الحقونااااااا بقى

جميل قوى اللى بيحصل ده والله .. جايز أكون هاتكلم عن حاجة قديمة بس انا سمعت عن الموضوع ده من فترة عارفين طبعا مسابقة ملكة جمال مصر بالصلا ع النبى .. ومادام عارفين مسابقة ملكة جمال مصر يبقوا طبعا عارفين مسابقة ملك جمال مصر بالصلا ع النبى برضه .. ومادام العريس هيتجوز يبقى العروسة هتتجوز ..فيه بعض ناس حااااااااقدين عايزين يبوَّظوا سُمعة المسابقة العظيمة دى اللى هتختار لنا البنت القدوة والولد القدوة .. الاتنين اللى هيشيلوا عَلـَم مصر ويتحزِّموا بيه فى أعرق المسابقات العالمية
الأب والأم شافوا صورة بنتهم ع المجلة فى المسابقة وهيه لا مؤاخذة استغفر الله العظيم يعنى كاشفة شعرها .. العِرْق المصرى الحِمِش اتنفض فى الراجل وقال ازاى بنتى تكشف شعرها والموضوع كِبِر وراحوا عند الحاج وائل الإبراشى فى دريم

الصراحة وائل ما اتأخرش .. جاب الناس كلهم اللى لا مؤاخذة استغفر الله العظيم بناتهم كشفوا شعرهم غصبن عنهم فى المسابقة..والناس التانيين اللى أشرف مِ الشرف وعُمْر شعرهم ما اتكشف على حد .. وكمان جاب واحد اسم الله على جمال أمه كان مرشح ضمن ملوك جمال مصر.. لو وصفتلكوا ثقافته وللا أخلاقه وللا دينه وللا احترامه للقاعدين مش هتصدقوا .. مصر دى عظيمة يا ناس
بدأ الراجل المصدوم يحكى ازاى بنته ربة الصون والعفاف صرف عليها حوالى 50 ألف عشان الإعداد ومامتها سابت ولادها اللى فى الثانوية وقعدت مع بنتها فى شقة مفروشة مخصوص ليها عشان الإعداد..طبعا ما هو ده اسمه إعداد البنية التحتية .. وازاى مامتها علمتها وقالت لها اوعى يا بنتى حد يقول لك اكشفى شعرك .. مايوهات ماشى .. بيكينى عادى .. أحضان ولا يهمك .. إنما أستغفر الله العظيم تكشفى شعرك ؟؟ ده حتى يبقى عيب
الجميل بقى ان الراجل مش متضايق من إن بنته كانت كما ولدتها أمها فى المسابقة .. هوه متضايق بس عشان صورتها جت فى المجلة وشاف الصبيان المراهقين يباخدوا المجلة كل واحد يوم فى بيته زى فيلم ثقافى
وجايبين بقى ناس تدافع عن المسابقة منهم واحدة كانت فى المسابقة والله العظيم ما انا عارف دى كانت بتتسابق ليه .. دى ممكن تمسك لهم الفُوَط عند حمام السباحة .. ده آخرها يعنى .. ومامتها اسم الله صاينها وحارسها
والبنت قاعدة تصرخ انتوا بتظلمونا .. احنا اتعلمنا حاجات كتير..احنا اتعلمنا ازاى نعمل خير.. أفهمها دى بقى !!! يعنى عمل الخير عايز مسابقة وتعليم؟؟ يعنى عشان اروح دار ايتام وللا مكفوفين لازم افتح كتاب كيف تعمل خير؟؟
احنا اتعلمنا ازاى نحب بعض.. أيوة أيوة فعلا .. هما خدوا كل ملكة جمال وقعَّدوها مع ملك جمال وعلموهم ازاى يحبوا بعض ويجيبوا لنا ملوك جمال صغيَّرين نتنطَّط بيهم بقى قدام الشعوب الجهلة التانية
وكله ولا الأستاذ ملك الجمال .. يا عييييييينى .. قمر يا أخواتى قمر .. جايبين صورته وهوه ماشاء الله عريان زى الفل وواقف بيتمنى انه يفوز عشان يمثل مصر ويضحى بعمره فداها زى أجدادنا ما ضحوا عشان احنا نعيش بكرامتنا فى حرب 73 مثلا أو غيرها وتخيلت ان منظم المسابقة بيناوله البشكير عشان يستر نفسه فيقول له شكرا يا فندم .. يرد عليه المنظم ويقول له مصر هيه اللى جايبالك البشكير يا رأفت قصدى يا ميمى
الجميل بقى ان كل أولياء الأمور ماضيين عقد قبل الكلام الفارغ ده على كل اللى هيحصل .. يعنى يا جماعة باختصار كل أب وأم عارفين ان بنتهم على رأى سعيد صالح ماشاء الله ماشاء الله .. بنتك هتشتغل رقاصة ماشاء الله ماشاء الله .. هترقص وتفتح ماشاء الله ماشاء الله
اللى عجبنى ان وائل الإبراشى كان بيعمل اللى عليه بصراحة .. يروح للراجل المنفعل ويقول له والله هما ما شتموش حضرتك هما بس بيقولوا انك بتتاجر ببنتك وزعلان عشان مكسِبِتْش وان هنادى أخدها الوبا زى دعاء الكروان
الراجل يتنرفز ويشتم يروح وائل يقول للتانيين هوه بصراحة مش بيشتمكم بس هوه بيقول ان بنتكم مكنتش بتبات فى الفندق ومشيها بطال وعايزة تتشهر .. بس هوه مشتمش الصراحة
الاب بيقول انه راح لبنته وشافها وسلم على اصحابها الملكات والملوك طبعا وقال لهم شدوا حيلكم ياولاد واطمن جدا طبعا لما لقى ملوك فى القعدة .. عشان لو اى ملكة اتضايقت تلاقى ملك بيهون عليها .. وسبحان الملك
يا جماعة والله العظيم اللى بيحصل ده حراااااااااام .. مصر مش كده يا جماعة ..مش شوية بنات وولاد أقل لفظ يتقال عنهم انهم ما اتربـَُوش حتى .. ده الولد بيقول للمحامى اللى كان قاعد ومتغاظ زيى انت بتسوأ سمعة الشعب المصرى !! ياسلام !! هوه مين اللى بهدل البلد غيركم ؟؟.. جدودنا ضحوا بكتير عشاننا واحنا عاملين مسابقات عشان ملكات وملوك الجمال .. خايف اسأل سؤال الناس تفتكر انى بس واخد المسألة بمنظور دينى .. هيه البنت اللى كانت عريانة طول اليوم .. كانت بتصلى امتى ؟؟ والولد اللى كان فى حمام السباحة طول اليوم مع الملكات وحاطط على شعره نص كيلو جيل مسك المصحف كام مرة .. طب الولد وللا البنت دى يعرفوا ايه عن اى حاجة؟؟؟ طبعا كان باين مستوى ثقافتهم من كلامهم فى الحلقة عشان محدش يظن انى بافترى
أنا مش باتكلم دينيا بس يا جدعان ..أنا باتكلم دينيا ودنيويا وأخلاقيا وعرفيا وكل حاجة ..دا انا معرفتش أحط صورة للمسابقة فوق البوست عشان اتكسفت والله
كل اللى اتمناه ان ينزل قرار من النهاردة بتحريم المسابقات دى من هنا .. بنات مصر مش محتاجين مسابقة عشان يبقوا ملكات جمال .. بنات مصر ملكات اصلا عشان بيحترموا دينهم وأخلاقهم وعاداتهم .. شباب مصر مش محتاج مسابقة عشان يبقوا ملوك جمال .. الشاب المصرى راجل من يومه مش بالجيل ولا البنطلون الواقع ولا الصور العريانة ليه بالملابس الداخلية .. شباب مصر رجالة عشان هما اللى بيصنعوا تاريخ البلد دى..دين .. ادب .. فن .. ثقافة .. معرفة .. فكر .. سلام .. حرب .. شباب مصر فيهم كل حاجة حلوة
بسم الله الرحمن الرحيم
إن الله لا يغير ما بقوم حتى يغيروا ما بأنفسهم

اولا يا جودزيلا انت اسلوب تناولك للموضوع جامد جدا و ساخر جدا

ثانيا الموضوع ده بجد فعلا يخنق و بقى سافل جدا

المشكلة الكبيرة فى الولاد مش فى البنات

انت لو كنت تشوف كل واحد و هوه بيقدم نفسه كنت هتلطم على وشك

دى بقت حاجة تخنق الشباب بقى كل همها العربية و الموبيل و هنروح كافيه ايه النهرده

و هنصيف فى مارينا ولا شرم السنة دى

ربنا يستر على مصر و الله من العالم اللى عندها فراغ فكرى دى

و شكرا يا جودز على الموضوع الجميل ده

المفروض يسموهم ملكة جمال العرر وملك جمال البقر لأنهم لا منظر ولا دماغ
ولا أى حاجه فى أى حاجه وقلة أدب "أوزن بالكيلو" والعيب بالطبع على وزير
الإعلام والثقافه واللى ماسكهم واللى ماسك البلد بنت "التيت" دى.

شكرا عالموضوع اللى ينرفز ده يا جودزيلا

حقا "بارك الله فيك " يابشمهندس/ جودزيلا على الموضوع القيم واللى فعلا يخلينا نحزن من قلوبنا على بنات وشباب المسلمين وعلى اللى وصلوه من تفاهة وإهدار للقيم وتعاليم دينا الاسلامى , وأعتقد أنه باين أوى ان المسابقات دى بيصرفوا عليها من الخارج ولأهداف أكبر من كونها مسابقة وبس ولكن لتدمير شباب المسلمين ولسه "ربنا يستر" ولو بقى كانت مصر لسه هتدعم وتدى المسابقات دى أكتر من كده يبقى هيا تقول على نفسها "يارحمن يارحيم"
الحقونااااااا بقى 700120

ملحوظة ياجماعه انا مقتبس الموضوع من مدونة الكاتب الساخر الشاب اشرف توفيق اسمها مدونة اخف دم وشكرا لكم على تعليقكم وربنا يحمى شبابنا ان شاء الله