تليفوني العزيز ويلسون...اديني سبب واحد يخليني مقطعكش حتت !!!

تليفوني العزيز ويلسون...اديني سبب واحد يخليني مقطعكش حتت !!!

من ناحية البطارية: ويلسون حبيبي بيتشحن3مرات في اليوم، فطار وغدا وعشا،وساعات بيحلي كمان،يعني طول ما أنا مربوط في مكان ويلسون هو كمان محطوط في الشاحن، ولا أما يكون مريض أنيميا متعلق له محلول، اللي يفرس ويغيظ بقى...انه ممكن اوي بعد كل ده يفصل شحن!!!!
من ناحية الساعة: ويلسون حبيبي بقاله ست شهور مقتنع ان النهاردة الاتنين 1-1-1996 وان الساعة12بعد منتصف الليل(أكيد عيد ميلاده) ولو مين حاول يقنعه ان احنا في2008 ويلسون مصر على موقفه،طبعا ده معناه إن المنبه باظ، وكمان مقدرش أعرف الساعة كام، ولا حتى في call log ،اللهم لا اعتراض!!!
من ناحية المنظر: ويلسون كان silver، بس نتيجة لعوامل الجو والتعرية والمناخ واحتمال التصحر كمان، ويلسون بقى لون كدة ملوش ملامح،تقريبا بقى لونه موف!!!
من ناحية الشبكة:ساعات كتير أرن على ويلسون يقولي غير متاح،مع اني والله بكون متاح أنا وويلسون!!!
من ناحية العمر: معرفش بس ويلسون عايش بقالة كتير، لما جبته من5 سنين كان بدعة في عالم الموبايلات، ألوان ونغمات مجسمة، كانت الكاميرات ابتدت تنزل بس ويلسون برضة كان في مرتبة متقدمة، وقتها صحابي كانوا بيقولوا عليه تحفة(حلو أوي يعني) دلوقتي برضة بيقولوا علية تحفة برضة(قديم اوي يعني)!!!
من ناحية السعر: صحابي اللي عايزين قطع لسانهم بيقولولي بيعة وكمل علية وهاتلك كيس شيبسي!!!
الحوادث:ويسلون وقع 3مرات على رصيف القطر، و5في محطة المترو، وعدد غير محدود من المرات أخد السلم جري وجريت وراه، أو من فوق سريري، وأفتكر أوي اني في مرة جبته من ورا المكتبة في رسالة، وفي كل مرة اطبطب علية واقولة:اسم الله عليك يا ويلسون انشاء الله اللي يكرهوك!!!!
كل المسوغات والأدلة الدامغة والقرائن دي، مش قادرة تخليني اسيب ويلسون، ويلسون بقى لازق فيا زي ما يكون قدري، نصيبي اللي مليش غير،هروح منه فين؟حتى لو حاولت مبقدرش، الأسبوع اللي فات جربت يوم كدة وأخدت موبايل من أخويا،حاجة كدة بالنسبة لويلسون عاملة زي الكاب بالنسبة للطربوش، بجد مقدرتش، حسيت ان في مشكلة في حياتي ناقصة، وأنا مشاكلي زي عيالي لما واحد فيهم يغيب عني أقلق أوي، يومها رجعت البيت أدور عليه، أنت فين يا ويلسون؟ تعالى يا حبيب ماما، وحطيت له المحلول، ومن يومها قررت ان ويلسون ده قدري مقدرش أبعد عنه حتى لو حاولت!!!

أيه اللي تاعبني ....... ؟

حاجة واحدة: لية بنفضل نقنع الناس أنهم يغيروا للأحسن مع أني مش قادر اعمل كدة مع حاجة بسيطة زي الموبايل؟ ممكن لأنه شاف أحلى أيام حياتي وذكريات عمرها ما هتتعوض؟
بنحاول نقنع المكفوفين اللي عندنا أنهم يغيروا طريقة التسجيل من شريط الكاسيت للام بي ثري، طبعا كان في معارضة فظيعة، وقتها دافعت عن وجهة نظري وقلت انهم لازم يتطوروا ويشوفوا الدنيا صح، طب ماأنا لا قادر أتطور ولا أشوف الدنيا صح، ليه التناقض ده؟
يخرب بيت الحب اللي من غير شروط ده،الحب ملوش منطق يحكمه،حتى لو حاولت توجد المنطق ده، ايه اللي يخليني اتعلق بتليفون مايساوييش في سوق الموبايلات3مليم؟
لا وايه حب الأم لأولادها، ليه الحب ده قلب بحب مرضي اليومين اللي فاتوا؟
يمكن لأني خفت على الشاهد الأخير على أيامي الحلوة؟ مرة أخ وصديق ليا قالي انت بتخاف من المجهول، آه ياسيدي بخاف حتى من خيالي، من الضلمة والأماكن المرتفعة والوحدة والفراغ.... على صحابي وزمايلي ودفاتري القديمة وذكرياتي اللي مالية ادراجي وكتبي...وعلى ويلسون،

ونفسي أبطل خوف بقى!!!!

Pudently

لية بنفضل نقنع الناس أنهم يغيروا للأحسن مع أني مش قادر اعمل كدة مع حاجة بسيطة زي الموبايل؟ ممكن لأنه شاف أحلى أيام حياتي وذكريات عمرها ما هتتعوض؟

"عندك حق والله يابشمهندس دايما بندور على الأحسن أو اللى أحنا شايفينه أحسن وبنردم وراه ذكرياتنا وحياتنا وماضينا الأجمل.........
"اختيار موفق وموضوع متميز"

» كيف تطبخين زوجك العزيز
» سؤالين بس واحد للشباب و واحد للبنات
» دعاء واحد محشش على واحد ظلمه
» ***رائع جداً...جميع المواصفات ASTM***
» Introduction to AutoCAD 2011