موضوع: إسرائيل المظلومة ..!! السبت 3 يناير - 21:37
إسرائيل المظلومة .. !!
هو جرى إيه يا جماعة هو إحنا عملنا إيه مالكم كده شايطين وركباكوا كتير شياطين مالكم يا عرب ومالنا وعلى إيه زعلانين مش كفاية إننا ساكتين مابنتكلمش كتير زيكم إحنا بجد مش فاهمين دانتوا حوالينا من كل نواحينا ونفسكم تقضوا النهارده قبل بكرة علينا حرام إننا نأمّن نفسينا .. صحيح رضينا بالهم والهم ما رضي بينا طب فهمونا ليه منفعلين إكمننا بنموت ستات وعيال يعني هو إحنا كنا قاصدين داحنا بكل طيبة قلنالهم يا أهالي غزة الأعزة إحنا بالضرب والقصف على بيوتكم ناويين طب ليه بعيالهم قاعدين هاتقولوا طب يروحوا فين كأنكم بتقولولهم إحنا مجانين هانولّع في هدومكم دلوقتي إقلعوها أحسن وإمشوا عريانين خلاص بقينا إحنا الإرهابيين داحنا من ساعة مالمينا شملنا وقعدنا في اللي بتقولوا عليها فلسطين وإحنا يا حبة عيني منضورين أيوه .. من أيام تمانية وأربعين وكل شوية نازلين فينا تلطيش إشي بحروب وإشي بكلام حتى ولو كان كلام تهويش وهانخرب بيتكم يا يهود وجيش "محمد" سوف يعود وكلام كتير وكتير وعود وكل واحد يزعقله بكلمتين واللي يشخط واللي ينطر مش عارفين نرتاح منكم يومين يخرب بيتك أهلك يا "بلفور" كله منك إنت سبب قلق نومنا كان لازم توفي بوعدك معانا وتقف وتتنفخ فيها قوي ولرقبتك وخدودك تحمّر عاملنا فيها سبع وغضنفر وللا لامؤاخذة يانجليزي يا مننا كنت زي الدحشة أما تنفر ياريتك كنت رميتنا في كندا وللا في أي داهية بعيد عن دول مجانين ودلوقت أدينا قاعدين في أرضنا وكافيين خيرنا شرنا لابنزعل حد ولاعايزين حد برضه يزعل مننا نقوم نلقى اللي طالع فيها المضروب ويقول بكل فشخرة وإعتزاز دي بلدنا إحنا وهانحدفكوا بالطوب طب ماهو اللي بيته من إزاز بيدوّر ليه عالحروب تكونوش فاكرين هانسكت للي واخداه الحماس إحنا يا جماعة العرب لا بيهمنا لا طالبان ولا قسّام ولا الناصر ولا حتى حماس داحنا بس نفسنا .. إننا ناخد حقنا زي مانتوا عارفينه من زمان من زمن الزمن اللي فات على الأقل على الأقل من النيل للفرات تكونوش فاكرين المهدي وصل برضك مايهمناش ما ياما قتلنا أنبيا ورسل وأي حاكم أو محكوم مخه بينغسل وياما ملينا بلادكم بكتير بلاوي إشي أمراض خبيثة وإشي مخدرات تتوزع في القهاوي وبالمجان على كل واحد طالع فيها وبيتكلم عن الحرب معانا وعليها ناوي يبقى إحنا كده وحشين داحنا بنرحمكم من وقعة زي الطين سيبونا في حالنا نقتّل في الملاعين اللي عاملين فيها شهدا المجرمين وكل شوية يا فلسطين يا فلسطين ويجروا على دول النفط المساكين ويغلوا الغلة لحد أما يجيبوا قعر الحلة عشان قال إيه يحاربوا في الأرض المحتلة محتلة إيه دانتوا خليتوها خل أهو دا كلام أي واحد عبيط و دهل هو حد برضه لبلده بيحتل إحنا من الآخر يا عرب دعاة سلام بس من غير مانتشدق بكتير كلام بنضرب ونقتل من سكات عشان حرام نعرّف اللي هايموت إمتى الزؤام وحرام عليكم تقولوا علينا سفاحين وللا صهاينة ومجرمين داحنا عمرنا مانمنا مرتاحين بالرغم إن بلادكم حوالينا مهزومة حرام عليكم بجد .. وبجد إحنا دولة مظلومة .... !!!!
موضوع: إسرائيل المظلومة ..!! 
السبت 3 يناير - 21:37
