تسونامي الرغيف

تسونامي الرغيف
متنامي ومخيف
والمصحف الشريف
قال حصل في مصر
فرعون ، كان عنده قصر
وجنود مالهمش حصر
وهامان و الساحرين
و الكهنة التابعين
له خروا ساجدين
يزوقوا الكلام
ويحللوا الحرام
ويسموه السلام
مايقولوا غير آمين
و الشعب كان سجين
لكن مش مستكين
حـَشَرت الناس ضحى
يدوروا الرحى
والفرن ملفحة
في طابور ماينتهيش
من أسوان للعريش
وقرص الشمس عيش
بيشوفه اللي اشتهى
لكن انت شوفتها
تاجك للمنتهى
وتورثه كمان
والنهر و الغيطان
والشباك و البيبان
والحلم اللي اتسرق
بس البحر اتفلق
مابقاش الا الغرق
علشان رغيف بسوسَه
مش محتاج فعل موسى
بكره نزف العروسة
بسنبلة وطحين
ونخبز العجين
على نار المحرومين
وانت تقول يالطيف
تسونامي الرغيف
متنامي ومخيف

قصيدة جميلة جداً ومعبرة عن الواقع الأليم

ربنا يصلح الحال
وحسبنا الله ونعم الوكيل

شكراً بشمهندس جودزيلا

قصيده جميلة ولكن نحتاج فقط لقصائد لنشكي مايصيبنا وانما نحتاج لمعلقات نعلقها على جدران المعابد لعلها تبعد عنا اللعنه

اشكرك