ما رايك في طريقة عرض نتيجة الامتحانات في المنتدي ؟؟؟؟ادخل وشارك برايك!!!!!!!

بعد التحية علي جميع الاعضاء والزوار /
انا كنت عاوز اطلب طلب من الادارة هو بخصوص عرض نتيجة امتحانات اخر الترم الخاصة بالكلية وهذا بعد ما سألت كتير من اصحابي في الكلية عن رايهم في نشر النتيجة علي المنتدي بشكل يظر للجميع بدون مراعاة خصوصية الطلاب
والطلب هو: ان الشكل اللي بتتعرض به النتيجة مش زي باقي الكليات- زي هندسة طنطا او الاسكندرية او عين شمس الخ...-
التي لاتظهر نتائج فيها الا برقم جلوس الطالب فياريت معرفة النتيجة تكون بان الطالب يدخل رقم الجلوس الخاص به وتظهر له النتيجة....
وهذا مراعاة لشعور بعض الطلبة بالاحراج اذا كان -لاقدر الله - راسب في بعض المواد وايضا حفاظا علي خصوصية الطالب
.............................. والي الجميع خالص تحياتي ................................
.........................تقبلوا احترامي وخالص تقديري.................................
...........................وفي انتظار ارائكم في الموضوع........................
شكرا

أخى سنايبر
أكيد طبعاً كلامك صحيح 100%
ولازم الخصوصية في الحاجات دى _
بس اننا نعرض النتيجة بالشكل المطلوب دة
استحالة اننا نعمله _
لان دة محتاج قاعدة بيانات كاملة تضم كل الطلبة اللى في الكلية
بدرجاتها _
ولكل طالب رقم يحفظه وباسسورد _يقدر يدخل به على نتيجته
الخاصة والمفروض كل بياناته /
وطبعاً احنا مانقدرش نعمل حاجة زى كدة في المنتدى _
قاحنا على قد ما بنقدر بنعمل اللى الكلية ماعملتوش _
ان يبقى لنا قاعدة بيانات على الإنترنت _
ولكل طالب رقم خاص وصفحة خاصة _
فالفائدة العامة ان عدد كبير من الطلبة يقدر يشوف نتيجته وهو بره
أسوان _فدى فائدة عامة _ ودى اكيد بتيجى ع المصلحة الخاصة
ان طالب يكون عايز يبقى له خصوصية في نتيجته _
ولكن برده ان الخصوصية دى بتنتهك لو النتيجة اتعلقت في الكلية
فال 2 سواء _ أعتقد ذلك _
والمفروض ان عندنا مشروع تخرج السنة دى _ يقوم
بعمل قاعدة بيانات للطلبة ببيان درجات المواد_
وكل ما يخص الطلبة من درجات الرأفة والتراكمى
بس اعتقد _ او متاكد ان الموضوع دة مش حيتنفذ في الكلية _
حتى لو المشروع بقى تماام التمااام _
لانك عارف النظام الإدارى المحبط والروتين
الغبى في الكلية وفي كل الوظائف الحكومية
وربنا يصلح الحال
وياريت نحط نصب أعيننا النظام الإلكترونى المعمول
في جامعة المنصورة
فهو الإفضل على مستوى الجامعات المصرية كلهااااا
واتكلف كتيييييييير جدا _
ودلوقتى هما بيسوقوا نظامهم الإلكترونى لبقية الجامعات لو عايزين تشترى منهم _
على أساس اننا مانعرفش نعمل زيهم
وممكن أفضل منهم _
بس محتاجين الثقة والتشجيع اللى مفقودة عندنا تماما

موقع جامعة المنصورة
www.mans.eun.eg/

هو كلامك صح أوووى أننا لازم نراعى خصوصيات الناس
بس فى نقطه عايز أوضحها لحضرتك أن موضوع عرض النتيجه دا أيجابياته أكتر من سلبياته

أخى الكريم

أهلا ومرحبا بك فى بالمنتدى

وبشأن ماذكرت وطلبت فقد تفضل البشمهندس يحيى بسرد الصعوبة فى إجراء عملية إضافة إسم الطالب ورقم جلوسه ونتيجته وأنها تتكلف وقت ومجهود ومال كثيرين بالإضافه لأننا جهه غير رسمية أو شرعية لعمل ذلك وإن تم ذلك فيكون من قبل الكلية أو الجامعة عموما ولو أن الكلية أعلنت النتيجة على موقعها لأراحتنا من تعب إعلانها ومشقة الحصول عليها لأنها لا تأتى أو تتاح إلا بشق الأنفس والشد والجذب والنقاش وأخذ الإذن من جميع الأطراف الذين لا يقبلون أخيرا ويعلنون عدم مسؤليتهم رغم أننا واضحين فى أن إعلانها يكون مجانى ومتاح لجميع الطلبة والطالبات ويعتبر دعم شبه كامل لإتاحة النتيجة للطلبة إلى أن تتكفل الكلية بذلك ولكن للأسف لاهم أعلنوها ولا هم تركوها لنعلنها لذلك أخى فالإعلان عن النتيجة شىء عسير وخدمة ليست بالسيئة وتضم جمهور كبير من الطلبة ، أما بشأن الخصوصية أو ربما الحياء من ظهورها فقد رسبت العام الماضى فى مواد كثيرة وتم إعلان نتيجتى كبقية الطلبة والأعضاء بالمنتدى وهذا ليس تفاخر ولكنه واقع وأعتبر الرسوب هو الحالة الأقل والأندر بين جمهور الناجحين ومن حق الناجح أن يفتخر ويفرح هو وذويه بنجاحه ولا يحزن من خالف ذلك لا قدر الله أو يقنط فالأمر بيد الله وكلا من عند الله وستستمر الدنيا بهذا وذاك وإعلان النتيجة بالكلية لا يفرق كثيرا عن المنتدى فمن تستحى منهم بالمنتدى ستجدهم بالكلية والعكس لأننا ندور فى فلك واحد والخبر يدور وينتشر بسرعة البرق لذلك أرجو أن تتقبل كلامى هذا بصدر رحب ولا تقلق فبإذن الله ستكون أنت والجميع ناجحين بإذن الله وستستعجل إعلانها حتى تزهو بنفسك وترى نجاحك ويراه الآخرين ونسأل الله التوفيق لك وللجميع

والله الموفق

انا طبعا مش هزود على كلام يحيى و الحبار

و فعلا موضوع عرض النتيجة على المنتدى بالشكل المطلوب ده صعبة

و ربنا يوفقنا جميعا

انا متشكر جدا لك يا بشمهندس يحيي علي التوضيح دة بس انا كان نفسي نرتقي بالمنتدي شوية ومكنتش اعرف ان العملية صعبة اوي كدة.
............وربنا يوفق الجميع............
والف شكر مرة تانية علي التوضيح..
الرية البيضا

ولو أن الكلية أعلنت النتيجة على موقعها لأراحتنا من تعب إعلانها ومشقة الحصول عليها لأنها لا تأتى أو تتاح إلا بشق الأنفس والشد والجذب والنقاش وأخذ الإذن من جميع الأطراف الذين لا يقبلون أخيرا ويعلنون عدم مسؤليتهم رغم أننا واضحين فى أن إعلانها يكون مجانى ومتاح
انت بالفعل بتبذل مجهود كبير يا" حبار" تستحق الشكر عليه
وربنا يكون في عونك
والي الامام يا بشمهندس

في البداية وفي أول مشاركة ليا في المنتدى الرائع ده
أحب أشكر الحبار جداً علي المجهود العظيم ده
وبالنسبة لموضوع النتيجة طبعاً كلتا عارفين أن مفيش حاجة بتختفي عن عيون الطلبة
خصوصاً وأن النتيجة بتظهر على الملأ وأمام الجميع في الكلية
لذلك عرض نتائج الكلية علي المنتدي وأمكان معرفتها للمغتربين من خارج أسوان
يعتبر خدمة ممتازة للطلاب المغتربين

طبعا هو يحي والحبار قالوا المفيد بس يبشمهندس احنا عشان نرفع كل النتايج على المنتدى بالصورة اللى انت شايفها كانت السنه اللى فاتت كانت عملية مرهقه جداااااااااااا فوق ماتتصور ده في ورقه واحده فقط كانت ناقصه في تالتة مدنى السنه اللى فاتت خدت يومين عشان نظبطها ونرفعها على المنتدى فما بالك لو اترفعت بقاعدة بيانات على ماعتقد النتيجه هتظهر كمان عشرومية سنه
ادعى بس ربنا ييسرها ونعرف نوصل نتايج السنه دى للمنتدى ان شاء الله

انا مقريتش غير الموضوع الرئيسى يعنى مشوفتش ردود ..بس انا رايى ان لازم النتيجه تتعرض وعادى يعنى اللى راسب مكله بيرسب وكله بيشيل ....بس لازم تتعرض واحنا نشكر الاداه على المجهود المبذول وياريت السنه ديا تتعرض ...

الشكر للجميع

بعد اذن الجميع سيتم نقل الموضوع لقسمه المناسب

لو سمحتوا ياجماعة مش عاوزين نحسس الناس اللي تعبت في عرض النتيجة بالفشل

لان دة ممكن يحبطهم ويخليهم يريحوا نفسهم من الاول خالص ومايعرضهاش وخصوصا
اذا كان دة فعلا اخر ماعندهم
ودة اللي انا وصحباتي المغتربين خايفين منه لاننا من الناس اللي ما بنعرفش تقديراتنا غير
من علي المنتدي دة
انا عن نفسي وبالنيابة عن صحباتي بشكر كل من ساهم في عرض النتيجة واحنا بجد حاسين
بمجهودهم
يعني مش كفاية ان جامعتنا دونا عن الجامعات التانية مش بتنزل النتيجة ع النت

» الي محبي فن الخط العربي ...ادخل وشارك برايك .....رأيك يهمنا كلنا!!؟؟؟؟؟
» البيت بيتك.......يوميات من هندسة أبوالريييييييش......
» اختبار بسيط للذكاء ادخل وشارك
» الكترونياتx الكترونيات ( بس من الصفر ) ادخل وشارك يلا بسرعه
» مسابقه تجعلم تذكر الله.....ادخل وشارك