ذاكرتك الجديدة عن طريق (USB)

ذاكرتك الجديدة عن طريق (USB)




قبل ما نبدأ أعرف دول الأول :
(RAM) : هى شريحة الكترونية توضع داخل جهار الكمبيوتر وهى مسئولة عن ذاكرة الجهاز المؤقتة.
(USB) : هو منفذ خارج جسم الكمبيوتر يوصل به الفلاشات والريدر والطابعة وأشياء أخرى.

============ ====

*
كتير مننا بيتخنق لما حد يديله معاد وبعدين مايجيش فى معاده .. ويتخنق
أكتر لما ما يجيش خالص .. وبعدين تيجى تقوله وتتعاتبه على كده يقول لك:
"يووووه !!!! .. والله يا أخى نسيت"..


*
كتير مننا بيتخنق لما تطلب من حد حاجة.. ويعشمك صاحبنا.. وبعد كده ما
يقمش بالمطلوب فتيجى تعاتبه على اللى حصل يقول لك: "يوووووووووه!!!!. يا
أخى أنا مخى دفتر؟!!! "..

*
كتير مننا بتخنق لما يكون شغال على برنامج تقيل ورخم شوية ع الكمبيوتر
وتيجى تحفظ اللى عملته من ساعة تلاقى الجهاز ماااات ومش راضى ينطق خالص ..
تيجى تعاتبه وتقول له: ليه كده؟ .. يقولك " There is no Enough Memory" يعنى بالعربى الفصيح "هو أنا راماتى دفتر ؟!!!!!!!!".

*
كتير مننا بيتخنق لما تيجيله فكرة حلوة وبعد كده تروح منه.. يحاول
يجبيها.. (مفيش فايده) ..تيجى تعاتب نفسك فتقول لك: "يا سيدى ..جل من لا
يسهو!!"




ما تجيب من الآخر .. وإيه المشكلة بالضبط ..



الخلاصة
هى مشكلة (ضرب المواعيد) بسبب أو بغير سبب.. والتنفيض لخلق الله
..والنسيان الكتير .. اللى معظمنا بيعانى منه من الآخر فى الفكرة دى
هانتخلص فيها إن شاء الله من كل ده وبطرق عملية زى ما اتعودنا مع بعض...




وده من إيه ولا مؤاخذة ؟



كل
المشكلة دى ليها سببين بس وما لهاش تالت .. وهما مذكورين فى كلمتين
والكلمتين فى آية فى سورة (طه) عندما عصى آدم ربه وأكل من الشجرة التى
نهاه عنها سبحانه فقال الله تعالى: "ولقد عهدنا إلى آدم من قبل فنسىَ ولم
نجد له عزما".. كل القصه فى السببين دول : (فنسى) .. (ولم نجد له عزما).




المشكلة الأولى : (فنسى)



غصب عنى مش بايديا



هاتقولى
والله الواحد مش عاوز (ينفض لحد) ولا فى دماغه كده خالص... كل الحكايه إنه
بينسى والنسيان مش بإيدى ... هاعمل إيه يعنى؟!!.. وتقوللى كمان حديث
الرسول صلى الله عليه وسلم: "رُفع عن أمتى الخطأ والنسيان وما
أستكرهواعليه".. يعنى ربنا كمان مش هايحاسبنى على النسيان ده لأنى ما ليش
فيه دخل .. طبعا هتلاقينى فى وشك عِدل وهاقولك إن ربنا عطانا وسائل لعلاج
النسيان والتغلب عليه .. وما أنزل الله من داء إلا وأنزل معه الدواء...
طيب وإيه العلاج والحل يا أبوالعريف .... طبعا الإسلام هو الحل .. وخليك
معايا لحد الآخر ...




عليت راماتى .. وانتا إيه نظامك ؟



كان
عندى مشكلة فى الجهاز بتاعى وهيا إنه بيكون بطىء جداً جداً وهو بيحفظ أى
شغل بعمله خصوصاً لو كان الشغل ببرامج غسلة زى برامج (الجرافيك) كدا...
طيب وإيه العمل؟.. بعضهم نصحنى إنى أبيعه وأشترى حاجة محترمة من بتوع
اليومين دول.. بس منين يا حسرة واللى رايح أكتر من اللى جاى.. لكن مهندس
زميلى فى الشغل لقانى زعلان طهقان مدايق...، قالى: يا عم المشكلة بسيطة
خالص .. إنتا ممكن (تعلَّى الرامات) .. يعنى تشترى رامة تانية جنب الرامة
بتاعتك الأصلية.. عشان يساعدوا بعض.... ما كدِّبتش خبر.. رحت جرى اشتريت
رامة 512 بجنب اللى عندى 256 وعليت راماتى .. ودلوقتى جهازى شغال كفاءة
وزى الفل... على الأقل أحسن من الأول بكتييير.



رسايل خطأ من )الويندوز( بتاعك



إذا مخ سعادتك عطاك رسايل خطأ زى :

ـ معلش يا أخى ... هوا أنا مخى دفتر

ـ زى بعضه .. بكرة إن شاء الله

ـ يووووووووووووووووه .. والله نسيت

ـ جل من لا يسهو

ـ امسحها فيا المرادى

تعرف ع طول إن (الويندوز) بتاعك تعبان و (رماتك) مش تمام ...




قانون (سبْع) للرامات .. للعالم المصرى أبوالأفكار الصينى


والحائز على جائزة شوقى عبداللطيف الدولية

Sab3`s Law for RAMs


رامة تعبانة (R - )= نسيان أكتر ========> تنفيض للمواعيد
رامة شغالة (R +)= نسيان أقل ========> حل أول مشكلة فى ضرب المواعيد



ازاى أعلّى راماتى طبقا لقانون (سبْع) للرامات



لأن النسيان مش بايدين الواحد .. وكمان مش ممكن أدخّل شريحة الكترونية فى دماغى عشان أعلى الرامات لأن ممكن بكدا يجيلى صداع
J .. يبقى أحسن حل إنك تعمل (رامة خارجية) توصل عن طريق (USB)...
والرامة دى هتلاقيها فى كل مكتبات جمهورية مصر العربية وسعرها يختلف من
حيث انتاج المصنع وجودة خامات التصنيع ... ولكن الأيام دى ليها اسم تانى..
هو غريب شوية لكن ها تتعود عليه إن شاء الله مع التكرار .. واسمها يا سيدى
(النوتة) ... J
... إيه؟ .. إييييييييييييه؟ .. معلش قول تانى كدا.. واكل دماغى بقالك
صفحتين وفى الآخر تقوللى (نوووووتة).. أيوه يا سيدى (نوتة).... (Block
Note) .. (مفكرة) .. (دفتر ملاحظات) ...(نوتة) صغيورة شكلها لذيذ ومعاها
قلم كده شكله شيك .. وتحطهم فى جيب معاليك عشان تكتب فيها كل المواعيد
التى عندك.. تكتب أى حاجة تخطر ببالك وانتا ماشى... أى خاطرة هفت على
دماغك قبل ما تروح منك.. بس كده



طيب أحطها فين ؟


إيه السؤال الذكى ده ؟؟ .. طبعا فى جيب القميص .. لأن الجيب طبقا لنظرية (سبْع) للرامات هو (USB)
.. ولو سعادتك رجل (كاجوال) وبتلبس تيرشيرتات بس .. ممكن سعاتك تحط النوتة
فى جيب البطلون الورانى أو فى المحفظة.. وماتقوليش :"ما عنيش جيب ورا...".



(النوتة) ولا (الموبايل) ؟


طبعا اللى ربنا فاتح عليه وعنده موبايل (فول أوبشنز) Full Options
أو حتى (سبانخ أوبشنز) ... ممكن يسجل المواعيد دى ع التليفون ولكن أنا
شخصيا مش مقتنع بكده ... النوتة عندى أفضل .. ممكن تكون مسألة راحة
نفسية.. أو ممكن لأن كل الناس المحترمة اللى أنا قابلتهم بيعملوا كده ..
أو ممكن كمان للآسباب دى :

ـ الموبايل صعبة الكتابة عليه عكس النوتة.

ـ النوتة تحسسك بشىء كده من الأصالة والاهتمام لدى الأخرين.


ـ مش كل شوية تطلع الموبيل بتاعك قدام الناس .. إيه ي عم انتا بتاعيرنا ولا إيه؟!!


ـ الحرية والسهولة فى الكاتبة .. لأنك ممكن تعمل سهم طالع وسهم نازل ودايرة هناك وحركات من دى.


ـ أرشيف مهم .. ممكن تستفيد منه بعد كده

ـ محدش هايسرق (النوتة) .. لكن دلوقتى بقى فيه حرامية تخصص (موبايلات).

ـ ممكن العدة (تتفرمت) Format بأكتر من طريقة... لو وقعت من ع السرير مثلاً.. وإنما (النوتة) تتفرمت فى حالة (الغسيل) بس ..

ـ تعملك منظر حلو قدام الناس وإنك راجل مهتم ..

ـ على فكرة (النوتة) شيك أوى للناس الكلاسيك



المشكلة الثانية: (ولم نجد له عزما)



ما
تقوليش دى مش بايديا برضه زى (النسيان) برضه .. لأ .. انتا ممكن تتحكم فى
النقطة دى وخليك معايا يا كبير لحد الآخر وما تزهقش زييى كدا ..




(1)- تعود أن تقول : لا .. اعذرنى



نقطة
مهمة جداً جداً جداً ... فى ناس كتيرة أوى ما تعرفش تقول (لأ) .. وبتورط
نفسها فى حاجات ومشاكل كتيرة .. وكله بسبب إنها مش عارفه تقول (لأ) ...


واحد
قلك ممكن لو سمحت يا برنس تروح السجل المدنى وتعمللى شهادة ميلاد
كمبيوتر.. خدمة منك يعنى عشان أنا مش فاضى؟ .. ما تتسرعش وتقول له أوامرك
يا كبير من عينيا الاتنين.. (لأ) .. اصبر شويه .. وفكر شويتين .. لو لقيت
نفسك ممكن تقوم بيها .... ياسلااااااااام يبقى كويس خالص وجزاكم الله خير
.. ولو لقيت نفسك بصراحة مش هاتقدر .. مش فاضى .. مش .. مش .. مشمش وخوخ
وحاجات من دى ...اعتذر له بأدب و قول له معلش يا أخويا اعذرنى مش هاقدر
أروح السجل السبوع ده...


أنا عارف هتلاقى الموضوع صعب فى الأول ..



شوف الصحابة .. واعرف صاحبك؟



كان
الصحابىّ يذهب إلى أخيه رضى الله عنهم جميعاً.. فيطلب منه الطلب ويقول له
:"إن قضيتها حمدت الله وشكرتك .. وإن لم تقضها حمدت الله وعذرتك".. يعنى
التمست لك الأعذار .. فلو صاحبك زعل منك .. يبقى صاحبك ده مش تمام خالص..




زعل أهون من زعل



لو
قولته: (لأ) مش هاقدر .. أه ممكن يزعل منك .. لكن هايزعل أكتر لو قلته
(آه) وعشمته وفى الآخر ما وفتش بوعدك .. طيب ليييه؟.. ما كنت من الأول
صارحة وقوله (لأ) وهو أكيد هايحترم صراحتك.




(2) - خد وقتك .. وما تضيقهاش



خلاص
ياسيدى قبلت إنك تروح السجل وتعمله شهادة الميلاد دى.. جزاكم الله ألف ألف
خير وربنا يتقبل منك.. خد بقى وقتك.. وما تقولوش ساعة وهاتكون الشهادة
عندك .. واعتبر الموضوع منتهى .. والكلام ده .. (لأ) يا سيدى خد وقتك
براحتك عشان محدش يضمن الظروف ... قوله إن شاء الله تعالى الأسبوع القادم
يوم الخميس مع إن انتا ممكن تخلصها يوم الإتنين.. ودى اسمها فكرة
(الاحتياطى) اللى اتكلمنا عنها قبل كده وطرحناها فى سؤال ..فاكرها ولاّ
... ولاّ ... آه .. أوعى تخبط على دماغك وتقول لى : (يوووووووووووه ...
نسيت" ... مش قولتلك هات (نوتة) وحطها فى جيبك... آدى آخرت اللى ما
بيسمعشى الكلام .... آه يا بلد ...




أوعى تفهم غلط

طبعا
أنا ما أقصدش إنك ما تكنش متعاون مع الناس وتقضى لهم المصالح ..(لأ) ابدا
والله.. كل اللى أقصده إنك تكون واقعى وتفكر كويس قبل أى شىء تعمله




الـــزتـونــة



(فنسى – ولم نجد له عزما) .. علاج الأولى: (النوتة) ...علاج الثانية: (تحكم فى عواطفك)



الأسئلة :



أجب عن الأسئلة الآتية بضمير :



س 1 / اذكر اسم السورة ورقم الآية التى ذكرت السببين بتوع خلفان الوعد.. علما بأنها فى أول السورة ؟


س 2 / انت بتقول (لأ) ..ولا (لأ) ؟ .. وها تتعود تقول (لأ) .. ولا (لأ) .؟.. وليه (لأ) ؟..(لأ) .. (لأ) .. لازم تجاوب..


س
3 / اذكر كم عدد (لأ) فى السؤال السابق ... ثم أضف إليه الرقم (8) ها
يطلعك رقم .. من وجهة نظرك هل يطابق هذا الرقم رقم الآية المذكورة ولا ..
(لأ) ؟


س 4 / اذكر نص قانون (سبْع) للرامات للعالم المصرى أبوالأفكار الصينى.. واذكر اسم الجائزة الحائز عليها سنة 1490 قبل الميلاد.

س 5 / طبقا لقانون (سبْع) للرامات .. ماذا تعنى هذه الكلمات RAM – USB



أسئلة كل مرة ...



س 1 / إيه رأيك فى الفكرة .. وهل قدمت لك جديدا ؟

س 2 / بصراحة ..قرأت الفكرة الأولى ولا ... دماااااغك ؟




وإلى اللقاء مع فكرة جديدة أحلى

حتى نلتقى نتواصى بالدعا