قصيدة مش باقي مني

قصيدة رائعة للشاعر الذي ابهرني بكلماته
الشاعر الروعة جمال بخيت

مش باقي مني غير شوية ضيّ في عينيَّ
أنا هادّيهُملك.. و امشي بصبري في الملكوت
يمكن في نورهم تلمحي خطوة
تفرق معاكِ بين الحياة و الموت

مش باقي مني غير شوية نبض في عروقي
خُدي .. و عيشي .. و افتحيلي تابوت
أفرح بريحة ورد فرعوني
و ربنا ف عوني
إذا دخلت الجنة ولاّ النار
هاشتاق إلى ضحكتك .. و قعدتي في الدار
و القهوة متحوجة .. من طيبة العطار

في كل يوم الصبح .. أشرب حليب قبطي
و في النهار .. و المِسا
أمسك ستار الكعبة لو سبتِ
و اثبت إذا هربتِ

أهديكِ عمري .. و حسّي .. و جوارحي .. أهديكِ جرحي
هو اللي باقي ف دنيتي لما خلص فرحي

مش باقي مني غير شوية لحم في كتافي
بلاش يتبعتروا في البحر
بلاش يتحرقوا في قطر الصعيد في العيد
بلاش لكلب الصيد تناوليهم
خدي اللي باقي من الأمل فيهم
و ابني لي من عضمهم
في كل حارة مقام
و زوريني .. مرة .. وحيدة
لو كل ألفين عام
ألم الجراح يتلمّ

مش باقي مني غير شوية دمّ
متلوثين بالهَمّ .. مُرين و فيهم سمّ
كانوا زمان شربات .. و النكتة سُكرهم
شربتهم الخفافيش .. في قلب أوكارهم

مش باقي مني غير شوية دم
ما أقدرشِ .. أسقيك مواجعهم
و برضه ما أقدرشِ .. أرميكِو أبيعهم
يمكن في مرة تعوزي تطلبيني شهيد
هاحتاج يوميها الدم .. يمضي على شْهادتي

مش باقي مني غير شوية قوة في إرادتي
على شوية شِعر من خطّي
حاسبي عليهم و انتِ بتخطّي
و انتِ في صُبح الدلال بتعطّري شطّي

مش باقي مني غير شوية ضيّ في عينيَّ
أنا مش عايزهم
لو كنت يوم ه المحك .. و إنتِ بتوطّي
في معركة مافيهاش
و لا طيارات و لا جيش
و انتِ ف طابور العيش
بتبوسي إيد الزمن
ينوّلك لقمة
من حقك المشروع

مش باقي مني غير .. شهقة
شهقة ف نفس مقطوع
بفتح لها سكة
ما بين رئة و ضلوع
ما بين غبار و دموع
و أنا تحت حجر المقطم في الدويقة بموت
أنا و العطش و الجوع
يئن تحتي التراب
و أنا صوتي مش مسموع
يا حلمنا الموجوع
من المرور ممنوع
مستني لما يمر
موكب سلاطينك

مش باقي مني غير شوية رحمة من طينك
على شوية صبر من دينك
مش باقي مني غير حبّة غُنا تايهين
في الضّلمة مش لاقيين .. حسّ الفواعليّة
و لا صوت مراكبي عَفي .. فوق المعديّة
و لا صوت بناتي العذارى .. في كل صُبحيّة
و الغنوة أمنيّة
ياما نفسي أقابل حبيبي .. و أنا ع الزراعيّة
صوتك و صوتهم غاب ..
و أنا تحت حجر المقطم .. بموت لوحديَّ

الليلة راحت عيوني .. تطل ع البستان .. و جناين الرمان
رجعتلي توصف .. عناد الغل و الدخان
و سْحابة سودا تضلل .. على الغُنا الغلبان
رجعتلي توصف .. هبوب الموت .. على الألوان
رجعتلي توصف.. خيال الذل .. في موائد الرحمن
مش باقي مني غير شوية كفر بشروقك.. و أنا .. منبع الإيمان

مش باقي مني غير شوية ضيّ و عينيَّ ..
مُش قادرة تلمحني
في وحدتي محني
خايف أموت م الخوف
و الضعف يفضحني

السجن عشّش في قلبي ..و ماشي في شوارعك
نفس اللي باعني و خدعني.. بالرخيص بايعك
هاشيل حُمولي أنا .. ولا هاشيل حِملك

ما عدت أملك شيء.. فيكِ .. و لا فيّا
و لا قيراط و لا بيت.. و لا نسمة صافية
تلاغي النيل بحرية

مش باقي منّي
غير شوية حب .. جارحِنّي
و لا باقي منّي
غير شوية ضيّ في عينيَّ

وممكن تشوفوا الشاعر جمال بخيت والقائه لتلك القيدة الرائعة على الرابط التالي

https://www.youtube.com/watch?v=SJzCEXmMNmY&eurl=http%3A%2F%2Fwww%2Esawtakonline%2Ecom%2Fforum%2Fshowthread%2Ephp%3Ft%3D65979&feature=player_embedded

الصراحه الراجل دا أحساسه عالى
وأنا القصيده مسمعتش عليها غير بعد ما شفتها أغنيه ففيلم دكان شحاته
تشكر يا بشمهندس محمد على القصيده الروعه دى

Leave Me Alone كتب:: الصراحه الراجل دا أحساسه عالى
وأنا القصيده مسمعتش عليها غير بعد ما شفتها أغنيه ففيلم دكان شحاته
تشكر يا بشمهندس محمد على القصيده الروعه دى

لك الشكر الوافر على الرد الروعة

قصيدة روعة جداااااااااااااااااااااا

قصيدة مش باقي مني 2696

مش باقي مني غير ان اقولك
قصيدة جميل وكلمات رائعة ومعبرة فعلا
تسلم ايدك يا محمد

flower2

» قصيدة جحا !
» ***قصيدة جميلة***
» قصيدة: جاء السحاب بلا مطر
» قصيدة ممنوعة
» قصيدة لا أنت أنت