مذكرات مهندس مطحون ومذكرات مهندس منفوخ

السلام عليكم ورحمة الله وبركاته

تنويه بسيط قبل البداية في مذكرات المهندس المطحون

مذكرات المهندس المنفوخ تبدا من الصفحة الثانية
اتمني ان تستمتعوا وتستفيدوا من هذه المذكرات
ايه اخباركم يا زملاء الكفاح وايه احبار المكافحون الذين يواصلون مسيرة الكفاح في الكلية من بعدنا
اه علي كفاح الكلية كفاح رهيب وضغط نفسي قاتل بس فعلا كانت ايام حلوة بالناس اللي كانت حوالين الواحد
انا قكرت كتير قبل ما اكتب الموضوع ده في الاخر لقيت اني لازم اكتبه اهو يعتبر نقل خبرات وتوضيح صورة الواقع للطلبة بصوا يا شباب من ايام وانا صغير كنت بسمع كلام من اهلي زي " شد حيلك واطلع مهندس او دكتور زي خالك"
قلت الكفاح في الثانوية العامة وبعد كده الواحد يرتاح بعد كده جيت في تانية ثانوي وجبت 92.4 % فقلت هندسة وحطيت ابويا قدام الامر الواقع علشان ينسي قصة الطب دي وانا فعلا كنت بعشق الرياضة قابويا قالي "شد خيلك السنة دي وادخل هندسة وان ترتاح "
جبت 94.5% في الثانوية العامة وقلت خلاص التعب راح وجه وقت الراحة والواحد لعب كتير في اول ترم في اعدادي واتنزق في الترم التاني فقالوا لي الطلبة الاكبر سنا " عدي اعدادي صافي وانت ترتاح "
عديت اعداي ودخلت قسم كهربا حبا في القسم ودي كانت اكبر غلطة في حياتي بلاش اقول ايه اللي حصل في كهربا انا كهرت نفسي في اولي كهرباءوفكرت جيدا في التحويل لدرجة انا فكرت اسيب هندسة خالص من سؤء العلمية التعليمية واني مش فاهم حاجة خالص وخاصة مكنتش فاهم مادة الفيلد العزيزة رضيت بالامر الواقع وتاقلمت مع نظام الدراسة وجيت وغلطت تاني اكبر غلطة في حياتي ودخلت اتصالات مش عارف ليه بعيد عنكم غباء رغم حبي الرهيب للبرمجة وتميزي في كورسات البرمجة المهم وعشت سنتين في القسم من أحلي سنوات حياتي مكنتش فاهم حاجة بمعني الكلمة
المهم بعد عناء وبعد دور نوفمبر اتخرجت من الكلية بتقدير جيد ومشروع جيد جدا
وبرده كنت بسمع قبل ما اتخرج " خلص الكلية واتخرج وانت ترتاح "

يتبع

يظهر محدش عجبه الموضوع
بس برضه هكمل مذكرات مهندس مطحون ومذكرات مهندس منفوخ Lol

وقفنا لغاية ما اتخرجت مع اهمال الكثير من تفاصيل الكلية اللي ممكن تزعل ناس مني لو كتبتها

المهم خدت الشهادة المؤقتة و وكنت مخلص ورق الاعفاء من سنتين

انا اشتغلت قبل كتير في مجال صيانة اجهزة الكومبيوتر في اجازات الدراسة
فقمت نزلت تاني الشركة بتاع الجاسب الالي مع تطوعي في جمعية بداية لتنمية المجتمع الذي اساتها انا وبعض المهندسين وغير المهندسين من ثلاث سنوات وابحث عن عمل كمهندس اتصالات داخل اسوان وقررت ان لا اذهب لاي محافظة اخري بسبب البيت والجمعية وخضت عدد من المقابلات الجيدة واهيرا بعد طول انتظار وجدت عمل في شركة شبكات في اسوان وهذا الشي يعد مستحيل في محافظ زي اسوان
يتبع .............

متابعك يا بشمهندس خالد ولعلك تكون بخير وموفق بإذن الله

والله الموفق

ابو خااااااااااااااااااااااااالد !!! lol!

ايه ياعم ده كلووووووووووووو !!!

بحلقه

ده معاليك طلعت حدوته ,,,,, وأنا معرفش !!

عيان 2

عموما ,,,,,,,,,, منتظر باقي المذكرات ,,, وبالطبع باقي الأسرااااااااااااااار !!

فاهمني !! شيطان

ومتنسااااااااااااااااااش ,,, دافنينه سواااااااااا نار

ايه الحلاوة دي
ده فيه ناس بتقرا الموضوع وبترد
يظهر ان فيه حد عجبه الموضوع
وعلشان كده هكمل
احنا وقفنا عندما اشتغلت في شركة شبكات قبل ما نتكلم عن الشركة وشغل الشركة حابب اوضح للناس مجالات عمل مهندس الاتصالات احنا لما نتخرج من الكلية بنكون مهندسين اتصالات واليكترونيات
فممكن نشتغل في شبكان نقل البيانات مثل شبكات الكومبيوتر والتليفون والمحمول والتليفزيون او في مجال الاليكترونيات وبما اني مدخلتش اتصالات عن حب فمكنش يفرق معايا اشتغل في اي مجال فكنت قبل ما اشتغل كنت باقرا في كل مجال شوية في انتظار اني اشتغل في مجال معين فابدا ازود نفسي فيه
المهم رحت مقابلة الشركة فلقيت ان الشركة كانت اول مزود لخدمة الانترنت في اسوان وشغالة من سنة 1999 واشتغل فيها مهندسين كتير قبلي الي منهم فيه دبي واللي في السعودية واللي في امريكا واللي في القاهرة واللي لسه في اسوان
كل واحد حسب طموحه وقدراته
ولقيت ان حجم شغل الشركة حاليا قل عن السابق واصبح عمل شبكات مراقبة واسمه العلمي CCTV
والمفروض اني لما اشتغل في الشركة هيكون شغلي تركيب وصيانة هذه الشبكات
بالاضافة ان بجوار الشركة فندق وصاحب الشركة هو ايضا صاحب الفندق وسوف اعمل ايضا مهندس صيانة الفندق
حقيقة انا فرحت جدا بالخبرة ان اخدها من هذا العمل لإني مش بس مجرد مهندس اتصالات ولكن ايضا مهندس صيانة
هيجي واحد يسال يعني ايه مهندس صيانة في فندق
هقوم اقول له يعني راجل بتاع كله يعني اي حاجة يصلح فيها مشكلة يشوف تتحل ازاي ويجيب فني لو استعدي الامر ويشرف عليهم ويجب ان تكون حلوله للمشاكل عملية وغير مكلفة
وده شئ جميل جدا لانه بيعطي خبرة في الكثير من الاشياء التي لم اكن اتوقع ان اعرف عنها شئ
وكمان فيه حاجة تانية لذيذة
ان المهندس صاحب الشركة عاش فترة في هولندا ومعلومة جديدة ليكم ان في اوروبا والدول المتقدمة الفرد العادي بيصلح اي حاجة في بيته ومش بيلجا للفني الا في الحاجات التقيلة يعني ايه
يعني كل واحد عنده في البيت شنط عدة ولو في اي مشكلة بيحلها بنفسه وده حقيقة شئ رائع
المهم فالمهندس صاحب الشركة اتعمل كده في المانيا وبقي بيعشق العدد جدا
فهو بيحب يعلم المهندس اللي شغال معاه - اللي هو انا حاليا - ان ازاي يشتغل بالعدد دي
فحقيقية اتعلم حاجات جامدة جدا واشتغلت بعدد عمري في خياتي ما تخيلت اني هشتغل بيها
حد هيجي يقول لي مال اي مهندس بهذا الكلام هقول له يا سيدي انت غلطان
المفترض المهندس انه من اي الناس وان المهندس عنده مهارة معرفة سبب المشكلة وحلها ودي مهارة مفيدة جدا لو عند حد
يتبع .......................

ياحج صدقني انت تستاهل كل خير ,,,!!!

وأتمني أن الناس اللي في قسمك السنه دي وهيتخرجوا يستفادو من الخبره دي

ويعرفوا ان الشغل عشان الفلوس مش كل حاجه ,, ولازم الواحد يشوف ايه الشغل اللي هيضيف ليه حاجه ,, مش أي شغل وخلاص !!

ومستنييين الباقي ياحج !!

Laughing

ربنا يعينك

فكره رائعه جدا ان تقوم بسرد مذكراتك ليستفيد منها الاخرين
جزاك الله عنهم كل الخير
واتمني لو يحذو كل خريج حذوك حتي يتوفر لدي الطلبه قاعدة بيانات كبيره من الخبرات التي سوف تساعدهم بالتاكيد عند بداية حياتهم العمليه

وفقكم الله

اهم حاجة ان انت خلصت منها

شكرا جدا علي كل الردود الجميلة دي

نكمل باقي الحكاية كان في نقطة مهمة جدا نسيت اذكرها
انا مؤمن ان العمل والرزق بايد ربنا زي ما كل حاجة في حياتنا بايد ربنا
وان موضوع الواسطة كش هو سبب العمل لان حتي لو معاك واسطة جامدة والموضوع مش مكتوب ليك يبقي عمرك ما هتاخده
انا كنت شايف عمال يسعي جاهدا ان يشغلني في الحكومة وانا بعمل اللي يريحه
جات موضوع المقابلة بتاعت الشركة ان ان صاحب الشركة اتصل بمهندس سابق وقاله عايز مهندس يشتغل معايا فقام المهندس كلم واحد اكبرمني بدفعة فكلمني وكلم ناس تاني فرحت المقابلة
وبعد ما عملت المقابلة بفترة اتصل بيا المهندس وسالني انت لسه ما اشتغلتش
طبعا قولته له لسه قالي تعالي بكره الصبح الساعة 10
رحت تاني يوم فقالي صاحب الشغل انه عايز مهندس يسمك شغل الشركة من تركيب انظمة المراقبة وصيانة هذه الانظمة وفي نفس الوقت يمسك صيانة الفندق وانه بيحب يشتغل كل حاجة بايديه وبيحب المهندس اللي معاه يكون نفس النظام
قلته انا معنديش خبرة في مجال العمل اليدوي بس احب اتعمل وقلتله اهم حاجة ان انا عايز اخد خبرة قالي تمام مواعيد العمل من 10 الي 3:30 صباحا ومن 8 الي 12 مساءا
فقلت سبحان الله الرزاق العليم رغم مجاولات والدي الكثير لكن هذا العمل لم ياتي من ضمن هذه المحاولات
واخذني في جولة داخل مكان العمل
وجه تاني يوم ونزلت مع الفني نركب كاميرات وساعتها بدات اتعرف علي العدة
انا طول عمري كنت اعرف الشنيور لكن في اليوم ده اتعرفت علي حاجة اسمها الهيلتي وده بقي ابو الشنيور
يعني ما بيغقتش مش بخرم حيطان لا بيخرم خرسانة مرة واحدة وماشاء الله رد الفعل بتاعه لذيذ علي دراع البني آدم
المهم جه بعد كده حاجة لذيذة خالص خدت منها معظم خبرتي في عمل الكاميرات
وهو تركيب 32 كاميرا في بازار سياحي عبارة عن دورين
فالقصة ان الكهربائي بيرمي الكابلات وبعد كده يجيي دوري -تنويه بسيط اي حزء من العمل مهما باين صغير مع تكراره بيكون مرهق جدا - اني لازم اشوف كل كبل داخل اوضة الكنترول تبع انهي كاميرا واتاكد انه شغال و العملية دي طبعا خدت اكتر من يوم دي 32 كاميرا
والخطوة اللي بعديها تركيب الجاكات - اطراف التوصيل - وبعد كده تركيب الكاميرات وعمل تيست لكل كاميرا علي شاشة تلفزيون

يتبع .......

مجهود أكثر من رااائع منك بشمهندس خــالد

جــزاك الله عنه كل خير

وربنا يعينك ويوفقك ونسمع عنك كل خير ان شاء الله

السلام عليكم ورحمة الله وبركاته

ايه اخبار المهندسين وايه اخبار الدفعة الجديدة ربنا يكرمكم ومتدخلوش الجيش
اسف للغياب لكن كله بسبب طحن الشغل
نكمل الحكاية قعدت بركب الكاميرات في البازار وقت طويل وصل لاكثر من شهر
خضت فيها تجارب لذيذة في التركيب في أماكن غريبة و زوايا معقدة علشان يكون كل المكان مكشوف للكاميرات
يعني مرة ركبت كاميرا علي ارتفاع 6 متر وانا واقف فوق سلم وبخرم بالهيلتي
المهم اتعلمت واتهبدلت في تركيب الكاميرات دي
وفي نفس الوقت في الفندق كنا حابين نعمل حمام سباحة في الفندق ودي قصة طويلة
بدات بدراسة مبني الفندق وهل العمدان تستحمل وزن حمام السباحة الذي يص الي 16 طن
طبعا الموضوع ده اللي مسكه مهندس استشاري في الهندسة المدنية
المهم وجدنا ان فيه عمود صغير ولازم سمكه يكبر
قمنا عملنا له حاجة اسمها قميص يعني قمنا بصب خرسانة حول العمود علشان نزود سمكه
ودي طبعا كانت تجربة جديدة بالنسبة لي بس كانت تجربة حلوة
واهم حاجة اتعملتها من ان العلاقة بين المهندس والفني علاقة رخامة وغتاتة
يعني لازم المهندس يغتت علي الفني والفني يرخم علي المهندس
مينفعش انها تكون علاقة ود ومحبة والا الشغل هيطلع مش كويس
وايضا في الفندق بتحدث بعض المشاكل في الشبكة الخاصة بينا وبقعد احلها بعون الله
في بداية الامر كنت بتخنق من المشاكل
لكن بعد كده اتعلمت ان احب المشاكل لاني لما اتوصل لحلها هكون اتعلمت حاجة جديدة

اولا أحب أشكر حضرتك علي الموضوع الشيق ده
ثانيا انا خريج 2009
يعني انتم السابقون ونحن اللاحقون
انت اتكلمت عن قيم كهرباء ومادخلتش على قسم المفاجآت قسم المهازل والمحسوبية
أكيد عرفت بتكلم عن أي قسم

(مدني طبعا) ولا داعي لتجريح حد بس انا عايز أقولك أني فعلا بعد مااتخرجت من قسم مدنى انا فعلا نادم علي الدراسة في هندسة أسوان أصلا ليس لعيب المناهج وغيرها ولكن للمعاملة السيئة من هيئة التدريس مش كلهم فيهم دكاترة الواحد فعلا فخور انه اتخرج من تحت ايدهم بس بأنوه علي المحسوبية أكيد عرفت انا بأتكلم عن مين؟ ما علينا انا بس اتمني ان كلية اسوان تكون افضل كلية
والله خايف علي الدفعات اللي بعد كده وربنا يستر عليهم

(الفهد الأسمر ) ...................no comment حاسب

مش عايز حد يزعل منى انا ما تكلمتش أصلا..........؟

الفهدالأسمر كتب:: انا فعلا نادم علي الدراسة في هندسة أسوان أصلا

يا اخي لكل مكان مزايا وعيوب
واساسا الناحية التعليمية فاشلة في كل كليان ليست هندسة اسوان فقط

الفهدالأسمر كتب:: بس بأنوه علي المحسوبية أكيد عرفت انا بأتكلم عن مين؟

يا اخي انا بعيد عن الكلية ومعرفش انت تقصد مين
بس انا لما كنت في الكلية مشفتش حاجة تعيب الدكاترة اللي درسوليوعلي العموم ما بني علي باطل فهو باطل وكفي

بجد موضوع نقل الخبرات من جيل لجيل دة مهم جدااااااااااااااااا..........جزاك الله كل خير يا باشمهندس وربنا يوفقك فى حياتك العملية

خالد بداية كتب:

الفهدالأسمر كتب:: انا فعلا نادم علي الدراسة في هندسة أسوان أصلا

يا اخي لكل مكان مزايا وعيوب
واساسا الناحية التعليمية فاشلة في كل كليان ليست هندسة اسوان فقط

الفهدالأسمر كتب:: بس بأنوه علي المحسوبية أكيد عرفت انا بأتكلم عن مين؟

يا اخي انا بعيد عن الكلية ومعرفش انت تقصد مين
بس انا لما كنت في الكلية مشفتش حاجة تعيب الدكاترة اللي درسولي وعلي العموم ما بني علي باطل فهو باطل وكفي

طبعا بعد كلام البشمهندس خالد ,,,, أنا مقدرش أزيد بحرف

عموما يابشمهندس الفهد الاسمر ,,, الكوسه موجوده في كل مكان ,,, حتي في الجيش

ودي مشكله تاريخيه ,,, وأصبحت عاديه وبتحصل في اي مكان في البلد

المشكله مش في الكوسه ولا الباميه قد ماهي مشكلة ,,,,, ( أشمعني )

اللي معاه كوسه واللي مامعهوش ,,, لو واحد عامل اللي عليه كويس ,,, وماشي بمايرضي الله ,,, هيحتاج كوسه ليه !!؟

انا اهوه خريج 2008 واعرف ناس دخلت وخلصت معايا ,,, وبقت كمان معيده في الكليه ,,, من غير كوسه ولا حاجه

أهم نقطه في الموضوع ,,,, أنك لو علي حق ,,,, أكيد مش هتحتاج الكوسه في حاجه

انما لو انت علي باطل ,,, أكيد ساعتها هتدور علي كوسه وباميه وحتي شوربة البردقوش

ومع احترامي لحضرتك ,,,, انما هيئه التدريس في الكليه ,,, كلهم بلا استثناء ليهم احترامهم ,,, لأنهم ربونا قبل مايعلمونا

****** وبالنسبه لخالوووود باشا ............ فمعاليك من حلاوة القصص بتاعتك ,,, أنا بجد أصبحت بغيييير أوييي

وخلاااااااااااااااااااص بعد أذنك ,,, هنزل برضو يوميات ليا في موضوع سيادتك عسي انه ينفع الناس

بيضحك 3

والله الموفق

@@ مذكرات مهندس ,,,,,, منفووووخ @@

أهلا وسهلا بكم ,,في مذكراتي المتواضعه

واللي بحكي من خلالها تجربتي مع الشغل ,,,, والشغل فقط ,,, عشان الناس دماغها ماتروحش بعيد

ونبتدي ,,,,, ونتوكل علي الله

مزأطط

&& البحث عن الشغل &&

طبعا زي ما الناس كلها تعرف ,,,, أن أصعب بدايه في الشغل هي أنك تلاقيه الأول

وانك بعد كده تثبت نفسك فيه ,,, وتصبر عليه

وده اللي انا بحاول اتعلمه ,,,,, ومهما حصل معايا ,,, لسه برضو هتعلم ,,, وربنا يوفقني

*** البدايه

وضربه البدايه معايا كانت من قبل ما اخلص امتحانات الدبلومه بتاعتي بمسافه

( معلومه لمن لا يعلم ,,, انا بعد التخرج اتجهت لعمل دبلومة تشييد وادارة مشروعات في الاكاديميه البحريه ,,, والحمد لله خلصت امتحاناتي ونجحت فيها , بس واقفه معايا علي المشروع ,,, مشروع الدبلومه ,, وربنا يسهل الامور )

الغرض من اني دورت علي شغل قبل ما اخلص امتحانات اني اكون علي علم ودرايه ولو قليله بالشغل وظروفه في الاسكندريه

لأني اساسا مش من اهل الاسكندريه ,,, فمعرفش ايه ظروف الشغل عندهم هناك

دامت وطالت رحلة البحث عن عمل ,,,, وكنت بدور علي شغل في الأماكن التاليه

نقابة المهندسين - نادي نقابة المهندسين

في لوحة الاعلانات في اي فرع لنقابة المهندسين في اي حته فيكي يابلد بيبقي فيها اعلانات لشغل ,, شركات بتبقي عايزه مهندسين من اهل البلد نفسها ,, وبتبقي دافعه فلوس لقاء اعلان فرصة العمل دي
مما يعطي جديه شويه في الاعلان ,, انه اعلان حقيقي مش اعلان هزار يعني

وجريدة الوسيط - فرع الاسكندريه

ودي بيبقي فيها اعلانات كتيير جدا لدورات ووظائف وكل حاجه ,,, ودي اللي لقيت فيها اعلانات لوظائف اتقدمتلها والحمد لله منهم الشغلانه اللي شغال فيها دلوقتي

&&&&&&&&&&&&&&

أول مقابله ,,,,,,,,, ولكن !!

قرأت اعلان في الوسيط عن شركة اساسات تطلب مهندسين مدني

ولما تشاورت مع اصدقائي المهندسين ( تعرفت واتصاحبت عليهم ,,, وهم من الاسكندريه ,, ناس زي العسل ) ,,, واللي بالصدفه برضو كانو بيدوروا علي شغل معايا للسبب التالي

ان معظمهم كان شغال مع مقاول ,,, ومدة المشروع انتهت ,,, فبيدوروا علي شغل تاني بظروف ومقابل احسن !!

المهم رحنا قدمنا ,,,, وعملنا مقابله ,,,, وكان الملاحظ في شغل الاساسات ان الشركات كانت بتطلب دايما مهندسين

ولما استفسرت ,,,, قالولي ان خبرة الاساسات والخوازيق في ارض الواقع مابيبقاش فيها جديد

اخرها خالص ,,,, شهرين او تلاته ,,, وتكون لميت بكل الخبره اللازمه ,,,, والباقي بيبقي تكرار

شغل تكرار ,,, مافيش اي جديد

تعمل عمليه وتدخل في التانيه ,,,, مافيش جديد

وطبعا حاجه زي دي بتقتل المهندس ,,,, وطبعا كان معظم المهندسين بيسبوهم عشان كده

وتلاقيهم باستمرار محتاجين مهندسين ,,,, فالمهم رحت ودخلت

وسألني طبعا ,,,,, ايه خبراتك وتقديرك وموقفك من التجنيد ,,, وبسسسسسس

وعلم علي رقم تليفوني ,,,, وقاللي هنتصل بيك يابشمهندس

cheers

,,,,,,,,,, وتمر دقايق وساعات وايام واسابيع وشهور وسنين ( معلش وسعت شويه ,, انما تمشي )

المهم ماخصلش نصيب ,,,,,,,, وعرفت بعد كده ان ده الطبيعي في اسكندريه ,,, وعموما في اي مكان

^^^^^^^^^^^^^^^^^^^^^^^^^^^^^^

lol!

ثاني مقابله ,,,,,,,,,,,,,,, وكانت !!

تاني مقابله ,,,, مكنتش مقابله ,,, قد ماكانت هزار

رحنا ,,,,, ثلاثي اضواء المدينه ( اصلنا كنا تلاته ) ,,, لمكان الشركه التانيه

ودي علي سمع منا ,,,,,,,, انها كانت او بتحتاج دايما مهندزين

ورايحين هناك ,,,, وكان المكتب بتاع الشركه جوه الموقع

الشركة مقرها الرئيسي في القاهره بس شغاله في عمليه في اسكندريه

وسمعنا انها محتاجه مهندسين في العمليه دي

المهم رحنا هناك ودخلنا الكارفان بتاع المهندس المختص

ورد علينا وقالنا انه هيبعت السي فيهات دي الي الأتش أر ( Human Resourses ) عندهم في الشركه ,,, وبرضو هنبقي نتصل بيكم يابشمهندزييييييييييين !!

cheers

$$$$$$$$$$$$$$$$$$$$$

المقابله الثالثه ,,,,,,,,,, بـ 600 جنيه يابلاش

صاحب من اصحابي الله يمسيه بالخير ,,,,, كان أقنعني وقاللي اروح اقدم في مكتب مقاولات

هوه راح قدم فيه ,,, بس ماعجبوش الراتب ,,, حيث كان فقط 800 جنيه في الشهر

واقنعي وقاللي مدام انت دلوقتي مش فارقه معاك راتب ,,, اشتغل معاهم شويه وأخدت خبره شهر ولا حاجه ,, بدل القاعده اللي في البيت دي

المهم ,,,,,,,,, وبدون أبداء أي أسباب أخري

scratch

ذهبت للعمل المقابله ,,,,,,,,,,,, ورحت للمكتب

lol!

واتكلمت مع البشمهندس الحاج هناك ,,,,,,,,, واتكلم معايا

وقاللي احنا هنجربك الأول ,,,, وهنوديك مشروع ,,,, ولما تثبت نفسك في حاجه معينه

( بند معين )

زي خرسانات او تشطيبات ,,, هيبقي البند ده تبعك في اي عمليه تانيه لينا

والمرتب عندنا من 600 - 800 جنيه

ضحكت جوايا ,,, وأفتكرت مقولة عادل امام المشهوره بتاعتة في شاهد ماشافش حاجه

( هوه انت بتاخد كام ؟؟

7 جنيه

في الشهر ؟؟

اه , في الشهر

طب وعندك كام عيل ؟؟

عندي 7 برضوا ,,

في الشهر ؟؟؟؟)

ههههههههه ,,, ودارت المسرحيه كلها في رأسي ,,,, وقال ايه

بيضرب نفسه

انا اللي كنت في يوم من الأيام حاطط في دماغي ان اي عمليه هدخلها هحط حدود ليها

يعني يكون ليا بوكت مني buket money ,,, بكذا

(buket money),, وهي الفلوس اللي بتبقي زياده علي المرتب وبتبقي لزوم اتصالاتك في الموقع ومواصلاتك واللذي منه

ويعني يكون ليا مرتب بكذا ,,, ويكون ليا كذا وكذا

طبعا ,,,,,,,,,,,, كلها أحلام أصطدمت بشاطئ الحقيقه المره

بيبكى 2

وروحت البيت ,,,, وأنا بغني أغنيه واحده بس

عين 2

الساعه بخمسه جنيه ,,,,,,,,, والحسابه بتحسب

cheers

مهندس بـ 600 جنيه ,,, واللي يشتري ,,,,,,,, يابلااااااااااااااااااااااااااش

scratch

%%%%%%%%%%%%%%%%%

والي اللقاء مع المقابله الأخيره لي ,,,, ومع أبو شبانه lol!

,,, عدنا

المقابله الرابعه والأخيره ,,,,,,,,,,, ومكتب أبو شبانه

كنت قد وصلت لمرحله شبه حرجه مع اليأس ,,,, ولحدوث ظروف أخري لي

جعلت ما أمر به في أي لحظه هي مسرحيه كومديه تراجيديه ,,, بلا معني

المهم ,,,, كانت هذه المقابله هي الأحرج ,, فعلا ,, الأكثر حرجا في تاريخ حياتي

والسبب ,,, اني لما رحت هناك ومع المقابلات المفرحه للغاية والبشاير اللي بتبشر بيها كل يوم

حيث اني كنت بتابع الشغل في أسوان والأسكندريه في نفس الوقت بحيث أنها يوم ما هتزنق معايا

هنزل أسوان أشتغل ,,, واللي فيها تجيبه ,,, ومكنتش هتفرق معايا أشتغل ولو شهرين وأسيب الشغل تانيي عشان معايا مشروع الدبلومه في الاسكندريه ,,, لازم أسافرله

فعشان كده كان البحث عن شغل بالنسبالي في اسكندريه مطلب هام جدا ,,, وضروري جدا جداا

المهم نرجع للموضوع ,,,, دخلت للبشمهندس في المكتب

وقاللي السؤال المعهود ,,, انت خريج كام وايه خبراتك

قولتلك ,,, علي الحديده

قاللي ,,,,,,,, خالص !!

قولتله ,,,,,,,,,, جدا جدااا جدااااا ,,, وأصل الظروف اني كنت بعمل دبلومه ,,, وحكيتله قصه حياتي

المهم خلاصة الكلام ,,, قاللي ان المشروع اللي هم عايزنله مهندزين في الكينج مريوط ,, فندق بيتبني هناك

وأنا كنت عايز مهندسين عندهم خبره ,,, بحيث ان المشروع بعيد

فأنا مش هقدر أحطك تحت عيني علي طول ,, لأنك حديث التخرج

المهم ,,, قعد يتكلم بنفس الطريقه ,,, وأنا قاعد قدامه ,, وعمال أنكمش وأخس ووشي يصفر

طيب خلاص ياعمونا ,,, أمشي بقي ,, إلا أبدا

المهندس قعد يتكلم شويه ,,, باين عليه أعجب بقصة كفاحي

المهم قاللي انه فيه مشروع تاني عندهم في المكتب ,, هيحتاج فيه مهندسين ولو حديثي التخرج

وهنكلمك يابشمهندس ,,, سيب السي في بتاعك

( المقوله المعتاده )

المهم ,,, خرجت ,,, وأنا جااااايب جاز وجميع انواع ومشتقات البترول

خرجت وقعد أطلع في غلبي ,,, علي الناس اللي معايا

قعدت أتريق ,,,, وأضحك عشان أفك عن نفسي

قعدت أقولهم ,,, مكتب أبو شبااااانه ؟؟!! ,,, ناقص بكره تقولولي مكتب أم سحلول

روحوا يابتوع شبانه ,,,, ولما فضيت بيني وبين نفسي ,,, مقولتش غير كلمه واحده بس

هي السبب في اني استلمت الشغلانه اللي مكنتش مكتوبالي

الحمدلله

المهم ,,,, أتصل بيا بعدها البشمهندس اللي كان عمل معايا الانترفيو ,,, بعدها باسبوعين

انا كنت ساعتها باخد دوره علي حسابي الخاص ,, دورة أوشا ( أمن صناعي ,, وهي كوسات معتدمه بمنظمة الأوشا الأمريكيه ,,, حيث الأوشا هي هيئة السلامة والصحه المهنيه الامريكيه ,, ودي كنت باخدها عشان المشروع بتاعي )

المهم الدوره كانت 3 ايام ,,, 10 ساعات في اليوم ,,,, بـ650 جنيه

lol!

يعني دفعت في 3 ايام ,, أكتر من مرتب شهر كان معروض عليا في المكتب اياه

المهم ,,, أتصل بيا ,,, روحتله بعد ماخلصت الدوره علي طول الساعه 10 مساء

وقاللي ان الظروف سمحت ,,, وأنه ممكن يستعين بمهندس مدني حديث التخرج في الموقع لأنه هيبقي هناك علي طول والمشروع ضخم علي مساحة 7 أفدنه

المهم ,,, ولأن المشروع كان كبيييييييييييير ,,, وكان لسه في بدايته ,, قبلته

بس أصحابي اللي معايا ,, حذروني من نقطه

ولأن العمليه كانت عملية رزق ,,, فكان لابد من عدم التهاون في مثل تلك الأمور

النقطه المهمه وهي ان الفندق 5 نجوم ,,, فعشان يبقي 5 نجوم لابد من تشطيب عالي و ,,,,,,,,,,,,

يكون فيه بااااااااااااااار ,, بيكون يقدم الخمور

فكان لازم استفسر وأسأل

المهم ,,,,,,و نسيت أسأل لمدة أسبوع تقريبا

ولما جيت سألت المهندس الأستشاري اللي معانا في الموقع

قاللي اه ,,,,,,, فيه باااااااااااااااااااار

affraid

يانهااااااااااااااااااار مدوحس ,,, يانهااااااااااااااااااار مش فايت

يافرحه ماتمت ,,,,,,,,,,,, ولسه هكمل وأولول

قاللي بس ماتخافش ,,,, مابيقدمش خمور

قولتله متأكد ؟؟ ,,, قاللي اه

عادي ,,, الفندق ملك لواحد من أثري أثرياء الأسكندريه

اسمه محمد رجب ,,, وهوه صاحب أفخم مول في الاسكندريه

مول جرين بلازا ,,,,,, وهناك برضو عامل فندق 5 نجوم ومأجره للهيلتون وبرضو مابيقدمش خمور

وأنا واثق ,,,,,,,,,,, ماتخافش

هنا ,,,,,,,,, تنفست الصعداء ,,,,,, وأرتاحت الأجوااااااااااااااااااء

و ,,,,,,,,,,,,,,,,, أستلمنا الشغل

lol!

ضربة البدايه ,,,,!!

وكانت البدايه معي في أول شغل لي ,,, مع الناس دول

ويبدو أن لي موعد مع القدر ,,,, لكن بدون ميعاد مسبق

وابتديت المشروع معاهم ,,, وكان الحمد لله في بدايته

في الحفر لسه

المفروض اننا بنحفر الجزء الخاص بينا في الفندق

حيث أن الفندق مقسم لثلاث أجزاء ,,, تطبيقا لسياسه ( ماتحطش صبعك تحت ضرس حد )

المهم احنا مكتب ابو شبانه واخدين جزء a ومكتب البشبيشي ( مش عاوزين تريقه ) واخد جزء b ,, ومكتب سياك واخدين c

المهم ان الجزء بتاعنا كبير أساسا ,,, ومقسمينه لأربع أجزاء

a1 , a2 , a3 , a4

وكل جزء بيتم حفره بيجي الاستشاري يستلم ,,, بس بيستلم بطلوووووووووع الروح

انا قبل كده نزلت تدريب مع بشمهندس زميلي وشوفته بيستلم حفر وهوه مهندس مالك كمان تبع الحكومه ,,, بصراحه ماشوفتش كده !!

أستلام بالتيله ,,, ولو ليه زياده هياخدها

حيث انه مسموحلنا بنقص 10% فقط من الحفر

يعني احنا منسوب الحفر عندنا 5,20 متر ,, يبقي مسموح لنا فرق في حوالي 5 سم بسسس affraid

أه ,,, تصور أنت

5 سم ,, وده ليه ,, لأنه كمان هيحط طبقة دمك عليهم مقدارها 1,25 متر

يعني لو منسوب الحفر شافه ناقص 7 سم ,, يقولنا خلي اللودر يمسح الحته دي تاني

ويكت كمان ملاحظاته ,,, فكانت بهدله

أنا في نفسي قولت اني اقل واجب هطلع بيه هوه كمان خبره الاستشاري نفسه اللي بياجي يستلم

انك عشان تبقي استشاري صح ,,, لو ماشوفتش الحاجه بتتنفذ صح قدامك ,,, وعرفت اللعب فين

يبقي مهما كنت مفتح ومهما كنت حافظ ,,, هتلبس في أتفه حاجه ,,, وقدام عيني حصل الكلام ده !!

*************

خلص الحفر , وسلمنا الأجزاء بتاعتنا حفر ,,, ناقص نبدأ طبقات الأحلال وندمك

بس ,,,,,,,,,,,, ولكن ,,,,,,,,,,,,,, نقصانا حاجه صغيره قد كده

الميه ,,,,,,, lol!

مافيش ميه في الموقع عشان ندمك بيها ,,, وحيث ان كمان الدمك مش زلط بس ولا رمل بس لأ ,,, ده مخلط

المهم قدمنا علي ميه ,,, ووصلت المقايسه ,,,,, وقاعدييين ننتظرررررررررر!!

بس ,,,,,,,,,, هل أنت واخد مرتبك عشان تقعد يابشمهندس ,,, لأ ميصحش طبعا

عندك لوح ,,,, ومعاك الكارفان بتاعك ,,,,, وورقه وقلم ,,, وأقعد معانا أحسب

وخد الجزء ده خلصه ,,,, وراجع علي زميلك وخللي زميلك يراجع عليك

لقيت نفسي في الموقع قلبت مكتب فني ,,, نعمل حصر خرسانه وحفر وردم وحديد ,,, ولو فاضي كمان ممكن اعمل بريمافيرا

حاجه أنا مكنتش أتوقعها ,,,, وكنت محتاجلها جداااااااااااا

المهندس الحقيقي عباره عن فنيات تنفيذ مع مهارات المكتب الفني

انك تنفذ صح وتحصر اللي بتنفذه عشان حقك تطالب بيه ,,, هوه ده اللي العامل بيعمله فهل أنت مش هتقدر تعمل زي العامل ده يابشمهندس !!!

معتقدش scratch

المهم ,,,,,,,,, قعدنا نحصر ,,,,, ولازلنا بنحصر ومع الحصر أنت بتعمل غصب عنك coordintion

توقيع اللوح علي بعضها ,,, يعني تشوف الانشائي والمعماري وتوقعهم علي بعض ,, لايكون المعماري حاطط حيطه الانشائي ناسيها ,,, ولا يكون الانشائي حاطط حاجه زياده مالهاش لازم او ماينفعش انها تتنفذ

وفعلا كنا بنطلع بلاااااااااااوي ,,, وكنا بنكت بيها ملاحظات

والبشمهندس بيكتب بيها جواب للأستشاري ,, ولو وصلت بيبعتها للمالك نفسه

فله الحمد ,,,,,,,,,,, كتر العك علّم الواحد حاجات كتيييييييييييييييير

ده غير الوقت الممتع جدا اللي بقضيه هناك في وقت البريك

يعني هناك اتعرفت واتصاحبت كمان علي عبد الحميد ,, وده الحارس بتاع الموقع

وعم حسن ,,,,,,,,,, وده سواق الباص اللي بروح معاه الموقع وبروح معاه

وعم حماده خليفه ,,,, وده الكوماندا بتاع العمال هناك ,,,, وفاتح مكتب مقاولات في الخباثه كده في الصعيد

واتعرفت علي ناس كتيييييييير اويى ,,, منهم العرباويه اللي في المنطقهه هناك

afro

والحارس بتاعنا كان معاه سلاح ابيض لزوم الديفنس عن النفس ,,, بروح الطخ عليه وأخده منهم أتعلم عليه

وأخر مره كنت هفتح بيه بطني ,,,,,,,, معلش أصلها أول مره ليا ,,, وهي أساسا مطوه قرن غزال

lol!

وهنا ,,,,,,,, ومازالت مده المشروع 18 شهر قابله للزياده

والمشروع ضخم وهم جايبين 3 مهندسين عشان التلاته يشتغلو مع بعض

ويلخموا الأستشاري ,,, فالاستشاري مايعرفش يلاحق علي مين ولا مين من المهندسين التلاته lol!

والعمليه تمشي ,,,,, وبعد كده أكتشفت أني بشتغل مع مكتب وطاقم عمل من الضاهريه

يعني أكثر منطقه شعبيه في الاسكندريه كلها ,,,, عشان كده المطاوي والتعامل هناك بيكون بطريقه ,, مختلفه شويه عن أي منطقه تانيه في الاسكندريه

lol!

المهم ,,, عشان يبقي خبره موقع ومطاوي وكمان سواطير جايه في السكه ,,, يعني من الأخر أنا مشروع مهندس ,,,,,,,,, ربنا يستر عليه !!!

ودعواتكم ,,,,,,

وفقكم الله

ايه الحلاوة دي يا سمعة

بجد حسيت دلوقتي فعلا ان الموضوع بقي ليه قيمة
بعد مذكراتك دي واسلوبك الرائع اللي كله انفعالات
ربنا يكرمك يا سمعة وفعلا مستني بقي مذكراتك بس عايز تفاصيل زيادة
ووهحاول عنوان الموضوع علشان يايق بمذكراتك

خالد بداية كتب:: ايه الحلاوة دي يا سمعة

بجد حسيت دلوقتي فعلا ان الموضوع بقي ليه قيمة
بعد مذكراتك دي واسلوبك الرائع اللي كله انفعالات
ربنا يكرمك يا سمعة وفعلا مستني بقي مذكراتك بس عايز تفاصيل زيادة
ووهحاول عنوان الموضوع علشان يايق بمذكراتك

الله يكرمك ياخالود ,,,,, وبجد متشكر كتيير أوييي

وبالنسبه للتفاصيل ,,, هتكلم معاكم عن يوميات مفصله في اللي انا اشتغلت فيه وخصوصا في الحصر وازاي كان بيتم ,,, وشويه تفاصيل كده ,, ممكن هتلاقوها مضحكه شويه ,,, أنما هوه ده اللي كان بيحصل معايا ,,, فمعلش بقي أبقو أستحملوني شويه !!

وإلي لقااااااااااااااااااااااااء وأمااااااااااااني وسلوي ورجااااااااااااااااء والأخت عزه كمان lol!

,,,,,,,,,,,,,, يتبع

بيضحك 2

اقتباس :: يعني أكثر منطقه شعبيه في الاسكندريه كلها ,,,, عشان كده المطاوي والتعامل هناك بيكون بطريقه ,, مختلفه شويه عن أي منطقه تانيه في الاسكندريه

المهم ,,, عشان يبقي خبره موقع ومطاوي وكمان سواطير جايه في السكه ,,, يعني من الأخر أنا مشروع مهندس ,,,,,,,,, ربنا يستر عليه !!!

ودعواتكم ,,,,,,

ربنا يكرمك يا بشمهندس

موضوووع رااائع يا بشمهندسين

و أدينا اخدنا فكرة عن سوق العمل و لو انى جالى إحباط بس خير إن شاء الله

و ربنا معاكوا بجد دى معناه و كفاح ...الواحد كان فاكر لموضوع أسهل من كده

و أنا بقترح على البشمهندس إسماعيل إقتراح فى الخباثه كدة

..هتلك مطوى يا بشمهندس إحتياطى محدش ضامن الدنيا تليل وواحد متعصب و مش شايف قدامه يتهور علييك..

أهو تأمن نفسك ...و ياريت متقولش لحد لحسن يقولوا أنى بعلمك التشرد ملاك

Nile's daughter كتب:

اقتباس :: يعني أكثر منطقه شعبيه في الاسكندريه كلها ,,,, عشان كده المطاوي والتعامل هناك بيكون بطريقه ,, مختلفه شويه عن أي منطقه تانيه في الاسكندريه

المهم ,,, عشان يبقي خبره موقع ومطاوي وكمان سواطير جايه في السكه ,,, يعني من الأخر أنا مشروع مهندس ,,,,,,,,, ربنا يستر عليه !!!

ودعواتكم ,,,,,,

ربنا يكرمك يا بشمهندس

موضوووع رااائع يا بشمهندسين

و أدينا اخدنا فكرة عن سوق العمل و لو انى جالى إحباط بس خير إن شاء الله

و ربنا معاكوا بجد دى معناه و كفاح ...الواحد كان فاكر لموضوع أسهل من كده

و أنا بقترح على البشمهندس إسماعيل إقتراح فى الخباثه كدة

..هتلك مطوى يا بشمهندس إحتياطى محدش ضامن الدنيا تليل وواحد متعصب و مش شايف قدامه يتهور علييك..

أهو تأمن نفسك ...و ياريت متقولش لحد لحسن يقولوا أنى بعلمك التشرد ملاك

هههههههههههههه ,,,, بعد أذن حضرتك ومع أحترامي

أنا شغال في أرض كلها كانت ملك للعرباويه ,, وضع يد ,,, وكتييييييييير أوي مهندسين قبلي طلعو عليهم العرباويه بالسلاح أثناء ماهم شغالين بنا في الموقع

بيطلعوا يقولو الأرض دي أرض أجدادنا ,,, وأرضنا ,, وأحنا عايزين تفتوفتنا ( عمولتنا ) ,,, ولو قولتيلهم لأ ,,, توصل معاهم لأنهم يضربو النار

عشان كده مافيش مشروع يتعمل في أرض صحرا ,, إلا لما يدخلو فيه عرباوي يبقو هم تحت حمايته ,, عشان العرباوي مش هيقدر يمد أيده علي ناس في حماية عرباوي زيه

أحنا مثلا العرباوي اللي احنا تحت حمايته أسمه السيد ,,, وياما حصلت مهاترات بينا وبين العرباويه قبل سابق ,,, وكله بياجي فوق دماغ المهندس

لأن العرباوي مالوش دعوه بالعامل ,,, العامل أخره اليوميه ,, أنما المهندس هوه المسؤل

فعادي يعني لو معايا مطاوي الأولي والأخره ,,, مش هتكفي فرقة القناصه دوول ,, اللي حياتي بالنسبالهم ولا تسوي غير تمن الرصاصه اللي هتنضرب فيا!!

ده انا أتحكي لي مهاترات ومجازر للمهندسين ,,, وخصوصا في الأسكندريه ,,, وفي المناطق الصحراويه زي اللي انا شغال فيها ,,, وربنا يستر

عشان كده لايحبذ البحث عن المهندسات للعمل في مثل تلك المواقع ,,, المواقع دي للمهندسين الرجاله ( المستبيعين ) فقط ,,,

,,,,,,,,,,,,,, وعدنا cheers

الأسبوع الأول ,,!!! ,, حفر وفحت ,,,, تحت منسوب الصفر !!!

زي ماقولت أني نزلت المشروع أول يوم في عربية المهندس مدير الموقع بعد مازرت عدد من الفيلات اللي هم كانو شغالين فيها تبع مكتب المقاولات اللي انا اشتغلت فيه

منهم فيلا للفنان التشكيلي والمعماري المشهور المعروف فتحي محمود ,, واللي مقامه علي مساحه 18 فدااااااااااااااان !!

دخلت الفيلا من جوه ,,,, وهي عباره عن وهم كبييييييييييييير اوييييييييييي !!!

الفيلا فيها مطبخ فلكي وجواها حمام سباحه ونافوره وفي الجنينه في برضو حمام سباحه تاني

الخارجي للولاد والداخلي للأناث ,, وعندهم أوضتين ساونا وكل الأوض فيها تاكييف ,,, ماعدا اوضة الشغاله ,,, فيها مروحه بس

وعندهم ,,,,,,,, غااابه فيها جميع أنواع المحاصيل ,,, 10 أفدنه ,, , ومقولكوش الفيلا معمول فيها تشطيب أزاي

وزورت كام فيلا أخري في الكينج ,,, وبعد كده رحت الموقع عندنا ,,, ألي أرض الواقع

وهناك كان اول يوم ليا ,,, كان بيتم تسليم الاستشاري مناسيب حفر

وفضلت انا مع العامل اللي معاه القامه ,,, متابع معاه ,,,, والمهندس التاني مع المهندس الأستشاري

وشوفت ازاي بيتم تسليم مناسيب الحفر ,,, علي حق

والملاحضات اللي بتتكتب ,,, والتقرير النهائي لتسليم الجزء ده

علما بأن الجزء الذي تم تسليمه هوه a2 ,, وأحنا أساسا الجزء بتاعنا a مقسم لأربع أجزاااء !!

طبعا لما أقعد 3 ساعات بسلم في جزء مايجيش 100 متر ,, وفي أول يوم ,, والأستشاري كان ماشاء الله عامل معانا الواجب وزياده

يعني احنا حفرنا 5,20 متر ,, وهنحط فيها 1,25 متر ردم ,,, مش رمل بس ولا زلط بس ,, لأ مخلوووووووط

وده كله ,,, والبيه سامحلي بس بـ 10% فرق في مناسيب الحفر

يعني لو لقي حته زايده 10 سم ,, يقولنا خلي اللودر يسوي الجزء ده تاني ,,, رغم أن الـ 5 سم دي مرميه في الأحلال

والأحلال نفسه ,, هيبقي فيه وفيه وفيه ,,, لأنه هيتم علي 5 طبقات ,, وعند الأنتهاء من كل طبقه يتم أرسال عينات الي المعمل ,,, لمعايرة نسبة الدمك ,, وعند التأكد من المعايره تمام وأن نسبة الدمك في الموقع 95% أو أكثر ,, بيتم عمل الطبقه اللي بعدها

يعني من الأخر كده ,,,, هناخد شهر رمضان كله وأحنا بس بندمك ,,, وبالطبع الوقت ده أحنا مش هنقعد حاطين ايدينا علي خدنا

فطبعا ,,,, كان هيغمي عليا من فرط المفاجأه والذهووووووووووووول ,,,, انما ,,, سبحان الله ,,,, صمدت !! scratch

وأحنا حاليا واقفين بسبب أنه مافيش ميه نعمل الدمك عليها ,, وده بعد ماسلمنا كل الاجزاء بتاعتنا ماعدا جزء واحد بس فيه الرانب ( وهو عباره عن جسر ترابي للكساحات واللودرات لكي ينزل الي اسفل ويتم عمل خلط مادة الدمك ( السن والرمل ) لأنه مش هينفع يخلطهم من فوق ويرميهم لأن المسافه عاليه (5,20 متر ))) فعليه أحنا منتظرين الميه ولأنه مافيش ميه !! ,, فبنيجي الموقع نعمل حصر هندسي ,, ( نقلب مكتب فني ,,, ونطلع أرقام ,, ونوديها الأستشاري يوافق عليها)

يعني عملنا حصر ردم ,,, وطبعا أنا عانيت الأمرين عشان أعمل الحصر ده ,,, وجربت برامج كتير جدا ,,, من السيرفر إلي اللاند ديسكتوب ,,, وبرضو لأنعدام الخبره مش قادر أجيب اللي انا عايزه

لغاية ما المهندس اللي معايا مشاها بطريقة المتوسطات ,,, وفهمني ازاي تتعمل ,,, ورغم انها فيها خساره لينا ,, لأنها بتاخد متوسطات ,,, يعني من الأخر لو عندك متوسط المناسيب عندك ثابت (مناسيب الارض عندك الفرق مابينها من 5:10 سم ) ,, وحفرت علي منسوب معين ,, فعند أستخدامك للطريقه دي ,, مش هتخسرك كتيير ,, أنما لو عندك فرق مناسيب عاليه وواطيه كتييير أوي

فالطريقه دي هتخسرك كتييير وأحسنلك أعملها بطريقة القطاعات ,,, وهتعرف الفرق !!!

المهم ,,,, عملنا حصر للحفر ,,, وطبعا حصر الردم أسهل ,, لأنك في الحفر عندك مناسيب الأرض الطبيعيه بتختلف أنما في الردم ,, عندك منسوب سطح الردم ثابت ومنسوب الحفر ثابت فبتجيب الحجم !!

وخلصنا حاليا حصر خرسانات القواعد والميد ,, هنبدا في حصر الحديد في القريب العاجل جدا ,, واللي هيتزامن مع رمضان واللي هبدأ فيه دوره أخري بعون الله هبدأ فيها ,, دورة توتال أستيشن ,, منحه مقدمه من وزارة الصناعه ,,, ولمدة 3 أسابيع ,, هرجع من الشغل علي الدوره عدل وأبقي أفطر في الشاااااااااااارع ,,

بيبكى

,, وفي الحلقة القادمه ,,, هتابع معاكم وبالتفصيل الأكثر من ممل ازاي احنا شغالين حصر في الموقع ,,,, واللي تقريبا كده شكلنا هنخلص حصر للمشروع كله ,,, من قبل ما نبتديه !!

بيبكى

» خطرفات مهندس !! ( الموضوع المنافس الأول (1) لموضوع شطحات مهندس ) ..
» CSI SAP2000 v14.1.0
» حوار بين اب مهندس كهربا وابنه مهندس الكترونيات
» دعاء مصرى مطحون
» دعاء مواطن مصري مطحون