بيستعبط ؟!!!

.
.

وكانْ
يا مَا كَان
يا أحبابي
راحَ احْكِيلْكُم حُكَى مْلَخْبَطْ

عَلَى عَاشِقْ
وَدِيعْ
حَبُّوبْ
وِسَرْسُوب رِقَّة بِينَقَّطْ

وِشَايِلْ قَلْبُهْ عَلَى كَفُّه وِدَايِرْ بِيْه
وِمِتْشَحْطَطَ

شِوَيَّة يقُولْ كَلَامْ مَوْزُونْ
شِوَيَّة بْيِهْذِي
وِيْعَبَّطْ

وِيِتْشَقْلِبْ
يِهِزّْ كْتَافُه زَيِّ الطِّفْلْ
يِتْنَطَّطْ

مَلِيْش دَعْوَة
عَايِزْ مَحْبُوبْ
مَلِيشْ دَعْوة
وِبِيْعَيَّطْ

يَا حَولِ الله عَلَى عَاشِقْ وَحِيدْ مُحبَطْ

مِقَضِّي العُمْر يِسْتَنَّى
عَلَى بَابُه الهوَى يْخَبَّطْ

يِمِيْل
وِيْحِبّ عَلَى رُوحُه في بَحر العِشْق
وِيْغَوَّطْ

وِيِتْغَنَّى
وِيِتْمَنَّى
وِيِرْكَبْ مُوْجُهْ وِيْزَقْطَطْ

بِيِحْلَمْ حِلْمْ
وِيْلَوِّنْ
إِشِي سَادَة
وِإشي مْخَطَّطْ

عَامِلْ لِي بُرَمْ
عَامِلْ لي فَصِيحْ
وِبِيْتَكْتِكْ
وِبِيْخَطَّطْ

وِهُوَّ عَبِيطْ
غَشِيْمْ
مَسْكِينْ
وِبِيْقَاوِحْ
وِيِتْسَلْبَطْ

في آَخِرْ كُلّْ حِلْم يسِيحْ
عَلَى الآخِرْ
وِيِتْمَرْمَطْ

وِمِنْ وَهْمُهْ يِفُوقْ مَجْرُوحْ
وِمِتْرَوَّقْ
وِمِتْشَقْلَطْ

وِيِلْقَى جَنَابُهْ مِتْبَعْتَرْ في كُلّْ مَكَانْ
يِوَطِّي يْلِمْ
وِيْلَقَّطْ

بَقِيْةْ نَفْسُه
يِجَمَّعْهَا حِتَتْ مَكْسُورَةْ
هَاتْ لَزَّقْ
وِهَاتْ رَبَّطْ

وَقَال جَايْ لي بْكَرَاكِيْبُهْ وِشَادِدْ عِزْمُهْ وِمْقَرَّطْ

وَجَايِّ يقُول لي
هَانْسَى الجَرْحْ
في دِيل الحِلْم هَاتْشَعْبَطْ

دَه لِسَّه في أَمَلْ مَوْجُودْ
فَفُكّْ شْوَيَّةْ وِاتْبَسَّطْ

بِيِسْتَعْبَطْ ؟؟!!!

مِفَكَّرْ إِنُّهْ مِنْ تَاني هَيِرْجَعْ عَال وِمِتْزَبَّطْ

دَهْ عَنْدْ اُمُّهْ

دَه لماَّ تِرْجَع العِنَبَةْ في عَنْقُودْهَا إِذَا اتْفَرَّطْ

دَه عُمْر الحُب
مَا يْرَجَّعْ كَرَامَةْ تْهُونْ عَلَى صَاحِبْهَا
وِيْفَرَّطْ

.

الله عليك يا جوست
ايه الكلام الجامد ده
بجد موضوع هايل

والله اكتر من هايل

تشكر يا باش مهندس