عايزنا نرجع زى زمان قول الزمان إرجع يا زمان !!!

السلام عليكم ورحمة الله وبركاته

عايزنا نرجع زى زمان قول الزمان إرجع يا زمان !!!

الكدب له ناسه والصدق له ناسه وعمر الحقيقة ما هتتلوث أو هتتغير حتى ولو إتملت

البلد كلها كدابين وبقوا عايمين على وش الأرض وأكتر من الهم عالقلب !!

مش عارف ليه كل ما تحصل حاجه غلط فى البلد يقولك فين أيام زمان ويفضل يمدح

فى أيام زمان !!

أو كل ما الناس تكتشف حرامى ولا تبقى وحشه فى بعضيها يرجع ويقولك فين زمان

وأيام زمان !!

ولو سمعت أم كلثوم اللى من أيام زمان هتقولك عاوزنا نرجع زى زمان قول الزمان

إرجع يا زمان !

ولو رجعت لورا برضو وسألت ناس من أيام الجاهلية والإله بعل ويغوث ويعوق

ونصرا هيقولك برضو فين زمان وأيام زمان !

حتى فى الأفلام الأبيض وأسود كانوا بيقولوا فين زمان وأيام زمان الشباب بقى خرع

ومش تمام وكلامهم كان فى التلاتينات ولغاية الخمسينات يعنى جدى وجدك مثلا !!

هوه الزمان ده مش بيخلص ولا إيه مش فاهم والخير دايما بيرجع لورا مبيطلعش لقدام

أبدا يعنى محلك سر!

أعتقد ممكن كمان نرجع بزمان وأيام زمان لغاية ما نوصل لأيام سيدنا آدم ونسأله

هيقول برضو أيام ما كنت فى الجنة زمان أحسن من دلوقتى لما نزلت الأرض !

كل الناس أجمعت على زمان وأيام زمان بس محدش دور ليه إحنا بنلجأ لزمان وقت

المشكلة ونفكر ليه لورا ومنبصش لقدام !

أيام زمان يا سيدى كانت الناس تبلغ من القناعة ما يجعلها سعيدة ومبسوطة والحياة

وردى وبمبى ولون قلب الخساية كمان !

إزاى بقى الكلام ده ولا أنا من ضمن الكدابين اللى عايمين على وش الأرض بس من

غير مايوه !

أقولك يا سيدى ...

زمان كانت العائلة بالكامل تسكن فى بيت واحد يعنى بتاع خمسين شخص كده ساكنين

فى نفس المأوى بسلاطتهم ببابا غنوجهم بكل حاجه معاهم وكل حجرة فيها تسعة على

الأقل يعنى الراجل بمراته وعياله بكل حاجه فى حتة أوضه لا تتعدى التلاتة متر فى

تلاتة متر بسرير نحاس بايظ من ساعة ما اشتروه جديد وبابور نحاس مصدى وارثاه

العروسة عن جدة جدتها وبحتة دهب صفيح وقشرة اساسا متساويش أى فلوس والعيال

نايمين على الأرض ولاد وبنات ولمبة جاز بتنور للحيطة بس ومعاهم هدوم كتيرة جدا

لدرجة إن الولد يلبس لبس أخوه الكبير ويسلمه للى وراه وجيل ورا جيل يسلم للتانى

والهدوم لسه هيا هيا لغاية منا بكتب أهو الموضوع وييسلموها أخيرا لمتحف الآثار

والأنتيكات القديمة ، والبنات كذلك الأمر وعلى نفس المنوال ممكن يتبادلوا الهدوم ،

وياكلوا تلات طقات يا أما دقة يا فحل بصل مع مش صافى كامل الدسم من أبو دودة

نص متر واللى طلعت منها بعد كده دودة البلهارسيا لو تفتكروا يعنى البلهارسيا

أساسا طالعة من بلاص المش اللى فيه دودة المش يعنى بالعربى كده البلهارسيا

تقول لدودة المش يا تيزة أو يا طنط بلغتنا الدارجة الأيام دى !!

ونيجى بقى للتحلية عبارة عن رغيف بتاو حاطينه فى الفرن ورشوا عليه شوية سكر

ويطلع بقى ويتقسم على جيش العيال وأمهم وأبوهم وطبعا الراجل بياخد حتة كبيرة

يعنى ممكن توصل لتمن رغيف البتاو أبو سكر والعيال وأمهم بقى يمزمزوا فى بقية

الرغيف ويبعتوا حتة لجدو وجدته اللى مش فى إسكندرية دول قاعدين فى الصالة أو

الطرقة اللى فى البيت وسبحان الله يفضل الباقى ويشلوه فى سحارة لأنى مفيش تلاجات

أو ياكلوا بالمرة لأحسن الدود ياكله قبل ما يتهنوا بهذا الكم الكبير من التحلية !!

أبناء الراجل ده وأولاد عمهم اللى فى نفس البيت برضو تلقاهم بيلعبوا مع بعض دايما

فى الطين أو يطيروا ورقة مثلا أو يتسابقوا فى الترعة مين يوصل الأول للناحية التانية

والبنات يلعبوا بالطوب ويلعبوا الحجلة ويغنوا ويتنططوا ومفيش أى سبيل ترفيه غير

كده.

إتفرجت على مسلسل عاشور الناجى بتاع نور الشريف وفى الحقات الأولى من

المسلسل ألاقى قصة حب نور الشريف لماجدة زكى إنها شافتوا وهو بيحمى الحمار

أو الجحش فى قول آخر "لا مؤاخذه يعنى" فحبته من أول غسلة أو نظرة فى نفس

القول الآخر!!!!!!!!!!!!!!!

والمشهد ده برضو بالفعل كان بيحصل زمان لأنهم كانوا بيشتروا راجل لذلك تلقى

العريس يا شيال يا فراش يا نجار يا مبيض نحاس يا فلاح ويوم ما يتمعظم ويصل

إلى الدرجات العلى تلقاه شغال موظف فى السكة الحديد أو باش كاتب فى الأرشيف

وغير كده من وظايف بيبقى تركى وجده باشا ومش من البلد أساسا !!!!!!!

كان الواحد لما ييجى يشترى قيراط أرض كان ياخدوا قيراطين ويوم ما يشتغل فى

أتخن وظيفة ياخد تلاتة جنية وعلى الكسار فى فيلم سلفنى تلاتة جنية طلعت عنيه

مسكين وهو يلف على الناس ويتشال ويتهبد عشان يلقى تلاتة جنية أو يقدر يحوشهم

معرفش !!

لغة زمان وتعاملاتها كانت بالسحتوت والقرش والنكلة والأبيض والمليم وكان الكيلو

مش كيلو لأنه حاجة كبيرة على المستهلك فكان يشترى بالأوقية أو بالرطل !!

شوال الدقيق بشلن والجاموسة باتنين جنية وكيلو اللحمة اللى بيتجاب فى العيد بس أو

غلطة بيندموا عليها كان بسالب ربع جنية وقيراط الأرض بخمستاشر جنية ونص مصر

بعشرتلاف جنية وتاخد صحراء سيناء هديه بعد ما تخربش الكوبون ولو معاك خمسين

ألف تشترى مصر والسودان كمان !!!!

الفيلم فى السينما يستحيل كان يزيد عدد الكلمات فيه عن مية كلمة لأنها كانت سينما

صامتة ويستحيل برضو حد يقل أدبه مع واحدة كده ولا كده فى الفيلم ويبقى نهار مش

طالعاله شمس ولا ملامح لو شوية هوا قفلوا الباب على الممثل والممثلة وهما بيمثلوا

المشهد والرقابة تبهدلهم وتقولهم هتبوظولنا الشعب يا تفتحوا الباب يا تخللوا حمادة

محرم معاهم مش ناقصين قلة أدب !!!

الراديو عشان يسمعوه كانوا بيجروا يستخبوا تحت شباك دوار العمدة عشان يشوفوا

إيه حتة الحديدة اللى بتتكلم دى ولأنه كان حاجه كبيرة جدا ومش أى حد يجيبها طبعا

فتضطر تسمع مليون شتيمة وقلة قيمة من العمدة اللى بيبقى بارد فى كل الحالات ،

والتلفزيون لما نزل كان عامل زى الهكسوس دلوقتى لو لقيتوا حد منهم يبقوا هتلقوا

تلفزيونات زمان ، يعنى زمان بالعافية تلقى عشر تلفزيونات فيكى يا مصر من أبو لمبة

ولازم تخبطه بالشبشب عشان يشتغل يعنى معدة كهربائية متكاملة شبشب أصيل

وكهربا كمان !!!

الطالب زمان كان لما ياخد الإبتدائية يقولك ده متعلم ويشتغل بمؤهله ولما ياخد

الإعدادية يبقى حاجه فخمة تشرف عيلتة ولو دخل الثانوى وأخد شهادة البكالوريا

يفضلوا يزمروا ويطبلوا شهر عشان أخد البكالوريا ولو دخل الجامعه بقى وحصل

على ليسانس ولا بكالوريوس يبقى ده مش هتلقى منه كتير لأنه من عجائب الدنيا

السبعة زمااان !!

أكتر من نص مصر راحت فى حفر قناة السويس والأمراض والسد العالى والحروب

والناس كانت بتخفى خبر الموت ساعة الكوليرا عشان لتتاخد فى الحجر الصحى

وتفضل سنين فى أوض ضلمة عشان العدوى متنتشرش وبعد ده كله محدش إتكلم

ولا فتح بقه واللى فتح بقه هو سعد باشا وقال مفيش فايدة وسكت أصله كان واكل

بصل الظاهر فمعرفش يقول غير الجملتين اللى فرحانين بيهم دول والباقى من

الزعماء أو اللى لديهم ألسن أول ما مسكوها أكلوها وبقى الحال على ما هو عليه

من الفقر فئة الضاد جيم !!

من خلال اللى قولتوا ده كله شايفين خير زمان وقول الزمان يرجع يا زمان اللى بيقولوا

عليه ده ؟؟!!

ركزوا كويس يمكن عينيكم زغللت من كتر القراية أو اللى مش لابس نضارة يلبسها

ولو لابس إقلعها برضو !!

ليه الناس دى كانت مش بتعمل مشاكل زى دلوقتى وكانت ناس بها خير إنسانى مش مادى ؟؟

ليه كل ما نفتكرهم ونشوف الأحداث اللى كانوا عايشينها نستغرب ونفضل ندور على

السبب وفى الآخر نقول زمان كان فيه خير كتير ودلوقتى لأ ؟؟

أخوتى الأعزاء ,,,,,

السر مش معضلة والخير كان فى الناس دى كان مش معجزة ، السر كان يكمن

فى سحر القناعة !

نعم القناعة ....

القناعة جعلتهم يعيشوا على اللقمة بدقة أو مش ويشبعوا منها وآخر تمام وإحنا

ناكل عشر مرات لحمة فى اليوم من كباب وكفتة وضانى وماعز ووجبات سريعة

وبطيئة وكبدة ولحمة راس وكينتاكى ويحلوا ببسبوسة وكنافة وكيكة وآيس كريم

وشيكولاته وفاكهة أشكال وألوان وبرضو مش شبعانين وعاوزين ناكل عشرين

مره مش عشرة !

القناعة جعلت البنت ترضى بالرجل مهما كانت مهنته فهى تطلب رجل يحتويها

حتى ولو كان بيعمل فراش أو فلاح بسيط أو موظف أبسط وتطير من الفرحة عندما

يهل عليها زوجها وتستقبله بوجه بشوش وهو يتصبب عرقا من عمله وتحضنه بهذا

العرق ومتقولش أفففف زى دلوقتى لأ طبعا وأنا قرأت بالمناسبة فى إحدى الكتب أن

رائحة عرق الرجل من الممكن أن تثير المرأه جنسيا بس مش معناه الناس متستحماش

يعنى بس كما ذكرت إنه شىء محفز للمرأه ويزيد من حبه لها ، أما الآن العريس يا إما

وزير أو نقيب الأطباء أو كبير المهندسين ولازم يكون مكتمل البنيان وحاد البصر

ويدخل الفتلة فى خرمة الإبره وهو مغمض عنيه وفى الآخر يطلقوا بعد أسبوع كامل من

الزواج أو شهر أو سنة كاملة وطبعا زمان كان ليموت هيا أو هوه واللى يفضل بقى

يستمر من غير زواج أو الأتنين يستمروا عشرات السنين بحب وود ويستحيل تجد

الطلاق إلا كنادرة أو شىء غريب غير مقبول قديما بالمره !

القناعة جعلت الزوج والزوجة يسكنون فى حتة أوضة صغيرة وبراها بيت مش كبير

وكله بشر بمنتهى السعادة والحب والعيال متكومين جمب بعض ومفيش لا مراوح ولا

أى حاجه غير الحيطان حواليهم ، ودلوقتى تجد الفيلا والقصر يضيقوا على شخصين

والكره بينهم تزول منه الجبال بالإضافة إلى إن العروسة يستحيل توافق على البساطة

فى الشقة ولو وافقت أبوها مش هيوافق ولو كلهم وافقو المجتمع هينظرلهم نظرة

المجانين أو الإستحقار !!

القناعة جعلت الرجل يقبض قرشين فى اليوم ويعيش بيهم ولا ينظر لغيره وممكن

يسلف منهم ويتصدق أما الآن آلاف الجنيهات والأراضى والعقارات وما زالوا أشقياء

خائفين من الحياه ويكنزون المال ويحرمون أنفسهم لأجل الدنيا المستقبل المجهول

وللآسف لن يأخذوا إلى قبورهم شيئا مما يكنزوه أو يأمنوا مكر الزمان !

القناعة جعلت الطالب يزهو ويمشى مفتخرا بالبكالوريا أو الإعدادية أو بالكلية لأنها

تعليم عالى وشىء مشرف بالفعل أما الآن تسعين فى المية من سكان مصر مهندسين

وأطباء ومحاسبين وأساتذة جامعات ومدرسين بالمدارس ومحامين وتجد الواحد بيتأفف

من الكلية اللى هوه فيها حتى ولو كانت من كليات القمة فتجد التعليم أصبح جحيم

بالنسبة للطالب وليس أمرا له شأن أو يجازى بالجنة والشهادة من يموت دونة !!

الخير زمان مكنش فى الأكل والشرب والعيشة ، الخير زمان كان فى قناعتهم بعيشتهم

رغم إنها فقيرة بس أسعد من أغنى واحد فى وقتنا هذا وحبهم لبعضهم اللى خلاهم

يقدروا يعيشوا فى بيت صغير بالعشرات وينجبوا أجيال وأجيال !

عرفتوا زمان بينضرب بيه المثل لييه ؟؟!!

عرفتوا زمانا دلوقتى بيتخسف بيه الأرض ويتلعن ليه ؟؟!!

زمانا ده برضو هيضرب بيه المثل بعد تلاتين سنة وهيبقى أفضل من اللى جاى !!

أخيرا نسيان الدين اللى بيحثنا على القناعة والرضا بالمكتوب هو أحد الأسباب

الرئيسية لإعابة الزمان والعيب فينا لذلك أرجع لدينك هتجد نفسك أحسن من

زمان وبكرة والنهارده ومن أى زمان كمان وأدفع اللى عليك من عبادة ربك

هتجد نفسك أسعد أهل الأرض فى أى مكان وأى زمان أيضا.

والله الموفق

الله عليك يابشمهندس
رجعتنا لزمان وايام زمان
اسلوبك السردي بسم الله ما شاء الله رائع
سلمت اناملك التي خطت هذا الموضوع الراااائع

موضوع راائع جدااااً
كعادة كتاباتك جميعها

والسبب كما ذكرت يكمن في القناعة
وكما يقولون
" القنــاعة كنز لا يفني "
وللأسف الصفــة دي بنفتقدها كثيرااااً هذه الايام والسبب كما قلت وهو بعدنا عن تعاليم ديننا

كما ان الناس نفوسها مبقتش صــافية زي زمـان
والناس بتتلكك لبعضها علي أتهف الأمــور

ياريت أيام زمان ترجع تاني
أيام الناس الجميلة والطيبة واللي بتخاف علي بعض ويهمهم أمر بعض

عن جـد سلمت الأيـادي بشمهندس الحبار يصفق

ومنتظرين منك المــزيد

بنت مصر كتب:: الله عليك يابشمهندس
رجعتنا لزمان وايام زمان
اسلوبك السردي بسم الله ما شاء الله رائع
سلمت اناملك التي خطت هذا الموضوع الراااائع

شكرا جزيلا على مرورك الرائع وذوقك وقولك الجميل أختى بنت مصر

والله الموفق

الكلام حلو ؛ بس دايما زمان حلو فى عنينا علشان احنا معشناش فيه؛هما كمان أكيد كان عنديهم مشاكل تعبتهم وإلا بقى كانوا عايشين فى حتة غير الدنيا وهما اصلا مش ناس بقى ولا اَيه رأيك يابشمهندس.

» إرجع بأه
» لا أنت أنت..ولا الزمان هو الزمان
» اعظم لاعبين الزمان
» لما يقسو علينا الزمان
» قصه عاشقان فرقهما الزمان..........