه فأنا بأعتبرها علاقة صداقه قبل ما تكون علاقة أخوه وكمان هو البير الغويط اللى بأحط فيه كل أسرارى وانا مطمن ومرتاح والحمد لله ويا رب علاقتى بأخويا وحبيبى وروح قلبى أحمد على النظام ده العمر كله .

اقتباس :

5/كيف هى علاقتك مع الجنس الخشن(البنات)؟

علاقه ممكن تقول تقريبا فى حدود المصلحه اللى أنا بأكلمها عشانها أو هى بتكلمنى عشانها تقدر تقول كده زى علاقة الموظف بزميلته فى العمل بس طبعا أكيد فى ناس يمكن تكون علاقتى بيهم اكتر من كده حبتين بس قليلين جدا.

اقتباس :

6/من هم أقرب الشخصيات إلى قلبك ومن ترتاح للحكى معهم دون خوف؟

أكيد أحمد أخويا من غير ما أفكر وبعدين محمد عمر وهانى.

اقتباس :

7/معاك خمس وردات تهديهم لمين؟

خمس وردات بس دا انتا بخيل قوى عموما هأهديهم لأخويا أحمد ومحمد عمر والحبار و عصام والأخيره هحطها فى البنك علشاب بيقولوا الورد هايغلى وأهو ورده فى اليوم الأبيض تنفع فى اليوم الأسود ويا ريت كان معايا أكتر من خمسه لأنه فى ناس تانيه بس طبعا دول ليهم الأولويه.

اقتباس :

8/حبيت كام مره قبل كده يا بشمهندس؟ وهل الحب ده مازال موجود ولا انتهى؟

مش هأقولك انا حبيت بعدد شعر راسى بس أنا يوم ما قلت يحب ملقيتش غير واحده بس فى وشى أو بمعنى أصح قلبى مشفش غيرها وأكيد طبعا الحب ده هيفضل موجود مهما حصل مش بيقولوا "ما الحب إلا للحبيب الأول"

اقتباس :

9/أيه رأيك فى الحب أثناء الجامعه؟ ولو كانت إجابتك بنعم على السؤال السابق أيه اللى جذبك فى الإنسانه التى أحببتها وكيف سارتالعلاقه بينكما؟

والله أنت لو قريت كان فى موضوع نزل على المنتدى زمان أسمه الحب أثناء الدراسة بين الوهم والحقيقة كنت معارض بس مش هأكدب عليك بعد كده رأيي أتغير.


10/هل واجهتك مشاكل فى الارتباط بمن تحب؟
أكيد طبعا

اقتباس :

فاصل ونواصل
وللحديث بقيه ما دام فى العمر بقيه

أى خدعه يا باشا وربنا يديك طولة العمر .

شكرا يا بشمهندس علي الموضوع الرائع بجد في متنها الروعه
وجزاك الله كل خيررررررر
الف شكرررررررررررر

بش

اقتباس :

مهندس القبطــان ...

يا هلا .. يا هلا وحمد الله علي السلامة

المنتدي و الكرسي منورين بحضرتك

شكرا على الترحيب يا بشمهندسه والمنتدى منور باللى فيه طبعا.




ندخل بقي علي الأسئلة :

اقتباس :

1- ما هي هوايتك ؟ وهل بتمارسها حتي الآن ؟

القراءه ودى تقريبا أبتدت تختفى أما الهوايه السائده حاليا هى النت

اقتباس :

2- هل هندسة كانت من طموحاتك ولا النصيب هو اللي دخلك هندســة ؟

لا خااااااااااااااااااااااااااااااااااااااالص وحاولتت مجيبش مجموع بس معرفتش أو تقدرى تقولى كده جبت 90 تقريبا فى سنه تانيه بالصدفه وبعدين الحاج صمم أخد رياضه 2 وكان مسكلى العصايه فمعرفتش أقول لا .

اقتباس :

3- ما هو سبب اختيارك لقسم مدني بالذات ؟

لأنى بأحب أى حاجه أدرسها تكون واقعيه وملموسه وبعدين كمان مدنى هو اللى واكل الجو كله دلوقتى .

اقتباس :

4- ايه أكتر لون بتحبه ؟

ما أعرفش بس دايما العمده محمد عمر بيقولى انت بتموت فى الأسود .

اقتباس :

5- ما هي طموحاتك في الحياة وأحلامك اللي نفسك تحققها ؟

طموحاتى كبيره جدا أو مستحيله منها مثلا أنه يكون عندى شركة مقاولات كبيره وتكون عالميه وقيسى على كده حاجات كتير.

اقتباس :

6- ايه المبادئ اللي بتمشي عليها في حياتك ؟ وهل من الممكن في يوم من الأيام تغير مبادئك ؟

مبحبش ألتزم بمبدأ معين وأمشى عليه على طول لأنه فى بعض الحالات ممكن مبدئى ده يثبت خطأه أو فشله فى التعامل مع المشكله وللسبب ده أنا بأفضل أنه حاجه يكون ليها مبدئها حسب وقتها وزمانها .


7- طبعاً حضرتك غبت عننا فترة طويلة جدااااً وطبعاً المنتدي أكيد أتغير جداااً
فايه اللي عجبك في المنتدي وايه اللي ضايقك ؟ وهل كل التغيرات كويسة
ولا في تغيرات اتضايقت منها ؟

بصراحه المنظر العام أكيد جميل جدا وبيقول انه فى حاجات كتير حلوه بس أنا لسه الحمد لله مأتصفحتش كل المواضيع القديمه اللى نزلت فى غيابى ولا التطورات الجديده فى المنتدى بس هو فى موضوع خايف منه انه يولع حريقه أو فتنه فى المنتدى بس ربنا يستر.

اقتباس :

8- ما هو رأيك وبكل صرااااحة في العشرة الأوائل في المنتدي وضيف عليهم
بشمهندس محمد عمر " العمدة " وبشمهندس أحمد سيد وبرنسيس

الحبار/ طبعا غنى عن أى تعريف أو مديح وكمان واد راجل وجدع قوى قوى بس الكلام ده ميعرفهوش غير اللى اتعامل معاه واللى متعاملش معاه هيقول عكس كده خالص.
يحيى /اللى ظاهر لى أنه عصبى جدا ومبيعرفش يتحكم فى نفسه بس مقابل ده إنسان نشيط جدا وربنا يكرمه.
حسام/ واد زى العسل ونشيط قوى ومجتهد جدا جدا وكمان رومانسى وحساس قوى.
إيسادور/ دايما مستعجله مش عارف ليه وعصبيه جدا جدا .
بشمهندس أسماعيل/ ده أنا أعرفه من قبل المنتدى بزمان شخص مرحح جدا جدا وكمان شغال فى المنتدى بضمير وصدره واسه وغالبا بيتعامل مع الامور بحكمه.
بشموهندسه رانيا/ طبعا لو قلت الدنيا كلها مش هأديها حقها فأنا أفضل السكوت أحسن.
جودزيلا/ لغاية دلوقتى مش قادر أحدد شخصيته أيه بالضبط .
بنت مصر/ اللى شفته من مواضيعها وردودها فى المنتدى أنها إنسانه متفتحه ومتحضره ومحترمه جدا جدا .
سيف الأسلام / طبعا ده عشره كبيره وشخصيه كبيره وواعره قوى قوى وكمان صوته فى الاناشيد الدينيه والقرأن جميل جدا.
القبطان/ مأعرفش حاجه عنه من مده طويله وأدينى بأدور عليه.
العمده/ طبعا ده ما أنساش أنه أخويا الكبير وكمان عشرة خمس سنين فى سكن واحد وصاحب صاحبه وتلقاه وقت الشده وربنا يوفقه.
أحمد سيد/أتكلمت عنه قبل كده وربنا يوفقه.
برينسس/مش عارف أقول ايه لأنه مأتعاملتش معاها بس نشاطها فى المنتدى واضح جدا.

اقتباس :

9- ما هي أولوياتك في الحياة ؟؟ وهل ممكن تتغير مع الزمن ؟

لأ أنا الدنيا عندى ظيطه خاااااااااااااااااااااااالص ومليش أى أولويات بس دايما بأقول اللى يجيبه ربنا كويس.

اقتباس :

10- ايه أكتر حاجة بتخاف منها ؟ ولو حصلت حتعمل ايه ؟

معلش السؤال ده لو عايزانى أقول الحقيقه هاقولك مش هأقدر أجاوب عليه.

اقتباس :

11- ايه رأيك في كلاً من وبصرااااحة

- الكلية
قدر ومكتوب

- الاتحــاد
محتاج شخص سياسى وبيعرف ياخد الحاجه من فم الأسد بس بذكاءه مش بالدراع ولا المخ التخين.

- الأســر
أسماء بالكدب

- دكاترة الكلية
محدش بيفهملهم نظام وربنا يهديهم علينا.

- طلبة الكلية
مش هأقدر أعرفهم كلهم بس عموما أحنا أحسن من غيرنا بكتيييييييييييييييييييير

- مواد قسم مدني
لو خلوها مطالعه من خير إمتحانات يبقى بارك الله فيهم.

اقتباس :

12 – أيه أكتر مادة بتحبها ؟ وايه أكتر مادة بتكرهها ؟؟

أكتر ماده بحبها الخرسانه واللى حببنى فيها الدكتور /هانى السيد
وأكتر ماده كنت بأكرهها هى ميكانيا التربه

اقتباس :

13 – ما هي أجمل سنة وأوحش سنة في حياتك ؟؟

أجمل سنه النصف الاخير للسنه قبل اللى فاتت
وأوحش سنه كانت لما كنت فى اولى مدنى

اقتباس :

14 – اسم بنت يعجبك واسم ولد يعجبك ؟

اسم بنت /فؤاده
اسم ولد /عتريس

اقتباس :

15 – ما هي أجمل ذكري في حياتك عمرك ما حتنساها ؟؟

لما كنت فى الحج

اقتباس :

16 - نفسك تعيش في أي محافظة من محافظات مصر ؟؟ واسرد لنا كل المحافظات
اللي زرتها علي مدار حياتك ؟؟

لو عشت فى مصر يبقى اكيد محافظة قنا
بس المحافظات اللى زرتها مش كتير /أسوان وفنا أكيد وسوهاج وأسيوط والقاهره والأسكندريه .

اقتباس :

17 – هل نفسك تشتغل برة مصر ولا في مصر؟ ولو برة مصر يبقي فين ؟؟؟
ولو في مصر برضـه فين ؟؟

هأكدب لو قات نفسى أشتغل فى مصر ولو الحظ حالفنى واشتغلت بره مصر فأتمنى انها تكون السعوديه ولو فى مصر يبقى نفسى أشتغل فى قنا.

اقتباس :

18 - ايه العيوب اللي شايفها في نفسك ونفسك تغيرها ؟؟ وايه الصفة اللي مش فيك
وتتمني انها تكون فيك ؟؟ وايه اكثر صفة بتتميز بيها ؟؟

العيوب/اللى موجودين حاليا تقريبا التدخين والقعده على القهوه.
الصفه اللى مش في/ حب الكليه
أكتر صفه بأتميز بيها/العناد فى بعض الأحيان

اقتباس :

19 - اذكر لنا موقف طريف وموقف محرج حصلوا معاك ؟؟

موقف طريف/مره فى سنه تانيه مدنى كان فى ماده عندنا أسمها ......... وكان الماده دى ليها معيدين فكان عندنا شيتين أول السنه ورحت خلصتهم بس متأخر شويه وكنت كل شويه أقول لواحد فيهم يصححلى الشيتين دول كان كل شويه يقولى بعدين وكنت انا الوحيد تقريبا فى السكشن اللى مصححتش الشيتين دول وقاعدوا معايا لغايه أخر السنه وأنا أصلا بعد كده طنشتهم بس جيت أخر السنه وحسيت الدنيا خربت معايا قلت أدول على الشيتين بتوع أول السنه دول والبشمهندس راسه وألف سيف ميصححهمش تانى وأتخانقت معاه ولما فقدت الأمل طلبت منه أنه يشوفلى غايب كام سكشن فهو بيبص فلقى درجة الشيتين اللى بتخانق عليهم معاه مرصودين كان منظرى وقتها جميل قوى بس لغاية دلوقتى والحمد لله معرفش مين ودا الاسكتش من ورايا وصححه

موقف محرج/بصراحه مش فاكر دلوقتى

اقتباس :

20 – لو معاك 200 وردة وقلب واحد بس حتديهم لمين ؟؟ بالأسم لو سمحت

هأديهم كلهم لأم محمد (أمى)

اقتباس :

21 – ايه سبب اختيارك لقسم البيت بيتك للإشراف عليه ؟؟

بصراحه أنا محدش خيرنى أمسك أيه ولأ أيه مكنش فى الدلع ده اللى موجود دلوقتى بس لما المدير قسم الغنايم أدى البيت بيتك لأحمد أخويا وبعدين أنا ورثته منه.

اقتباس :

وبس كفاية عليك كدة انهاردة
وأكيد لنا عودة ان شاء الله

ما لسه بدرى يا بشموهندسه
عموما متشكرييييييييييييييين جدا .

السلام عليكم ورحمة الله وبركاته

اهلاً وسهلاً بقبطان منتدانا وعود احمد ان شاء الله



1_ من خلال اجاباتك السابقه ذكرت انك دخلت هندسه مرغم

فهل انت من الاشخاص الذين من الممكن ان يغيروا قراراً مصيرياً في حياتهم تحت الضغط او الالحاح ؟؟



2_ ذكرت ايضاً في سابق اجاباتك انه يوجد موضوع بالمنتدي تخشي ان ينتج عنه فتنه

فما هو هذا الموضوع ؟؟

وان كنت تري انه من الممكن ان ينتج عنه فتنه فكيف تري السبيل للحيلولة دون ذلك ؟؟



3_ لقد وصفك العديد بانك صديق حقيقي

فما هي صفات الصديق الحقيقي في نظرك ؟؟

وكيف تنتقي اصدقائك وعلي أي اساس ؟؟



4_ واضح ايضاً من كلامك انك مويد لموضوع العلاقات العاطفيه بين الطلبه

فماذا سيكون تصرفك اذا كانت لك اخت في الجامعه وجائتك يوما لتقول لك انها مرتبطه بواحد زميلها ؟؟؟

وياريت تجاوب بمنتهي الامانه



5_ يقولون ان الابن سر ابيه

فما هي الصفات التي اكتسبتها من والدك ؟؟

وماهي الصفات التي كنت تتمني ان تكتسبها منه وليست عندك ؟؟

وماهي الصفات التي اكتسبتها وتمنيت لو لم تكتسبها ؟؟



كفايه كده احسن بعدين تكرهني

اتمني ان تكون اسئلتي في نطاق المسموح

اقتباس :

إزيك يا محمد بيه باشا أميرلاى عقيد طيار أفندى

الحمد لله يا كبير.


السعالات المطروحة على سيادتكم :

اقتباس :

1/ شخبارك وشحوالك وشو بسوى وشو الدنيا وشوالحركة وشو بتعمل وايش لونك وايش

كل حاجة فى الحياة ؟؟؟

تمام بس الجو هنا حر جدا ومش مساعد الواحد يعمل أى حاجه والدنيا هنا مكركبه خالص والدنيا زحمه على الأخر .

اقتباس :

2/ هل إذا أردت ستفعل أم لن تستطيع ؟؟

أنا أريد وانت تريد والله يفعل ما يريد.

اقتباس :

3/ كيف تبدو لك الحياة من النافذة ؟؟ ومن البلكونة ؟؟ ومن السرير ؟؟

هى دلوقتى مقفوله علشان لسه الشمس ماغبيتش لما نفتحها إن شاء الله أبقى أجاوبك وكمان لما ألاقى سرير فاضى أبقى أقولك.

اقتباس :

4/ الألم والعرق والمشيان حافى والشيشة ماذا يمثلون لك فى الحياة ؟؟

الألم/دى حاجه الواحد اتعود عليها
العرق/ريحته وحشه.
المشيان حافى/ داك مشش فى ركبك لسه موصلناش للدرجه دى.
الشيشه/ فى مثلمقوله بتقول "السجاير للمستعجلين والشيشه للمعلمين والمضغه للمعفنين"

اقتباس :

5/ هل أجرحت قبل كده جرح معنوى فى مصارين قلبك من جوه ولا لأ ؟؟

لما أبقى أعمل أشعه على قلبى واجاوب عليك.

اقتباس :

6/ ما هى مواصفات البت اللى هتتجوزها ؟؟ وهل سهل أنك تجد مواصفاتها فى هذا الوقت ؟؟

أنا مليش أى مواصفات لما أتجوزها هأبقى أبرمجها من جديد.

اقتباس :

7/ ولنفرض إنك حبيت بنت لدرجة الجنون والهبل وفجأه إكتشتفت إن إنفلونزا الخنازير جاتلها

وإنتشر المرض فى جسمها وخلاص هتغور وتريحنا هتعمل إيه ؟؟ وإيه هيكون موقفك من التجنيد

بصدد هذا الموقف الملخبط؟؟

أبق أدور على واحده على الأقل معاها ضمان 20 سنه بس.

اقتباس :

8/ إفرضنا وأنت ماشى فى الشارع جه واحد أهبل جرى وفط ونط وقفز عليك وشوحك بقلم

وقع سنانك هل هتسامحه بطيبة قلبك المعهودة ؟؟

جرى وفط ونط وقفز ده اكيد مش بنى ادم وبعدين الموضوع مش مستاهل لأنى مش طويل للدرجه دى ولو حصل هاطلبله مستشفى المهابيل لانه اكيد مجنون رسمى.

اقتباس :

9/ لو أنت بياع خضار هتتخصص فى إنهى فئة من المجال الصعب ده ؟؟

يبقى كرم من ربنا لو حتى حصلت بياع فجل وجرجير.

اقتباس :

10/ أول ما تغمض عنيك بتشوف إيه ؟؟ وإيه آخر حلم حلمته ؟؟ وإيه الحلم اللى نفسك

يتحقق ؟؟ وإيه الحلم اللى إتحقق خلاص ؟؟ وإيه الحلم اللى نصه أتحقق والنص التانى لأ؟؟

أول مبغمض عينى مش بأشوف حاجه علشان الدنيا بتبقى ضلمه كحل
أخر حلم مفيش لأنه تقريبا بطلت أحلم لو كوابيس معلش .

اقتباس :

طبعا ده تحت الحساب والقراءة والعلوم

ومازال وما فتأ وما يزال لنا عودة بإذن الله لو كان بالعمر بقية

والله الموفق

بس لازم يكون نفسك طويل يا حبى.

اقتباس :

السلام عليكم ورحمة الله وبركاته

اهلاً وسهلاً بقبطان منتدانا وعود احمد ان شاء الله

اقتباس :

1_ من خلال اجاباتك السابقه ذكرت انك دخلت هندسه مرغم

فهل انت من الاشخاص الذين من الممكن ان يغيروا قراراً مصيرياً في حياتهم تحت الضغط او الالحاح ؟؟

لأ طبعا بس متنسيش أنه ده والدى قبل اى حاجه .

اقتباس :

2_ ذكرت ايضاً في سابق اجاباتك انه يوجد موضوع بالمنتدي تخشي ان ينتج عنه فتنه

فما هو هذا الموضوع ؟؟

وان كنت تري انه من الممكن ان ينتج عنه فتنه فكيف تري السبيل للحيلولة دون ذلك ؟؟

هو فى فعلا موضوع لو اتطور زى المواضيه اللى قبله ممكن يعمل مشاكل على المنتدى وهو موضوع بخصوص أتحاد الطلاب رسالة الى كل من ينوى تمثيل الاتحاد هذا العام
فالرجاء أنه يكون الكلام فى إطار الموضوع فقط .

اقتباس :

3_ لقد وصفك العديد بانك صديق حقيقي

فما هي صفات الصديق الحقيقي في نظرك ؟؟

وكيف تنتقي اصدقائك وعلي أي اساس ؟؟

الصديق الحقيقى هو اللى بيقولوا عليه صاحب صاحبه وتلقاه معاك فى اى حاجه من قدام وكمان يكون كتوم وحافظ للأسرار وبحب جدا انه يكون بيحب الأختلاط بالغير لأنى أنا كده بحب أخطلت بالناس ومش بأحب الأصدقاء النكديين اللى شايلين الدنيا فوق راسهم زياده عن اللزوم وكمان اكره البخيل واللى مش بيقدر الظروف .
وده الأساس اللى بأنتقى عليه أصدقائى وأكتر الأماكن اللى بأحب أتعرف فيها على الناس القهوه والشارع اما الكليه فدى اخر مكان مممكن انقى من أى اصدقاء وده بيكون بحكم الدراسه مش أكتر من كده وأعتقد أنها مهما كانت علاقتى بحد فى الكليه فأغلبها مممكن ينتهى بمجرد ما اخلص ده لو كان لي عمر وخلصت وطبعا مأنساش أصدقائى اللى بأحبهم بحكم صلة الرحم اللى بينا برضه.

اقتباس :

4_ واضح ايضاً من كلامك انك مويد لموضوع العلاقات العاطفيه بين الطلبه

فماذا سيكون تصرفك اذا كانت لك اخت في الجامعه وجائتك يوما لتقول لك انها مرتبطه بواحد زميلها ؟؟؟

وياريت تجاوب بمنتهي الامانه

الحمد لله انا معايا اخت واحده فقط وخلصت وأتجوزت بس ده لو كان حصل فعلا يبقى كويس انها جات وصارحتنى فى الموضوع زى ما حضرتك بتقولى وبكده اكيد هتكون كسبت نقطه فى صالحها وهاحاول أسأل عن الشخص ده بمعرفتى وأشوف جديته ولو كان شخص كويس هخليها تعرفنى عليه وهحاول أوقف معاهم للنهايه بس فى حدود الأخلاق والمعقول .

اقتباس :

5_ يقولون ان الابن سر ابيه

فما هي الصفات التي اكتسبتها من والدك ؟؟

وماهي الصفات التي كنت تتمني ان تكتسبها منه وليست عندك ؟؟

وماهي الصفات التي اكتسبتها وتمنيت لو لم تكتسبها ؟؟

الصفات اللى أحتسبتها من الحاج حرصه دائما على صلة رحمه وهى دى اكتر حاجه بأحبها فيه .
واللى هو عنده وكنت اتمنى انه يكون عندى أنه بيكره التدخين ومش بيحب المكان اللى فيه مدخنين ومش بيحب القهاوى وبيحاول على قد ما يقدر انه يتلاشاها.
وبصراحه مفيش صفات أكتسبتها منه وندمت عليها لأنى دايما لأنى بأخد من أى حد الصفه الكويسه اما الصفات الوحشه اللى فى كلها أكتسبتها بنفسى وبمحض إرادتى محدش ليه اى ذنب فيها.

اقتباس :

كفايه كده احسن بعدين تكرهني

اتمني ان تكون اسئلتي في نطاق المسموح

لأ عادى ولا يهمك .

اقتباس :

السلام عليكم

اقتباس :

اخي القبطان هسئلك شوية اسئله ارجو تكون خفيفه وماتدايققش

لا مضايقه ولا حاجه يا بشمهندس.


1

اقتباس :

-ايه اكتر موقف محرج اتعرضت ليه؟

مكرررررررررررر.
2

اقتباس :

-مين اكتر واحد في المنتدى بيعجبك؟

بدون مجامله بجد أكتر واحد بيعجبنى هو الحبار.

اقتباس :

3-مين اكتر واحد بتدايق منه في المنتدى؟

أكتر واحد بضايق منه هو القبطان.

اقتباس :

4-مين اكتر شيخ بتحبه؟

الشيخ محمد متولى الشعراوى رحمه الله.

اقتباس :

5-مين اكتر شيخ متحبش تسمحله؟

عمرو خالد.

اقتباس :

6-مين اكتر قارى تحبه؟

القرئ الشيخ عبد الباسط عبد الصمد

اقتباس :

7-مين اكتر قارى متحبش تسمعله؟

تقريبا مفيش.

اقتباس :

8-مين المسئول اللي بيعجبك؟

السيد اللواء عادل لبيب محافظ الأسكندريه حاليا والحبار بصفته مسؤل عن المنتدى.

اقتباس :

9-مين المسئول اللي انت تظن انه ميستحقش المكان اللي هو فيه؟

أعضاء مجلس الشعب فى دشنا.

الكود:

10-ايه رايك في الاغاني وهل بتسمعها ولا لا؟

بصراحه من الناحيه الدينيه مش هأقدر أفتى بس أنا عن نفسى بأحب أسمع الأغانى صوت فقط وليست كليبات .

اقتباس :

كفايه كده النهارده وارجو مكنش دايقتك ولينا لقاء تاني ان شاء الله
سلام عليكم

ولا يهمك يا باشا ده حضرتك شرفتنا خالص وانا منتظر حضرتك.



مع الأعتذار للحبار على تأجيل إجاباتى على أسئلته.

اقتباس :

أسئلتى:

يا مسهل يا حبار.

اقتباس :

1/ بعد عشر سنوآت ماذا تتخيل نفسك؟

حاسس نفسى مش هاكون موجود اصلا بعد عشر سنوات عموما لو كان لينا عمر هأتخيل نفسى راكب طياره ومغادر البلاد.

اقتباس :

2/ سؤال دائما بيكون فى عقلك ومش بتلاقى رد عليه ؟

مين اللى جه الاول البيضه ولا الكتكوت.

اقتباس :

3 / مــاذا يعني لك كلاً من الوطن _ الصمت _ الدموع _ الصداقه _ الحب ؟

الوطن/"أنا وطنى وطنى يا وطنطن........."
الصمت/إذا كان الكلام من فضه فالسكوت من دهب
الدموع/ أحيانا كتير بتكون راحه.
الصداقه/مأعتقدش فى حد يقدر يستغى عن الصديق ولو صديق واحد.
الحب/ شئ ندر وجوده.

اقتباس :

4/ النسيان نعمه ..مالذي تتمني نسيانه ..؟؟

عايز أنسى اننا هنا فى السادس وأنه المفروض انى اروح الكليه كل يوم؟

اقتباس :

5/ ما هى احسن 5 القاب تحبينها ليك ؟

أنا مليش اى القاب غير تقريبا (أب سيدالكبير/ والقبطان )

اقتباس :

6/ أي الأماكن التى تفضل قضاء الوقت فيها عادة ومع مين ؟

أكيد على القهوه بلاشك واجمل لحظه لما بكون مع احمد اخويا على القهوه وقاعدين ندردش مع بعض.

اقتباس :

7/ لو خيروك بين الأماكن اللى تحت دى هتختار إيه ؟؟ وليه؟؟

- عشاء في مطعم فخم

- أو رحلة بحرية

- أو الذهاب إلى الأماكن الترفيهية واللعب فيها

- أخرى .......... ( حدد ) ؟

ولا واحده من دول لو فيهم قهوه كنت اخترتها.

اقتباس :

8/ ما هى الشخصيات التى تعجبك فى الحياه مع توضيح لماذا ؟

الشخصيات اللى بتكون متفاهمه وبتراعى الظروف وكمان تخاف ربنا وتتقى فيه خلقه كمثال ملوس تقريبا للجيع د/هانى السيد

اقتباس :

9/ ايه قرانية موجودة دائما امام عينك ؟

بسم الله الرحمن الرحيم

(( قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ لَا تَقْنَطُوا مِن رَّحْمَةِ اللَّهِ

إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ ))

صدق الله العظيم

اقتباس :

10 / ارسل رسالة من اربع اسطر لاي عضو ماهي ولمن ؟

اقتباس :

11/ ( لو مثلا جائتك بنوتة وقالتلك انا معجب بيك ما رد فعلك ) ؟

هأقولها كلمى بابا .

اقتباس :

12/معاك زلطة لمين تهديها ؟؟

هأديهالك يا حبار وكمان هأسميك أبو زلطه.

اقتباس :

13 / معاك 5 وردات لمن تهديها ؟

مكرر يا لوحى.

اقتباس :

14/معاك 150 ورده لمين تهديها "بالنفر يا ريت"؟؟

لو الوقت يسمح كنت جاوبتك.

اقتباس :

15 / معاك 3 قلوب لمن تهديهم ؟

قلب لأمى
وقلب لأحمد أخويا
وقلب للى بالى بالك

اقتباس :

16 /شخصية مش طايقاها واتصل عليك و لم ترد ثم اتصل عليك بعده مباشرة برقم آخر

وأجبت ما موقفك ؟

يبقى خير وبركه المركب اللى تودى.

اقتباس :

17 /دعوت صديق عزيز لك في افخم مطعم في مصر و عند الحساب تفاجئين بأن رصيدك ( صفر ) و صديقك يننظر اليك .. ماذا تفعل ؟

بسيطه هأتصل باى حد وأخليه يحضر فورا ومعاه مونى واتصرف عادى يعنى ومش شرط الموقف
يحصل فى مطعم فخم ممكن يحصل فى اى مكان بسيط عادى جدا ويمكن يكون حصل معايا فعلا.

اقتباس :

18/ ماهو رد فعلك عندما تتعرض للإحراج؟

ولا حاجه أصله حاجه حصلت وخلاص بس مش هأبين انى محرج هأعمل فيها عبده العبيط.

اقتباس :

19/ متى تشعر بانك قريب من نفسك؟

أكيد لما ابص فى المرايه او اشوف صورتى.

اقتباس :

20/ ما الموهبة التي كنت ترغب في امتلاكها ؟

موهبه الخط.

اقتباس :

21/ ما هو أكثر أمر مخيف حصل معك؟

مره كنت ماشى لوحدى هنا فى اسوان وكانت الساعه اتنين صباحا كنت رايح القهوه وكنت ساكن فى حته اسمها الحجعلاب هنا فى ابو الريش وكنت ماشى موازى للسكه الحديد وفجأه لقيت واحد لابس جلبيه بيضه ماشى جاى على وبيقرى قرأن فعديت الموقف عادى يعنى وبعد ما اتقدمت بكام خطوه لقيته بيسجد وبعدين ببص عليه لقيته اختفى خالص بصراحه وقتها خفت شويه بس برضه كملت ورحت القهوه.

اقتباس :

22/ ما هي اجمل سنة في حياتك ؟وأوحش سنة برضو؟؟

مكررررررررررر.

اقتباس :

23/ هل أنت راضي بوضعك الحالي؟

مش قوى يعنى بس الحمد لله على كل حال.

اقتباس :

24/ احلى صدفه في حياتك؟-اغلى هديه جاتلك؟

هأبقى اقولك عليها بس فى ودنك يا شقى.

اقتباس :

25/ حلم صعب يتحقق؟- حلم تسعى لتحقيقه؟

سؤال صعب شويه هأبقى افكر فيه واقولك بينى وبينك؟

اقتباس :

26/اسم بنت يعجبك؟- اسم ولد يعجبك؟

أظاهر انه فؤاده وعتريس مش عاجبينك طيب خليك فى دول برضو.
أسم بنت/ بسنت
أسم ولد/دياسطى

اقتباس :

27/ مكان تتجمع فية انت واصحابك ؟

القهوه.

اقتباس :

28/ كم عدد اصدقائك ؟

قبل السؤال ولا بعد السؤال.

اقتباس :

29/ ماذا تخطط للعام القادم بإذن الله كدراسة وغيره ؟؟

أنى التزم وأبطل لعب شويه بس مش كتير

اقتباس :

والله الموفق

أى خدمه يا حبورتى

هههههههههه

سحس حتتقطع يا بابا أستعد

خد عندك دول


1-أسمك بالكامل وسنك وعنوانك ؟؟
2-بما أنك شريف فيك أيه من مميزات الشرفه؟؟
3-بتلعب بمين ف البلاى ستيشن والتشكيل أيه؟؟
لو جتلك قنا وغلبتك ف التحدى ليا عندك أتنين كنز

دوووول تحت الحساب

السلام عليكم

اولا :اهلا بحضرتك في الكرسي
ندخل بقي ع الاسئله
1-حضرتك بتقول انك مش ف كليه ومخلص دبلوم تجاره طيب ليه مش كملت كليه بعدها؟؟
2-جيت اسوان قبل كدا ؟؟وايه رايك فيها لو جيت؟؟وايه رايك ف كليتنا ؟؟-لوشوفتها يعني-
3-حاجه كانت نفسك تعملها بس لسه مش حققتها؟؟
4-حاجه كانت نفسك فيها بس الحمد لله حققتها؟؟
5-شخصيه ماثره فيك جدا؟؟
6-مكان نفسك اووووي تزوره؟؟

كفايه بقي لحد كدا
وياريت مش اكون تقلت عليك

ياجماعة انا مش شعارفة مين فى كرسى الاعتراف الاستاذ حسين طيب ممكن اشارك معاكم
اكيد طبعا ممكن هههههههههههههه
اسال بقة

لو جيت فى يوم وحد سالك سؤال محرج جدا قدام ناس كتير حتعمل اية او السؤال قولنا موقفك لما تبقا فى موقف محرج ؟؟؟؟؟؟؟؟؟؟؟؟؟؟
واية هو اكتر موقف محرج حصلك ؟؟؟؟؟؟؟؟؟؟؟؟؟؟
ياترى حصل يوم وبكيت قبل كدة ؟وياترى اية هى الحاجة الى بكيت عليها ؟؟؟؟؟؟؟؟؟؟؟؟
بتحب مين اكتر ماما ولا بابا ولا اخوك ولا اختك ولا مراتك؟رتب
اية اصعب قرار فى حياتك ؟؟؟؟؟؟؟؟؟
كفاي كدة النهاردة