حسن مشاوير!

بالبلدي
يكتبها : المصري
حسن مشاوير!

يا أبوعلي تعال الحاج عايزك.. يا حسن أمي بتنده عليك.. حسن الباراموني كان من سكان قريتنا.. مختلف عننا.. أهلنا كانوا يا اما فلاحين أو طلبة أو مدرسين.. لكن حسن الباراموني كان "مخلصاتي".. زمان كان البندر بعيد شويه وكانت عجلة حسن هي رأسماله في الدنيا.. واحد عايز يبعت جواب أو واحدة مستنيه حواله من ابنها أو فلاح عايز يعرف ميعاد استلام التقاوي.. في الستينات ما كانش فيه غير عجلة حسن.. أبوعلي يلف علي البيوت الصبح ويلم الطلبات.. من الساعة سبعة ونص يسرح علي الناس يكتب طلباتهم والساعة عشرة يكون انطلق.. والساعة خمسة العصر يكون خلص ورجع ولف علي كل بيت ومعاه ما يثبت أنه قضي مصلحته أو يجيب رد علي التانيين.
ما كانش فيه توك توك. ولا ميكروباص.. القرية كلها كان فيها عربيتين.. واحده اولدزموبل قديمة بتاعتنا والثانية فورد كفرانة.
بلدنا ماكانش فيها كارتة يجرها حصان. الناس كانت تقدس الخيل ولا تهينها في أعمال الحقل.. علشان كده حسن كان مهم.. قرية تعتمد علي فرد واحد مش معقول.. المهم انه في يوم ضربته عربية ورجله انكسرت. لكنه ماسلمش.. باع العجلة واشتري ترسيكل مايحتاجش رجليه الاتنين.. وبعدين اشتري "سيدكار" أو موتوسيكل بجواره صندوق.. وممكن يسوقه برجل واحدة.
لكن لما الدنيا اتطورت. وكترت المواصلات وبقي فيه ميكروباص كل ساعة وتاكسيات . حسن حس انه خالي شغل.. مبقاش عارف يوكل ولاده ومراته.. لف البلد كلها عشان يعرف ناقصها ايه.. كانت كل حاجة موجودة.. بقالة وخضرواتي وفاكهاني وترزي وسباك وكهربائي.. تعمل ايه ياحسن.. تعمل ايه ياحسن.. فتح دكان عطارة وقرا تذكرة داود بالكامل.. البلد كلها كانت بتتعالج عنده رغم انه مش دكتور.. فتح عندنا 3 دكاترة وبعدين قفلوا.. حسن العطار كان اشطر منهم.. وهو الوحيد في بلدنا اللي كان له اسمين للشهرة.. واحد مشاوير والتاني حسن تحويجة أو حسن قرطاس.. كان يعمل لكل مرض قرطاس ونادر جدا ان قرطاسه مايجيبش مفعول!
ولغاية دلوقتي .. حسن عنده 77 سنة ولسه عطار بيعالج الناس رغم ال3 مستشفيات وال 12 دكتور في بلدنا.. مازال حسن البريمو! ايه رايكم في حسن؟

رائع حسن ده وفعلا الدنيا بتتطور وبتنقرض مهن وتظهر مهن تانية ولازم نواكب
كل ده علشان نعرف نعيش وكل زمن أكيد ليه حسن.

شكرا على الموضوع يا بشمهندس

الله الموفق