أنا مش إخوانجي ,,,!!!

********

أنا مش إخوانجي أو حزب يسار
ولا حتى كفاية ولا تبع الغد
أنا مش تيار يتدّحلب جوه
فاتح على بره ومستني المد
لا أنا رأسمالية متربي فـ خيرها
ولا من دلاديلها وببوس اليد
ولا أنا اشتراكية ولا كنت ناصرها
أو شفت مصيرها عضيت الأرض
مش حزب سياسي تنظير لكراسي
والناس بتقاسي ولا شاغل حد
****
أنا شخص جسور واقف في طابور
ملضوم في طابور والسوووور ممتد
معصوب في سواقي بتلف تدور
عكس الأيام ..والنوم يتعدّ
شيال في هموم مغصوب ع العوم
وبصارع موج للعزم يهدّ

****
أنا شخص بسيط
بيقولوا ساعات ساذج وعبيط
لكني حويط 00 أتشال واتحطّ
مافي يوم نخّيت00 ولا يوم غطيت عن ظلم عنين
ولا يوم وطيت عشان أرفع حدّ
ولسان 00 في الحق سيوف ما بتعرف خوف
في كلام وسكوت كرابيج تشتدّ
أنا صوت مسموع
أنا ثورة عدل وثورة جوع
لو يوم رديت للشمس سطوع
الكون يرتدّ
لكني صبورباستنى لغااااااية آخر الدور
وساعتها يبان كل المستور , ينفتح السدّ
وأعيد الحسابات من تاني
مين بكّاني
مين أحياني فــ أوهام تحتدّ
لا أنا حزب يمين 00 ولا حزب شمال
وكلام يتقال 00 والسوق ينفض

رائع ياجوست بس مبين انك فعلا اخوانجى كتيير وراح ينقبض عليك قريب اوى

قصيدة جميلة وبتلامس الواقع

شكراً بشمهندس إسماعيل

يا عم انت كده هتحبسنا

بس من الاخر يا ابنى