انا مش راجل فبلاش عربية السيدات !!!

منذ فترة ليست بالبعيدة اوي
تمنيت في لحظات كثيرة ان اكون ولد او راجل يافع
يعني نظام الخروج والدفاع عن النفس معروف انه نظام شرقي بحت يخص الرجل فقط
ولذلك تمنيت ان اكون هذا الرجل

بعدها بفترة قررت ان لا اكون رجل
بل استرجل
وبما اني رياضية ايه الي يمنع اني اكون رياضية قوية
العب الالعاب العنيفة
يكون ليا عضلات وبتاع
بس مش زي الصور اللي فوق دي

لكنني ابدا لم اسوي الرجل بالمرأة
جايز يكون في اختلاف في اكلامي

بس لو جينا بصينا للايدولوجية المنطقية الواقعه في بير المقوقعات والتي لا تنطلي علي مجتمعنا
هنلاقي ان كلامي مقنع
بقول كلام كبير
مش مهم ماهو دة الكلام اللي لو قاله اي شاب مفعوص حتي لو مش عارف يعني ايه بقي مثقف
المهم ان كلامي هيتفهم

وها انا من مكاني هذا وبعد سنوات الكفاح اعلنها بكل ارياحية وانا في كامل قوايا العقلية
ان الراجل راجل والست ست

مش هنخش في مهاترات فارغة بان تركيب جسم المرأة مختلف فسيولوجيا عن جسد الرجل
لا

بس الراجل راجل والست ست

فياريت القراء العظام مش اللي هو عضم اللحمة او الفراخ ولكنها جمع عظيم
ان لا يقولونا كلام احنا مش قلناه

معظم البرامج اللي موجودة علي التيلفزيون ونوال السعداوي وهاله سرحان
بيقولوا نعم للمساواة بين الرجل والمراة

وها انا اعلنها مرة ثانية

لا
واذا كان كل اللي هيعلق ويقول البت دي اكيد اتجننت
ان الراجل راجل والست ست
مش معني كلامي ان الست تقعد في البيت ولازم تصرف عليا تجيبلي كل الي انا عايزاه
وتهنيني
مانا ست بقي لا برضه مش دة المقصود

ومش المقصود ان الراجل يعتبر ان الست ستامه
قصدي خدامه
ولازم تغسلي رجليا بالميا والملح
ولو انه مش عيب ولا حرام ان تفعل المرأة ذلك لزوجها
لكن مش غصب

ولا ان الرجل ينظر للمرأة علي انها دونية وانها اقل منه
ولو جيت اتكلم معاكي مش هتفهميني اصلك غبية
وكلام من دة
لا برده مش دة المقصود

كل ما اطلب حقي كانثي الاقي الرد جاهز
اشمعني؟؟؟؟

علي فكرة يا سيد دي عربية السيدات

مانا عارف اشمعني انتو بتركبوا معانا

يا فندم لو سمحت دة حمام للسيدات بس
يوووووووه انتو هتقرفونا مش بتقولوا ان الراجل زي الست اشمعني في دي
مانيش خارج من هنا بقي

وردود كتير

هو مين اللي قال ان الرجل زي الست
انا عن نفسي ضد دة واكيد في غيري كدة
يبقي التعميم دة جه منين

لا انكر ان في ستات ملاعين وتعابين وعايزين الحرق
اي نعم عربية السيدات في مترو الانفاق كلها عايزة الحرق
بس اهي زنقة الستات ولا زنقة راجل
اي نعم علي راي ناس اعرفهم ان الست من دول صحتها خمسمية حصان
وتطلع المترو وكأن جالها جلطة عشان غيرها يقوملها

مع العلم ان لو ست كبيرة في عربية السيدات واقفة ولا شابة هتقوملها
ولكن العكس في باقي العربيات اللي فيها الرجاله

ودة اكبر دليل ان الست ست والراجل راجل

نيجي للشغل

تيجيلك الواحدة وهي رافعه صدرها كدة وتقولك انا هشتغل
يا سيتي ليه اهي مستورة والحمد لله
لا بوقلك ايه انا عايزة اشبع طموحي واثبت نفسي
وبعدين انا هفيد المجتمع

ومن منبري هذا اود ان اقول لتلك السيدات

اتوكسي

انا مش ضد الشغل

بس في اسباب كتيرة تستدعي للشغل
ان يكون دخل الزوج مش اد كدة
ماشي اشتغلي يا ست الكل

واحدة مطلقة او جوزها ميت او بخيل وبتصرف علي البيت من الشغل
ماشي ليكي الجنة

واحدة بتصرف علي نفسها عشان ابوها ابن ستين في سبعين
يبقي عداها العيب

واحدة شغلها مش ينفع يشتغله راجل
واللي بيحتم ان الشغل دة تكون واحدة ست
مش سكرتيرة وعلي قدر كبير من الجمال
وبمرتب مجزي
واحدة اتعلمت وبتصرف علي اهلها مش مشكلة
بالمختصر ان في اسباب كتيرة تستدعي ان تعمل المرأة

لكن ظروفها تبقي مية مية
وتقولك عايزة اثبت نفسي
والمجتمع مش هيعرف يعيش من غيري
يبقي كلا والف كلا
لا انكر ان مجالي في العمل يعتبر نفس مجال الراجل
زي اي مجال قد يكون مجال الذكور
بس بايدي اني اختار
اني اكون من انهي فئة
ان اعمل بما يرضي الله
ولو في مجال اني اشتغل مع الستات
يبقي اوكي يا مان

اتعرض عليا شغلانة بتلات الاف جنيه في الشهر
مع العلم ان دة اقل مرتب
بس نظام شغل مع رجاله ومساج وتدليك واديها تفعيص يا ريس في الراجل والست مع بعض
يبقي نو
والرد
ليه يعني هو الراجل هياكل منك حته
دة في مزز كتير ولا حد بيبصلها
وبعدين دة شغل
وانتي لازم تثبتي نفسك
اثبت نفسي ايه وبتاع ايه
مالها حلة ورق العنب اجدعها اختبار لاثبات النفس

لو جينا للبس
فحدث ولا حرج
ايه يا بنتي اللي انتي لابساه دة
اصلي شفت حته واد لابس بنطلون زي دة مش عايزة اقولك اتهوست
ودوخت علي ما لقيته
يشفي الكلاب ويضرك يا بعيدة

ليا واحدة صاحبتي مديونة للمدرب ب 200 جنيه

ولما جيت قلتلها ليه يا ست البنات مانتي بتشتغلي والاشية معدن

كانت الاجابة صاعقة

قالتلي يا بنتي انتي عارفة المكان الي بشتغل فيه بيجي فيه ناس مش اي ناس
فلازم اكون علي سنجة عشرة ودة بيخليني البس لبس هاي وفلوسي كلها رايحة علي الهدوم

وكرهت كوني قاهرية وتمنيت ان اكون اسكندرانية لاتبع كلامها بصيحة اسكندرانيه

بس تصدقوا انها فعلا فادت المجتمع
بتشتري هدوم
ويا عيني علي الفايدة

انا مش ضد الشغل لاني انا شخصيا بشتغل

بس السبب ورا الشغل

طب والله الراجل راجل والست ست

وربنا سبحانه وتعالي بيكرمنا ونبقي قوارير
واحنا اللي عايزين نبقي حديد فولاذ من بتاع احمد عز
فعشان كدة بقولها بصوت عالي
انا مش راجل
وانا لا اطالب بالمساواة

ولكن ايها الرجال ارجوكم

لا تركبوا عربية السيدات

ايها الرجال ارجوكم

لا تخبرونا باننا طالبنا بالمساواة
فانا لم افعلها او اقولها

ايها الرجال ارجوكم
لاتقسوا علي زوجاتكم او بناتكم

ايها الرجال
انا بريئة من البرامج التليفزيونية التي تطالب بالمساواة

فانا مش راجل
ولا زي الراجل

lol!

للمبدعه ,, انجي !!

مقـالة رائعة جداااااً
بل صراحــة ً أكثر من رااائعة
وكاتبة الموضوع بنت رائعة و مبدعة فعلاً

وفعلاً الراجل راجل والست ست
واللي تقول غير كـدة تبقي بتضحك علي نفسها
واللي بيطالبوا بالمساواة دول ناس فاضية مش وراهم حاجة يعملوها

وفي الحقيقة عندما تساوي المرأة نفسها بالرجل فانها تقلل من نفسها
ومن شأنها ومن المكانة التي أعطاها الله لها

وهناك كثير من السيدات ضد مبدأ المساواة
ولكن للأسف كما يقولون السيئة تعم والحسنة تخص

عن جد سلمت الأيـادي بشمهندس إسماعيل
ومنتظرين منك المـزيد

» ويحكى راجل صعيدى
» السيدات
» سيرينا وسافينا تتأهلان إلى الدور الثاني في تنس السيدات
» تجانج تحرز ذهبية القوس والسهم لفردي السيدات
» طرائف عربية