::: حاجات يامه / ّ شعر عامي \ ّ:::

حاجات يامه

بنتغرب
وحضن الشمس يتدارى ف خطاوينا
ونتقابل
نبص لبعضنا حبّه..ونتصعب
عشان كدبه قالوها اتنين ما عشقوش بعض زيينا
واعيش فاكرك
وراسم بين رموش العين ملامح كدبه هدامه
وتنسينى..
برغم انك ما زلتى بتعشقى فيا حاجات يامه
كلام الشعر والتنكيت..
وغنوه تمللى أغنيها لثومه ف فيلم سلامه
حاجات يامه
سجايرى الفرط لما اكتب نكت سَكّه
وضحكك لما بستأذن ولما تقولى رايح فين
وأقول هفتح بلاد عكا
وجيبى اللى اتزرع جواه شوية قرشينات فكَّه
وقلبى اللى اترسم بسمك
على الحيطه وع الدِكه
وضحكه تمللى أطلعها وأخبيها
واخاف يسرقها ديب واقف بيسرق ضحكة العشاق على السكه
وشخبطتى على الكلمه
وخوفنا من الفيران فى الغيط ومن حواديتنا فى الضلمه
ومن شكِّى ما بين الرسم جوا ملامحك النيلى وبين لونى
ومن بصة عنيكى السودا لعيونى
وتنهيدك وتنهيدى
ووقفة شعرى لحظة ايدك المرمر ..
..ما تلمس ف الهوا ايدى
وهزة شفتى يمك
وهزة شفتك يمى ولا همك
كلام الناس هيجرحنا ..هيدبحنا ..
تقولى ان أنتى شريانى وأنا دمك
ومش بدرى ولا بتدرى
ورعشة جسمى لما يمروا كفينك على صدرى
ونتكلم كلام يمكن ما نفهمهوش
وكلمة تجر ميت حدوتة وحكايه
وأنا بين النجوم والورد تايه فيكى يا آيه
ومحتار فى السنين بالطول
ودايخ فى الساعات بالعرض
وأقيم لك فى الصلا يمكن تؤمينى ...
تضمينى ...
تخلينى أحس ان الصلا (ف) حضنك عليا فرض
وبسأل نفسى معقوله تكونى زينا (م ) الأرض ؟
ولو كنتى
سمانا دى سما لينا
ولكن فوق ضفيرتينك سما وبجد
تايه فيكى يا آيه
سمانا دى عشان خاطرك سما مرايه
وأنام حبه تهزينى
أفوق ماسك كتاب فى الشعر والتانى كتاب دينى
وقدامنا كتاب صاحبه ما هوش عارف
يفرق يعنى إيه عالمه..وعلامه
ونقراه ننفجر (م )الضحك أحس انك
ما زلتى بتعشقى فيا حاجات يامه
تبصيلى ونتنهد ...ونتكى على ايدينا
تتوهى ف حضنى أتوه فيكى ونتدارى ف بعضينا

شعر / سعيد حامد شحاتة

جميل قوي الشعر العامي
شكرا عالموضوع

$::: حاجات يامه / ّ شعر عامي \ ّ::: 2696$
عسولة القصيدة دى

بجد شكرا للمرور الأكثر من رائع ده ,,,,,

منورني ,,,,,

بيقدم ورده

» على أدى .. &# .. شعر عامي .. &#
» .:. آهه .. وآهه .:. شعر عامي
» العصـــب السـابـــــع.. ( ..شعر عامي.. )
» اده حاجات غريبه يا جدع........!!
» خلاص القلب إتكلم ** عامي **