هل وصلنا إلي المرحلة التي سنطلب فيها من أمريكا أن تحقق أحلام أبنائنا بالبلاي استيشن
وهل وصل الحال إلي أن ينظر أبنائنا إلي أمريكا علي أنها بابا نويل"
ومين يا حبيبي اللي قالك إن عمو اوباما ممكن يجيبلك البلاي استيشن ؟؟
أبدا يا بابا أنا بس شفت الناس وهي فرحانة ومستنيه قدام التليفزيون عشان تسمع كلام عمو اوباما وسمعت ناس بتقول انه حيعمل وحيعمل والخير حيعم علينا معاه
فقلت أكيد هو وزع عليهم هدايا وحاجات وأنا ملحقتش اطلب حاجه
هو ينفع يا بابا أبعتلة رسالة ؟؟
"وهنا ألحت عليا فكرة شيطانيه لماذا لا استغل عمونا اوباما لارتاح من زن هذا الولد في موضوع البلاي استيشن "
وماله يا حبيبي ينفع طبعاً وأنا بنفسي اللي حكتب الجواب واحطهولك في صندوق البوسطه بنفسي كمان
"واستني بقي يا حلو لحد ما يبعتلك عمك اوباما البلاي استيشن "
بجد !!!!!!!!!!! شكرا شكرا شكرا يا بابا أنت أحسن أب في الدنيا .
وانصرف متهللا فرحا مستبشرا بوعود اوباما
حقاً إنها سذاجة الطفولة
لم يعد لدي رغبة في قراءة الجريدة أو إكمال هذا الفنجان البغيض من القهوة فسارعت بالمغادرة قبل أن يفاجئني احد أبنائي برغبته في أن ينعم عليه أنكل اوباما بشقه وعروسه يا رب المهم غادرت مسرعا متجها إلي عملي وبمجرد دخولي إلي المكتب فوجئت بنقاش حاد بين الإخوة الزملاء المحترمين
"يادي النهار اللي باين من أوله خير اللهم اجعله خير لغوا العلاوة ولا زودوا الأسعار ؟؟!!!!!!!!!!"
خير يا جماعه إيه اللي حصل ؟؟!!
اهو الأستاذ ( ) وصل وأنا عاوز اعرف رأيه تفتكر يا أستاذ ( ) الأخ اوباما حيقدر يحللنا مشكلة فلسطين بعد كام سنه وحيقدر صحيح يساعدنا ونعيش كده في نعيم وهنا
"نعيم وهنا !!! وايوه يا دنيا ايوه كده عمري ما شفتك حلوه كده "
وقبل أن افتح فمي مجاوباً انطلقت أصوات الفريق المعارض الأخر بالصياح والمجادلة
فضربت كفاً بكف
حقاً إنها سذاجة موظفين
"الله يخرب بيت اوباما هو أنا أسيبه في البيت ألقاه هنا كمان في الشغل طب والله مانا شغال النهارده "
وتركت المكتب وخرجت مسرعاً لا اعلم إلي أين اذهب
"أي مكان صحرا إن كان او بستان المهم مااسمعش اسم اوباما ده تاني "
وبعد وقت ليس بالقصير أبصرت أمامي مقهى
"يا سلام مقهى للناس المسنين اللي علي المعاش الناس اللي فاهمه الدنيا صح الناس الخبرة الناس البركة الناس إلي فيها ريحه زمان وخير زمان "
وجلست علي المقهى وطلبت فنجان من القهوة
"بدل الفنجان الي من غير ملامح بتاع الصبح ده "
وما ان هممت بتناول فنجان القهوة حتى سمعت حديثا بين اثنين من زبائن المقهى
تفتكر يا حاج ( ) ابننا اوباما حيقدر يخلي الحكومة تعملنا مواصلات خاصة بينا بدل البهدلة مع الشباب المايع والبنات المايصه دي في المواصلات العامة ؟؟
موضوع: بركاتك يا عمو اوباما 
الجمعة 12 يونيو - 21:12
