معالجه قضايا متعدده ليس فقط في رمضان ولكن لنتخذ من الشهر الكريم بدايه

بسمالله الرحمن الرحيم

رمضان شهرالقرآن والعباده وتهذيب النفس وتنقيتها من كل ما يشوبها وفرصه لكل انسان لكي يصلح
من حاله لن اطرح هذا الموضوع لاتحدث تقليديا عن الشهر الكريم ولكن لتوضيح بعض
الاشياء التي قد يجهلها البعض فجسم الانسان ماهو الا تراب ويتحكم فيه ويسيطر عليه
القلب والذي يتحكم في القلب ويسيره اما النفس التي طالما امرت صاحبها بسوء او قلما
امرته بخير او الاثنين معا واما سيرته الروح المملوءه بحب الله لذا فلنتخذ من
رمضان فرصه لاضعاف النفس وتقويه الروح حيث ان غذاء النفس هو الماكل والمشرب وغيرها
مما يرضي رغبات النفس وكما نعلم ان رمضان والصوم يمنعنا من ذلك كله اي من غذاء
النفس لذا فهي ضعيفه في هذا الشهر العظيم ويسهل علينا جميعا ان نتخذ من روحنا مسير
لنا ومعين في طاعه الله في الشهر المبارك ونغذي روحنا بالطاعات وتلاوه القرآن
الكريم واداء الفرائض كما يجب واليكم بعض النصائح التي اتمنى ان يعمل بها الجميع
وتكون سببا في الفوز برمضانك خال من المعاصي وان صغرت ويكون سببا في اصلاح حياتك
الى ما بعد الشهر الكريم بعون الله

معذره سوف
الجأ للكتابه بالعاميه حتى يكون الموضوع قريب من الجميع وبعيدا عن التكلف

1- اخي المسلم اختي المسلمه لاتفسدوا صيامكم بتضييع الصلاة او
تأخيرها
طبعا كلنا عارفين هي صله بين العبد وربه وعماد الدين واهم
دعائم الايمان وغيرها كثير ونداء من ربنا سبحانه وتعالى يعني لما تسمع الله اكبر
تعرف ان ربنا بينادي عليك وطبعا اكيد في نداءات كتيره في نفس الوقت مثلا برنامج
معين حتى لو ديني او صاحبك تو حد من اهل بيتك او تليفون او غيره كل دي حاجات
بتناديك في نفس الوقت اللي انت سامع فيه نداء الله لاداء الصلاهوليس فوق نداء الله
عز وجل نداء فاحسن حاجه تعملها في الوقت ده انك تتجه لاداء الفريضه اكيد مفيش حاجه
اعلى ولا اجمل من انك تتوضأ وتبقى واقف بين ايدين ربنا وانت سايب كل حاجه عشانه
وايه اجمل من انك في صلاتك وبالذات في سجودك بتبقى قؤيب من ربنا قوي وتطلب منه
اللي انت عاوزه وتبقى سعيد جدا وانت حاسس ان ربنا فرحان وانت بترضيه اعاننا الله
واعانكم على حسن الطاعه وبلغنا واياكم الشهر الكريم .

2- لاتفسد صيامك بإكثار العزومات
اكيد كلنا بنحب رمضان عشان العزومات وكلنا بنعزم ونتعزم مش
هقول ان العزومات مفسد للصيام او رمضان طبعا ده غلط لان العزومه بيبقى فيها ود
وصله رحم وحب ومعاني جميله كتير بس ممكن العزومه دي تلهيك عن اداء الصلاه لان كلنا
عارفين ان الفتره بين صلاة المغرب والعشاء صغيره فانت لحد ما تفطروا وتتكلموا
وتشربوا الشاي والقطايف والكنافه ممكن الصلاه تفوتك وطبعا ده كله معناه انك سبت
نداء ربك ونداء الله غالي فمفيش مانع انك وانت بتعزم الناس دول مثلا تقوللهم احنا
ياجماعه النهارده ان شاء الله عازمينكم على الفطار وان شاء الله بعده هنقوم كلنا
نروح الجامع ونصللي الفريضه جماعه وده طبعا مش قله ذوق ولا حاجه ده انت هتكون
ارضيت ربنا وفي نفس الوقت اخذت ثواب الموده وصله الرحم وافطار الصائم .

3- لاتفسد صيامك بقله الانفاق
مش محتاجه اقول ان الزكاه والانفاق مما رزقنا الله دي عباده
مهمه في رمضان وزي ماقلت قبل كده ان انت اضعفت نفسك في الشهر الكريم ومادام النفس
ضعيفه والروح قويه وهي المسيطره عليك يبقى نفسك مش هتقدر تمنعك انك تطلع صدقه
كبيره وهيبقى اسهل عن اي شهر تاني ممكن مثلا تعمل حاجه ظريفه انك تفك مائه جنيه خمسات
او خمسين جنيه جنيهات او غيره وكل يوم تطلع ورقه من الفكه دي وبكده تبقى زكيت
وعودت نفسك على الصدقه اليوميه وطبعا كل واحد على قد مايقدر .

4- لاتفسد رمضانك بالغضب ولانفعال
بعضنا بيتعرض في رمضان لمواقف ممكن تستفزه او تدايقه او
تغضبه ساعتها المفروض تفرح مش تدايق لان الحد اللي دايقك ده او الموقف ده طبق
حسنات من ربنا حاول تكظم غيظك زي ما الرسول عليه الصلاه والسلام قال لاحد الصحابه
لا تغضب ولك الجنه وكررها كذا مره عشان يبين للصحابه اهميه كظم الغيظ متضيعش ثواب
صومك بواحد يستفزك او موقف يغضبك وقول اللهم اني صائم ده غير ان البعض ساعات لما
حد ييجي يتكلم معاه يقلله بص انا صايم وروحي ف منخيري ومش طايق حد وطبعا ده غلط
وكل الغلط لان ده معناه ان الصيام بيغضبك طيب ازاي هو ربنا اللي بيحبك هيامرك
بطاعه تدايقك يامسلم دي كلها حاجات بيصورهالك الشيطان لكن بمجرد ذكر الله وان انت
تبقى حاسس ان الشهر الكريم ده هبه كبيره قوي من ربنا عشان تبدا تعمل فيه تغيير
يرضي ربنا في حياتك او زياده في ايمانك عمرك ما هتحس بالشعور ده .

5- لاتفسد رمضانك بتضييع حجابك
الموضوع كتر الكلام حوله والنصائح انا مش هطول فيه بس عايزه
اقول لكل واحده مش محجبه ان الحجاب ده ربنا امرك بيه بيحبك وبيخاف عليكي عارفه زي
الام كده لما بتخاف على عيالها ومثلا يكون حد منهم تعبان وتديه دواء بس مر شويه او
مش على هواه ومش عاجبه بس تجبره عليه عشان هي عارفه انه في نجاته بالظبط زي ما ربنا
امرك بالحجاب بالذات لو انتي قلبك حلو وبيحب ربنا وبتصومي وعندك حسنات ويوم
القيامه هتروحي لربنا بكل ده بس ياخساره مكنتيش محجبه شوفي كام واحد بص عليكي وكام
واحد اتكلم عليكي ومنعتي كام واحد من غض البصر وكنتي السبب في شغل بال كام واحد
طيب انتي قادره تتحملي ذنوب دول كلهم اكيد كل واحد بالعافيه بيتحمل ذنوبه فحرام
عليكي نفسك ياريت تتخذي من رمضان بدايه وتتحجبي ومتسمعيش كلام اي واحده تقولك ان
انتي هتقلعيه بعد رمضان او حتى تكوني عارفه من جواكي ان انتي مش هتستمري مش مهم
البسيه برضه جايز قلبك يعرف قيمته ويحب الحجاب وتكملي بيه وربنا يهدي الجميع .

6- لا تفسد رمضانك بكثره كلامك
الكلام انواع ممكن يكون خير او سخريه او تريقه او هزار او
غيبه او نميمه او لهو او غيره الكلام يعني قله الهدوء والسكينه والعلماء قالوا
عشان القلب يبقى ساكن لازم اربع حاجات يحصلوا قله الطعام وقله المنام وقله الكلام
وقله الانام وده كله بيحصل في رمضان بالتالي قله الكلام هتعمل هدوء في القلب وهدوء
القلب وسكينته تقربك من الله وكمان عشان من كثر لغطه كثر غلطه قال تعالى :

{‏لَا خَيْرَ فِي كَثِيرٍ مِنْ نَجْوَاهُمْ إِلَّا مَنْ
أَمَرَ بِصَدَقَةٍ أَوْ مَعْرُوفٍ أَوْ إِصْلَاحٍ بَيْنَ النَّاسِ وَمَنْ يَفْعَلْ
ذَلِكَ ابْتِغَاءَ مَرْضَاةِ اللَّهِ فَسَوْفَ نُؤْتِيهِ أَجْرًا عَظِيمًا‏}‏ صدق
الله العظيم .

7- لا تفسد رمضانك بالاستسلام لدخانك
انت قاعد اليوم كله وصايم ونفسك المدفع يضرب ياترى ليه هل
عشان زي ما لنبي عليه الصلاة والسلام قال للصائم فرحتان فرحة عند فطره وفرحة عند
لقاء ربه ولا عشان تفطر على معصيه وهي السيجاره اكيد مش لايقه خالص انك تشرب
السيجاره بعد ماتقول اللهم لك صمت وعلى رزقك افطرت و .....الخ اكيد مش هيبقى ربنا
فرحان بصيامك لما تبقى بتقول الدعاء بسرعه وفرحان ومتوتر وبتدور على العلبه وتطلع
سيجاره وتولع ليه ده كله مش الاحسن انك تبقى صايم ومش مستعجل الفطار والمغرب ياذن
وانت فرحان ان اليوم عدى بدون ماتفطر وعارف انك راضي ربنا وربنا فرحان اتشرب الميه
اكيد ده احسن بكتير وبعد الفطار دور على حاجه فيها رضا لربنا واعملها وخليك واحد
من اهداف النبي اللي عايز يشوفك دايما في احسن حال مش من اهداف صاحب قهوه عايزك
تقعد على القهوه وتشرب شيشه وتتفرج على اللي رايح واللي جاي وغيره من الذنوب عشان
في الاخر ياخد فلوسك اكيد مش هتبقى فرحان وانت بتضحي بنفسك ومالك عشان سيجاره
وفرحك وسرورك وحزنك متوقف على وجودها ونفسك ضعيفخ قدامها وبتبعت ابنك بعيد عشان
يجيبهالك كل ده بتعمله عشان سيجاره طيب ما تعمل كل ده عشان ربنا احسن واللي بيسيب
حاجه عشان ربنا ربنا بيعوضه احسن منها واكيد كلنا عارفين كده ربنا يهدي كل شباب
المسلمين .

8- لا تفسد رمضانك باطلاق بصرك
الكلام عن غض البصر كتير واحنا كلنا عارفينه فمش هتعمق فيه
وياريت كلنا نغض بصرنا عما حرم الله وزي ما قال الرسول الحبيب عليه الصلاة والسلام
" النظره سهم من سهام ابليس من تركه مخافه الله ابدله الله حلاوة للايمان
يجدها في قلبه " صدق الرسول الكريم عليه افضل الصلوات واتم التسليم .

اسفه لاني طولت عليكم في موضوعي واتمنى ان يستفيد الجميع به وخصوصا ان رمضان قرب بلغنا الله واياكم الشهر الكريم

موضوع أكثر من ممتاز ,,,,,,,, يصفق

معالجه قضايا متعدده ليس فقط في رمضان ولكن لنتخذ من الشهر الكريم بدايه 700120

معالجه قضايا متعدده ليس فقط في رمضان ولكن لنتخذ من الشهر الكريم بدايه 2696

اللهم بلغنا الشهر الكريم

موضوع رائع

جزاكى الله كل خير

"المواضيع الخاصه بشهر رمضان بتنزل فى قسم الخيمه الرمضانيه" وشكرا

موضوع رائع
"بارك الله فيك"
معالجه قضايا متعدده ليس فقط في رمضان ولكن لنتخذ من الشهر الكريم بدايه 700120

جزاكم الله خير على هذا الموضوع الرائع
الله بلغنا رمضان

بسم الله الرحمن الرحيم
شكرا ليكم جميعا على المرور الكريم وبلغنا الله جميعا الشهر الكريم

» وقف العمل بالتوقيت الصيفي اعتباراً من أول أيام رمضان وأستئنافه بعد الشهر الكريم
» ادعية لكل يوم في الشهر الكريم
» إسطوانة رمضانيات كل مايخص الشهر الكريم
» اغتنم ابواب الخير في هذا الشهر الكريم
» 6 اسطوانات خاصة بشهر رمضان الكريم بحجم 2.7 جيجا على اكتر من سيرفر