يا عم سيبك م الكلام ... " شعر عامي "

>>>>>>>>>>

يا عم سيبك م الكلام

يا عم سيبك م الكلام ......... أصل الكلام بيجيب كلام

وان جيت تقول فين العمل .. حيقولوا إنك لسه خـــــام

حواديت كتير تاخـُد ساعات ..... بعديها كل الناس تِنام

إنتاجنا فين ونعيش مِنين ....... نشرب كلام نسكر تمــام

مشاكِلنا ليها حلول كِتير .......... أولها نبدء بالعَـــلام

وتانيها نزرع أكلِنــــــا ....... تالِتها تصدير كل عام

ورابـِعها ميِّة نهرنــــا .... نِحميها مِن صرف السُخام

في العِّد حتطوُل قعدِتي ...... ويقولوا ف الآخر مُــلام

نِطرح حلول زي الدهب ..... أغلبها مِن حِلم ف منام

تِطلع لِجان ..تِرجع لِجان ... آخرتها تقرير والسلام

واللجنه تِسأل بعدهــــا ....... هيَ المُكافأه تبقى كام !

لا فتحنا منجم للدهـب ...... ولا حتى محجر للرُخام

كلـُّه فكاكه وفهلـــــوه ...... ونفاق بشيء م الاحترام

وف ندوه مِن جامعة كذا ..... مِترتِبه وآخِر نِظــــــام

ويقول رئيسها ع الهوا ....... ولحد ما يشـِّد اللجــــام

وتكون دي كِلمة حضرته ... ويـَّا الخـُلاصه بالابتِسام

وتسقف الناس كلها ......... ويكون كِدا مِسك الخِتــام

نضرب له كام مليون سلام .. ونروح ننام آخِر تمـام

حكتِب يا ناس مِن حُرقِتي وبدون زعَل وبدون خِصام

دا بلدنا راح تِفضل كِده .......... تِرجع ورا مش للأمام

**********

» نزاع "شعر عامي".
» موجة بحر .. " شعر عامي "
» الاتوبيس " شعر عامي "
» حوار المطورين _ """" شارك """ لغات البرمجة """ برأيك "" _ دعوة الى مبرمجى المنتدى
» ّّّّّ::::كل /::سنة:::وانتي:::طيبة""""يا """"Eng_amenreds""""