يا حلاوه يا ولاد والله وبقيلى عنوان عالفيس تووووك !!!

السلام عليكم ورحمة الله وبركاته

يا حلاوه يا ولاد والله وبقيلى عنوان عالفيس تووووك !!!

النهارده مش قادر أوصفلكم فرحتى وسعادتى وهنايا ومنايا وشوقى ولهيبه لما دخلت على

الفيس بوك الموقع المعروف والمشهور جدا جدا والمتداول بين أوساط الشباب اللى زى العسل

والشابات اللى زى القمر وطبعا العسل والقمر أنا شوفتهم يا أخوانا يعنى مش بقول

الكلام كده جهجهونى ولا بفتكس عليكم ولا بكدب لا سمح الله أستغفر الله العظيم يا رب حاشا وماشا

إنى أكون بكدب أو بأغير الحقيقة أو أنبس ببنت شفة أو بنت خالتها حتى إلا لما تكون صدق الصدق وزهرة الزهرة

كمان لذلك إسمعوا وعوا وأقرأوا وأعوا وأصرخوا معى أعووووووووا !!

لاحظت خير اللهم اجعله خير قلبى مرفرف زى الطير فى

جولتى الحرة كل راجل وشاب من دول حاطط صورته بالبنط العريض وعلى الملأ وطبعا طبعا

فاتح بقه على الآخر وبيضحك ضحكه مفيش أجمل منها " كميل أمه يا ناس " أو تلقاه

متشقلب مثلا أو قاعد يفكر فى حاجه مش موجوده وطبعا المصور الشاطر بياخد اللقطة

النادرة اللى هنشوف بيها سيادته على الفيس بوك ولازم تتنضف الصوره بقى ويورنشها

كويس عشان فيه ناس كبارات هيشوفوا الصوره ويخللى بالوا كويس كمان إنى لما حد هيضيفه

هيبص فى الصورة ولو كان مقبول وكاتب كام كلمة حلوة من أنه متعلم على الآخر وحاصل

على شهادة الأكس واى زد من جامعة أريد حلا فى بريطانيا العظمى وبيتعشى حلاوة بالقشطة

وبيفطر سيمون فيميه وبياخد مصروف عشره خمستاشر ألف جنيه فى اليوم "ما شاء الله يعنى مش

عاوزين نحسد " وأنه كمان هادى ورومانسى وحب مرررررررره واحده وبسسسسس وبعد كده

إنجرح سبحان الله يا أخى جميع الناس فى العالم حبت مره واحده وبس وإنجرحت مره واحده برضو يعنى

شوف الحكمه يا أخى فى كده حب مره وإنجرح مره واحده طيب حب مرتين يا جدع وإنجرح مره

عشان تفوز مثلا ولا إنجرح مرتين وحط ميكركروم ولا أربط إيدك ورجلك بفتله عشان الإصابة

لتنتشر فى الناس وفيك وتقرفنا وممكن كمان تلقاه قاعد مع واحدة وحاطط إيده على إيدها فى مشهد

لن ينساه التاريخ والناس والمجتمع لأنه بيدل دلاله واضحه على العلاقه الحميدة والحميمة

بينه وبين المزة اللى معاه !!!

نخش بقى على النص الحلو والبنات الأمامير الجمال اللطاف الظراف الخفاف اللى إحنا منقدرش نستغنى

عنهم أبدا!!!

وحبيبة بابا رشا وطبعا رشا مش حبيبة بابا لأن بابا حبيبتة ماما لياخد على قفاه !!

أومال هنعذب نفسنا إزاى ونحرق دمنا بإيه والدكاتره بتوع الأعضاب والمرارة والقرحة

الأثنى عشر والزايدة والسكر وضغط الدم والشلل بأنواعه هيكسبوا منين ما هو

رزق ناس بتتسبب فيه ناس ومينفعش نقطع رزقهم

لذلك لما دخلت وبصيت يا عم الحاج وفتحت المندل وعلى حين غرة وتحينت الفرصة ونظرت

وأمعنت النظر ودققت الرؤيا أغرورقت عينيا من هول ما رأيت !!

واكارثاتاه ووامصيبتاه وواذلاه ووافيسبوكاااه وواو الجماعتاااااه !!

هيا دى البنات الحلوة اللى على الفيس بووووووك !!!!!!!

يعععععععععععععععععع أخخخخخخخخ أفففففففففف أررررررر !!!!

اللى حوله واللى أصلا ملهاش علاقة بالجمال واللى عامله حركة متصدرش من مرأه أساسا

واللى حاطه معلومات نصها إلم تكن كلها معر وكدب فشر ورياء وتملق ولفت نظر ملهوش أى

قيمة ولا لزمة والحلوة اللى فلتت من ده كله وحاطه صوره حلوه أشك

مليار فى الميه إنها بتاعتها تلقى الدبان عليها للركب وده بيتمثل فى

الشباب اللى داخل بيتكلم فى الجروب فى الظاهر وفى الباطن عاوز يتعرف على البنية

الجميلة والظريفة واللى إتعرف عليها نص سكان الأرض قبله وهو فاكر بروح أمه هيفوز

بالكنز الثمين اللى الناس كلها فتحته قبله ولقيت حتة قماشة قديمة ملهاش أى قيمة ولا

شكل ولا طعم ولا ريحة زى السم فى العسل طبعا وتلاقى البنت من دول عندها بتاع ألفين ولد من ضمن

الأصدقاء ونفس الألفين مع ده وده وكله بيفتح على كله وبيلعب مع كله ومليطة يا حاج

وهبل للركب واللى حاطط صور قلة أدب واللى بيشتغل نفسه وغيره واللى عايشين جوه الفيس

بوك يشوفوا ده ويعرفوا ده ويراقبوا دى ويفتحوا فى جروبات بقى وأفكار عظيمة جدا فمثلا

على سبيل المثال لا الحصر هخش أقول هعمل جروب عن اللى بيشربوا اللبن قبل ما يناموا بعد

لحظات تلقى بتاع ألفين واحد إشتركوا سبحان الله !!!!

وبعدين أقول هفتح جروب عن اللى مش بيشربوا اللبن

قبل ما يناموا فتلقى نفس الألفين إشتركوا بس المره دى عشان خاطر فيه مزة إشتركت زيادة

فقالك نشوف بقى إيه حكايتها !!!!!!!!!!!!!!!!

أو مثلا فكرة حيوية بتقول نعمل جروب عن اللى بيحطوا

صباعهم فى مناخيرهم ويطلعوا حاجات ونقول يا أخوانا عيب الكلام ده يا ريت تنف فى المنديييييييل يا أخ !!!!!!

كمان ممكن نعمل جروب للى عاوز يتعلم يحلب البقرة أو جروب للى بيناموا على الجمب

الشمال وعاوزينهم يناموا على الشمال برضو بس بزاوية خمسة وأربعين وبرضو ممكن نعمل

جروب عن اللى مش بيحبوا بذر البطيخ وعاوزين حل للمشكلة العويصة دى أو جروب لشاذلى

ومحبين الفول والطعمية وهكذا دواليك وعلى نفس المنوال وبنفس الطريقة وعلى الدرب

يسيرون وعلى الباغى تدور الدوائر !!!

كذا شخص أعرفهم قولتله إيه الفيس بوك ده وإشتغل عليه إزاى للناس تقول عليا متأخر

ورجعى ومش بفهم ومتخلف وديماجوجى وبتاع بطنى وبشخر وانا نايم وكل العيوب اللى فى

الدنيا وده عشان مش فاهم الفيس بوك فقولت أفهم من الناس المختصة لأنى مبحبش الحفظ

وعشان أطبق وأفرد كويس فى العملية الفسًية البوكًيية قاللى يا حاج أنا مش فاهم بس

شغال أضيف فى الناس وبس وبعدين ابدأ أتعرف وأندمج فى الأحداث وعندى شوية بنات موزز

هبعتهملك فى ثوانى !!!!

طبعا أنا إذبهليت وتفاجأت وإستغربت وإندهشت وتعجبت وحوقلت وكبرت وأصريت إنى أشوف

طبعا الحكايه إيه وبالفعل دخلت برجلى الشمال فى بطن الفيس بوك ولقيت الكلام صحيح مية

بالمية وكل اللى قاعدين كدابين وفاضيين وكلامهم فاضى مع مرتبة الشرف المتطورة !!!

كان فيه كاتب كبير لما سمع بخبر إن فيه راجل ومرأة عملوا رقم قياسى جديد فى أطول بوسة فى

العالم وكان حوالى تلاتين ساعة ويمكن أكتر فقال أول ما سمع الخبر ده

"أقطع دراعى من لغاليغة إن كانوا متجوزين !!!"

وأنا أقطع دراعى من الصرة حتى آخر بربور فى رجلى إن الناس دى فيها عقل أو على الأقل

فيها راس بشعر !!!

يا ريت كل واحد يلغى الفيس بوك من حياته لأنه وبالعربى قلة أدب وقلة قيمة وقلة عقل لا تنفع مع راجل ولا

مع الطامة الكبرى التى تتمثل فى البنت وحرام عليكم الوقت اللى بيضيع منكم فى الكلام الفارغ ده واى حاجه غير

كده هتبقى أفضل كتير من الإدمان الغير مباشر للفيس بوك وخلافه واللى بيتم من خلاله

ترويج للأفكار اللى معظمها لا قيمة لها واللى بتنزع مننا الحياء والدين وتسلب العقول من خلال عرض الصور

السافرة والعبارات التى يندى لها الجبين وتروج لها الدول الأجنبية الصهيونية لفساد شباب هذا البلد.

والله الموفق

بصراحة أكثر من رااااائعة
وأسلوبك الادبي الساخر جميل جدااااً

وانا من أشد أعداء الفيس بوك لاني حاسة انه ملهوش اي لازمة وتضييع وقت علي الفاضي و سلبياته اكتر من ايجابياته ان كان ليه ايجابيات أصلاً

سلمت لنا يــداك وسلم لنا قلمك
وأدام الله عليك هذه الموهبة التي تستحق كل التقدير

MISS_R كتب:: بصراحة أكثر من رااااائعة
وأسلوبك الادبي الساخر جميل جدااااً

وانا من أشد أعداء الفيس بوك لاني حاسة انه ملهوش اي لازمة وتضييع وقت علي الفاضي و سلبياته اكتر من ايجابياته ان كان ليه ايجابيات أصلاً

سلمت لنا يــداك وسلم لنا قلمك
وأدام الله عليك هذه الموهبة التي تستحق كل التقدير

شكرا على مرورك الكريم اللى دائما بيسعدنى

والله الموفق

» اهة جه ياولاد اهو جه يا ولاد .مرتضي جالكم خبه عيالكم
» برنامج عملي للثبات بعد رمضان ....اذا كنت تذوقت حلاوه ولذه الطاعه تفضل .....
» جروب لمهندسي اسوان عالفيس بوك بسبب هذا الحوار
» ليه ما ينفعشي تحطي صورتك علناً عالفيس بوك او حتي الماسنجر ؟؟؟
» قصيدة بلا عنوان