كيف نعرف اننا نحب؟؟

والله يا بشمهندس كلامك جميل وجه على بذرة الموضوع بس أنا ليا وجهة نظر اسمحلى أقولها

اقتباس :

نحلم بصوت مسموع و نبتسم بصوت مسموع و نشتاق بصوت مسموع

الحلم بصوت مسموع والنوم برضو دى حاجه عاديه أنا معايا حد فى السكن أصوات الدنيا
والآخره بيعملها وهو نايم ومش ضرورى تفهم ماهية لاأصوات دى وعادى قبل ما يحب وبعد ما هيحب برضو نفس الأمر وأعرف ناس برضو بتتكلم وهيا نايمه وبتمشى كمان بصوت مسموع
دى من زمان وعادى والشوق أبو صوت مسموع ده مش عارف يمكن حد اكل حاجة حراقه ولا حاجه فالشوق بيطلع صوت عنده لذلك أعتقد غنى البند ده مش حب.

اقتباس :

نحب الليل كثيراً و نحب السهر كثيراً و نحب القمر كثيراً

طبعا دى برضو متنفعش لأن مدحت صالح قال " بحب أسهر للصبح وعمرى ما اروح بدرى
مخلوق رافض للنصح والعمر بقيسه بسهرى" يعنى الراجل بيقيس مش بيحب خالص والقمر
بيبقى جميل لما يكتمل ودى مره فى الشهر يعنى أحب يوم كل شهر على أساس انه قبض يعنى
برضو مينغعش وأوبجكشن.

اقتباس :

يصبح للورد أهمية أكبر و يصبح للبريد أهمية أكبر و يصبح للهاتف أهمية أكبر

حكاية البريد طبعا الجوابات خلصت زمان ومفيش غير جوابات حراجى القط اللى فاضله
وأيام زمان كان الكلام بيتكتب على جلد حيوانات وكانت بتبقى الريحه مش اللى هيا بمعنى
لو لقيت الأوضه رحيتها وحشه يبقى فى جواب جه بس ده زمان أوووى والموبايل عن ذات نفسى
مش بمسكه غير عشان أرد على حد أو اكلم حد أى نعم كان وسيله زمان لسماع صوت
حد معين بس مش مهم للدرجه يعنى لأن المقابله أفضل بكتير عشان تبقى عين وودن مش ودن وبس!
والورد جميل من غير حب أو بحب عادى برضو!!
يبقى لسه برضو مجبناش السبب نشوف الباقى...

اقتباس :

نفهم الحياة أكثر ، نفهم أنفسنا أكثر و نفهم الآخرين أكثر

نمنح بلا حدود و نحلم بلا حدود و نشتاق بلا حدود

تصبح لدينا هوايات جديده و إبداعات جديده و اهتمامات جديده

هنا بقى الحياه بتتفهم أكتر وأنفسنا والآخرين والعالم والناس لم تتظلم فى حبك أو يظهرلك
حد على حقيقته دى بقى اللى هتبقى جامده جدا وهتتعلم منها أووى أنما طول ما أنت بتحب
هتبقى فى حالة من الغشاوه ومش هتشوف أى عيب أو هتتعلم حاجه لأن مفيش مشاكل
أو عقبات أنما مع بداية المشاكل والعقبات وكلمة هيا دى الدنيا هتعرف كل حاجه.

نمنح بلا حدود دى بالذات كانت الأم تريزا بتلف العالم كله عشان الأطفال والفقرا والمساكين
طبعا ونماذج كتير من فاعلى الخير من اجل الخير والشوق ده حاجه زى الغريزه ممكن تبقى
فى كل حاجه يعنى مشتاق للوطن ومشتاقين يااااه لبلاد الدهب"دى أغنيه برضو"!!

الهويات والإبداعات قى دول بيبقوا قاعدين من زمان
وحب إيه ده اللى هيعلمك هوايات وإبداعات إلا إذا كنت بتمتلك الموهبه نفسها ولا هتصحى
الصبح هتبقى طبل العالم فى التنس ولا فى الكوره مثلا ولا هتمشى على الحيط!!
والأهتمامات هتبقى بالحاجات اللى بتلفت نظر المحبوب وبسسس يعنى بتحاول تستعرض مثلا
نوع من مراحل الطاوووس ودى مش إهتمامات ده إستعراض عضلات ولفت نظر وبس.

معلش لسه شويه نشوف الباقى

اقتباس :

نغير عاداتنا السيئة و نغيّر و نغيّر

نختار عطورنا بدقة

ننتقي ملابسنا بعناية و نطيل الوقوف أمام المرآة

تتغير أصواتنا و تتغير أذواقنا و تتغير أحلامنا

نفرح بلا سبب و نبكي بلا سبب و نحزن بلا سبب

بخصوص العادات السيئه فالسجاير خير دليل وبرهان والمعسل برضو
ممكن تحب وبتاع وتستمر بالدخان أو تزود يعنى بيساعد على تدمير الصحه
بالإضافه إلى التغيير دى بتبقى صعبه شويه لأن الطبع بيغلب التطبع مهما حصل.

وإختيار العطور بيبقى عادى برضو ممكن حد بيكون ذوق فى العطر بتاعه عادى يعنى
ومستحيل هحب حد مثلا عشان ريحته حلوه أو أكرهه عشان ريحته وحشه وبرضو
عشان مفيش حاجه بدووم.

ولبس إيه ده اللى يخلينى أحب حد؟!!!!
يعنى كل ما يكون قليل مثلا أحب أكتر ولا كل ما يكون كتير ولا إستايل معين!!
طبعا مستحيل أحب عشان لبس لأن ساعات بيبقى فيه شوال وجواه دهب وساعات
فيه علبه جميله بيبقى جواها زباله" آسف فى اللفظ".


والصوت مبيتغيرش إلا لو أتزكمت ولو حاجه غير كده يبقى أنت مش على طبيعتك يا ريس
وأنا بكره المغشوش وبحب الطبيعى لأنه بيكسب دايما والحلم والهدف برضو مبيتغيروش
لأنك نفسك تطلع مهندس مثلا لو جه الجن الأزرق مش هتخش خدمه إجتماعيه ولا إيييه!!

والفرح بلا سبب والحزن بلا سبب والكلام ده يعتبر جنان مش حب والواحد يروح لطبيب نفسانى
لأنى مستحيل أضحك وأبكى فى وقت واحد إلا إذا كنت شاذ عن البشر أو خارق للعاده.

وباقى الكلام يعتبر هوه هوه برضو

معلش رأيى ممكن يكون غلط وممكن يكون صح بس ده رأيى ومينفعش ميتقالش لأن فيه حريات
برضو فى البلد لذلك أحب أقول إنى الحب ليه تعريف جميل خالص وهو
إن كل شخص ليه حد بيكمله فى الدنيا دى بس فين الشخص ده الله أعلم بقى وخللى بالك
أوعى تتغير عشان حد لأنك بعد مهتتجوز هترجع لما مضى وممكن أكتر من كده لأنك أتغيرت
عشان تعجب أو عشان ترضى حد أو عشان هدف معين توصله إنما لو عاوز تتغير يبقى
من جواك أنت بس والطرف التانى برضو كل واحد بدماغه دون نقصان وزياده عشان
الحب ده يستمر ويبقى أروع ما يكون.

والله الموفق