ولد تايه ,,,,

ولد تايه

ولا عارف يغوص في البحر
يعرف ايه مخبي البحر
لمرايته اللي تستناه

يخاف جدا
يقابل عرافات بحري
فيحكيله الودع سره
ويكشفله اللي تاه جواه

حزين جدا
كما الورد اللي مات بدري
كما العصفور
بيحضن طلقة مش شايفاه

بريء بالجبر
ماختارشي القلم
مهنة
ولم يحلم يكون شاعر
هو
الشاعر بأمر الله

عنيد جدا
وحالف يشتري الملكوت
وحالف انه ما هيموت
إذا نفد الطبيب ودواه

عبيط جدا
وبيصدق كلام الديب
وبيعاهد ديدان الغش
وكل ما يتلدع منهم
يقول معلش

شقي جدا
بيعرف من عيون البنت
لون شوقها
وبيدوقها
بعيونه السمر
بيطبطب على جروحها
اللي ما بتطيبش

بيضحك
إن عيون الشمس ضحكتله
بيتحَنَّى بنسيم الصبح
ويسبَّح بطمي النيل
يصحي الليل على صوته
ويحكيله الغنا المجروح
على شطوطه
ولما يموت
يموت شبعان ومن قوته

شعر
محمد كارم